«Итаәт етмәк гурбандан... даһа јахшыдыр»

ГӘДИМ Исраилин илк падшаһынын ады Шаул иди. Ону бу вәзифәјә һәгиги Аллаһ тәјин етмишди, анҹаг сонрадан Шаул Онун сөзүндән чыхды.

Шаул һансы сәһвләрә јол верди? Бу сәһвләрдән гачмаг мүмкүн идими? Онун нүмунәсиндән биз һансы ибрәт дәрси ҝөтүрә биләрик?

Јеһова падшаһ тәјин едир

Шамуел Исраилдә Аллаһын тәмсилчиси вә пејғәмбәри кими хидмәт едирди. Шаул һәлә падшаһ тәјин олунмамышды. Шамуел артыг гоҹалмышды, оғуллары исә онун јолу илә ҝетмирдиләр. Һәмин әрәфәдә дүшмәнләр Исраил халгыны һәдәләјирдиләр. Бир ҝүн Исраил ағсаггаллары Шамуелин јанына ҝәлиб онларын үзәринә падшаһ тәјин етмәләрини хаһиш етдиләр. Онлар истәјирдиләр ки, падшаһ онлара һөкмранлыг етсин вә дөјүшләрдә онлара рәһбәр олсун. Јеһова Шамуелә Шаулу мәсһ етмәји әмр етди вә: «Филиштлиләрин әлиндән халгымы о гуртараҹаг», — деди (1 Шам. 8:4—7, 20; 9:16).

Шаул «ҝәнҹ, јарашыглы» оғлан иди. Амма хариҹи ҝөрүнүш ону фәргләндирән јеҝанә ҹәһәт дејилди. О һәм дә тәвазөкар иди. Буну Шамуелә дедији сөзләрдән ҝөрмәк олар: «Мән Исраил гәбиләләринин ән кичији олан Бинјаминдән дејиләмми? Нәслим исә Бинјамин гәбиләсинин нәсилләринин ән кичији дејилми? Ахы нә үчүн мәнә белә сөз сөјләјирсиниз?» Шаулун атасы Гиш [Киш] «чох варлы адам» (ЈД) олса да, Шаул өзү вә аиләси барәдә јүксәк фикирдә дејилди (1 Шам. 9:1, 2, 21).

Шамуел Јеһованын сечдији падшаһы елан едәндә ҝөрәк Шаул неҹә давранды. Шамуел Шаулу тәкликдә мәсһ едәркән она демишди: «Вәзијјәтә ујғун һәрәкәт ет, чүнки Аллаһ сәнинләдир». Бундан сонра пејғәмбәр Јеһованын сечимини елан етмәк үчүн халгы бир јерә јығды. Лакин Шаулун падшаһ олдуғу бәлли оланда ону һеч јердә тапа билмирдиләр. Шаул утанҹаг олдуғундан гачыб ҝизләнмишди. Јеһова Шаулун һарада олдуғуну ҝөстәрди вә о, падшаһ елан олунду (1 Шам. 10:7, 20—24).

Дөјүшдә

Гыса бир заманда Шаул онун габилијјәтинә шүбһә едәнләрә јанылдыгларыны ҝөстәрди. Аммонлулар Исраилин Јавеш-Ҝилеад шәһәрини зәбт етмәк истәјәндә «Аллаһын Руһу Шаулун үстүнә гүввә илә енди». О, гәтијјәтлә халгын бүтүн ҹәнҝавәрләрини бир араја јығыб онлары гәләбәјә доғру апарды. Анҹаг Шаул бу зәфәрин Јеһовадан олдуғуну етираф етди: «Рәбб бу ҝүн Исраилә гуртулуш верди» (1 Шам. 11:1—13).

Шаулда јахшы хүсусијјәтләр вар иди вә Аллаһын хејир-дуасы онун үзәриндә иди. О, Јеһованын һакимијјәтини гәбул едирди. Исраиллиләрин вә онларын падшаһынын мүвәффәгијјәт газанмалары чох ваҹиб бир амилдән асылы иди. Шамуел Исраил халгына деди: «Әҝәр Рәбдән горхуб Она гуллуг едәрәк сәсинә гулаг ассаныз, әмринә гаршы чыхмасаныз, һәм сизә һөкмранлыг едән падшаһыныз, һәм дә сиз Аллаһыныз Рәббин ардынҹа ҝедәҹәксиниз». Јеһоваја садиг галдыглары тәгдирдә онлар нәјә үмид едә биләрдиләр? Шамуел деди: «Рәбб халгыны Өз бөјүк исми наминә атмајаҹаг, она ҝөрә ки сизи Өз халгы етмәк Рәббин хошуна ҝәлмишди» (1 Шам. 12:14, 22).

Бу ҝүн олдуғу кими, гәдим дөврләрдә дә итаәткарлыг Јеһованын рәғбәтини газанмаг үчүн ваҹиб амилләрдән бири иди. Јеһованын хидмәтчиләри Онун әмрләринә риајәт едәндә Јеһова онлары хејир-дуаландырыр. Бәс итаәтсизлик ҝөстәрәндә неҹә?

«Ағылсызлыг етдин»

Шаулун филиштлиләрлә нөвбәти дөјүшүндән сонра филиштлиләр исраиллиләрлә вурушмаг үчүн чох бөјүк орду топладылар. «Дәниздәки гум дәнәләринин сајы гәдәр ҹамаат» Шаула гаршы чыхды. «Исраиллиләр тәһлүкә гаршысында олдугларыны ҝөрдүләр, чүнки халг сыхышдырылды, халг мағараларда, коллугларда, гајаларда, мәгбәрәләрдә вә ноһурларда ҝизләнди» (1 Шам. 13:5, 6). Шаул нә етди?

Бундан әввәл Шамуел Шаула тапшырмышды ки, ону Гилгалда ҝөзләсин. Чүнки Шамуел ора ҝәлиб Аллаһа гурбан ҝәтирәҹәкди. Шаул Шамуели ҝөзләди, анҹаг о ҝеҹикирди вә Шаулун ордусу дағылмаға башлады. Буна ҝөрә дә Шаул гурбан ҝәтирмәк ишини өз үзәринә ҝөтүрдү. О, гурбаны тәгдим едиб гуртаранда Шамуел ҝәлиб чыхды. Шаул нәјә ҝөрә белә даврандығыны изаһ едәндән сонра Шамуел деди: «Ағылсызлыг етдин, Аллаһын Рәббин сәнә вердији әмрә әмәл етмәдин. Белә олмасајды, Рәбб Исраил үзәриндә сәнин падшаһлығыны әбәди сахлајаҹагды. Лакин инди падшаһлығын давам етмәјәҹәк. Рәбб Өзү үчүн Өз үрәјинә јатан бир адам тапыб. Һәмин адамы Рәбб халгына башчы тәјин етди. Чүнки сән Рәббин вердији әмрләрә әмәл етмәдин» (1 Шам. 10:8; 13:8, 13, 14).

Шаул, Аллаһын әмринә әсасән Шамуелин ҝәлиб гурбан ҝәтирмәсини ҝөзләмәли иди. Лакин Шаулун өзүнә архаланыб Аллаһын сөзүндән чыхмасы онун иманынын олмамасыны үзә чыхарды. Шаул вахтилә Исраил ордусуна башчылыг едән Ҝидеондан неҹә дә фәргләнирди! Јеһова она әмр етмишди ки, дөјүшчүләрин сајыны 32 000-дән 300-дәк ендирсин. Ҝидеон Аллаһын бир сөзүнү ики етмәди. Нәјә ҝөрә? Чүнки о, Јеһоваја инанырды. Аллаһын көмәјилә Ҝидеон 135 000 нәфәрдән ибарәт олан дүшмән ордусуну тамамилә дармадағын етди (Һак. 7:1—7, 17—22; 8:10). Јеһова Шаула да көмәк едәҹәкди. Лакин Шаул итаәтсизлик ҝөстәрдији үчүн филиштлиләр Исраили гарәт етдиләр (1 Шам. 13:17, 18).

Бәс биз дара дүшәндә гәрарлары неҹә веририк? Иманлары олмајан инсанлара елә ҝәлә биләр ки, Аллаһын принсипләринә мәһәл гојмамагда пис бир шеј јохдур. Елә Шаул да Шамуелин ҝеҹикдијини ҝөрәндә, јәгин, фикирләшди ки, гурбаны өзүнүн ҝәтирмәси дүзҝүн оларды. Аллаһын рәғбәтини газанмагда гәти гәрарлы оланлар үчүн исә гәрар гәбул едәркән јеҝанә дүзҝүн јол мүвафиг Мүгәддәс Китаб принсипләринә риајәт етмәкдир.

Јеһова Шаулу рәдд едир

Амалеглиләрлә дөјүш заманы Шаул даһа бир ҹидди сәһвә јол верди. Јеһова амалеглиләри мүһакимә етмишди, чүнки исраиллиләр Мисирдән чыхан заман онлар һеч бир сәбәб олмадан исраиллиләрә һүҹум етмишдиләр (Чых. 17:8; Ганун. т. 25:17, 18). Онлар һакимләрин дөврүндә дә башга халгларла әлбир олараг Аллаһын сечилмиш халгына һүҹум етмишдиләр (Һак. 3:12, 13; 6:1—3, 33). Буна ҝөрә дә Јеһова амалеглиләри мәсулијјәтә ҹәлб етди вә Шаула әмр етди ки, онлары гылынҹдан кечирсин (1 Шам. 15:1—3).

Исраилә дүшмән кәсилмиш амалеглиләри вә онларын мал-мүлкүнү Аллаһын әмр етдији кими мәһв етмәк әвәзинә, Шаул онларын падшаһыны әсир ҝөтүрдү вә ән јахшы һејванларыны сахлады. Шамуел Шаулдан изаһат истәјәндә о, нә етди? Мәсулијјәти өз бојнундан атмаға чалышды: «Халг... Рәббә гурбан етмәк үчүн гојунларла өкүзләрин ән јахшыларыны сахлајыб». Шаул бу һејванлары Јеһоваја гурбан ҝәтирмәк нијјәтиндә олса да, олмаса да, онун бу һәрәкәти Јеһоваја гаршы итаәтсизлик иди. Шаул артыг «өз ҝөзүндә кичик» дејилди. Аллаһын пејғәмбәри Шаула итаәтсизлик ҝөстәрдијини деди: «Рәбб Өз сөзүнә итаәт едилмәсиндән хошу ҝәлдији гәдәр јандырма гурбаны вә башга гурбанлардан хошу ҝәләрми? Бах итаәт етмәк гурбандан... даһа јахшыдыр... Инди ки сән Рәббин сөзүнү рәдд етдин, О да сәни падшаһлыгдан рәдд етди» (1 Шам. 15:15, 17, 22, 23).

Јеһова Шаулу Өз мүгәддәс руһундан вә хејир-дуаларындан мәһрум едәндә «шәр бир руһ» Исраилин илк падшаһына әзаб вермәјә башлады. Шаул Давуддан — Јеһованын ҝәләҹәкдә падшаһлығы верәҹәји инсандан шүбһәләнир вә она пахыллыг едирди. Шаул һәтта бир нечә дәфә Давуду өлдүрмәјә ҹәһд ҝөстәрмишди. Мүгәддәс Китабда дејилир ки, «Шаул Рәббин Давудла олдуғуну ҝөрүб... өмрүнүн сонуна гәдәр она дүшмән олду». Шаул Давудун изинә дүшүб ону тутмаг истәјирди вә һәтта буна ҝөрә Аллаһын 85 каһинини өлдүрдү. Тәәҹҹүблү дејил ки, Јеһова Шаулу тәрк етмишди (1 Шам. 16:14; 18:11, 25, 28, 29; 19:10, 11; 20:32, 33; 22:16—19).

Филиштлиләр нөвбәти дәфә исраиллиләрә һүҹум етмәјә һазырлашанда Шаул чарәсизликдән ҹадуҝәрә үз тутду. Ертәси ҝүн дөјүшдә өлүмҹүл јараландыгдан сонра о, өзүнә гәсд етди (1 Шам. 28:4—8; 31:3, 4). Исраилин илк итаәтсиз падшаһы һаггында Мүгәддәс Китабда дејилир: «Беләҹә Шаул Рәббә гаршы хаинлик етдији үчүн өлдү. О, Рәббин сөзүнә әмәл етмәјиб ҹиндара мүраҹиәт етди, амма Рәбдән мәсләһәт истәмәди» (1 Салн. 10:13, 14).

Шаулун пис нүмунәси ајдын шәкилдә ҝөстәрир ки, Јеһоваја итаәт етмәк истәнилән гурбандан даһа јахшыдыр. Һәвари Јәһја јазыб: «Аллаһы севмәк Онун әмрләринә риајәт етмәк демәкдир, Онун әмрләри исә ағыр дејил» (1 Јәһ. 5:3). Ҝәлин ваҹиб бир һәгигәти — Аллаһла мөһкәм достлуғун бизим Она итаәткар олмағымыздан асылы олдуғуну һеч вахт унутмајаг!

[21-ҹи сәһифәдәки шәкил]

Шаул Исраилин падшаһы тәјин олунанда тәвазөкар иди

[23-ҹү сәһифәдәки шәкил]

Нәјә ҝөрә Шамуел Шаула деди ки, «итаәт етмәк гурбандан... даһа јахшыдыр»?