Иман јахшы ишләрә тәшвиг едир
1 Иман Нуһу, Мусаны вә Раһавы фәалијјәтә тәшвиг едирди. Нуһ ҝәми тикди. Муса, фир’онун сарајында әлдә едәҹәји мүвәггәти мәнфәәтдән имтина етди. Раһав кәшвијјатчылары ҝизләтди, сонра исә онларын ҝөстәришинә риајәт едиб, аиләсини хилас етди (Ибр. 11:7, 24-26, 31). Иман бу ҝүн бизи һансы јахшы ишләрә тәшвиг едир?
2 Шәһадәтлик етмәк. Иман бизи, ҝөзәл Аллаһымыз вә Онун әбәди ҝәләҹәјимиз үчүн етдији ишләр барәдә данышмаға тәшвиг едир (2 Кор. 4:13). Хош хәбәри башгалары илә бөлүшмәјә чәкиндијимиз анлар да олур. Лакин Јеһованы “даима өнүмүзә” гојарыгса, бу, бизи мөһкәмләдәҹәк вә горху һиссимиз чәкиләҹәк (Мәз. 16:8). О заман иманымыз бизи, һәр имкан јарананда гоһумларымыза, гоншуларымыза, иш јолдашларымыза, мәктәб достларымыза вә һамыја шәһадәтлик етмәјә тәшвиг едәҹәкдир (Ром. 1:14-16).
3 Мүштәрәк ҝөрүшләр. Јығынҹаг ҝөрүшләринә мүнтәзәм олараг ҝәлмәк, иманын тәшвиг етдији јахшы ишләрдән биридир. Нәјә ҝөрә? Она ҝөрә ки, ҝөрүшләрә ҝәлмәјимиз, Аллаһын мүгәддәс руһу васитәсилә Иса Мәсиһин бу ҝөрүшләрдә иштирак етдијинә әмин олдуғумузу ҝөстәрир (Мат. 18:20). Бу давранышымыз “Руһун ҹәмијјәтләрә [“јығынҹаглара”, ЈД] нә дедијини” ешитмәк арзумузу ашкар едир (Вәһј 3:6). Ешитдијимиз нәсиһәтләрә диггәт јетиририк, чүнки иманын ҝөзләри илә Даһи Тә’лиматчымыз Јеһованын бизи өјрәтдијини ҝөрүрүк (Иш. 30:20, ЈД).
4 Гәбул етдијимиз гәрарлар. Ҝөрүнмәјән шејләрә дәрин иман, һәјатымызда башлыҹа јери руһани ишләрә ајырмаға тәшвиг едир (Ибр. 11:1). Бу, чох вахт мадди гурбанлары нәзәрдә тутур. Мәсәлән, бир ағсаггал јүксәкмәваҹибли ишдән имтина етди. Чүнки бу ишә ҝөрә о, јығынҹаглардан галмалы, аиләсиндән узагда јашамалы вә пионер хидмәтини дајандырмалы иди. Ҝәлин, биз дә бүтүн үрәјимизлә Мүгәддәс Китабын вә’динә иман едәк ки, Јеһова “әввәлҹә Онун Падшаһлығыны вә Онун салеһлијини” ахтаран кәсләри лазым олан һәр шејлә тә’мин едәҹәкдир (Мат. 6:33, И-93).
5 Иманын һәјатымыза ҝөстәрдији ҝүҹлү тә’сир башгаларынын нәзәриндән јајынмајаҹаг. Иманымыз бүтүн дүнјада бәллидир (Ром. 1:8). Буна ҝөрә дә, ҝәлин, иманымызын дири олдуғуну јахшы ишләримизлә ҝөстәрәк (Јаг. 2:26).