Хидмәти Тәкмилләшдирмә Мәктәби фәалијјәт үчүн “ҝениш гапы” ачыр
1 Јеремја пејғәмбәрин васитәсилә Јеһова габагҹадан демишдир: “[Халгымын үзәринә] онлары ҝүдәҹәк чобанлар гојаҹағам; вә артыг горхмајаҹаглар вә әсмәҹәјә дүшмәјәҹәкләр вә әксилмәјәҹәкләр” (Јер. 23:4). Бу ҝүн он минләрлә ағсаггаллар бүтүн милләтләрдән олан инсанларын арасында бу ҹүр чобанлыг ишини иҹра едирләр. Бундан әлавә, шеһә бәнзәр чохсајлы ҝәнҹләр Јеһоваја һәвәслә хидмәт едирләр (Мәз. 110:3). Јеһованын халгынын јығынҹаглары үчүн бу тәвазөкар гардашлар әсл хејир-дуадырлар! Руһани бичин давам едир, буна ҝөрә гардашларына хидмәт етмәјә һазыр олан тәҹрүбәли кишиләрә еһтијаҹ һәлә дә чохдур.
2 Субај ағсаггал вә хидмәти көмәкчиләр Хидмәти Тәкмилләшдирмә Мәктәбиндә ҝөзәл тә’лим алырлар. Бу исә онлара үзәрләринә даһа чох мәс’улијјәт ҝөтүрмәјә көмәк едир. Мәктәбин тә’сис едилдији 1987-ҹи илдән бәри 999 синифдә тәхминән 140 өлкәдән олан 22 000-дән артыг тәләбә тә’лим алмышдыр. Мәктәбин сајәсиндә бу гардашлар үчүн “бөјүк вә фәалијјәт үчүн ҝениш гапы” ачылмышдыр (1 Кор. 16:9).
3 Мәктәбин мәгсәди. Хидмәти Тәкмилләшдирмә Мәктәби тәшкилатын тәләбатларындан асылы олараг мүхтәлиф мәсәләләри һәлл етмәк үчүн тәләбләрә мүвафиг олан гардашлар һазырлајыр. Мәктәбдә онлар тәблиғ фәалијјәтинә даһа јахшы рәһбәрлик етмәји, чобанлыг ишини ҝөрмәји вә јығынҹагда өјрәтмәји өјрәнирләр. Бурахылышдан сонра тәләбәләрин бә’зиләрини өз өлкәләринә, ја да хариҹи өлкәләрә хүсуси пионер вә ја сәјјаһ нәзарәтчи тә’јин едирләр. Диҝәрләрини өз јығынҹагларына, ја да филиалын табелијиндә олан вә онларын көмәји тәләб олунан әразиләрә тә’јин едирләр.
4 Сәккиз һәфтәлик курс мүддәтиндә тәләбәләр Мүгәддәс Китабы дәриндән өјрәнирләр. Тә’лим курсу бир чох Мүгәддәс Китаб тә’лимләрини, чобанлыг вәзифәсини вә мәсиһчи һәјатындакы проблемләри һәлл етмәкдә көмәк едән принсипләри әһатә едир. Онлар һәмчинин Мүгәддәс Јазыларда теократик рәһбәрлијә, һүгуги вә тәшкилати мәсәләләрә даир нә дејилдијини тәдгиг едирләр. Онлар ачыг мә’рузәләрлә чыхыш етмәк үчүн хүсуси тә’лим алыр вә руһани инкишафларынын сүр’әтини артырмаг үчүн онларын һәр биринә шәхси көмәк ҝөстәрилир.
5 Тәләыбләр. Әлбәттә, Хидмәти Тәкмилләшдирмә Мәктәбиндә охумаг истәјән намизәдләрә гаршы тәләбләр јүксәкдир. Намизәд фасиләсиз ән азы ики ил ағсаггал вә ја хидмәти көмәкчи кими хидмәт етмиш олмалыдыр. О, субај вә јашы исә 23-дән 50-дәк олмалыдыр. Намизәд мәктәб кечирилән дилдә сәлис охумағы, јазмағы вә данышмағы баҹармалыдыр. Онун сәһһәти јахшы олмалы вә хүсуси гајғыја вә ја гидаја еһтијаҹы олмамалыдыр. Үстүнлүк пионерләрә верилир.
6 Мәктәбдә охумаг истәјәнләр көмәк тәләб олунан јердә хидмәт етмәјә һазыр вә габилијјәтли олмалыдырлар. Бунун үчүн Ишаја пејғәмбәрдәки руһу әкс етдирмәк тәләб олунур. О, өзүнү хүсуси бир тапшырығы јеринә јетирмәк үчүн тәгдим етмишдир: “Будур, мән, мәни ҝөндәр” (Иш. 6:8). Ишаја һәмчинин бүтүн һәјаты боју тәвазөкарлыг тәзаһүр етдирирди. Хидмәти Тәкмилләшдирмә Мәктәбинә әризә јазан кәсләрин мәгсәди јүксәк мөвгејә саһиб олмаг јох, гардашларына мәһәббәт ҝөстәрмәк вә хидмәт етмәк арзусу олмалыдыр. Мәктәб мә’зунларындан ҝөзләнилир ки, онлар өјрәндикләрини башгаларынын фајдасы үчүн тәтбиг етсинләр (Лука 12:48).
7 Мәктәбдә әлдә олунан фајдалар. Тәләбәләр сәккиз һәфтә әрзиндә кечирилән сәмәрәли өјрәнмә заманы ‘иманын вә... јахшы тә’лиматын сөзләри илә бәсләнирләр’ (1 Тим. 4:6). Тә’јин олундуглары јығынҹагларда вә рајонларда тәблиғчиләрә көмәк етмәк вә онлары руһландырмаг үчүн онлар јахшы һазырлыг алырлар. Хидмәти Тәкмилләшдирмә Мәктәбини битирән тәләбәләрин тә’јин олундуглары бир чох јерләрдә тәблиғ фәалијјәти ҝенишләнмишдир; пионерләрин сајы, хүсусилә дә ҹаванлар арасында артмышдыр; вә Аллаһын халгына тәзәликҹә гошулан инсанлара даһа чох шәхси мараг ҝөстәрилмәјә башланылмышдыр.
8 Сән субај вә 23-дән 50-дәк јашы олан ағсаггал вә ја хидмәти көмәкчисәнми? Онда нәјә ҝөрә Хидмәти Тәкмилләшдирмә Мәктәбинә әризә тәгдим етмәјәсән? Сән бир ҝәнҹ гардаш кими Јеһоваја хидмәт етмәк үчүн узунмүддәтли планлар гурурсанмы? Нәјә ҝөрә манеәсиз олан садә һәјат сүрмәјә чалышмајасан? О заман сәнин гаршында “бөјүк вә фәалијјәт үчүн ҝениш гапы” ачылаҹагдыр. Бу сәнә бөјүк севинҹ вә мәмнунлуг бәхш едәҹәк. Хидмәти Тәкмилләшдирмә Мәктәби тәк онун мә’зунлары үчүн јох, бүтүн дүнјада Аллаһын халгынын јығынҹаглары үчүн дә хејир-дуадыр.
[3 сәһифәдәки чәрчивә]
Тә’лимдән әлдә етдикләри фајдалар
“Мән Мәктәбдә Мүгәддәс Јазылары истифадә етмәји өјрәнмишәм, бу исә доғрудан да хидмәтими вә сүрүјә һикмәтлә гајғы ҝөстәрмәк баҹарығымы јахшылашдырды”.
“Мәктәбдән сонра јығынҹагдакы вәзифәләрими јеринә јетирәркән өзүмү даһа архајын һисс едирәм”.
“Демәк олар ки, Мәктәб мәним бүтүн һәјатымы, о ҹүмләдән теократијаја вә Аллаһын тәшкилатына олан мүнасибәтими дә дәјишди”.
“Мәктәб мәнә, тәләбат олан јерләрдә хидмәт етмәјә һазыр олмаг руһуну тәзаһүр етдирмәји өјрәтди”.