Инсанларла мүлаһизә јүрүтмәк мәһарәтини инкишаф етдир
1. Биз Мүгәддәс Китабдан һансы парчаны нәзәрдән кечирәҹәјик вә нәјә ҝөрә?
1 Һәвариләрин ишләри 13:16-41 ајәләриндә јазылыб ки, Павел Писидијанын Антакја шәһәриндәки синагогда мүлаһизә јүрүдүрдү. О, мүлаһизә јүрүтмәк тәрзи илә бизә ҝөзәл нүмунә гојду. Павел динләјиҹиләринин мәншәјини, дүшүнҹә тәрзини нәзәрә алыр вә хош хәбәри онлара ујғун шәкилдә тәгдим едирди. Мүгәддәс Китабын бу парчасыны нәзәрдән кечирәркән, ҝәлин алдығымыз дәрсләри тәблиғдә неҹә тәтбиг едә биләҹәјимиз һагда дүшүнәк.
2. Павелин сөһбәти неҹә башламасындан нә өјрәнирик?
2 Сөһбәти гурмаг үчүн үмуми тәмәл ахтарын. Павел, әсасән, Иса Мәсиһин Аллаһын нијјәтләриндәки ролу һагда тәблиғ етсә дә, сөһбәтини бунунла башламады. О, динләјиҹиләринин чохунун јәһуди олдуғуна диггәт јетирди. Буна ҝөрә дә сөһбәтини ибрани халгынын онлара таныш олан тарихи илә башлады (Һәв. иш. 13:16-22). Сөзләримизин инсанларын үрәјинә јол тапмасыны истәјириксә, биз дә үмуми тәмәл ахтармалыјыг. Бунун үчүн инсанлары өз фикирләрини бөлүшмәјә тәшвиг етмәлијик. Буну нәзакәтлә суаллар вермәклә вә һәмсөһбәтимизи динләмәклә едә биләрик.
3. Павелин динләјиҹиләринә Исаны Мәсиһ кими гәбул етмәкдә нә әнҝәл төрәдирди?
3 Павел ибраниләрин тарихи һагда данышанда онлара хатырлатды ки, Аллаһ Давудун нәслиндән бир Хиласкар төрәтмәк нијјәтиндәдир. Лакин бир чох ибраниләр онлары ромалылардан азад едәҹәк вә Јәһуда халгыны диҝәр халгларын үзәриндә јүксәлдәҹәк бир гәһрәман ҝөзләјирдиләр. Шүбһәсиз ки, онлар Исанын јәһуди дин рәһбәрләри тәрәфиндән инкар олундуғуну, ромалыларын әлинә верилдијини вә өлдүрүлдүјүнү билирдиләр. Бәс Павел мәһз һәмин адамын вә’д олунмуш Мәсиһ олдуғуна онлары неҹә әмин едә биләрди?
4. Павел өз динләјиҹиләри илә мәһарәтлә неҹә мүлаһизә јүрүдүрдү?
4 Тәгдимәни вәзијјәтә ујғунлашдыр. Павел динләјиҹиләринин дүшүнҹә тәрзини вә онларын нәји гәбул едиб-етмәдикләрини билирди. Бунлары нәзәрә алараг вә Мүгәддәс Јазылардан истифадә едәрәк Павел онларла мүлаһизә јүрүдүрдү. Мәсәлән, Павел Иса Мәсиһин Давудун нәслиндән олдуғуну вә буну Вәфтизчи Јәһјанын да тәсдиг етдијини хатырлатды, чүнки о, һамынын Јәһјаны Аллаһын пејғәмбәри кими гәбул етдијини билирди (Һәв. иш. 13:23-25). Павел һәмчинин гејд етди ки, дин рәһбәрләри Исаны инкар едиб өлүмә мәһкум етмәклә «пејғәмбәрләрин... сөзләрини јеринә јетирдиләр» (Һәв. иш. 13:26-28). Сөзүнү давам едәрәк о, изаһ етди ки, бир чох инсанлар Исанын дирилмәсинин шаһиди олмушдур. Јәһудиләр Мәсиһин дирилмәсинә аид олан пејғәмбәрликләрлә таныш идиләр вә Павел она гулаг асан јәһудиләрин диггәтини мәһз бу пејғәмбәрликләрә јөнәлтмишдир (Һәв. иш. 13:29-37).
5. а) Павел јунанлы динләјиҹиләринә үнванладығы нитгини неҹә гурмушду? б) Саһәмиздә тәблиғ едәркән Павелин нүмунәсини неҹә тәглид едә биләрик?
5 Диҝәр тәрәфдән, Павел Афина шәһәриндәки ареопагда јунанлы динләјиҹиләрә үнванладығы нитгини башга ҹүр гурмушду (Һәв. иш. 17:22-31). Бурада да һәмин мүждәни тәгдим едәрәк јахшы нәтиҹәләрә наил ола билди (Һәв. иш. 13:42, 43; 17:34). Бу ҝүн биз дә тәблиғдә үмуми тәмәлин әсасында сөһбәт етмәклә, динләјиҹиләримизин мәншәјини вә дүшүнҹә тәрзини нәзәрә алмагла вә тәгдимәләримизи ујғунлашдырмагла, јахшы нәтиҹәләр әлдә едә биләрик.