Гапы ағзында вә телефон васитәсилә уғурлу Мүгәддәс Китаб өјрәнмәси кечиририк
1. Мүгәддәс Китаб өјрәнмәсини кечирмәкдә мәгсәдимиз нәдир?
1 Мүгәддәс Китаб өјрәнмәсинә башламаг неҹә дә севиндириҹидир! Лакин өјрәнмәјә марағы олан инсаны тапмаг һәлә ишин әввәлидир. Өјрәнмәнин мәгсәди инсана Мәсиһин һәгиги давамчысы олмаға көмәк етмәкдир (Мат. 28:19, 20). Бу мәгсәдә чатмаг үчүн бизә нә көмәк едә биләр?
2. Гапы ағзында вә телефон васитәсилә Мүгәддәс Китаб өјрәнмәси неҹә кечирилир вә онлар нә үчүн еффектлидир?
2 Мәшғул инсанлар. Бу ҝүн инсанлар даһа чох мәшғулдурлар. Бә’зи јерләрдә аз адам әввәлҹәдән Мүгәддәс Китаб өјрәнмәсинә бир саат вахт сәрф етмәк истәјәр. Белә инсанлара көмәк етмәк үчүн гапы ағзында вә ја телефон васитәсилә өјрәнмәјә башламаға вә ону давам етдирмәјә тәшвиг олунмушдуг. Башланғыҹда бу өјрәнмәләр нисбәтән гыса ола биләр вә «Билик» вә бу кими әдәбијјатлардан бир-ики абзас кечмәклә Мүгәддәс Китабын бир нечә ајәси мүзакирә олуна биләр. Бир чох тәблиғчиләрин һазырда гапы ағзында вә ја телефон васитәсилә өјрәнмә апармалары чох тә’рифәлајигдир.
3. Нә үчүн гапы ағзында кечирдијимиз өјрәнмәјә, ҝетдикҹә даһа чох вахт сәрф етмәјә чалышмалыјыг?
3 Бәс Мүгәддәс Китаб өјрәнмәсини һәмишә гапы ағзында кечирмәклә кифајәтләнмәлијикми? Хејр. Бахмајараг ки, илк дәрсдә ев саһибинин вахтыны чох алмамаг јахшы оларды, «Бизим Падшаһлыг Хидмәтимиз»ин 1990-ҹы ил мај сајынын 8-ҹи сәһифәсиндә (инҝ.) белә изаһат вардыр: «Өјрәнмә мүнтәзәм кечириләндә вә ев саһибинин марағы артанда, өјрәнмәјә ҝетдикҹә даһа чох вахт сәрф етмәк олар». Бу чох ваҹибдир. Белә бир нүмунә: аҹлыг чәкән ушаг, иштаһасы бәрпа олунана кими әввәлҹә аз-аз једиздирилир, лакин белә гидаланма узун чәкәрсә, онун ҝүҹүнү там бәрпа етмәсини вә нормал инкишаф етмәсини ҝөзләјә билмәрик. Буна бәнзәр шәкилдә, өјрәнән инсанын Аллаһын јеткин хидмәтчиси олмасы үчүн даһа рәсми шәраитдә вә мүнтәзәм кечирилән өјрәнмәјә еһтијаҹы вардыр (Ибр. 5:13, 14).
4. Мүгәддәс Китаб өјрәнмәсини евдә кечирмәјин һансы мүсбәт ҹәһәтләри вардыр?
4 Мүгәддәс Китаб өјрәнмәсини евдә кечирмәк. Мүгәддәс Китаб өјрәнмәсини сакит јердә — евдә вә ја башга мүнасиб јердә кечирмәк даһа јахшы оларды. Белә шәраит өјрәнмәнин даһа сәмәрәли олмасына вә шаҝирдә Аллаһын Кәламыны јахшы баша дүшмәјә көмәк едәҹәк (Мат. 13:23). Һәмчинин мүәллим үчүн дә, өјрәнилән материалы шаҝирдин тәләбатына ујғунлашдырмаг хејли асанлашаҹаг. Бундан башга, өјрәнмәјә даһа чох вахт ајрылдыгда, Аллаһын Кәламыны даһа әтрафлы мүзакирә етмәк олар, бу да өз нөвбәсиндә өјрәнәнин иманыны мөһкәмләндирәҹәк (Ром. 10:17).
5. Гапы ағзында кечирилән өјрәнмәни евдә кечирмәк үчүн нә етмәк олар?
5 Неҹә едәк ки, гапы ағзында кечирилән өјрәнмәни евдә кечирәк? Нә үчүн садәҹә олараг, бир нечә гыса дәрсдән сонра өјрәнмәни даһа чох вә мүәјјән едилмиш вахт әрзиндә кечирмәји тәклиф етмәјәсән? Јахуд сорушмаг олар: «Бу ҝүн бу материалы отурараг бир јердә мүзакирә етмәјә вахтыныз олармы?» вә ја «Мөвзуну мүзакирә етмәјә бу ҝүн нә гәдәр вахт ајырмаг истәрдиниз?» Әҝәр ҹәһдләрин һеч бир нәтиҹә вермәзсә, онда гыса өјрәнмәни гапы ағзында давам етдирмәк лазымдыр. Өјрәнмәни евдә кечирмәк үчүн мүнасиб вахтда јенидән ҹәһд ҝөстәр.
6. Хидмәтимизин әсас мәгсәди нәдир вә мәгаләдәки мәсләһәтләр бу мәгсәдә наил олмагда бизә неҹә көмәк едә биләр?
6 Лајиг оланлары ахтармаға давам едәрәк, ҝәлин һансы мәгсәдлә Мүгәддәс Китаб өјрәнмәсинә башладығымызы вә давам етдирдијимизи нәзәрдән гачырмајаг. Бизим мәгсәдимиз сәмими гәлбли инсанлара Јеһованын һәср вә вәфтиз олунмуш хидмәтчиси олмаға көмәк етмәкдир. Хидмәтимизи бу мәгсәдлә давам етдирдикҹә, гој Јеһова бизим сә’јимизә хејир-дуа версин (2 Тим. 4:5).