Көмәк етмәјә һәмишә һазыр ол
1 Голјат Исраил алајларыны сөјүрдү. Истәнилән әсҝәр онунла вуруша биләрди, анҹаг дөјүш тәҹрүбәси олмајан ҝәнҹ чобандан башга, һеч кәс ирәли чыхыб, дөјүш мејданына атылмады (1 Шам. 17:32). Сүрҝүндән Јерусәлимә дөнән јәһудиләр диварлары тикмәјә мүвәффәг олмајанда мәһз Фарс падшаһынын сагиси тикинтини бәрпа етмәк үчүн сарајдакы шәрәфли мөвгејини бурахыб Јерусәлимә ҝәлди (Неһ. 2:5). Јеһова, көмәк етмәјә һазыр олдугларына ҝөрә һәм Давуда, һәм дә Неһемјаја хејир-дуа верди (1 Шам. 17:45, 50; Неһ. 6:15, 16).
2 Бу ҝүн инсанлар башгаларына көмәк етмәјә тәшәббүс ҝөстәрмирләр. Инсанларын һәддиндән артыг ҝәрҝин һәјат тәрзи сүрдүјү бу «ахыр ҝүнләрдә» чохлары «худбин» олмушдур (2 Тим. 3:1, 2). Адамын башы өз ишләринә о гәдәр гарыша биләр ки, онда башгаларынын еһтијаҹларына гаршы лагејдлик јарана биләр. Анҹаг бир мәсиһчи кими, биз Исанын изләри илә ҝетмәк истәјирик. О өзү тәшәббүс ҝөстәриб башгаларына көмәк едирди (Јәһ. 5:5-9; 13:12-15; 1 Пет. 2:21). Бәс биз онун нүмунәсини неҹә тәглид едә биләрик вә бу һансы хејир-дуалары ҝәтирәр?
3 Һәмиманлыларымыза көмәк. Јығынҹаг ҝөрүшләриндә иштирак етмәк тәләб олунанда шәрһләр верәрәк башгалары илә ‘руһани ән’амы’ бөлүшә биләрик (Ром. 1:11). Вердијимиз шәрһләр Јеһоваја шәрәф ҝәтирир, һәмчинин бунун сајәсиндә һәгигәт үрәјимизә вә бејнимизә һәкк олунур вә ҝөрүшләр бизим үчүн даһа мараглы кечир (Мәз. 26:12). «Теократик Хидмәт Мәктәби»ндә кимисә әвәз етмәк лазым ҝәләндә, өз көмәјимизи тәклиф едә биләрик. Бунун сајәсиндә бизим тә’лим вермәк габилијјәтимиз тәкмилләшәҹәк.
4 Гардашлар јығынҹагда мәс’улијјәтләрә ҹан атмагла башгаларына көмәк етмәјә һазыр олдугларыны ҝөстәрирләр (Јешаја 32:2; 1 Тим. 3:1). Һамы мүхтәлиф шө’бәләрдә көнүллү хидмәт етмәклә конгресләрин низам-интизамла кечмәсинә шәраит јарада биләр. Сәјјар нәзарәтчи илә хидмәтә ҝедәндә вә ја ону јемәјә дә’вәт едәндә гаршылыглы руһланырыг (Ром. 1:12). Атасыз бөјүјән ушаглара, дул гадынлара, хәстәләрә, балаҹа ушаглары олан аналара вә башгаларына көмәк әлимизи узаданда севинҹ тапыр вә Јеһованын лүтфүнү газанырыг (Сүл. мәс. 19:17; Һәв. иш. 20:35).
5 Бундан башга, вахтымызы вә ҝүҹүмүзү сәрф едиб, Падшаһлыг Залынын тәмизләнмәсиндә иштирак едә биләрик. Һәгигәтә ҝәләнләрин сајы артдыгҹа јени-јени Падшаһлыг Залларына вә тикинтидә иштирак едәҹәк көнүллүләрә дә еһтијаҹ артыр. Тикинти ишиндә тәҹрүбәси олмајан бир әр-арвад Реҝионал тикинти комитәсинә көмәк етмәјә һај верди. Мүәјјән вахт әрзиндә онлар тә’лим алдылар, һазырда исә тикинтидә бәнна ишләјирләр. Баҹы дејир: «Баҹы-гардашларла чијин-чијинә ишләмәјин сајәсиндә чохлу јахын дост тапдыг. Ҝүнүн ахырында јорғунлуг һисс етсәк дә, руһән тәравәтли олуруг».
6 Тәблиғдә. Бу ҝүн бизим көнүллү олараг иштирак етдијимиз ән ваҹиб иш Падшаһлығын тәблиғидир. Инсанлар Мүгәддәс Китаб мәсләһәтләрини анлајыб, тәтбиг едәндә һәјатын мә’насыны тапыр вә зәрәрли вәрдишләрә үстүн ҝәлмәк үчүн ҝүҹ әлдә едирләр. Һәмчинин Аллаһын Кәламы онлара ҝәләҹәк үчүн үмид верир. Мүгәддәс Китаб тә’лимләрини инсанлара өјрәдәндә әбәди фајда ҝәтирән хидмәти иҹра едирик (Јәһ. 17:3; 1 Тим. 4:16). Ола билсин, шәраитимиз бизә көмәкчи вә ја даими пионер кими хидмәт етмәјә, тәблиғчиләрә еһтијаҹ олан јерә көчмәјә вә ја башга дил өјрәнәрәк бу ишдә даһа чох иштирак етмәјә јол верир.
7 Давуд падшаһ пејғәмбәрлик етмишдир ки, Мәсиһ падшаһлыг етмәјә башлајанда Аллаһын халгы өзүнү «көнүллү олараг» тәгдим едәҹәкдир (Мәз. 110:3). Јеһованын сүр’әтләндирдији руһани бичинин сонунда ҝөрүләси ишләр чохдур (Јешаја 60:22). Сән дә: «Мән бурадајам. Мәни ҝөндәр» дејән Јешаја кими көмәк етмәјә һазырсанмы? (Јешаја 6:8). Бәли, биз көмәк етмәјә һазыр оланда Јеһованы севиндирир вә бол-бол хејир-дуалар бичирик.
[Ојрәнилмә үчүн олан суаллар]
1. Давудла Неһемја көмәк етмәјә һазыр олдугларыны неҹә ҝөстәрдиләр?
2. Мәсиһчиләр нә үчүн өзләри тәшәббүс ҝөстәриб башгаларына көмәк етмәлидирләр?
3. Көмәк етмәјә һазыр олдуғумузу јығынҹаг ҝөрүшләриндә неҹә ҝөстәрә биләрик?
4. Көмәк етмәјә һазыр олдуғумузу башга неҹә ҝөстәрә биләрик?
5. Падшаһлыг Заллары тикинтисинә нә үчүн көнүллүләр тәләб олунур?
6. Тәблиғ хидмәти нә үчүн ән ваҹиб ишдир?
7. Көмәк етмәјә һазыр олмаг бу ҝүн нә үчүн хүсусилә ваҹибдир?