Јени шаҝирд һазырламагда јығынҹағын бүтүн үзвләри иштирак едә биләр
1 Јени шаҝирд бир инсанын зәһмәтинин бәһрәси дејил. Мүгәддәс Китабы өјрәнән шәхсин руһән бөјүмәсинә көмәк етмәк үчүн Јеһова Өзүнүн бүтүн ‘әмәкдашларыны’ истифадә едә биләр (1 Кор. 3:6-9). Биз јени ҝәләнләрә јалныз мәсиһчи ҝөрүшләриндә вердијимиз сәмими шәрһләрлә дејил, һәмчинин Аллаһын руһунун һәјатымыза тә’сиринин ајдын сүбуту олан ҝөзәл давранышымызла да көмәк едирик (Јәһ. 13:35; Гал. 5:22, 23; Ефес. 4:22, 23). Јениләрә көмәк етмәк үчүн даһа нә едә биләрик?
2 Бүтүн јығынҹаг. Һәр биримиз јығынҹаға јени ҝәләнләри сәмими саламламагла вә ҝөрүшдән әввәл вә сонра үнсијјәт етмәклә онларла марагландығымызы ҝөстәрә биләрик. Јығынҹаға илк ҝәлишини хатырлајан бир киши дејир: «Мәни һеч танымајан бу гәдәр инсанын мәнә сәмими, меһрибан мүнасибәтини ушаглыгдан зијарәт етдијим килсәдә ҝөрмәмишдим. Һәгигәти тапдығым тамамилә ајдын иди». Бу киши ҝөрүшә ҝәлдији һәмин ҝүндән једди ај сонра вәфтиз олунду.
3 Мүгәддәс Китабы өјрәнән шәхс руһән инкишаф едирсә, ону сәмимијјәтлә тә’рифлә. О, мүгавимәтә таб ҝәтирирми? Јығынҹаг ҝөрүшләринә мүнтәзәм ҝәлирми? Шәрһ вермәји гәрара алыбмы? Теократик Хидмәт Мәктәбинә јазылыбмы, јахуд тәблиғ етмәјә башлајыбмы? Ону етдији наилијјәтләрә ҝөрә тә’рифлә. Бу ону мөһкәмләндирәҹәк вә руһландыраҹаг (Сүл. мәс. 25:11).
4 Мүгәддәс Китаб өјрәнмәсини кечирән тәблиғчи. Бә’зи тәблиғчиләр диҝәр баҹы-гардашлары өјрәнмәјә дә’вәт етмәклә, Мүгәддәс Китабы өјрәтдикләри адамын јығынҹағын ајры-ајры үзвләри илә таныш олмасына көмәк етмишләр. Өјрәтдијин адамы јығынҹаг ҝөрүшләринә мүмкүн гәдәр тез дә’вәт ет. Ҝөрүшләрә ҝәлдији илк ҝүндән ону јығынҹағын үзвләри илә таныш ет. О, пис вәрдишин, мәсәлән сигарет чәкмәјин, өһдәсиндән ҝәлмәк үчүн мүбаризә апарырмы? Мүгәддәс Китабы өјрәндијинә ҝөрә аиләсиндән ким исә она мүгавимәт ҝөстәрирми? Әҝәр беләдирсә, о, ејни проблемләрлә гаршылашмыш вә онлара үстүн ҝәлмиш тәблиғчиләрлә сөһбәт етмәкдән фајдалана биләр (1 Пет. 5:9).
5 Јени ҝәләнләр јығынҹағын руһани дәстәјинә еһтијаҹ дујурлар. Јығынҹағын һәр бир үзвү јениләрә сәмимијјәтлә мараг ҝөстәрәрәк онлара наилијјәтләр етмәкдә көмәк едә биләр.