Суаллар гутусу
◼ Евләнәнләр тој мәрасимини Падшаһлыг залында кечирмәк истәјирләрсә, ағсаггалларла һансы мәсәләләри мүзакирә етмәлидирләр?
Мүгәддәс Китабын принсипләринә ујғун тәшкил олунан тојлар Јеһоваја иззәт ҝәтирир. Буну хүсусилә дә Падшаһлыг Залында кечирилән тојларла бағлы демәк олар, чүнки бурада кечирилән мәрасимләр инсанларын ҝөзүндә тәшкилатымызы әкс етдирир. Буна ҝөрә дә тоју Падшаһлыг Залында кечирмәк истәјәндә ‘һәр шејин әдәблә вә низамла едилмәси’ үчүн јерли ағсаггаллар евләнмәјә һазырлашанларла бир сыра мәсәләләри мүзакирә етмәлидирләр (1 Кор. 14:40).
Падшаһлыг Залында тој етмәк истәјәнләр һәмин залда ҝөрүш кечирән јығынҹағын хидмәти комитәсинә јазылы шәкилдә мүраҹиәт етмәлидирләр. Мәктубу бахылмаг үчүн кифајәт гәдәр әввәлҹәдән вермәк, залдан истифадә етмәк истәдикләри ҝүнү вә сааты гејд етмәк лазымдыр. Онлар јадда сахламалыдырлар ки, ағсаггаллар тоја ҝөрә ҝөрүшләрин вахтыны дәјишмәјәҹәкләр. Бундан әлавә, бәјлә ҝәлин Мүгәддәс Китаб принсипләринә вә Јеһованын салеһ нормаларына мүвафиг јашајараг јахшы ад газанмыш олмалыдырлар.
Тојун Аллаһын адына шәрәф ҝәтирәҹәјинә әмин олмаг үчүн евләнмәјә һазырлашанлар тој һазырлыгларыны јекунлашдырмаздан әввәл буну хидмәти комитә илә мүзакирә етмәлидирләр. Дүздүр, ағсаггаллар өз шәхси фикирләрини гәбул етдирмәјә чалышмајаҹаглар, анҹаг нә исә јолверилмәз бир шеј етмәк планлашдырылырса, онда дәјишиклик едилмәлидир. Јалныз Падшаһлыг мелодијаларындан, јахуд нәғмә китабында олан маһнылары сәсләндирмәк олар. Падшаһлыг Залыны бәзәмәк, јахуд стулларын јерини дәјишмәк үчүн иҹазә алмаг лазымдыр. Әҝәр фотоапаратдан вә ја видеокамерадан истифадә едиләҹәксә, бу, мәрасимин ләјагәтини ашағы салмамалыдыр. Ағсаггаллар јығынҹағын ишләринә мане олмамаг шәртилә, Падшаһлыг Залында мәшг кечирилмәсинә иҹазә верә биләрләр. Еланлар лөвһәсиндә дәвәт јерләшдирилмәмәлидир. Анҹаг ағсаггаллар Падшаһлыг Залында кечирилмәси ҝөзләнилән тој барәсиндә јығынҹағы хәбәрдар етмәк үчүн Хидмәти ҝөрүшдә гыса елан едә биләрләр.
Бәјлә ҝәлинин сағдыш-солдышларынын һамысынын вәфтиз олунмуш олмасы тәләб олунмаса да, һәјат тәрзи Мүгәддәс Китаб принсипләринә зидд ҝедән, јахуд давранышы илә башгаларында суал доғураҹаг кәсләри сечмәк дүзҝүн олмазды. Әҝәр мүмкүндүрсә, тоју ағсаггал апарсын. Ағсаггаллар Аллаһын Кәламынын баҹарыглы мүәллимләри олдуғундан Мүгәддәс Јазыларын бу мүһүм мәрасимә даир принсипләрини вурғуламаг үчүн онлар ән мүнасиб шәхсләрдир (1 Тим. 3:2).
Тој һәм дә ону апаран ағсаггалын адына тәсир етдијиндән, тој һазырлыглары илә бағлы она да мәлумат вермәк лазымдыр. О, евләнәнләрин ҝөрүшдүкләри вахт әхлаг гајдаларына әмәл едиб-етмәдикләрини өјрәнмәк үчүн онларла сөһбәт едәҹәк; онлар да гардашла ачыг данышмалы вә һәр шеји дүз демәлидирләр. Бәј вә ја ҝәлин әввәлләр евли олмушдурса, Мүгәддәс Јазылара вә дөвләт ганунуна әсасән евләнмәк һүгугунун олдуғуну сүбут етмәлидир (Мат. 19:9). Бошанма кағызыны да ағсаггала ҝөстәрмәк лазымдыр.
Евләнәнләр ағсаггалларла ачыг үнсијјәт вә һәртәрәфли әмәкдашлыг етсәләр, тој һамы үчүн севинҹли һадисә олаҹаг (Сүл. мәс. 15:22; Ибр. 13:17).