Һәр ҝүн Јеһоваја һәмд един
1. Аллаһын хидмәтчиләри нәјә тәшвиг олунурлар вә нә үчүн?
1 Давуд падшаһ Јеһоваја «һәр ҝүн», һәтта әбәдијјән һәмд едәҹәјинә даир гәти гәрарыны ифадә етмишди (Мәз. 145:2, 7, 21). Бизим дә Јеһоваја һәр ҝүн һәмд етмәјә әсаслы сәбәбләримиз вар (Мәз. 37:10; 145:14, 18; 2 Пет. 3:13).
2. Аиләләр һәр ҝүн Јеһоваја неҹә һәмд едә биләрләр?
2 Аиләдә. Ҝүндәлик ајәни мүзакирә едәркән, аиләви ибадәт заманы вә јығынҹаг ҝөрүшләринә һазырлашаркән руһани мөвзуда долғун сөһбәтләр едә билмәјимиз үчүн руһландырыҹы нәшрләримиз вар. Бир чох аиләләр ҝүндә һеч олмаса бир дәфә бир јердә јемәк јејирләр. Бунун сајәсиндә тәләсмәдән, раһат сөһбәт етмәк вә Јеһоваја һәмд етмәк имканы јараныр. Валидејнләрин тәшәббүсү илә едилән бу ҹүр гејри-рәсми сөһбәтләр ‘ушаглары Рәббин тәрбијә вә нәсиһәти илә бөјүтмәкдә’ чох бөјүк рол ојнајыр (Ефес. 6:4; Ганун. т. 6:5-7).
3. Һәмиманлыларымызла оларкән Јеһоваја һәмд етмәк үчүн һансы имкан јараныр?
3 Һәмиманлыларла оларкән. Тәблиғдә вә ја јығынҹаг ҝөрүшләриндә оларкән һәмиманлыларла бирликдә Јеһоваја һәмд етмәк үчүн ҝөзәл имкан јараныр (Сүл. мәс. 15:30; Филип. 4:8; Ибр. 13:15). Јеһованы севдијимиз үчүн, бир-биримизлә үнсијјәт едәркән Онун хејирхаһлығына ҝөрә сәмими гәлбдән миннәтдарлығымызы билдирмәк һәр биримизә асан олмалыдыр (Мәз. 106:1).
4. Јеһоваја һәмд етмәк үчүн башга һансы имканлар вар?
4 Иманымыза шәрик олмајанларла сөһбәт едәркән. Шәраитимиз һәр ҝүн хидмәтдә иштирак етмәјә јол вермәсә дә, әмәкдашымызла, мәктәб јолдашымызла, јахуд әтрафымызда олан башга инсанларла Јеһова вә Онун нијјәтләри һаггында һәтта гыса сөһбәт етмәјимиз сәмими инсанлара үмид верә биләр (Мәз. 27:14; 1 Пет. 3:15). Бир баҹы тәјјарәдә јанында әјләшән адама шаһидлик етмишди. Ешитдикләри һәмин адама елә тәскинлик вермиш вә руһландырмышды ки, о, сонра әлагә сахлаја билмәләри үчүн өз үнваныны вә телефон нөмрәсини баҹыја вермишди. Дүнјада нараһатчылыг артдығындан вә вәзијјәт писләшдијиндән Јеһованын халгы гулаг асмаға мејилли оланлара «хош мүждә» чатдырмаға давам едир. Бу, һәмин инсанлара үмид бәхш едир вә онлары Јеһоваја һәмд етмәјә тәшвиг едир (Јешаја 52:7; Ром. 15:11).
5. Нәјә ҝөрә Јеһоваја һәмд етмәк истәјирик вә бунун сајәсиндә нә әлдә олунур?
5 Хидмәтчиләринин һәр ҝүн Она һәмд етмәләрини ешитмәк, јәгин Јеһованы чох севиндирир. Јеһованын јаратдығы шејләр кими, биз дә һәр ҝүн евимиздә, јығынҹагда вә һәлә Јеһоваја һәмд етмәјән инсанларла сөһбәт едәркән Она даһа чох һәмд едә биләрик (Мәз. 19:1-4).