Телефонла шаһидлик етмәк сәмәрәли ола биләр
1. Телефонла шаһидлик етмәк нә үчүн хидмәтимизин ваҹиб һиссәси һесаб олуна биләр?
1 Хидмәтимизи иҹра едәркән нә үчүн телефонла шаһидлик етмәк барәдә дә дүшүнмәлијик? Чүнки бу, хилас ҝәтирән дәгиг билији әлдә етмәләри үчүн инсанлара көмәк етмәјин бир үсулудур (2 Пет. 3:9). Аллаһын Падшаһлығы һагда хош хәбәри тәблиғ етмәјин башлыҹа үсулу евдән-евә тәблиғ етмәк олса да, евдә тапылмајан адамлара шаһидлик етмәк үчүн биз башга үсуллардан да истифадә едирик (Мат. 24:14; Лука 10:1-7; Вәһј 14:6).
2. Телефонла шаһидлик неҹә тәшкил олунур?
2 Неҹә тәшкил олунур? Тәблиғчиләрин һәм евдән-евә тәблиғ етмәләри үчүн тәдбирләр ҝөрүлүр, һәм дә телефонла шаһидлик етмәләри үчүн онлара саһәләр верилир. Телефонла тәк вә ја ики-үч нәфәрдән ибарәт груп шәклиндә шаһидлик етмәк олар. Бунун үчүн сакит вә раһат јер сечмәк лазымдыр. Чохлары маса архасында отуруб, адәтән евдән-евә тәблиғ едәркән истифадә етдикләри әшјалары әлләринин алтында һазыр сахлајырлар.
3. Телефонла тәблиғ едәркән нәји јадда сахламалыјыг?
3 Телефонла неҹә шаһидлик етмәли? Телефонла шаһидлик едәркән тәгдимә данышыг үслубунда сөјләнилмәлидир. Телефонла јениҹә тәблиғ етмәјә башлајанлар тәгдимәни ев саһиби үчүн охуја биләрләр, лакин буну данышыг үслубунда демәјә чалышмалыдырлар. «Мүгәддәс Китаб әсасында сөһбәт етмәк үчүн мөвзулар» брошүрасындакы, «Бизим Падшаһлыг Хидмәтимиз»дәки тәгдимәләр вә «Һәгигәти өјрәнмәк истәјирсинизми?» трактаты бу саһәдә бизә көмәк едә биләр. Тәгдимә һазырлајаркән чатдырмаг истәдијин хәбәри, верәҹәјин суалы мүәјјән ет вә она ҹаваб верән бир нечә ајә һазырла. Адәтән бу заман евдән-евә тәблиғдә пајланылан нәшрләр тәклиф олунур. Нөвбәти амилләри унутма: өзүнү сыхма вә тәләсмәдән даныш. Нәзакәтли, сәбирли вә меһрибан ол, чүнки бу, өзүнү телефонла данышаркән бүрузә верә биләр. Ев саһиби фикирләрини сөјләјәркән гулаг ас, сонра да онун фикирләрини нәзәрә ал вә миннәтдарлығыны билдир. Диггәтли ол ки, көнүллү ианәни гејд етмәјәсән, чүнки буну јанлыш олараг телефонла ианә јығма үсулу кими баша дүшә биләрләр.
4. Телефонла шаһидлик етмәјин сајәсиндә бизә верилән саһәни даһа јахшы неҹә ишләјә биләрик?
4 Телефонла тәблиғ едәркән хәстә, јахуд евдән-евә тәблиғ едәркән ишдә олдуғу үчүн евдә чәтин тапылан адамлара шаһидлик едә биләрсән. Бир башгалары исә мүһафизә олунан вә ја һәр адама дахил олмаға иҹазә верилмәјән биналарда јашајырлар. Буна ҝөрә дә хидмәти даһа там вә әсаслы шәкилдә иҹра етмәјә чалышаркән шаһидлик етмәјин сәмәрәли үсулу олан телефонла шаһидлик етмәк һагда дүшүн.