Хидмәтдә сәјли олмаг үчүн дуа вә дүшүнмәјин ваҹиблији
1. Исаја ән ваҹиб ишдән јајынмамаға нә көмәк едирди?
1 Бир ахшам Иса инсанлары сағалтды вә ҹинләри говду. Ертәси ҝүн шаҝирдләри ону тапанда: «Һамы сәни ахтарыр» дедиләр вә тәшвиг етдиләр ки, бу мөһтәшәм ишләри давам етдирсин. Анҹаг Иса әсас олан хош хәбәрин тәблиғ ишини иҹра етмәкдән јајынмырды. О ҹаваб верди: «Ҝәлин башга јерә, бу јахын кәндләрә ҝедәк ки, мән хош хәбәри ораларда да тәблиғ едим, ахы мән бунун үчүн ҝәлмишәм». Белә әһвал-руһијјәни горујуб-сахламагда Исаја нә көмәк едирди? Иса дуа етмәк вә дүшүнмәк үчүн сәһәр тездән дурурду (Марк 1:32—39). Бәс дуа вә дәриндән дүшүнмәк сәјли тәблиғчиләр олмагда бизә неҹә көмәк едә биләр?
2. Хидмәтдә сәјли олмаг үчүн нәјин үзәриндә дүшүнмәк бизә көмәк едә биләр?
2 Нәјин үзәриндә дүшүнмәли? Иса ҝөрүрдү ки, инсанлар «чобансыз гојунлар кими јазыг вә пәракәндә һалда идиләр» (Матта 9:36). Ејнилә биз дә хош хәбәрә нә гәдәр инсанын еһтијаҹы олдуғунун үзәриндә дүшүнә биләрик. Һәмчинин вахтын ҝөзләмәдијини дә дүшүнүн (1 Кор. 7:29). Биз Јеһованын ишләри вә хүсусијјәтләри, еләҹә дә Јеһованын Шаһиди олмағын нә гәдәр шәрәфли олдуғу һаггында, әтрафымызда олан инсанларын һәлә дә билмәдикләри Аллаһын Кәламындан өјрәндијимиз дәјәрли руһани хәзинәләрин үзәриндә дүшүнә биләрик. (Мәз. 77:11—13; Јешаја 43:10—12; Мат. 13:52).
3. Дүшүнмәк үчүн неҹә вахт ајырмаг олар?
3 Һансы вахтларда дүшүнмәли? Дүшүнмәк үчүн бәзиләри Иса кими, сәһәр тездән сакит вахтда галхыр. Башгалары исә ахшам јатмаздан өнҹә дүшүнмәјә вахт ајырырлар (Јар. 24:63). Һәтта графикимиз ҝәрҝин олса да, бунун үчүн вахт тапа биләрик. Бәзиләри нәглијјатда ҝедәркән, диҝәрләри исә наһар фасиләси заманы дүшүнмәјә вахт ајырырлар. Чохлары фикир вермишләр ки, хидмәтдән өнҹә гыса да олса дүшүнмәк сәјлә вә ҹәсарәтлә тәблиғ етмәјә көмәк едир.
4. Нәјә ҝөрә дүшүнмәк ваҹибдир?
4 Дуа едәрәк дәриндән дүшүнмәк Јеһоваја хидмәт етмәк истәјимизи ҝүҹләндирәҹәк, хидмәтә даһа ҹидди јанашмаға көмәк едәҹәк вә тәблиғ ишиндә мәтанәтли олмаг гәтијјәтимизи артыраҹаг. Дүшүнмәк Аллаһын ән бөјүк хидмәтчиси Исаја фајда ҝәтирдији кими, бизә дә фајда ҝәтирәҹәк.