Аиләләрә көмәк

1. Шәнбә ҝүнүнә риајәт етмәләри исраилли аиләләрә һансы фајданы ҝәтирирди?

¹ Јеһованын Шәнбә ҝүнү һаггында вердији ганун аиләләрә фајда ҝәтирирди. Исраиллиләр өз ишләриндән динҹәлир, Јеһованын хејирхаһлығы вә Онунла олан мүнасибәтләри барәдә дүшүнмәјә вахт ајырырдылар. Валидејнләр бу фүрсәтдән истифадә едәрәк Гануну ушагларынын үрәјинә һәкк едә биләрдиләр (Ганун. т. 6:6, 7). Шәнбә ҝүнү сајәсиндә Јеһованын халгынын һәр һәфтә өз руһанилијинә диггәт јетирмәк имканы олурду.

2. Шәнбә һаггында ганундан Јеһова барәдә нә өјрәнирик?

² Әлбәттә, бу ҝүн Јеһова артыг Шәнбә ҝүнүнә риајәт етмәји тәләб етмир. Лакин биз бу ганундан Аллаһ һаггында ваҹиб бир шеј өјрәнә биләрик. О, һәмишә Өз халгынын руһани рифаһы илә дәриндән марагланыр (Јешаја 48:17, 18). Бу ҝүн Јеһова Өз мәһәббәт долу гајғысыны аиләви ибадәт ахшамлары васитәсилә тәзаһүр етдирир.

3. Аиләви ибадәт ахшамынын мәгсәди нәдән ибарәтдир?

³ Аиләви ибадәт ахшамынын мәгсәди нәдир? 2009-ҹу илин јанвар ајындан јығынҹағын китабөјрәнмәси Теократик Хидмәт Мәктәби вә Хидмәти ҝөрүшлә бирҝә кечирилир. Бу дәјишиклијин сәбәбләриндән бири аиләви ибадәтә һәр һәфтә конкрет вахт ајырараг аиләләрә өз руһаниликләрини мөһкәмләндирмәк имканы вермәк иди. Аиләләр аиләви өјрәнмәни имкан дахилиндә әввәлләр китабөјрәнмәнин кечирилдији ахшама салмаға вә Мүгәддәс Китаб мөвзуларыны аиләнин тәләбатына ујғун олараг тәләсмәдән мүзакирә етмәјә тәшвиг олунурдулар.

4. Аиләви ибадәтин ҹәми бир саат кечмәси шәртдирми? Изаһ един.

⁴ Әввәлләр китабөјрәнмәјә ҝетмәк үчүн ҝејинмәјә, јола вә саирә кими шејләрә дә вахтымыз ҝедирди. Бу бир саатлыг ҝөрүшдә иштирак етмәјә чохларымыз, аз гала, јарым ҝүн сәрф едирди. Ҝөрүшләримизин графикиндә бу ҹүр дәјишиклик едилдикдән сонра аиләләрин бу ахшамы Јеһоваја ибадәтә һәср етмәк имканы јаранды. Буна ҝөрә дә, аиләви ибадәт ахшамына ҹәми бир саат ајырмаг шәрт дејил. Әксинә, биз аиләмизин тәләбатларыны вә имканларыны нәзәрә алмалы вә вахты она әсасән мүәјјән етмәлијик.

5. Вахтын һамысыны мүзакирәјә сәрф етмәк лазымдырмы? Изаһ един.

⁵ Вахтын һамысы мүзакирәјә сәрф етмәк лазымдырмы? Әрлә арвад, еләҹә дә аилә үзвләри Мүгәддәс Јазылара әсасланан мөвзулары бирликдә мүзакирә етмәклә гаршылыглы руһланырлар (Ром. 1:12). Бу, аилә телләрини даһа да мөһкәмләндирир. Буна ҝөрә дә, белә мүзакирәләр аиләви ибадәт ахшамынын әсас һиссәсини тәшкил етмәлидир. Бунунла јанашы, аиләнин һәр бир үзвү өзү үчүн охујуб арашдырмаға вахт ајыра биләр. Мәсәлән, бирҝә мүзакирәдән сонра һәрә өзү үчүн журнал охујаркән вә ја јығынҹаг ҝөрүшүнә һазырламаға давам едәркән, аилә үзвләринин һәрәси бир тәрәфә дағылмыр. Бәзи аиләләр һәмин ахшамы үмумијјәтлә телевизора бахмамаг гәрарына ҝәлибләр.

6. Мүзакирәни неҹә кечирмәк олар?

⁶ Мүзакирәни неҹә кечирмәли? Мүзакирәни һәмишә суал-ҹаваб шәклиндә кечирмәк мүтләг дејил. Аиләви ибадәт ахшамыны мараглы вә ҹанлы етмәк үчүн бир чох аиләләр һәфтәлик ҝөрүшләрин програмына бәнзәр програм тәртиб едирләр. Онлар мүзакирәни бир нечә һиссәјә ајырыр вә мүхтәлиф үсуллардан истифадә едирләр. Мәсәлән, бир јердә Мүгәддәс Китабы охујур, јығынҹаг ҝөрүшләринин мүәјјән һиссәләринә һазырлашыр вә хидмәтдә истифадә едәҹәкләри тәгдимәләри мәшг едирләр. 6-ҹы сәһифәдә бәзи тәклифләр верилир.

7. Аиләви ибадәт ахшамында неҹә аб-һава һөкм сүрмәлидир?

⁷ Аиләви ибадәт ахшамында неҹә аб-һава һөкм сүрмәлидир? Аиләниз мәһәббәтин вә раһатлығын һөкм сүрдүјү аб-һавада даһа јахшы өјрәнмәјә мејилли олаҹаг. Чөлдә һава јахшыдырса, өјрәнмәни ачыг һавада да кечирә биләрсиниз. Лазым ҝәләрсә, фасилә етмәк олар. Бәзи аиләләр програмдан сонра јүнҝүлвары јемәк јејирләр. Валидејнләр аиләви ибадәт ахшамы кечирилән заман тәнбеһ вә мәзәммәт етмәкдән гачынсалар да, ҝөрдүкләри һансыса конкрет вәзијјәти вә ја проблеми мүзакирә етмәк үчүн мүәјјән вахт ајыра биләрләр. Ушағы диҝәр баҹы-гардашларынын јанында пәрт етмәмәк үчүн јахшы оларды ки, һәссас вә шәхси мәсәләләр барәдә онун өзү илә башга вахт ајрыҹа данышасыныз. Аиләви ибадәт ахшамы гуру вә ҹансыхыҹы олмамалыдыр, әксинә, хошбәхт Аллаһа ибадәт етдијимиз бәлли олмалыдыр (1 Тим. 1:11).

8, 9. Аилә башчылары неҹә һазырлаша биләрләр?

⁸ Аилә башчылары неҹә һазырлаша биләрләр? Аилә башчысы аиләви ибадәт ахшамында нә мүзакирә едәҹәкләрини вә ону неҹә мүзакирә едәҹәкләрини мүәјјән етмәк үчүн габагҹадан һазырлашса, бу, аиләјә бөјүк фајда ҝәтирәҹәк (Сүл. мәс. 21:5). Әр бу барәдә арвады илә мәсләһәтләшсә, јахшы олар (Сүл. мәс. 15:22). Һәрдән ушагларын фикрини өјрәнмәк дә пис олмазды. Белә етмәклә, аилә башчысынын онлары марагландыран вә нараһат едән шејләр барәдә ајдын тәсәввүрү олаҹаг.

⁹ Аилә башчысына һәр һәфтә һазырлашмаға бир о гәдәр дә чох вахт сәрф етмәк лазым ҝәлмәјә биләр. Ола билсин, аиләнин һансыса һәфтәлик графики вар, буна ҝөрә дә аилә башчысынын һәр дәфә јени програм тәртиб етмәсинә еһтијаҹ олмајаҹаг. Аиләнин руһани тәләбатлары јадындан чыхмасын дејә о, һәр аиләви ибадәтдән сонра һазырлашмаг гәрарына ҝәлә биләр. Бәзи аилә башчылары ибадәт ахшамы мүзакирә едәҹәкләри мөвзулары гысаҹа гејд едиб, аиләнин асанлыгла ҝөрә биләҹәји јерә, мәсәлән, сојудуҹунун үстүнә јапышдырырлар. Бу, аилә үзвләринин марағына сәбәб олур вә габагҹадан һазырлашмаға имкан верир.

10. Тәк јашајанлар аиләви ибадәт ахшамы үчүн ајрылмыш вахты нәјә сәрф едә биләрләр?

¹⁰ Тәк оланлар. Тәк јашајанлар аиләви ибадәт ахшамыны шәхси өјрәнмәјә һәср едә биләр. Јашы шәхси өјрәнмәјә әсас етибарилә Мүгәддәс Китабы охумаг, јығынҹаг ҝөрүшләринә һазырлашмаг, «Ҝөзәтчи Гүлләси» вә «Ојанын!» журналларыны охумаг дахилдир. Бундан башга, бәзи тәблиғчиләр әлавә нәшрләри вә мөвзулары да арашдырырлар. Истәсәләр, онлар башга тәблиғчиләри вә ја һансыса аиләни руһани мөвзулары бирликдә мүзакирә етмәјә дәвәт едә биләрләр.

11, 12. Мүнтәзәм олараг аиләви ибадәт ахшамы кечирмәк һансы фајданы ҝәтирир?

¹¹ Мүнтәзәм аиләви ибадәтин һансы фајдасы вар? Сидги-үрәкдән һәгиги ибадәтдә иштирак едәнләрин Јеһова илә сых мүнасибәтләри јараныр. Еләҹә дә, бирҝә ибадәт едәнләрин аилә телләри мөһкәмләнир. Пионер кими хидмәт едән вә ушаглары олмајан бир әр-арвад наил олдуглары хејир-дуалар һаггында дејир: «Аиләви ибадәт ахшамыны сәбирсизликлә ҝөзләјирик. Бунун сајәсиндә бир-биримизлә вә сәмави Атамызла мүнасибәтләримиз даһа да сых олур. Бирликдә өјрәнмә кечирәҹәјимиз ҝүн сәһәр ојананда бир-биримизә дејирик: “Бу ахшам биздә нә олаҹаг? Аиләви ибадәт ахшамы!”»

¹² Бу јенилијин вахты аз олан аиләләрә дә көмәји дәјмишдир. Ики оғлуну тәк бөјүдән вә таммүддәтли пионер кими хидмәт едән бир ана јазыр: «Әввәлләр бизим аиләви өјрәнмәмиз мүнтәзәм кечмирди. Мән јорғун олдуғумдан бу, тәсадүфи һалларда алынырды. Бунун үчүн һеч ҹүр вахт тапа билмирдим. Буна ҝөрә дә бу мәктубу јазараг сизә аиләви ибадәт ахшамына ҝөрә дәрин миннәтдарлығымы билдирирәм. Инди бизим ҝөзәл мүнтәзәм аиләви өјрәнмәмиз кечир вә биз бунун фајдасыны ҝөрүрүк».

13. Аиләнизин ибадәт ахшамындан фајдаланмасы нәдән асылыдыр?

¹³ Шәнбә ҝүнү кими, аиләви ибадәт ахшамы да сәмави Атамызын аиләләрә көмәк үчүн бәхш етдији һәдијјәдир (Јаг. 1:17). Исраилли аиләләр Шәнбә ҝүнүнә даир гануна нә гәдәр јахшы риајәт етсәјдиләр, бир о гәдәр дә чох руһани фајда әлдә едәҹәкдиләр. Ејнилә, биз дә аиләви ибадәт үчүн ајрылмыш ахшамдан нә гәдәр сәмәрәли истифадә етсәк, бу, аиләмизә бир о гәдәр чох фајда ҝәтирәҹәк (2 Кор. 9:6; Галат. 6:7, 8; Колос. 3:23, 24). Бу тәдбирдән јарарлансаныз, онда сизин аилә дә мәзмурчунун кечирдији һиссләрә шәрик олаҹаг: «Мәним үчүн Аллаһа јахынлашмаг јахшыдыр, Худавәнд Рәббә пәнаһ ҝәтирмишәм, она ҝөрә бүтүн ишләрини һамыја чатдыраҹағам!» (Мәз. 73:28).

[5-ҹи сәһифәдәки јазы]

Аиләви ибадәт ахшамы гуру вә ҹансыхыҹы олмамалыдыр, әксинә, хошбәхт Аллаһа ибадәт етдијимиз бәлли олмалыдыр

[6-ҹы сәһифәдәки чәрчивә]

САХЛАЈЫН

Аиләви ибаәт ахшамы кечирмәк үчүн бәзи тәклифләр

Мүгәддәс Китаб

• Мүгәддәс Китабы һәфтәлик график үзрә бирликдә охујун. Әҝәр материал јол верирсә, бир нәфәр нәгл едәнин, башгалары исә диҝәр ролларын сөзләрини охуја биләр

• Мүгәддәс Китабдан охудуғунуз парчаны сәһнәләшдирин

• Аиләнин һәр бир үзвүнә Мүгәддәс Китабдан охујаҹағыныз фәсилләри әввәлҹәдән охумағы вә баша дүшмәдикләри бир-ики суалы гејд етмәји тапшыр. Сонра һәмин суаллары бирликдә арашдырын

• Һәр һәфтә үзәриндә Мүгәддәс Китаб ајәләри јазылмыш карточкалар һазырла вә аиләнизлә бирҝә онлары јадда сахламаға вә изаһ етмәјә чалышын. Һәмин карточкалары топла вә јадынызда нә гәдәр ајә сахладығынызы билмәк үчүн һәр һәфтә онлары јенидән нәзәрдән кечирин

• Мүгәддәс Китабын аудиојазыларына гулаг асаркән һәмин фәсилләри өз Мүгәддәс Китабынызда изләјин

Јығынҹаг ҝөрүшләри

• Бирликдә јығынҹаг ҝөрүшләринин бир һиссәсинә һазырлашын

• Ҝәлән һәфтә үчүн нәзәрдә тутулан Падшаһлыг маһныларыны мәшг един

• Әҝәр киминсә Теократик Хидмәт Мәктәбиндә тапшырығы варса вә ја Хидмәти ҝөрүшдә сәһнәҹикдә иштирак едирсә, буна даир тәклифләри мүзакирә един, јахуд аилә гаршысында мәшг един

Аиләнин тәләбатлары

• «Ҝәнҹләрин суаллары» (рус.) вә «Бөјүк Мүәллимдән өјрән» адлы китаблардан мөвзулары нәзәрдән кечирин

• Мәктәбдә јарана биләҹәк вәзијјәтләрин өһдәсиндән ҝәлмәк үчүн онлары сәһнәләшдирәрәк мәшг един

• Бәзән валидејнләрлә ушаглар ролларыны дәјишә биләр. Ушаглар һансыса бир мөвзуну арашдырыр вә сонра валидејнләри илә бирликдә мүлаһизә јүрүдүр

Хидмәт

• Һәфтә сонунда истифадә едәҹәјиниз тәгдимәләри мәшг едәрәк онлара һазырлашын

• Хатирә Ҝеҹәси әрәфәсиндә, тәтил вә ја мәзунијјәт заманы аилә үзвләринин хидмәтләрини ҝенишләндирмәк үчүн гаршыларына һансы реал мәгсәдләри гоја биләҹәкләрини мүзакирә един

• Гој аиләнин һәр бир үзвү бир нечә дәгигә әрзиндә хидмәтдә јаранан суаллара неҹә ҹаваб верәҹәјини арашдырсын, сонра да онлары мәшг един

Әлавә тәклифләр

• Ҹари журналлардакы мәгаләләри бир јердә охујун

• Гој аиләнин һәр бир үзвү журналлардан онун үчүн хүсусилә мараглы олан мәгаләни охусун вә аиләви ибадәт ахшамы заманы охудугларыны данышсын

• Һәрдән һансыса тәблиғчини вә ја ҹүтлүјү аиләви ибадәт ахшамына дәвәт един вә онлардан хаһиш един ки, хидмәтдән мараглы һадисәләри вә ја һәгигәтә неҹә ҝәлдикләри барәдә данышсынлар

• Видеофилмләримиздән биринә бахын вә ону мүзакирә един

• «Ојанын!» журналындан «Ҝәнҹләрин суаллары» вә ја «Аиләви викторина» адлы рубрикалары бирҝә мүзакирә един

• «Ҝөзәтчи Гүлләси» журналындан «Ушагларынызы өјрәдин» вә «Ҝәнҹ охуҹуларымыз үчүн» адлы рубрикалары бирҝә мүзакирә един

• Ҹари «Иллик мәҹмуә»нин вә ја ахырынҹы вилајәт конгресиндә алдығымыз нәшри охујуб мүзакирә един

• Конгресдән сонра әсас фикирләри мүзакирә един

• Јеһованын јаратдыгларыны мүшаһидә един вә онларын бизә Јеһова һаггында нә өјрәтдијини мүзакирә един

• Бирликдә нә иләсә мәшғул олун, мәсәлән, макет дүзәлдин, хәритә вә ја схем чәкин