Өјрәтмәк габилијјәтини јахшылашдырмағын үч үсулу
1. Нәјә ҝөрә өјрәтмәк габилијјәтимизи јахшылашдырмалыјыг?
1 Тәблиғчиләрин һамысы мүәллимдир. Инсанла илк дәфә сөһбәт едәндә, марагланана тәкрар баш чәкәндә, јахуд Мүгәддәс Китаб өјрәнмәси кечирәндә инсанларла билдикләримизи бөлүшүрүк. Бизим чатдырдыгларымыз ади биликләр дејил. Мүгәддәс Јазылардан чатдырдығымыз бу биликләр инсанлары хиласа јетишмәләри үчүн һикмәтли едә биләр (2 Тим. 3:15). Бу неҹә дә бөјүк шәрәфдир! Инди исә ҝәлин өјрәтмәк габилијјәтимизи јахшылашдырмағын үч үсулуну арашдыраг.
2. Биз садә тәрздә неҹә өјрәдә биләрик?
2 Садә тәрздә өјрәт. Биз мөвзуну јахшы биләндә һәмин мөвзу илә таныш олмајан гаршы тәрәф үчүн бунун нә гәдәр гәлиз олдуғуну асанлыгла унуда биләрик. Буна ҝөрә дә Мүгәддәс Китаб өјрәнмәси кечирәндә инсаны лазымсыз тәфсилатларла јүкләмә. Әксинә, әсас фикирләри вурғула. Чох данышмаг јахшы мүәллим олмаг демәк дејил (Сүл. мәс. 10:19). Адәтән, ән јахшысы әсас ајәләри охумагдыр. Ајәни охудугдан сонра диггәти мүзакирә етдијиниз мөвзуја аидијјәти олан һиссәјә јөнәлт. Матта 5-дән 7-дәк олан фәсилләрдә гәләмә алынан Дағүстү тәблиғә чохлу дәрин һәгигәтләр дахилдир, бунунла белә, Иса бу һәгигәтләри инсанлара садә тәрздә чатдырмышды вә аз сөзләрдән истифадә етмишди.
3. Әјани нүмунәләрин фајдасы нәдәдир вә адәтән ән јахшы әјани нүмунәләр һансылардыр?
3 Әјани нүмунәләр. Нүмунәләр дүшүнмәјә тәшвиг едир, һиссләри ојадыр вә фикирләри јадда сахламаға көмәк едир. Елә билмә ки, јахшы нүмунәләр чәкмәк үчүн сән һекајәчи олмалысан. Чох вахт Иса гыса вә асан нүмунәләр чәкирди (Мат. 7:3—5; 18:2—4). Бир кағыз парчасында чәкилән садә шәкил дә чох фајдалы ола биләр. Јахшы һазырлыг сајәсиндә сән тәсирли нүмунәләр фикирләшә вә ја тапа биләрсән.
4. Биз суаллардан еффектив шәкилдә неҹә истифадә едә биләрик?
4 Суаллар. Суаллар Мүгәддәс Китабы өјрәтдијин инсаны дүшүнмәјә вадар едир. Беләликлә, суал верәндән сонра сәбирли ол. Әҝәр суал верән кими дәрһал ҹавабыны өзүн дејирсәнсә, онда өјрәнәнин нәји баша дүшүб-дүшмәдијини билмәјәҹәксән. Әҝәр онун вердији ҹаваб сәһвдирсә, дүзәлиш вермәк әвәзинә, әлавә суаллардан истифадә едәрәк она дүзҝүн нәтиҹәјә ҝәлмәјә көмәк етмәјин даһа јахшы оларды (Мат. 17:24—27). Әлбәттә, һеч биримиз камил мүәллим дејилик. Буна ҝөрә дә Мүгәддәс Китаб бизи өјрәтмәк габилијјәтимизә даима фикир вермәјә тәшвиг едир. Әҝәр белә етсәк, бу һәм өзүмүзә, һәм дә бизи динләјәнләрә әбәди олараг фајда ҝәтирәҹәк (1 Тим. 4:16).