«Һамы илә сүлһдә олмаға чалышын»
1. Агрессив инсанларла гаршылашанда Мүгәддәс Китабын һансы мәсләһәти көмәјимизә чата биләр?
1 Јеһованын халгы сүлһпәрвәрдир вә онлар инсанлара сүлһ хәбәрини чатдырырлар (Јешаја 52:7). Анҹаг бәзән гапыны дөјәндә агрессив инсанларла растлашырлар. Белә вәзијјәтдә сүлһпәрвәр олмаға нә көмәк едә биләр? (Ром. 12:18).
2. Анлајышлы олмаг нә үчүн ваҹибдир?
2 Анлајышлы ол. Һәрчәнд бәзиләринин агрессив олмаларынын сәбәби һәгигәтә гаршы чыхмалары олдуғу һалда, диҝәрләринин бу ҹүр мүнасибәт ҝөстәрмәсинин чатдырдығымыз хош хәбәрлә һеч бир әлагәси олмаја биләр. Ола билсин, биз мүнасиб олмајан вахтда ҝәлмишик, јахуд ев јијәсинин шәхси проблемләри вар. Һәтта о, хош хәбәрә ҝөрә аҹыгланса да, онун бу ҹүр реаксија ҝөстәрмәсинин әсас сәбәби һәгигәт барәдә јанлыш тәсәввүрләрә малик олмасы ола биләр (2 Кор. 4:4). Анлајышлы олсаг, өзүмүзү әлә алмағы баҹараҹаг вә инсанын бу ҹүр мүнасибәтини өз үзәримизә ҝөтүрмәјәҹәјик (Сүл. мәс. 19:11).
3. Ев саһибинә һөрмәт етдијимизи неҹә ҝөстәрә биләрик?
3 Һөрмәт ҝөстәр. Чох вахт ҝүҹлү әгидәјә саһиб олан инсанларла гаршылашырыг (2 Кор. 10:4). Онларын бизи динләјиб-динләмәјәҹәкләрини сечмәк һүгуглары вар. Буна ҝөрә дә биз һеч вахт һәмсөһбәтимизин әгидәсини алчалтмамалы, јахуд елә тәәссүрат ојатмамалыјыг ки, бизим дүшүнҹәләримиз онункундан үстүндүр. Һәтта биздән ҝетмәјимизи истәјирләрсә, һөрмәтҹил тәрздә ораны тәрк етмәлијик.
4. Нәзакәтли данышмаг нә демәкдир?
4 Нәзакәтли даныш. Бәзән тәһгирләрә мәруз галсаг белә, биз мүтләг һәлим вә сакит ҹаваб вермәлијик (Колос. 4:6; 1 Пет. 2:23). Мүбаһисә етмәк әвәзинә, үмуми мөвзу тапмаға чалышмалыјыг. Һәтта мүлајимликлә ев јијәсиндән етиразынын сәбәбини өјрәнмәк олар. Инсаны һөвсәләдән чыхармамаг үчүн бәзән ән јахшысы сөһбәти дајандырмагдыр (Сүл. мәс. 9:7; 17:14).
5. Хидмәтдә һамы илә сүлһдә олмаг нәјә ҝөрә ваҹибдир?
5 Әҝәр сүлһлә ајрылсаг, бу ҹүр мүнасибәтимиз сөһбәт етдијимиз инсана мүсбәт тәсир едәҹәк вә нөвбәти дәфә шаһидлик верән инсаны динләмәк истәјәҹәк (Ром. 12:20, 21). Унутмајаг ки, һәмин адам хош хәбәрин нә гәдәр әлејһинә олса да, бир ҝүн о, һәмиманлымыз ола биләр (Галат. 1:13, 14). Инсанын һәгигәтә мараг ҝөстәриб-ҝөстәрмәмәсиндән асылы олмајараг, ҝәлин өзүмүзә һаким олаг вә һамы илә сүлһдә олмаға чалышаг. Бунун сајәсиндә Јеһованы иззәтләндирәҹәк вә өјрәтдијимиз тәлимләри бәзәјәҹәјик (2 Кор. 6:3).