Аллаһын ҝөзүндә неҹә инсанам?
1. Һансы мәнада Мүгәддәс Китаб ҝүзҝүјә бәнзәјир?
1 Ҝүзҝүјә тез-тез бахырсан? Әксәријјәтимиз ҝүзҝүјә тез-тез бахырыг, чүнки бу, бизә хариҹи ҝөрүнүшүмүзә даим нәзәр јетирмәјә көмәк едир. Мүгәддәс Китаб ҝүзҝүјә бәнзәдилир. Аллаһын Кәламыны охумагла биз өзүмүзү, Јеһованын бизи ҝөрдүјү кими, ҝөрүрүк (1 Шам. 16:7; Јаг. 1:22—24). Аллаһын Кәламы «үрәјин дүшүнҹә вә нијјәтләрини үзә [чыхара]» биләр (Ибр. 4:12). Бәс Мүгәддәс Китабы һәр ҝүн охујуб үзәриндә дүшүнмәк даһа сәриштәли мүждәчи олмаг үчүн мөһкәмләндирмәли олдуғумуз ҹәһәтләри ҝөрмәјә неҹә көмәк едә биләр? (Мәз. 1:1—3).
2. Мүгәддәс Китаб өзүмүзү јохламаға неҹә көмәк едир?
2 Мүгәддәс Китабдан ҝүзҝү кими истифадә ет. Мүгәддәс Китабда гәләмә алынан садиг инсанларын нүмунәси Јеһованын һансы кејфијјәтләрдән разы галдығыны бизә өјрәдир. Мәсәлән, Давуд Аллаһын адынын гејрәтини чәкирди (1 Шам. 17:45, 46). Јешаја ҝәрҝин мүһитдә көнүллү олараг ҹәсарәтлә тәблиғ едирди (Јешаја 6:8, 9). Сәмави Атасына бөјүк мәһәббәтдән ирәли ҝәләрәк Иса хидмәтә ағыр јүк кими јох, севинҹ вә тәравәт мәнбәји кими бахырды (Јәһ. 4:34). Биринҹи әсрдәки мәсиһчиләр дә ҹанла-башла тәблиғ едир, Јеһоваја ҝүвәнир вә тәслим олмурдулар (Һәв. иш. 5:41, 42; 2 Кор. 4:1; 2 Тим. 4:17). Белә нүмунәләр үзәриндә дүшүнмәк бизә чатышмајан ҹәһәтләримизи ҝөрмәјә вә мүгәддәс хидмәтә јарарлы олмаг үчүн лазыми кејфијјәтләр инкишаф етдирмәјә көмәк едир.
3. Нә үчүн дәјишиклик етмәји тәхирә салмамалыјыг?
3 Гүсурлары дүзәлт. Сөзсүз ки, ҝүзҝүјә бахыб гүсурлары ҝөрмәмәзликдән ҝәлмәк јахшы олмазды. Биз Јеһоваја дуа едә биләрик ки, бизә гүсурларымызы ҝөрмәјә вә онлары дүзәлтмәјә көмәк етсин (Мәз. 139:23, 24; Лука 11:13). Вахт азалдығы вә һәјат чәтинләшдији үчүн лазыми дәјишикликләр етмәји тәхирә салмамалыјыг (1 Кор. 7:29; 1 Тим. 4:16).
4. Аллаһын Кәламына диггәтлә бахан вә она ујғун давранан инсан һагда нә демәк олар?
4 Јеһованын ҝөзүндә инсанын дахили аләми заһириндән даһа ваҹибдир (1 Пет. 3:3, 4). Бәс Аллаһын Кәламына диггәтлә бахан вә она ујғун давранан инсан һагда нә демәк олар? О, «унутган динләјиҹи олмајыб ешитдикләрини јеринә јетирдији үчүн өз ишиндә хошбәхт олаҹаг» (Јаг. 1:25). Бәли, «Јеһованын ҹалалыны ҝүзҝү кими әкс [етдирдијимиз]» үчүн биз хошбәхт вә сәриштәли тәблиғчи олаҹағыг (2 Кор. 3:18).