МӘСИҺИ ҺӘЈАТЫ
Булус Аллаһа шүкүр етди вә үрәкләнди
Ромадакы јығынҹаг Булусун ҝәлишиндән хәбәр тутанда гардашлар тәхминән 64 км јол гәт едиб онун габағына чыхдылар. Булус онларын бу ҹүр фәдакар мәһәббәтини ҝөрәндә «Аллаһа шүкүр етди вә үрәкләнди» (Һв 28:15). Адәтән, Булус өзү баш чәкдији јығынҹаглары руһландырырды, амма индики вәзијјәтдә дустаг олдуғундан, руһланан тәрәф о олду (2Кр 13:10).
Бу ҝүн рајон нәзарәтчиләри јығынҹаглары зијарәт едәрәк баҹы-гардашлары руһландырырлар. Аллаһын бүтүн хидмәтчиләри кими, онларын да јорулдуғу, нараһатчылыг кечирдији, мәјус олдуғу вахтлар олур. Нөвбәти дәфә рајон нәзарәтчиси вә һәјат јолдашы сизин јығынҹаға ҝәләндә онлары неҹә үрәкләндирә биләрсиниз ки, һәм сиз руһланасыныз, һәм дә онлар? (Рм 1:11, 12).
Тәблиғ ҝөрүшләриндә иштирак един. Тәблиғчиләр рајон нәзарәтчисинин баш чәкдији хүсуси фәалијјәт һәфтәсиндән там јарарланмаг үчүн әлләриндән ҝәләни едәндә о, чох руһланыр (1Ск 1:2, 3; 2:20). Мәсәлән, онун баш чәкдији ај көмәкчи өнҹүл кими хидмәт етмәк олар. Онунла, јахуд һәјат јолдашы илә әмәкдашлыг едә, јахуд онлардан бирини Мүгәддәс Китаб дәрсинә дәвәт едә биләрсиниз. Онлара мүхтәлиф тәблиғчиләрлә, о ҹүмләдән, јениләрлә, јахуд хидмәтдә елә дә сәриштәси олмајан тәблиғчиләрлә әмәкдашлыг етмәк хошдур.
Гонагпәрвәрлик ҝөстәрин. Онлары гонаг сахлаја вә ја јемәјә дәвәт едә биләрсиниз? Бу, гардаша вә һәјат јолдашына олан севҝинизә дәлаләт едәҹәк. Унутмајын, онлар сиздән дәм-дәсҝаһ ҝөзләмирләр (Лк 10:38—42).
Онун мәсләһәтинә әмәл един. Рајон нәзарәтчиси меһрибанлыгла бизә ибадәтимизин һансы саһәсиндә дүзәлишә еһтијаҹымыз олдуғуну ҝөстәрә биләр. Бәзән исә о, ҹидди шәкилдә мәсләһәт вермәли олур (1Кр 5:1—5). Биз итаәт едәндә вә табе оланда о да хидмәтини севинҹлә иҹра едир (Иб 13:17).
Миннәтдарлығынызы ифадә един. Рајон нәзарәтчисинә вә һәјат јолдашына сизә неҹә көмәкләри дәјдијини билдирин. Буну ја бирбаша онларын өзүнә дејә биләрсиниз, ја да ачыгҹа јаза биләрсиниз (Кл 3:15).