«Әсил бүнөврә үзәриндә тикилмиш шәһәри» ҝөзләјирсиниз?

1. Јеһованын јолунда чохлары һансы гурбанлары вериб вә онлары буна нә тәшвиг едиб?

БУ ҜҮН Аллаһын милјонларла хидмәтчиси Онун јолунда чохлу гурбанлар вериб. Кимиси субај галмаг гәрарына ҝәлиб, кимиси ушаг саһиби олмағы тәхирә салыб. Бир чох аилә садә һәјат сүрмәји сечиб. Бәс онлары буна нә тәшвиг едиб? Һамысы Јеһоваја баҹардығы гәдәр чох хидмәт етмәк истәјир. Бу баҹы-гардашлар хошбәхт һәјат сүрүр, Јеһованын онлары зәрури олан һәр шејлә тәмин едәҹәјинә архајындыр. Бәс онлар бу гәрарларына ҝөрә пешман олаҹаглар? Хејр. Нәјә ҝөрә буну әминликлә дејә биләрик? Чүнки Јеһова гәдимдә садиг хидмәтчиләринин гајғысына галмышды, мәсәлән, «иман ҝәтирәнләрин атасы» олан Ибраһим пејғәмбәрин башындан немәтләр төкмүшдү (Ром. 4:11).

2. а) Ибраниләрә 11:8—10, 16 ајәләринә әсасән, нәјә ҝөрә Ибраһим пејғәмбәр тәрәддүд етмәдән Ур шәһәриндән чыхды? б) Бу мәгаләдә нәләри мүзакирә едәҹәјик?

² Јеһованын бујруғу илә Ибраһим пејғәмбәр тәрәддүд етмәдән Ур шәһәриндәки раһат һәјатыны гојуб чыхды. Чүнки о, «әсил бүнөврә үзәриндә тикилмиш шәһәри ҝөзләјирди». (Ибраниләрә 11:8—10, 16 ајәләрини охујун.) Бу һансы шәһәр иди? Ибраһим пејғәмбәр бу шәһәрин тикилмәсини ҝөзләјән мүддәтдә һансы чәтинликләрлә үзләшмишди? Биз ондан вә онун нүмунәсини изләјән мәсиһиләрдән нә өјрәнирик?

«ӘСИЛ БҮНӨВРӘ ҮЗӘРИНДӘ ТИКИЛМИШ ШӘҺӘР»

3. Ибраһим пејғәмбәр һансы шәһәри ҝөзләјирди?

³ Ибраһимин ҝөзләдији шәһәр Аллаһын Падшаһлығы иди. Бу Падшаһлыға Иса Мәсиһ вә 144 000 мәсһ олунмуш мәсиһи дахилдир. Булус Падшаһлығы «вар олан Аллаһын шәһәри сәмави Јерусәлим» адландырмышды (Ибр. 12:22; Вәһј 5:8—10; 14:1). Иса Мәсиһ шаҝирдләринә өјрәтмишди ки, дуада Падшаһлығын ҝәлмәсини вә бу Падшаһлығын Аллаһын ирадәсини ҝөјдә олдуғу кими, јердә дә јеринә јетирмәсини диләсинләр (Мәт. 6:10).

4. Јарадылыш 17:1, 2, 6 ајәләринә әсасән, Ибраһим пејғәмбәр Аллаһын вәд етдији шәһәр һагда нәји билирди?

⁴ Ибраһим пејғәмбәр Аллаһын Падшаһлығынын неҹә тәшкил олунаҹағы һагда тәфәррүатлары билирди? Хејр. Әсрләр әрзиндә бу, «мүгәддәс сирр» олараг галмышды (Ефес. 1:8—10; Кол. 1:26, 27). Амма пејғәмбәр билирди ки, онун нәслиндән бәзиләри падшаһ олаҹаг. Бу вәди она шәхсән Јеһова вермишди. (Јарадылыш 17:1, 2, 6 ајәләрини охујун.) Ибраһим пејғәмбәрин Аллаһын вәдләринә иманы о гәдәр ҝүҹлү иди ки, санки Аллаһын Падшаһлығынын Падшаһы олаҹаг Мәсиһи ҝөрмүшдү. Бу сәбәбдән Иса Мәсиһ јәһудиләрә демишди: «Атаныз Ибраһим мәним ҝүнүмү ҝөрәҹәји үчүн чох севинирди. О, мәним ҝүнүмү ҝөрдү вә шадланды» (Јәһ. 8:56). Бәли, Ибраһим билирди ки, онун нәслиндән бәзиләри Аллаһын гурдуғу Падшаһлыға дахил олаҹаг вә Аллаһын бу вәдини јеринә јетирмәсини сәбирлә ҝөзләјирди.

5. Ибраһим пејғәмбәрин Аллаһын гураҹағы «шәһәри» ҝөзләдијини һарадан билирик?

⁵ Ибраһим пејғәмбәр Аллаһын гураҹағы шәһәри, јәни Падшаһлығы ҝөзләдијини неҹә ҝөстәрирди? Әввәла, о, јер үзүндәки һеч бир падшаһлығын тәбәәси олмады. О, көчәри һәјат јашады, һеч јердә көк салмады, һеч бир падшаһы дәстәкләмәди. Һәмчинин өз падшаһлығыны да гурмаға ҹәһд етмәди. Әксинә, Јеһоваја итаәткарлыг ҝөстәрди вә вәдләрини јеринә јетирмәсини ҝөзләди. Бу, мөһтәшәм иманын тәзаһүрү иди. Бәс пејғәмбәр һансы чәтинликләрлә үзләшмишди вә биз ондан нә өјрәнә биләрик?

ИБРАҺИМ ПЕЈҒӘМБӘРИН ҮЗЛӘШДИЈИ ЧӘТИНЛИКЛӘР

6. Ур шәһәрини тәсвир един.

⁶ Ибраһим пејғәмбәрин гојуб чыхдығы шәһәр тәһлүкәсиз, раһат шәраитли шәһәр иди, орада зијалы, варлы инсанлар јашајырды. Шәһәр бөјүк диварларла вә үч тәрәфдән дәрин су хәндәкләри илә әһатә олунмушду. Әһали јазы вә һесаблама ишиндә маһир иди. Еһтимал олунур ки, шәһәр тиҹарәт мәркәзи олуб, чүнки археологлар һәмин әразидә алыш-веришлә бағлы чохлу сәнәдләр тапыб. Евләр кәрпиҹдән тикилмишди, диварлар сувагланыб һамарланмыш вә ағардылмышды. Бәзи евләрин 13-14 отағы, даш дөшәмәли дахили һәјәти вар иди.

7. Нәјә ҝөрә Ибраһим пејғәмбәр Јеһованын мүдафиәсинә етибар етмәли иди?

⁷ Ибраһим пејғәмбәр Јеһованын ону вә аиләсини горујаҹағына етибар етмәли иди. Нәјә ҝөрә? Гејд етдијимиз кими, Ибраһим вә Сара Ур шәһәриндә өз раһат вә тәһлүкәсиз ев-ешијини гојуб, Кәнан чөллүјүндә чадырларда јашамаға јолланмышды. Даһа ону вә аиләсини галын диварлар, дәрин хәндәкләр горумурду. Артыг онлар мүдафиәсиз идиләр, асанлыгла дүшмән һүҹумуна туш ҝәлә биләрдиләр.

8. Ибраһим пејғәмбәр һансы чәтинликлә үзләшмишди?

⁸ Пејғәмбәр Аллаһын дедијини етди. Амма Јеһованын ону ҝөндәрдији дијарда бир дәфә ҝүҹлү аҹлыг баш галдырмышды вә онун аиләсинин јетәринҹә јемәји јох иди. Аҹлыг о гәдәр шиддәтләнмишди ки, Ибраһим пејғәмбәр бир мүддәтлик аиләси илә бирҝә Мисирә көчмүшдү. Амма Мисирдә олдуғу мүддәтдә өлкәни идарә едән фирон Сараны өзүнә арвад етмәк үчүн сарајына ҝәтиздирди. Тәсәввүр едирсиниз, Јеһова фирону ҹәзаландырана вә о, Сараны ҝери гајтарана гәдәр Ибраһим нә гәдәр фикир чәкмишди? (Јар. 12:10—19).

9. Ибраһим пејғәмбәрин аиләсиндә һансы чәтинликләр вар иди?

⁹ Ибраһим пејғәмбәрин аиләсиндә бөјүк чәтинликләр вар иди. Истәкли арвады Саранын ушағы олмурду. Узун илләр бу дәрд онлары чох үзүрдү. Ахырда Сара кәнизи Һәҹәри Ибраһимә верди ки, онлар үчүн ушаг дүнјаја ҝәтирсин. Амма Һәҹәр Исмајыла һамилә галанда Сараја һәгарәтлә бахмаға башлады. Вәзијјәт о һәддә чатды ки, Сара да Һәҹәрлә пис рәфтар етди вә Һәҹәр евдән гачмалы олду (Јар. 16:1—6).

10. Ибраһим пејғәмбәрин Јеһоваја етибары Исмајыл вә Исһагла бағлы мәсәләдә неҹә сынанды?

¹⁰ Нәһајәт, Сара һамилә галды вә Ибраһимә оғул бәхш етди. Ибраһим ушағын адыны Исһаг гојду. О, һәр ики оғлуну, Исмајылы да, Исһагы да чох истәјирди. Амма Исмајыл Исһагла пис рәфтар етдијиндән Ибраһим мәҹбур галыб, ону Һәҹәрлә бирҝә евдән ҝөндәрмәли олду (Јар. 21:9—14). Илләр сонра Јеһова Ибраһим пејғәмбәрә бујурду ки, оғлу Исһагы гурбан ҝәтирсин (Јар. 22:1, 2; Ибр. 11:17—19). Һәр ики вәзијјәтдә пејғәмбәр Јеһованын онун өвладлары илә бағлы вердији вәди јеринә јетирәҹәјинә етибар етди.

11. Нәјә ҝөрә Ибраһим пејғәмбәр Јеһованы сәбирлә ҝөзләмәли иди?

¹¹ Ибраһим пејғәмбәр бүтүн бу вахт әрзиндә Јеһованы сәбирлә ҝөзләмәји өјрәнди. Аиләси илә бирҝә Ур шәһәриндән чыханда, еһтимал ки, онун 70-дән чох јашы вар иди (Јар. 11:31—12:4). Тәхминән јүз ил әрзиндә о, Кәнан дијарында чадырларда көчәри һәјат јашады. 175 јашында пејғәмбәр өмрүнү баша вурду (Јар. 25:7). Долашдығы торпаглары Јеһова онун нәслинә верәҹәјини вәд етмишди, амма о, бу вәдин ҝерчәкләшмәсини өз ҝөзү илә ҝөрмәди. Һәмчинин онун өмрү «шәһәрин», Аллаһын Падшаһлығынын гурулмасыны ҝөрмәјә јетмәди. Амма јазылыб ки, о, «узун өмүр сүрәндән сонра һәјатдан дојмуш һалда дүнјадан көчдү» (Јар. 25:8). Јашадығы бүтүн чәтинликләрә бахмајараг, пејғәмбәр мөһкәм иманыны горуду вә Јеһованы ҝөзләмәкдән безмәди. О неҹә белә дөзүмлү гала билмишди? Чүнки Јеһова ону өмрү боју һифз етмиш, она дост олмушду (Јар. 15:1; Әшј. 41:8; Јаг. 2:22, 23).

12. Биз нәји ҝөзләјирик? Нөвбәти абзасларда сөһбәт кимләрдән ҝедәҹәк?

¹² Ибраһим кими, биз дә әсил бүнөврә үзәриндә тикилмиш шәһәри ҝөзләјирик. Амма биз онун тикинтисини ҝөзләмирик. Чүнки Аллаһын Падшаһлығы 1914-ҹү илдә гурулуб вә ҝөјдә там шәкилдә идарә едир (Вәһј 12:7—10). Биз онун јер үзүндә һәр шеји идарә етмәсини ҝөзләјирик. Анҹаг бу мүддәтдә Ибраһим вә Саранын үзләшдији чәтинликләрә бәнзәр чәтинликләрә дөзмәлијик. Бәс бизим дөврдә кимләрсә онун нүмунәсини изләјә билиб? «Ҝөзәтчи гүлләси»ндә јазылмыш биографијалар ҝөстәрир ки, Ибраһим вә Сара кими, бу ҝүн дә Јеһованын чохлу хидмәтчиси иман вә сәбир тәзаһүр етдириб. Ҝәлин онлардан бәзиләри илә таныш олаг вә ҝөрәк онлардан нә өјрәнә биләрик.

ИБРАҺИМ ПЕЈҒӘМБӘРДӘН ӨРНӘК АЛАНЛАР

13. Бил Волден гардашдан нә өјрәнирик?

¹³ Гурбанлар вермәјә һазыр олун. Аллаһын шәһәрини, јәни Падшаһлығы һәјатымызда һәр шејдән үстүн тутмаг үчүн биз Ибраһим пејғәмбәр кими Аллаһын јолунда гурбанлар вермәјә һазыр олмалыјыг (Мәт. 6:33; Марк 10:28—30). Ҝәлин Бил Волденb адлы гардашдан данышаг. 1942-ҹи илдә Јеһованын Шаһидләри она дәрс кечмәјә башлајанда о, АБШ университетләринин бириндә мемарлыг вә иншаат мүһәндислијини бакалавр дәрәҹәси илә битирмәк үзрә иди. Бир профессор Билин мәзун олдугдан сонра ишләмәси үчүн иш тәшкил етмишди. Амма Бил имтина етди вә изаһ етди ки, һәјатыны карјера гурмаға јох, Аллаһа ибадәтә һәср етмәк истәјир. Чох кечмәмиш, Били һәрби хидмәтә чағырдылар. О, һөрмәтҹил шәкилдә имтина етди вә буна ҝөрә она ҹәримә олараг 10 000 АБШ доллары вә беш ил һәбс ҹәзасы кәсдиләр. Үч илдән сонра о, азадлыға бурахылды. Бир мүддәт сонра Бил Ҝилад мәктәбинә дәвәт алды вә хүсуси тәјинатлы мүждәчи кими Африкаја тәјин олунду. Сонра о, Ива адлы бир баҹы илә аилә гурду вә онлар бирҝә Африкада хидмәт етдиләр, бу исә һеч дә асан дејилди. Бир нечә ил сонра Билин анасынын гајғысына галмаг үчүн онлар Бирләшмиш Штатлара гајытмалы олдулар. Бил Волден гардаш һәјатына ҝери бојланараг дејир: «Мәнә 70 илдән чох Јеһоваја хидмәт етмәк шәрәфи нәсиб олуб, бу һагда дүшүнәндә биихтијар ҝөзләримдән јаш сүзүлүр. Хидмәти карјера етмәкдә мәнә бәләдчи олдуғу үчүн Јеһоваја һәмишә миннәтдарлығымы билдирирәм». Бәс сиз тамвахтлы хидмәти һәјат јолунуз едә биләрсиниз?

14, 15. Аристотелис гардашын вә Елени баҹынын һәјатындан нә өјрәнирик?

¹⁴ Һәјатынызын дәрди-сәрсиз олаҹағыны ҝөзләмәјин. Ибраһим пејғәмбәрин нүмунәсиндән өјрәндијимиз кими, һәтта бүтүн өмрүнү Јеһоваја хидмәтә һәср едәнләрин һәјаты чәтинликсиз өтүшмүр (Јаг. 1:2; 1 Бут. 5:9). Аристотелис Апостолидисc гардашын јашадыглары буна бир сүбутдур. О, 1946-ҹы илдә Јунаныстанда вәфтиз олунду. 1952-ҹи илдә Елени адлы бир баҹы илә нишанланды. Онларын руһани мәгсәди үст-үстә дүшүрдү. Амма Елени баҹы хәстәләнди, она бејин шиши диагнозу гојулду. Шиши ҝөтүрдүләр, анҹаг аилә гурандан бир нечә ил сонра шиш јенидән јаранды. Һәкимләр Елени баҹыны јенидән әмәлијјат етдиләр, амма о, гисмән ифлиҹ галды вә бу, данышыг габилијјәтинә зәрәр вурду. Хәстәлијинә вә һәмин вахт дөвләт тәрәфиндән тәгибләрә бахмајараг, Елени баҹынын хидмәтдәки шөвгү һеч заман сөнмәди.

¹⁵ Аристотелис гардаш 30 ил арвадынын гајғысына галды. Бу илләр әрзиндә о, ағсаггал кими хидмәт едиб, топланты комитәсиндә олуб вә топланты залларынын тикинтисинә көмәк едиб. 1987-ҹи илдә тәблиғдә оларкән Елени баҹынын башына бәдбәхт һадисә ҝәлди. О, үч ил комада галдыгдан сонра вәфат етди. Аристотелис гардаш башына ҝәләнләр барәдә биографијасынын сонунда белә сөзләр дејир: «Илләр әрзиндә үзләшдијим ағыр вәзијјәтләр, чәтинликләр вә ҝөзләнилмәз сынаглар һәдсиз дәрәҹәдә тәмкин вә дөзүм тәләб етди. Амма Јеһова һәмишә мәнә бүтүн бунлара синә ҝәрмәјә ҝүҹ верирди» (Зәб. 94:18, 19). Јеһова Онун јолунда чәтинликләрә рәғмән әлиндә ҝәләни едән хидмәтчиләрини чох севир!

16. Нејтан Норр гардаш һәјат јолдашына һансы ҝөзәл мәсләһәти вермишди?

¹⁶ Диггәтинизи ҝәләҹәјә ҹәмләјин. Ибраһим пејғәмбәр бүтүн диггәтини Јеһованын она ҝәләҹәкдә верәҹәји немәтләрә ҹәмләмишди; бу она чәтинликләрә дөзмәјә көмәк едирди. Одри Һајдd баҹы даим өзүндә никбин әһвали-руһијјәни горумаға чалышырды. Онун биринҹи һәјат јолдашы Нејтан Норр хәрчәнҝдән вәфат етди, икинҹи һәјат јолдашы Глен Һајд исә Алсһејмер хәстәлијинә тутулду. Баҹы дејир ки, Норр гардашын өлүмүндән бир нечә һәфтә өнҹә дедији сөзләрин она чох көмәји дәјиб. Баҹы бөлүшүр: «Норр мәнә хатырлатды: “Өлүм бизим үчүн сон дејил. Бизим үмидимиз ҝерчәкдир, биз даһа һеч вахт әзаб чәкмәјәҹәјик”. Сонра о мәни тәшвиг етди: “Ирәли бах, мүкафатынын олдуғу јерә бах... Бош дурма, инсанлар үчүн даим нәсә ет. Бу сәнә һәјатда севинҹ бәхш едәҹәк”». Неҹә дә ҝөзәл мәсләһәтдир: бош дурма, инсанлар үчүн јахшылыг ет, үмидинә севин! (Ром. 12:12).

17. а) Нәјә ҝөрә ҝөзүмүзү ҝәләҹәјә дикмәк үчүн әсаслы сәбәбләримиз вар? б) Микә 7:7 ајәсиндә јазылан әһвали-руһијјәјә саһиб олмаг бизә ҝәләҹәк немәтләри дадмаға неҹә көмәк едәҹәк?

¹⁷ Бу ҝүн ҝөзүмүзү ҝәләҹәјә дикмәк үчүн һәмишәкиндән даһа чох сәбәбимиз вар. Дүнјадакы һадисәләр ачыг-ашкар ҝөстәрир ки, биз ахырзаманын ахырында јашајырыг. Чох тезликлә интизарымыз битәҹәк, артыг «әсил бүнөврә үзәриндә тикилмиш шәһәри»н, Аллаһын Падшаһлығынын бүтүн јер үзүнү идарә етмәсини ҝөзләмәјә еһтијаҹ галмајаҹаг. Алдығымыз немәтләр саја-һесаба ҝәлмәјәҹәк; бир интизар да битәҹәк, дирилән доғмаларымыза говушаҹағыг. Һәмин вахт Јеһова Ибраһим пејғәмбәрә иманына вә сәбринә ҝөрә мүкафат верәҹәк: ону вә аиләсини јер үзүндә һәјата гајтараҹаг. Бәс сиз онлары гаршылајанларын арасында олаҹагсыныз? Ола биләрсиниз, әҝәр Ибраһим пејғәмбәр кими Аллаһын Падшаһлығы наминә гурбанлар вермәјә һазыр олсаныз, проблемләрә бахмајараг, иманлы галсаныз вә Јеһованы сәбирлә ҝөзләмәји өјрәнсәниз. (Микә 7:7 ајәсини охујун.)