Шаҝирдә вәфтизә доғру ирәлиләмәјә көмәк едәк (II һиссә)

1. Шаҝирд һазырламағын һәјатлары хилас едән иш олдуғуну һарадан билирик?

ШАҜИРД һазырламаг һәјатлары хилас едән ишдир! Буну һарадан билирик? Мәтта 28:19, 20 ајәләриндә Иса Мәсиһ нөвбәти әмри вермишди: «Ҝедин... шаҝирд һазырлајын, онлары... вәфтиз един». Вәфтиз олмаг нәјә ҝөрә ваҹибдир? Бу, хилас олмаг истәјәнләр үчүн тәләбдир. Вәфтиз олмаг истәјән инсан иман етмәлидир ки, хилас олмаг јалныз Иса Мәсиһин өзүнү уғрумузда гурбан вермәси вә дирилмәси сајәсиндә мүмкүндүр. Буна ҝөрә дә һәвари Бутрус диндашларына демишди: «Вәфтиз... сизи Иса Мәсиһин дирилмәси васитәсилә хилас едир» (1 Бут. 3:21). Беләликлә, шаҝирд вәфтиз олунмагла хиласына јол ачыр.

2. 2 Тимутијә 4:1, 2 ајәләри бизи неҹә мүәллим олмаға тәшвиг едир?

² Шаҝирд һазырламаг үчүн «мүәллимлик габилијјәтини» инкишаф етдирмәлијик. (2 Тимутијә 4:1, 2 ајәләрини охујун.) Нәјә ҝөрә? Чүнки Иса Мәсиһ демишди: «Ҝедин... шаҝирд һазырлајын,.. һәр шејә риајәт етмәји онлара өјрәдин». Һәвари Булус да демишди ки, бу ишдән «бәрк-бәрк јапыш», чүнки «бу јолла һәм өзүнү, һәм дә сәнә гулаг асанлары хилас едәҹәксән». Мәһз бу сәбәбдән о вурғуламышды ки, «вердијин тәлимә һәмишә диггәт јетир» (1 Тим. 4:16). Шаҝирд һазырламаг тәлим вермәклә әлагәли олдуғу үчүн биз буну ән јахшы шәкилдә етмәк истәјирик.

3. Бу мәгаләдә нәји мүзакирә едәҹәјик?

³ Биз мүнтәзәм олараг милјонлара инсана Мүгәддәс Китаб һәгигәтләрини өјрәдирик. Амма өтән мәгаләдә дә гејд олундуғу кими, биз даһа чох инсана вәфтиз олунмаға көмәк етмәјин јолларыны билмәк истәјирик. Бу мәгаләдә мүәллимләр үчүн зәрури олан даһа беш мәсләһәти мүзакирә едәҹәјик.

ГОЈ МҮГӘДДӘС КИТАБ ДАНЫШСЫН

4. Нәјә ҝөрә мүәллим дәрс кечәркән өзүнә һаким олмалыдыр? (Һашијәјә бахын.)

⁴ Биз Аллаһын Кәламындан өјрәтдијимиз һәгигәтләри севдијимиз үчүн бу һагда чох данышмаға мејилли ола биләрик. Амма неҹә ки, јығынҹагда «Ҝөзәтчи гүлләси» мүзакирәсини, Мүгәддәс Китаб дәрсини апаран гардаш чох данышмамалыдыр, ејнилә шаҝирдлә дәрс кечән тәблиғчи дә белә давранмалыдыр. О өзүнә һаким олмалыдыр ки, Мүгәддәс Китаб данышсын. Һансыса ајә вә ја мөвзу илә бағлы билдији һәр шеји изаһ етмәмәлидирb (Јәһ. 16:12). Вәфтиз олунан заманкы Мүгәддәс Китаб билијинизи индики илә мүгајисә един. Јәгин о вахт јалныз әсас тәлимләри баша дүшүрдүнүз (Ибр. 6:1). Нәзәрә алын ки, һал-һазыркы билијә илләр әрзиндә јијәләнмисиниз, буна ҝөрә дә онларын һамысыны шаҝирдә бир дәфәјә данышмаға чалышмајын.

5. а) 1 Салоникилиләрә 2:13 ајәсинә әсасән, шаҝирдин нәји баша дүшмәсини истәјирик? б) Шаҝирди өјрәндикләри барәдә данышмаға неҹә тәшвиг едә биләрик?

⁵ Биз истәјирик ки, шаҝирд өјрәндикләринин һамысынын Аллаһын Кәламына әсасландығыны баша дүшсүн. (1 Салоникилиләрә 2:13 ајәсини охујун.) Буну неҹә едә биләрик? Шаҝирдинизи өјрәндикләри һагда фикирләрини ачыг ифадә етмәјә тәшвиг един. Јахшы оларды ки, һәр дәфә ајәни өзүнүз изаһ етмәјәсиниз, онун неҹә баша дүшдүјүнү сорушасыныз. Аллаһын Кәламынын шәхсән она неҹә аид олдуғуну ҝөрмәјә көмәк един. Елә суаллар верин ки, охудуғу ајә һаггында фикирләрини вә һиссләрини бөлүшә билсин (Лука 10:25—28). Мәсәлән, белә суаллар верә биләрсиниз: «Бу ајәдә Јеһованын һансы хүсусијјәтини ҝөрүрсән?» «Мүгәддәс Китабдан өјрәндијин бу фикрин сәнә һансы фајдасы вар?» «Инди өјрәндикләрин сәндә һансы һиссләри доғурур?» (Мәс. 20:5). Әсас о дејил, шаҝирд нә гәдәр мәлумат билир, әсас өјрәндикләрини севмәси вә онлара әмәл етмәсидир.

6. Мүгәддәс Китаб дәрси кечәркән тәҹрүбәли тәблиғчиләрлә әмәкдашлыг етмәјин һансы хејри вар?

⁶ Мүгәддәс Китаб дәрси кечәркән тәҹрүбәли тәблиғчиләрлә әмәкдашлыг едирсиниз? Онлардан дәрси неҹә кечдијиниз, әсас јери Мүгәддәс Китаба вериб-вермәдијиниз барәдә фикирләрини сорушун. Әҝәр мүәллимлик габилијјәтинизи јахшылашдырмаг истәјирсинизсә, тәвазөкар олмалысыныз. (Һәвариләрин ишләри 18:24—26 ајәләри илә әлагәләндирин.) Сонра тәҹрүбәли тәблиғчидән шаҝирдин дәрси гаврамасы һагда нә дүшүндүјүнү сорушун. Сиз бир-ики һәфтәлик һараса ҝедәндә һәмин тәблиғчидән хаһиш едә биләрсиниз ки, сизи әвәз етсин. Бунун сајәсиндә һәм дәрсин мүнтәзәмлији горунаҹаг, һәм дә шаҝирд дәрс кечмәјин ваҹиблијини баша дүшәҹәк. Һеч вахт дүшүнмәјин ки, о «сизин» шаҝирдиниздир вә сиздән башга һеч ким она дәрс кечә билмәз. Ахы сизин үчүн өнәмли олан шаҝирдин рифаһы вә Мүгәддәс Китаб һәгигәтләрини өјрәнмәјә давам етмәсидир.

ШӨВГЛӘ ВӘ ӘМИНЛИКЛӘ ӨЈРӘДИН

7. Шаҝирдә өјрәндикләрини севмәјә неҹә көмәк едә биләрик?

⁷ Шаҝирд Мүгәддәс Китаб һәгигәтләринә севҝинизи, әминлијинизи ҝөрмәлидир (1 Салон. 1:5). Онда о да өјрәндикләрини севәҹәк. Она Мүгәддәс Китаб принсипләринин шәхсән сизә неҹә көмәк етдији һаггында даныша биләрсиниз. Беләҹә, шаҝирдиниз ҝөрәҹәк ки, Мүгәддәс Китабдакы фајдалы мәсләһәтләрдән о да јарарлана биләр.

8. Шаҝирдә башга неҹә көмәк едә биләрсиниз вә бунун һансы фајдасы вар?

⁸ Дәрс заманы шаҝирдинизә онун үзләшдији чәтинликләрлә үзләшән вә онларын өһдәсиндән ҝәлән мәсиһиләрин нүмунәсини чәкин. Јығынҹағыныздан белә мәсиһиләри шаҝирдинизлә дәрс кечмәјә дәвәт едә биләрсиниз. Јахуд jw.org сајтындакы «Мүгәддәс Китаб һәјатлары дәјишир»c рубрикасындан тәшвигедиҹи һадисәләр тапа биләрсиниз. Бу ҹүр мәгаләләр вә видеолар шаҝирдинизә Мүгәддәс Китаб принсипләринә әмәл етмәјин һикмәтини ҝөрмәјә көмәк едәҹәк.

9. Шаҝирди өјрәндикләри һагда аиләсинә вә достларына данышмаға неҹә тәшвиг едә биләрсиниз?

⁹ Әҝәр шаҝирдиниз евлидирсә вә һәјат јолдашы Мүгәддәс Китабы өјрәнмирсә, дәрсдә отурмағы она да тәклиф един. Шаҝирдинизи өјрәндикләрини аиләсинә вә достларына данышмаға тәшвиг един (Јәһ. 1:40—45). Бунун үчүн садәҹә олараг соруша биләрсиниз: «Бу фикри аиләнә неҹә изаһ едәрдин?» «Бәс фикри әсасландырмаг үчүн һансы ајәни ҝәтирәрдин?» Бу үсулла шаҝирди мүәллим олмаға һазырлајаҹагсыныз. Беләҹә, тәләбләрә ҹаваб верәндә о, вәфтиз олунмамыш тәблиғчи кими хидмәтдә иштирак едә биләр. Һәмчинин шаҝирддән Мүгәддәс Китабы өјрәнмәк истәјән кимисә таныјыб-танымадығыны соруша биләрсиниз. Белә бир адам варса, вахт итирмәдән онунла әлагә сахлајын вә дәрс кечмәји тәклиф един. Она «Мүгәддәс Китаб дәрсләри неҹә кечирилир?»d адлы видеону ҝөстәрин.

ШАҜИРДИ ЈЫҒЫНҸАГДА ДОСТЛАР ТАПМАҒА ТӘШВИГ ЕДИН

10. 1 Салоникилиләрә 2:7, 8 ајәләринә әсасән, мүәллимләр һәвари Булусдан нә өјрәнә биләр?

¹⁰ Мүәллимләр шаҝирдләринә сәмими мараг ҝөстәрмәлидир. Онлара ҝәләҹәк баҹысы вә гардашы кими јанашмалыдыр. (1 Салоникилиләрә 2:7, 8 ајәләрини охујун.) Онлар үчүн кечмиш достлары илә мүнасибәтләрини кәсмәк вә Јеһоваја хидмәт етмәк үчүн лазыми дәјишикликләри етмәк асан дејил. Буна ҝөрә дә јығынҹагдакыларла достлашмаға көмәк един. Шаҝирдинизлә дост олун, она тәкҹә дәрс заманы јох, башга ҝүнләрдә дә вахт ајырын. Дәрсдән әлавә зәнҝ етмәк, месаж јазмаг вә ја ҝөрүшмәклә ҝөстәрәҹәксиниз ки, ону дүшүнүрсүнүз.

11. Јығынҹагда шаҝирдә һансы саһәдә көмәк етмәлијик вә нә үчүн?

¹¹ Белә бир мәсәл вар: «Елдән дәрс алан лоғман олар». Мәсәли өз вәзијјәтимизә ујғунлашдырыб белә дејә биләрик: «Бүтүн јығынҹагдан дәрс алан вәфтиз олунар». Елә буна ҝөрә дә јахшы мүәллимләр шаҝирдләрини јығынҹагдакы баҹы-гардашларла таныш едирләр, чүнки онлар да шаҝирдин Јеһоваја јахынлашмасына тәкан верә биләр. Беләҹә, шаҝирд Јеһованын халгына гајнајыб-гарышаҹаг, онлардан руһани вә мәнәви дәстәк алаҹаг. Истәјирик ки, шаҝирд өзүнү јығынҹаға јад һисс етмәсин, өзүнү руһани аиләмизин бир үзвү кими ҝөрсүн. Севҝи долу мәсиһи гардашлығынын арасында олмаг истәсин. Бунун сајәсиндә она Јеһоваја јахынлашмасына әнҝәл олаҹаг инсанларла сых мүнасибәтә сон гојмаг даһа асан олаҹаг (Мәс. 13:20). Әҝәр көһнә достлары ондан үз дөндәрәрсә, биләҹәк ки, Јеһованын тәшкилатында әсл достлары вар (Марк 10:29, 30; 1 Бут. 4:4).

ВӘФТИЗИН ВАҸИБЛИЈИНИ ВУРҒУЛАЈЫН

12. Нәјә ҝөрә шаҝирдимизлә һәср олунма вә вәфтиз барәдә данышмалыјыг?

¹² Һәср олунма вә вәфтиз барәдә ачыг данышын. Ахы дәрс кечмәкдә мәгсәдимиз шаҝирдә Јеһованын вәфтиз олунмуш хидмәтчиси олмаға көмәк етмәкдир. Мүнтәзәм дәрс кечмәјә башлајандан бир нечә ај сонра, хүсусилә дә јығынҹаглара ҝәлмәјә башлајандан сонра шаҝирд баша дүшмәлидир ки, мәгсәд Јеһованын Шаһиди олмасына көмәк етмәкдир.

13. Һансы аддымлар шаҝирди вәфтизә апарыр?

¹³ Вәфтиз олунмаг истәјән шаҝирд аддымбааддым ирәлиләјиб мәгсәдинә чатыр! Илк нөвбәдә, о, Јеһованы таныјыр, үрәјиндә Она севҝи вә иман јараныр (Јәһ. 3:16; 17:3). Бундан сонра о, Јеһоваја јахынлашыр вә јығынҹагдакы баҹы-гардашларла достлашыр (Ибр. 10:24, 25; Јаг. 4:8). Нәтиҹәдә, пис әмәлләриндән әл чәкиб, ҝүнаһларындан төвбә едир (Һәв. 3:19). Бу мүддәт әрзиндә иманы ону өјрәндикләрини башгаларына данышмаға тәшвиг едир (2 Кор. 4:13). Сонра о өзүнү Јеһоваја һәср едиб, бунун рәмзи олараг вәфтиз олунур (1 Бут. 3:21; 4:2). Һәмин ҝүн һамы үчүн неҹә дә хошбәхт ҝүндүр! Шаҝирдин мәгсәдинә доғру атдығы һәр аддымында ону үрәкдән тәрифләјин вә даһа да ирәли ҝетмәјә тәшвиг един.

ВАХТАШЫРЫ ШАҜИРДИН ИНКИШАФЫНЫ ЈОХЛАЈЫН

14. Мүәллим шаҝирдин инкишафыны неҹә мүәјјән едә биләр?

¹⁴ Шаҝирдин вәфтизә һазыр олмасына көмәк едәркән сәбирли олмалыјыг. Амма бунунла јанашы, шаҝирдин Јеһоваја хидмәт етмәк истәјиб-истәмәдијини мүәјјән етмәлијик. О, Исанын әмрләринә риајәт етмәјә чалышыр? Јохса садәҹә олараг Мүгәддәс Китабы өјрәнмәк она мараглы ҝәлир?

15. Шаҝирдин инкишафынын ҝөстәриҹиси кими мүәллим нәләрә фикир вермәлидир?

¹⁵ Мүнтәзәм олараг шаҝирдин инкишафыны јохлајын. Мәсәлән, о, Јеһоваја бәсләдији һиссләри ифадә едир? Она дуа едир? (Зәб. 116:1, 2). Мүгәддәс Китабы һәвәслә охујур? (Зәб. 119:97). Ибадәт ҝөрүшләриндә мүнтәзәм иштирак едир? (Зәб. 22:22). Һәјатында һансыса дәјишикликләр едиб? (Зәб. 119:112). Өјрәндикләрини аиләсинә вә достларына данышмаға башлајыб? (Зәб. 9:1). Ән әсасы, Јеһованын Шаһиди олмаг истәјир? (Зәб. 40:8). Әҝәр шаҝирд бу саһәләрин һеч бириндә ирәлиләјиш етмәјибсә, нәзакәтли шәкилдә бунун сәбәбини өјрәнин, сонра мүлајим, амма ачыг шәкилдә онунла бу барәдә данышынe.

16. Дәрси һансы һалларда дајандырмаг лазымдыр?

¹⁶ Вахташыры дүшүнүн ки, дәрси давам етдирмәјә дәјәр, ја јох. Нөвбәти суаллар гәрар вермәјә көмәк едәҹәк: «Шаҝирд дәрсләрә һазырлашыр? Јығынҹаглара ҝәлмәк онун үчүн мараглыдыр? Пис вәрдишләриндән әл чәкиб? Јалан диндән чыхыб?» Әҝәр бу суаллара «хејр» ҹавабы верирсинизсә, дәрси давам етдирмәјиниз исланмаг истәмәјән инсана үзҝүчүлүјү өјрәтмәјә бәнзәјир. Әҝәр шаҝирд өјрәндикләрини гијмәтләндирмирсә, дәјишиклик етмәк истәмирсә, онунла дәрс кечмәјин мәнасы вар?

17. 1 Тимутијә 4:16 ајәсинә әсасән, Мүгәддәс Китабы өјрәдән бүтүн мүәллимләрдән нә ҝөзләнилир?

¹⁷ Биз шаҝирд һазырламаг тапшырығына ҹидди јанашырыг вә шаҝирдләримизин руһән инкишаф едиб, вәфтиз олунмасына көмәк етмәк истәјирик. Буна ҝөрә дә имкан верәҹәјик ки, Мүгәддәс Китаб данышсын, һәмчинин шөвглә вә әминликлә тәлим верәҹәјик. Шаҝирди јығынҹагда достлар тапмаға тәшвиг едәҹәјик. Гаршысына вәфтиз олунмаг мәгсәдини гојмағын ваҹиблијини вурғулајаҹағыг вә вахташыры шаҝирдин инкишафыны нәзәрдән кечирәҹәјик. («Шаҝирдин вәфтиз олунмасы үчүн мүәллим нә етмәлидир?» адлы чәрчивәјә бахын.) Һәјатлары хилас едән бу ишдә иштирак етдијимиз үчүн чох хошбәхтик! Ҝәлин дәрс кечдијимиз шаҝирдин вәфтиз олунмасы үчүн әлимиздән ҝәләни етмәјә әзмли олаг.