Охуҹуларын суаллары

1 Тимутијә 5:21 ајәсиндәки «сечилмиш мәләкләр» кимләрдир?

Һәвари Булус ағсаггал әмәкдашы Тимутијә јазмышды: «Аллаһын, Мәсиһ Исанын вә сечилмиш мәләкләрин гаршысында сәнә тапшырырам: бу ҝөстәришләрә әмәл ет, гәрар вермәздән әввәл һәр шеји диггәтлә вә гәрәзсиз арашдыр» (1 Тим. 5:21).

Әввәлҹә ҝөрәк бу мәләкләрин сырасында кимләр ола билмәз. Ајдын мәсәләдир ки, бу, 144 000 мәсһ олунмуш дејил. Булус Тимутијә мәктуб јазанда мәсһ олунмуш мәсиһиләрин ҝөјләр һәјатына дирилмәси һәлә башламамышды. Нә һәвариләр, нә дә башга мәсһ олунмушлар һәлә руһани варлыг олмамышдылар. Буна ҝөрә дә «сечилмиш мәләкләр» онлар дејил (1 Кор. 15:50—54; 1 Салон. 4:13—17; 1 Јәһ. 3:2).

Һәмчинин Дашгын заманы итаәтсизлик етмиш мәләкләр дә «сечилмиш мәләкләр» ола билмәз. Онлар Шејтанын тәрәфини тутараг ҹин олдулар вә Исанын дүшмәнинә чеврилдиләр (Јар. 6:2; Лука 8:30, 31; 2 Бут. 2:4). Ҝәләҹәкдә онлар 1000 ил мүддәтинә буховланаҹаглар, сонра исә Иблислә бәрабәр мәһв едиләҹәкләр (Јһд. 6; Вәһј 20:1—3, 10).

Онда белә чыхыр ки, Булус «сечилмиш мәләкләр» дејәндә «Аллаһын [вә] Мәсиһ Исанын» тәрәфиндә олан ҝөјдәки мәләкләрдән данышырды.

Јеһованын он минләрлә садиг мәләји вар (Ибр. 12:22, 23). Дүшүнмәмәлијик ки, онларын һамысы ејни вахтда ејни иши ҝөрүр (Вәһј 14:17, 18). Јадыныздадырса, бир мәләк ашшурлуларын 185 000 әсҝәрини өлдүрмәк тапшырығыны алмышды (2 Пад. 19:35). Ола билсин, хејли сајда мәләјә «ҝүнаһа сүрүкләјән һәр шеји вә ганунсуз ишләр ҝөрән һәр кәси [Исанын] Падшаһлығындан јығ»маг һәвалә олунуб (Мәт. 13:39—41). Диҝәр мәләкләр, ҝөрүнүр, «Онун сечдикләрини» ҝөјә јығырлар (Мәт. 24:31). Бир башгаларына исә аддымларымызы горумаг тапшырылыб (Зәб. 91:11; Мәт. 18:10; Мәтта 4:11 вә Лука 22:43 ајәләри илә әлагәләндирин).

Мәләк саһә хидмәтиндә олан әр-арвады бир евә јөнәлдир. Һәмин евдә бир нәфәр дуа едир.

1 Тимутијә 5:21 ајәсиндәки «сечилмиш мәләкләр», чох јәгин ки, Јеһованын халгы илә бағлы хүсуси өһдәликләри олан мәләкләрдир. Контекстә баханда ҝөрмәк олар ки, Булус ағсаггаллара һикмәтли мәсләһәтләр верир вә онларын һөрмәтә лајиг олдуғуну гејд едир. Ағсаггаллар мәсулијјәтләрини «гәрәзсиз» јеринә јетирмәлидирләр вә гәрар вермәздән әввәл һәр шеји «диггәтлә» арашдырмалыдырлар. Онлар Булусун бу мәсләһәтинә ҹидди јанашмалыдырлар, чүнки «Аллаһын, Мәсиһ Исанын вә сечилмиш мәләкләрин гаршысында» хидмәт едирләр. Демәли, бәзи мәләкләрин иши јығынҹагла бағлыдыр: онлар Аллаһын халгыны горујур, тәблиғ ишинә нәзарәт едир вә һәр шеји диггәтлә мүшаһидә едиб Јеһоваја хәбәр апарырлар (Мәт. 18:10; Вәһј 14:6).