РӘҺБӘРЛИК ШУРАСЫНЫН МӘКТУБУ

«АТАМЫЗ Аллаһ вә Рәбб Иса Мәсиһдән сизә лүтф вә сүлһ олсун!» Јығынҹаглара јаздығы мәктубларын чохуну Павел бу ҹүр диләклә башлајырды. Биз дә өз мәктубумузу белә бир диләклә башламаг истәјирик (Ефес. 1:2).

Иса Мәсиһин фидијә гурбанлығында зүһур етмиш Аллаһын лүтфү бизим үчүн неҹә дә гијмәтлидир! Фидијәнин сајәсиндә Аллаһ бизи салеһ сајыр. Һәтта дајанмадан Мүгәддәс Китабы өјрәнсәјдик, хош хәбәри тәблиғ етсәјдик вә ја башга јахшы ишләр ҝөрсәјдик белә, биз һеч заман буна өз гүввәмизлә наил ола билмәздик. Ҝүнаһларымызын бағышланмасыны вә әбәди һәјаты ҝөстәрдијимиз сә’јин мүгабилиндә верилән әмәк һаггы кими алмырыг. Бунлар Аллаһын Иса Мәсиһ васитәсилә ҝөстәрдији лүтфүнү ифадә едән бәхшишләрдир (Ром. 11:6).

Павел һәмиманлыларына јазырды: «Биз... сизә јалварырыг ки, Аллаһын лүтфүнү бош јерә гәбул етмәјәсиниз. Чүнки О дејир: “Сәни мүнасиб вахтда ешитдим вә хилас ҝүнүндә сәнә јардым етдим”. Бах инди мүнасиб вахтдыр, инди хилас ҝүнүдүр». Бу ҹүр ‘мүнасиб вахтдан’ бири биринҹи әсрдә Јерусәлимин дағыдылмасындан әввәл олмушдур. Јеһованы севән сәмими инсанлар руһани мә’нада хилас едилмишдиләр. Бунун нәтиҹәси о олмушдур ки, ерамызын 70-ҹи илиндә Јерусәлим дағыдыланда, шәһәрдән гачан бүтүн садиг адамлар сөзүн әсл мә’насында һәјатларыны хилас етмишдиләр (2 Кор. 6:1, 2).

Бу ҝүн биз дә ‘мүнасиб вахтда’ вә ‘хилас ҝүнүндә’ јашајырыг. Јеһованын Өз хидмәтчиләри кими гәбул етдији инсанлар вә руһани мә’нада хилас олунанлар, лап јахында олан «Рәббин мөһтәшәм ҝүнү»ндән сағ чыхмаға үмид бәсләјирләр (Сеф. 1:14).

Јеһованын јахынлашмагда олан ҝүнү һаггында билијә саһиб олмағымыз бизим үзәримизә ҹидди мәс’улијјәт гојур. Биринҹиси, биз инсанлары хәбәрдар етмәлијик. Икинҹиси, һәлим инсанларын да хилас олунмалары вә Јеһованын лүтфүнә һај вермәләри үчүн онлара көмәк етмәлијик. Павел башгалары гаршысында олан мәс’улијјәтини дәрк едирди. О јазырды: «Әҝәр Мүждәни... тәблиғ етмирәмсә, вај һалыма!» Ону тәблиғ етмәјә тәшвиг едән нә иди? О јазырды: «Мүдрикләрә вә ҹаһилләрә борҹлујам. Беләликлә... вар ҝүҹүмлә Мүждәни тәблиғ етмәјә һазырам» (1 Кор. 9:16; Ром. 1:14, 15).

Инсанлары хәбәрдарлыг етмәк ишини Јеһова чох ваҹиб саныр: әҝәр биз бу тапшырыға е’тинасыз јанашсаг, Аллаһ бизи мәс’улијјәтә ҹәлб едәҹәк. Биз Јеһованын Језекелә нә дедијини хатырлајырыг: «Еј бәшәр оғлу, сәни Исраил нәслинә ҝөзәтчи гојдум. Сән сөзү ағзымдан ешидәндә Мәним адымдан онлара хәбәрдарлыг ет. Мән пис адама “һөкмән өләҹәксән” дедијим заман сән она хәбәрдарлыг етмәсән, һәјаты гуртулсун дејә пис адамы өз шәр әмәлиндән дөндәрмәк үчүн хәбәрдарлыг сөзү сөјләмәсән, онда о пис адам өз тәгсири ичиндә өләҹәк, лакин онун ганы үчүн мәс’улијјәти Мән сәнин үзәринә гојаҹағам» (Јез. 3:17, 18).

Бу сон ҝүнләрдә јашамаг олдугҹа чәтиндир. Сизин чохсајлы вәзифәләриниз вар: аилә, иш, мәктәб, јығынҹагдакы ишләр вә тәблиғ хидмәти. Бундан әлавә, бир чохлары хәстәлик, мә’јуслуг вә јашла әлагәдар насазлыг кечирир вә һәтта тә’гибләрә мә’руз галырлар. Бүтүн бунларын һамысы, доғрудан да, ағыр јүкдүр. Иса кими, биз дә сизин дәрдинизә шәрикик. О демишдир: «Еј бүтүн јорғунлар вә јүкләри ағыр оланлар, Мәним јаныма ҝәлин вә Мән сизә раһатлыг верәрәм» (Мат. 11:28). Мүхтәлиф сынаглара бахмајараг Јеһоваја сәдагәтлә хидмәт етмәјә чалышан сизләрин һамысына үрәкдән миннәтдарлығымызы билдирмәк истәјирик.

Сизин сә’јлә тәблиғ етмәјиниз вә шаҝирдләр һазырламағыныз, һәмчинин Јеһованын хејир-дуасы сајәсиндә һәр һәфтә бүтүн дүнјада орта һесабла 4 764 адам вәфтиз олунмушдур. Өтән хидмәт или әрзиндә 1 417 јени јығынҹаг тәшкил олунмушдур. Биз дуа едирик ки, артыг 120-дән чох дилдә нәшр олунан «Мүгәддәс Китаб әслиндә нәји өјрәдир?» адлы јени китаб, милјонларла инсанлара бу «хилас ҝүнүндә» Јеһовадан лүтф вә сүлһ алмаға көмәк етсин. Үмид едирик ки, Јеһова үмидләримизи һәјата кечирәҹәк.

Әмин олун ки, Рәһбәрлик шурасы сизи севир вә сизин үчүн дуа едир. Һәмчинин бизим үчүн дуа етдијинизә ҝөрә сизә өз миннәтдарлығымызы билдирмәк дә истәјирик.

Сизин гардашларыныз,

Јеһованын Шаһидләринин Рәһбәрлик шурасы