Һашијәләр

⁶ «Амос» китабынын Мүгәддәс Јазыларын канонуна мәхсус олмасы шүбһә доғурмамалыдыр. Стефанын Һәвариләрин ишләри 7:42, 43 ајәләриндә бу китабдан үч ајәни нәгл етмәси, һәмчинин Јагубун Һәвариләрин ишләри 15:15-18 ајәләриндә ондан ситат ҝәтирмәси онун доғрулуғуну гәти сурәтдә тәсдиг едир (Амос 5:25-27; 9:11, 12).

БИЗӘ ФАЈДАСЫ

¹³ Амосун Исраилә, Јәһудаја вә онларын гоншуларына е’лан етдији хәбәрдарлыгларын сәбәбинә диггәт јетирмәк, Мүгәддәс Китабын мүасир охуҹулары үчүн фајдалы оларды. Јеһованын ганунуну рәдд едәнләр, касыблары алдаданлар вә сыхышдыранлар, тамаһкарлар, әхлагсызлар вә бүтләрә итаәт едәнләр Јеһованын рәғбәтини газана билмәзләр. Амма бу ҹүр ишләрдән төвбә едиб әл чәкәнләри Јеһова бағышлајыр вә онлара лүтф ҝөстәрир. Әҝәр биз позғун үнсијјәтдән аралы ҝәзир вә Јеһованын «Мәнә тәрәф дөнүн ки, сағ галасыныз» төвсијәсинә гулаг асырыгса, демәли ағылла давранырыг (5:4, 6, 14).

¹⁴ Ишҝәнҹәли өлүмүндән әввәл Стефан Амосун китабындан ситат ҝәтирди. О, јәһудиләрә, Исраилин Молох вә Ремфан кими јад аллаһлара итаәт етдији үчүн әсирлијә дүшдүјүнү хатырлатды. Јәһудиләр «Амос» китабындакы хәбәрдарлыгдан бир нәтиҹә чыхартдылармы? Хејр! Онлар гәзәбләниб Стефаны даш-галаг етдиләр, бунунла да онлар өзләрини б. е. 70-ҹи илиндә Јерусәлимин дармадағын едилдији заман бу халгы һагламыш даһа бир бәдбәхтлијә дүчар етдиләр (Амос 5:25-27; Һәв. иш. 7:42, 43).

¹⁵ Амосун тәкҹә Исраилин, Јәһуданын вә диҝәр халгларын алдыглары ҹәзалар һаггында чохсајлы пејғәмбәрликләринә дејил, һәмчинин бәрпа едилмә һаггындакы пејғәмбәрликләринә дә нәзәр салмаг чох фајдалыдыр. Јеһованын Амос васитәсилә дедији сөзләринә сүбут олараг, б. е. ә. 537-ҹи илдә исраиллиләр әсирликдән гајытдылар ки, виран галмыш шәһәрләрини тикиб мәскунлашсынлар вә орада бағлар, үзүмлүкләр салсынлар (Амос 9:14; Езра 3:1).

¹⁶ Амосун даһа бир пејғәмбәрлијинин һәвариләрин ҝүнләриндә һејрәтамиз шәкилдә јеринә јетмәси диггәтәлајигдир. Мәсиһчи јығынҹағына гејри-исраиллиләрин дахил олаҹағы мүзакирә едиләндә, Јагуб Аллаһдан илһам алараг, бунун Амос 9:11, 12 ајәләриндә габагҹадан дејилдијини изаһ етди. О, ҝөстәрди ки, ‘Давудун јыхылмыш мәскәнинин јенидән гурулаҹағы’ һаггындакы пејғәмбәрлик мәсиһчи јығынҹағы үзәриндә јеринә јетди. Орада охујуруг: «Галан инсанлар вә Өзүмә аид олмаг үчүн чағырдығым бүтүн халглар Рәбби ахтарсынлар. Бунларын һамысыны едән Рәбб белә дејир». Бу, шүбһәсиз ки, јени тәшкилати гурулуш јаранаҹағына даир Мүгәддәс Китабда дејиләнләрин тәсдиги иди. Шимон Петерин дедији кими, Аллаһ мүхтәлиф халглардан ‘Өз ады наминә бир халг тәшкил едир’ (Һәв. иш. 15:13-19).

¹⁷ Мүгәддәс Јазыларын башга бир һиссәсиндә мәсиһчи јығынҹағынын башчысы Иса Мәсиһин «Давуд оғлу» адландырылараг, «атасы Давудун тахтыны» мирас алаҹағы вә әбәди падшаһлыг едәҹәји дејилир (Лука 1:32, 33; 3:31). Беләликлә, Амосун пејғәмбәрлији Давудла бағланмыш падшаһлыг әһдинин һәјата кечдијинә ишарә едир. Амосун јекун сөзләри «Давудун чадырынын» бәрпасы дөврүндәки боллуг вә чичәкләнмәни тәсвир етмәклә јанашы, һәмчинин Аллаһын Падшаһлығынын сабитлијини вурғулајыр: «“Онлары өзләринин торпағында јерләшдирәҹәјәм, Онлара вердијим торпагдан бир даһа кәнара атылмајаҹаглар” Аллаһын Рәбб белә дејир». Јеһова «Давудун чадырыны» тамамилә бәрпа етдикдән сонра јер үзүндә бол-бол даими хејир-дуа олаҹаг! (Амос 9:13-15).