Үмид верән чәтинликләр

«Ахыр ҝүнләрдә сон дәрәҹә ағыр бир зәманә ҝәләҹәк» (2 ТИМОТЕЈӘ 3:1).

ОЛА БИЛСИН, сиз ашағыда садаланан дәһшәтли һадисәләр һагда ја ешитмисиниз, ја да онларын шаһиди олмусунуз.

● Өлүмҹүл хәстәликләр чохлу сајда инсан һәјатына баис олур.

● Аҹлыг јүзләрлә инсанын өлүмүнә сәбәб олур.

● Зәлзәләдә минләрлә адам өлүр, сајсыз-һесабсыз инсанлар исә евсиз-ешиксиз галыр.

Әлиниздә тутдуғунуз журналын нөвбәти сәһифәләриндә бу кими һадисәләрлә бағлы бәзи дүшүндүрүҹү фактлар ҝәтирилир. Ејни заманда, орада дејилир ки, Мүгәддәс Китаба әсасән, бу әламәтләр «ахыр ҝүнләр» адланан дөврү характеризә едир.

Анҹаг бу мәгаләләрин мәгсәди сизи әзаб-әзијјәтләрлә долу бир дүнјада јашадығыныза инандырмаг дејил. Онсуз да сиз өзүнүз бу проблемләри ҝөрүрсүнүз. Башлыҹа мәгсәд сизә үмид верәҹәк хәбәри чатдырмагдыр. Бурада ҝөстәрилән алты пејғәмбәрлијин јеринә јетмәси «ахыр ҝүнләр»ин тезликлә сона чатаҹағыны билдирир. Һәмчинин бу мәгаләләрдә бунунла бағлы ирәли сүрүлән бәзи ҝениш јајылмыш етиразлар нәзәрдән кечириләҹәк вә јахын ҝәләҹәкдә ҝөзәл ҝүнләрин олаҹағына инанмағыныза әсас верән сәбәбләр арашдырылаҹаг.

1. Зәлзәләләр

«Ҝүҹлү зәлзәләләр олаҹаг» (ЛУКА 21:11).

● Һаитидә баш вермиш зәлзәләнин нәтиҹәләри һагда сүжет һазырлајан чәкилиш һејәти зәиф инилти сәси ешидир. Бу, 16 ајлыг Виннинин сәси иди. Балаҹа гызҹығазы дағынтыларын алтындан чыхардырлар. О, сағ галыр, валидејнләри исә јох.

ФАКТЛАР НӘЈИ ҜӨСТӘРИР? 2010-ҹу илин јанварында Һаитидә 7 бал ҝүҹүндә баш вермиш зәлзәләдә 300 000-дән чох инсан һәјатыны итирди. Үстәлик, 1,3 милјон инсан евсиз-ешиксиз галды. Анҹаг бу дәһшәтли зәлзәлә јеҝанә һал дејилди. 2009-ҹу илин апрел ајындан 2010-ҹу илин апрел ајына гәдәр бүтүн дүнјада ән азы 18 ҝүҹлү зәлзәлә гејдә алыныб.

ЕТИРАЗЛАР. Демәк олмаз ки, зәлзәләләрин сајы артыб, садәҹә олараг кечмишә баханда бу ҝүн мүасир технолоҝијанын сајәсиндә онлар һагда бизим даһа чох хәбәримиз олур.

БУ ЕТИРАЗЛАР ӘСАСЛЫДЫРМЫ? Бир факта нәзәр салаг: Мүгәддәс Китабда ахыр ҝүнләрдә баш верәҹәк зәлзәләләрин сајы гејд олунмајыб. Анҹаг «бир чох јерләрдә» «ҝүҹлү зәлзәләләр»ин олаҹағы дејилир; һәмчинин орада ҝөстәрилир ки, бунлар тарихин ән ваҹиб дөврүнүн сәҹијјәви әламәти олаҹаг (Марк 13:8; Лука 21:11).

СИЗ НЕҸӘ ДҮШҮНҮРСҮНҮЗ? Мүгәддәс Китабда габагҹадан дејилдији кими, ҝүҹлү зәлзәләләр баш верирми?

Зәлзәләләр ахыр ҝүнләрдә јашадығымыза дәлаләт едән јеҝанә сәбәб дејил. Бу, јеринә јетән пејғәмбәрликләрдән садәҹә биридир. Ҝәлин нөвбәти пејғәмбәрлији нәзәрдән кечирәк.

[4–ҹү сәһифәдәки јазы]

«Биз [ҝеофизикләр] онлары ҝүҹлү, башгалары исә дәһшәтли зәлзәләләр адландырыр» (КЕН ҺАДНАТ, АБШ-ЫН ҜЕОЛОЖИ ХИДМӘТИ).

[4–ҹү сәһифәдәки шәкил. Иҹазә илә]

© William Daniels/Panos Pictures

2. Аҹлыг

«Гытлыг олаҹаг» (МАРК 13:8).

● Бир киши сығынмаг үчүн Ниҝеријанын Гуаратаджи кәндинә ҝәлир. Онун халасы ушаглары, гардашлары вә баҹылары да аҹындан өлмәмәк үчүн өлкәнин уҹгар јерләриндән ора көчүрләр. Лакин о, тәк-тәнһа һәсирин үстүндә јердә јатыр. Нәјә ҝөрә? Сиди адлы кәндин ағсаггалы бунун сәбәбини белә изаһ едир: «О, [аиләсини] јемәклә тәмин едә билмәдији үчүн онларын үзүнә баха билмир».

ФАКТЛАР НӘЈИ ҜӨСТӘРИР? Дүнјада тәхминән 7 нәфәрдән 1-и дојунҹа јемәк јејә билмир. Бөјүк Сәһранын ҹәнубунда исә вәзијјәт даһа бетәрдир — һәр 3 нәфәрдән 1-и даими аҹлыг чәкир. Мөвҹуд вәзијјәти баша дүшмәк үчүн ата, ана вә ушагдан ибарәт олан бир аиләни ҝөтүрәк. Әҝәр јемәк ики нәфәрә анҹаг чатырса, бәс онда аҹ галан ким олаҹаг? Ата? Ана? Јохса ушаг? Бир чох аиләләр һәр ҝүн бу ҹүр сечим гаршысында дурурлар.

ЕТИРАЗЛАР. Јер артыгламасы илә мәһсул јетирир. Садәҹә олараг јерин ресурсларыны дүзҝүн шәкилдә бөлүшдүрмәк лазымдыр.

БУ ЕТИРАЗЛАР ӘСАСЛЫДЫРМЫ? Әслиндә, бу ҝүн һәмишәкиндән даһа чох мәһсул истеһсал олунур вә идхал едилир. Дөвләт рәһбәрләри аҹлыг проблемини һәлл етмәк үчүн гида мәһсулларыны дүзҝүн шәкилдә бөлүшдүрмәји баҹармалыдырлар. Анҹаг он илләр әрзиндә онларын ҝөстәрдикләри ҹәһдләр боша чыхмышдыр.

СИЗ НЕҸӘ ДҮШҮНҮРСҮНҮЗ? Марк 13:8 ајәсиндәки сөзләр јеринә јетирми? Технолоҝијанын инкишаф етмәсинә бахмајараг, дүнја һәлә дә аҹлыгдан әзијјәт чәкирми?

Зәлзәләләр вә аҹлыг адәтән ахыр ҝүнләрин нөвбәти бир әламәтинә јол ачыр.

[5–ҹи сәһифәдәки јазы]

«Вәрәм, исһал вә диҝәр хәстәликләр уҹбатындан һәјатыны итирән ушагларын үчдә бириндән чоху лазымынҹа гидалансајды, өлмәзди» (АНН ВЕНЕМАН, ЈУНИСЕФИН КЕЧМИШ ИҸРАЧЫ ДИРЕКТОРУ).

[5–ҹи сәһифәдәки шәкил. Иҹазә илә]

© Paul Lowe/Panos Pictures

3. Хәстәликләр

«Бир чох јерләрдә епидемијалар олаҹаг» (ЛУКА 21:11).

● Вәтәндаш мүһарибәси ҝедән Африка өлкәләриндән бириндә Бонзали адлы тибб ишчиси өлүмҹүл хәстәлик олан Марбурҝ вирусуна јолухмуш шахтачылара көмәк етмәк үчүн әлиндән ҝәләни әсирҝәмирдиa. Бонзалинин көмәк үчүн бөјүк шәһәрдәки сәлаһијјәтли даирәләрә мүраҹиәт етмәсинә бахмајараг, һеч бир ҹаваб верилмәмишди. Ҹаваб дөрд ајдан сонра ҝәлди, анҹаг артыг ҝеҹ иди, Бонзали өлмүшдү. Чүнки о, шахтачылара көмәк едәркән өзү дә Марбурҝ вирусуна јолухмушду.

ФАКТЛАР НӘЈИ ҜӨСТӘРИР? Тәнәффүс јолу вә ағҹијәр хәстәликләри (мәсәлән, пневманија), исһал, ГИЧС, вәрәм вә малјарија бәшәријјәти мәһв едән ән дәһшәтли хәстәликләр сырасындадыр. Тәкҹә 2004-ҹү илдә бу хәстәликләр 10,7 милјон инсанын өлүмүнә сәбәб олмушдур. Бу да о демәкдир ки, ил әрзиндә һәр 3 санијәдән бир инсан өлүр.

ЕТИРАЗЛАР. Дүнја әһалиси артдыгҹа, мүвафиг олараг, хәстәликләрә јолухма һалларынын сајы да артыр.

БУ ЕТИРАЗЛАР ӘСАСЛЫДЫРМЫ? Дүздүр, дүнја әһалиси сүрәтлә артыб, анҹаг инсанлар да хәстәликләрин диагностикасында, мүајинә вә мүалиҹәсиндә хејли наилијјәтләр әлдә едибләр. Бүтүн бунлары нәзәрә алсаг, мәнтигли олараг хәстәликләр вә онларын тәсири ҝет-ҝедә азалмалы дејилми? Анҹаг тамамилә бунун әкси баш верир.

СИЗ НЕҸӘ ДҮШҮНҮРСҮНҮЗ? Мүгәддәс Китабда пејғәмбәрлик едилдији кими, инсанлар дәһшәтли хәстәликләрдән әзаб чәкирләрми?

Зәлзәлә, аҹлыг вә хәстәлик милјонларла инсанын һәјатыны әлиндән алан кәнар тәсирләрдир. Анҹаг даһа чох инсан исә өз јахынларынын — онлары горумалы олан инсанларын әлиндән әзијјәт чәкир. Ҝәлин Мүгәддәс Китабын бу һагда габагҹадан нә дедијинә нәзәр салаг.

[Һашијә]

[6–ҹы сәһифәдәки јазы]

«Ширин вә ја башга бир вәһши һејванын инсаны парчалајыб јемәси нә гәдәр дәһшәтлидирсә, хәстәлијин инсаны дахилдән јејиб-битирмәси вә киминсә ҝөзүнүн габағында ҝүнү-ҝүндән әримәси даһа дәһшәтлидир» (ЕПИДЕМИОЛОГ МАЈКЛ ОСТЕРҺОЛМ).

[6–ҹы сәһифәдәки шәкил. Иҹазә илә]

© William Daniels/Panos Pictures

4. Севҝинин сојумасы

«Инсанлар. . . доғмаларыны севмәјән олаҹаглар» (2 ТИМОТЕЈӘ 3:1—3).

● Крис Шимали Уелсдә аиләдә зоракылыгдан әзијјәт чәкәнләрә көмәк едән групда хидмәт едир. О дејир: «Јадымдадыр, јаныма бир гадын ҝәлмишди, о, елә вәһшиҹәсинә дөјүлмүшдү ки, әввәлләр ону ҝөрдүјүмә бахмајараг, таныја билмәмишдим. Диҝәр гадынлар исә, мәнәви ҹәһәтдән елә зәрбә алырлар ки, утандыгларындан башгаларынын үзүнә баха билмирләр».

ФАКТЛАР НӘЈИ ҜӨСТӘРИР? Бир Африка өлкәсиндә, демәк олар ки, һәр 3 гадындан 1-и артыг ушаг вахтындан ҹинси зоракылыға мәруз галмышдыр. Һәмин өлкәдә кечирилән сорғуја әсасән, кишиләрин үчдә бириндән чоху арвадыны дөјмәкдә пис бир шеј ҝөрмүр. Анҹаг аиләдә зоракылыгдан әзијјәт чәкән тәкҹә гадынлар дејил. Мәсәлән, Канадада һәр 10 кишидән 3-ү арвады тәрәфиндән дөјүлүр вә ја тәһгир олунур.

ЕТИРАЗЛАР. Аиләдә зоракылыг һәмишә олуб. Садәҹә олараг бизим ҝүнләрдә бу шејләрә әввәлкинә нисбәтән даһа чох диггәт јетирилир.

БУ ЕТИРАЗЛАР ӘСАСЛЫДЫРМЫ? Дүздүр, сон он илликләр әрзиндә бу проблем даһа чох мүзакирә олунур. Бәс бунларын аиләдә зоракылыг һалларынын азалмасына бир хејри дәјибми? Хејир. Әксинә, һеч вахт доғмалар арасында буҝүнкү гәдәр сојуглуг олмајыб.

СИЗ НЕҸӘ ДҮШҮНҮРСҮНҮЗ? 2 Тимотејә 3:1—3 ајәләриндәки сөзләр јеринә јетирми? Сизҹә, инсанлар өз аиләләриндә ҝөрмәли олдуглары севҝини ҝөрүрләрми?

Бу ҝүн јеринә јетән нөвбәти пејғәмбәрлик исә јашадығымыз Јер күрәси илә бағлыдыр. Ҝәлин бу барәдә Мүгәддәс Китабда нә дејилдијинә бахаг.

[7–ҹи сәһифәдәки јазы]

«Аиләдә зоракылыг ән аз гејдә алынан ҹинајәтләрдән биридир. Орта һесабла бир гадын әри тәрәфиндән 35 дәфә зоракылыға мәруз галдыгдан сонра полисә мүраҹиәт едир» (УЕЛСИН АИЛӘДӘ ЗОРАКЫЛЫГДАН ӘЗИЈЈӘТ ЧӘКӘНЛӘРӘ КӨМӘК ХИДМӘТИНИН ТӘМСИЛЧИСИ).

5. Јерин тәләф олунмасы

«[Аллаһ] јери тәләф едәнләри тәләф едәҹәк» (ВӘҺЈ 11:18).

● Ниҝеријанын Кпор кәндиндә јашајан Пирри адлы бир нәфәр палма шәрабы һазырлајырды. О, Ниҝер чајынын делтасына бөјүк мигдарда нефт төкүлдүкдән сонра ишини дајандырмалы олду. О дејир: «Нефт балыгларымызы мәһв едир, дәримизи корлајыр, чајларымызы чиркләндирир. Артыг неҹә доланаҹағымы билмирәм».

ФАКТЛАР НӘЈИ ҜӨСТӘРИР? Експертләрин рәјинә әсасән, һәр ил океанлара 6,5 милјон тон зибил атылыр. Төкүлән зибилин јарысы пластик шејләрдир ки, онлар да чүрүјүб парчаланана гәдәр јүзилликләр кечир. Инсанларын јери чиркләндирмәләри аз имиш кими, үстәлик, тәбии сәрвәтләри дә алт-үст едирләр. Арашдырмалара ҝөрә, инсанларын бир илдә истифадә етдикләрини бәрпа етмәк үчүн бир ил јарым вахт тәләб олунур. Австралијада чыхан бир гәзетдә гејд олунур: «Әҝәр әһалинин сајы вә ресурсларын истифадәси бу сүрәтлә артмаға давам етсә, 2035-ҹи илдә бизә ики Јер күрәси лазым олаҹаг» («Сјднеј Морнинҝ Һералд»).

ЕТИРАЗЛАР. Инсанлар бу проблемләрдән дүзҝүн чыхыш јолу тапмаг үчүн кифајәт гәдәр ағыллыдырлар. Биз дүнјанын ҝедишатыны дәјишиб јер күрәсини мәһвдән гуртара биләрик.

БУ ЕТИРАЗЛАР ӘСАСЛЫДЫРМЫ? Бир чох инсанлар вә тәшкилатлар әтраф мүһитин чиркләнмәси илә бағлы ҹәмијјәти мәлуматландырмаға чалышырлар. Анҹаг бунунла белә јер үзү һәлә дә бөјүк мигјасда чиркләнмәјә мәруз галыр.

СИЗ НЕҸӘ ДҮШҮНҮРСҮНҮЗ? Планетимизин мәһвинин гаршысыны алмаг үчүн Аллаһын вердији вәди һәјата кечирәрәк мүдахилә етмәсинә еһтијаҹ вармы?

Нәзәрдән кечирдијимиз бу беш пејғәмбәрликдән әлавә, Мүгәддәс Китабда ахыр ҝүнләрдә нә исә јахшы бир шејин олаҹағындан да данышылыр. Нөвбәти пејғәмбәрлик буна бир нүмунәдир.

[8–ҹи сәһифәдәки јазы]

«Мәндә белә бир һисс вар ки, ҹәннәт ҝушәсинә бәнзәјән бу јер инди зәһәр пүскүрән зибилханаја чеврилиб» (МЕКСИКА КӨРФӘЗИ САҺИЛЛӘРИНДӘ ЈАШАЈАН ЕРИН ТАМБЕРИН 2010-ҸУ ИЛДӘ БАШ ВЕРӘН НЕФТ СЫЗМАСЫ ҺАГДА РӘЈИ).

[8–ҹи сәһифәдәки чәрчивә]

Тәгсиркар Аллаһдырмы?

Бу ҹүр пис шәраитин һөкм сүрәҹәји һагда Мүгәддәс Китабда хәбәр вердији үчүн Аллаһы бүтүн бунларда ҝүнаһландырмаг олармы? Чәкдијимиз әзабларын сәбәбкары Одурму? Сиз бу суаллара ганеедиҹи ҹавабы Јеһованын Шаһидләри тәрәфиндән дәрҹ олунмуш «Мүгәддәс Китаб әслиндә нә өјрәдир?» китабынын 11-ҹи фәслиндән тапа биләрсиниз.

[8–ҹи сәһифәдәки шәкил. Иҹазә илә]

U.S. Coast Guard photo

6. Үмумдүнја тәблиғ иши

«Падшаһлыг һаггындакы бу хош хәбәр... бүтүн јер үзүндә тәблиғ едиләҹәк» (МАТТА 24:14).

● Ваиатеа адлы гадын Сакит океанын Туамоту архипелагынын адаларындан бириндә јашајыр. Үмуми саһәси 802 900 квадрат километр олан 80 мәрҹан адасындан ибарәт Туамоту архипелагынын ҹәми 16 000 әһалиси вар. Бунунла белә, Ваиатеа вә гоншулары Јеһованын Шаһидләри илә танышдырлар. Бу да тәәҹҹүблү дејил, ахы Јеһованын Шаһидләри Аллаһын Падшаһлығы һагда хош хәбәри, һарада јашамаларындан асылы олмајараг, бүтүн инсанлара чатдырырлар.

ФАКТЛАР НӘЈИ ҜӨСТӘРИР? Аллаһын Падшаһлығы һагда хош хәбәр дүнјанын һәр јеринә чатдырылыр. Тәкҹә 2010-ҹу илдә Јеһованын Шаһидләри бу хәбәрин 236 өлкә вә әразидә тәблиғинә 1,6 милјард саат сәрф етмишләр. Бу да онлардан һәр биринин орта һесабла ҝүндә 30 дәгигә тәблиғ етдијини ҝөстәрир. Сон он ил әрзиндә Јеһованын Шаһидләри Мүгәддәс Китаба әсасланан 20 милјарддан чох әдәбијјат нәшр етмиш вә пајламышлар.

ЕТИРАЗЛАР. Мүгәддәс Китаба әсасланан хош хәбәр артыг нечә әсрдир ки, тәблиғ олунур.

БУ ЕТИРАЗЛАР ӘСАСЛЫДЫРМЫ? Дүздүр, чохлары Мүгәддәс Китабдан нә исә тәблиғ етмәјә ҹәһд ҝөстәрмишләр. Анҹаг онларын чоху бу иши гыса мүддәт әрзиндә вә кичик мигјасда ҝөрмүшләр. Јеһованын Шаһидләри исә бүтүн дүнјада мүтәшәккил шәкилдә фәалијјәт ҝөстәрир вә хош хәбәри јүз минләрлә инсана чатдырырлар. Онлар һәтта бәшәр тарихинин ән ҝүҹлү вә амансыз сијаси режимләринин мүгавимәтләри илә гаршылашанда белә тәблиғ етмәји дајандырмамышлар (Марк 13:13)a. Үстәлик, онлар буна ҝөрә мәваҹиб алмыр, вахтларыны көнүллү олараг бу ишә сәрф едир вә тәмәннасыз әдәбијјат пајлајырлар. Јеһованын Шаһидләринин фәалијјәти көнүллү ианәләр һесабына дәстәкләнир.

СИЗ НЕҸӘ ДҮШҮНҮРСҮНҮЗ? Падшаһлыг һаггында хош хәбәр бүтүн дүнјада тәблиғ олунурму? Ола биләрми ки, бу пејғәмбәрлијин јеринә јетмәси јахын ҝәләҹәкдә јахшылыға доғру дәјишикликләр олаҹағындан хәбәр версин?

[Һашијә]

[9–ҹу сәһифәдәки јазы]

«Һәлә ки, Јеһова јол верир, биз бундан сонра да һәр бир имкандан истифадә едәрәк Падшаһлыг һаггында хош хәбәри сәјлә тәблиғ едәҹәјик» (2010-ҸУ ИЛ ҮЧҮН «ЈЕҺОВАНЫН ШАҺИДЛӘРИНИН ИЛЛИК МӘҸМУӘСИ»).

Ҝөзәл ҝүнләрин астанасында!

«Бир аз ҝөзлә, пис јох олаҹаг... Мәзлумлар [һәлимләр] өлкәни мүлк олараг алаҹаг, әмин-аманлығын боллуғундан зөвг тапаҹаг» (МӘЗМУР 37:10, 11).

ЈУХАРЫДА ҝәтирилән пејғәмбәрлик сөзләринин һәјата кечдијини ҝөрмәк истәрдинизми? Әлбәттә, ким истәмәз?! Бунун тезликлә баш верәҹәјинә әсаслы сәбәбләримиз вар.

Әввәлки мәгаләләрдә «ахыр ҝүнләрдә» јашадығымызы ҝөстәрән јалныз бир нечә Мүгәддәс Китаб пејғәмбәрлијини нәзәрдән кечирдик (2 Тимотејә 3:1—5). Аллаһ бу һадисәләри Өз хидмәтчиләринә бизим үмидимиз олсун дејә јаздырмышдыр (Ромалылара 15:4). Бу пејғәмбәрликләрин һәјата кечмәси һал-һазырда үзләшдијимиз әзаб-әзијјәтләрин тезликлә битәҹәјини ҝөстәрир.

Бәс сонра нә олаҹаг? Аллаһын Падшаһлығы јер үзүнү идарә етмәјә башлајаҹаг (Матта 6:9). О заман шәраитин неҹә олаҹағыны Мүгәддәс Китаб белә тәсвир едир:

● Аҹлыг олмајаҹаг. «Гој өлкәнин зәмиләри бол олсун, дағларын башында далғалансын» (Мәзмур 72:16).

● Хәстәликләрә сон гојулаҹаг. Һеч ким «“хәстәјәм” демәјәҹәк» (Јешаја 33:24).

● Јер үзү јениләшәҹәк. «Сәһра вә гуру торпаг севинәҹәк, ҝөл шадланаҹаг, нәрҝиз кими чичәкләнәҹәк» (Јешаја 35:1).

Бунлар јахын ҝәләҹәкдә јеринә јетәҹәк руһландырыҹы Мүгәддәс Китаб пејғәмбәрликләрдән садәҹә бир нечәсидир. Сиз Јеһованын Шаһидләриндән тезликлә ҝөзәл ҝүнләрин ҝәләҹәјинә нәјә ҝөрә әмин олдугларыны соруша биләрсиниз.