Аллаһа јахынлашын

О, инсанларда јахшы шеј ахтарыр

1 ПАДШАҺЛАР 14:13

«РӘББ бүтүн үрәкләри сынајыр вә ағылларын бүтүн истәкләрини билир» (1 Салнамәләр 28:9). Мүгәддәс Китабда гәләмә алынан бу сөзләр Јеһова Аллаһын бизимлә јахындан марагландығыны ҝөстәрир вә үрәјимиздә Она гаршы миннәтдарлыг һисси ојадыр. Адәмдән ҝүнаһы мирас алдығымыза бахмајараг, Јеһова Аллаһ үрәјимиздә јахшы шејләр ахтарыр. Буну 1 Падшаһлар 14:13 ајәсиндә Авија илә бағлы дедији сөзләриндән ајдын ҝөрмәк олар.

Авија пис аиләдә бөјүмүшдү. Атасы Јаровам дөнүк бир сүлаләнин башчысы идиa. Јеһова Јаровамын аиләсини «пејин јандырылан кими» мәһв етмәк гәрарына ҝәлмишди (1 Падшаһлар 14:10). Лакин О әмр вермишди ки, онун аиләсиндән јалныз бир нәфәр — ағыр хәстә олан Авија басдырылмаға лајиг ҝөрүлсүнb. Нәјә ҝөрә мәһз о? Мүгәддәс Китабда охујуруг: «Исраилин Аллаһы Рәбб Јаровамын нәслиндән јалныз онда јахшы бир шеј тапмышдыр» (1 Падшаһлар 14:1, 12, 13). Бу сөзләрдән Авија һаггында нә өјрәнирик?

Мүгәддәс Китабын һеч бир јериндә Авијанын Аллаһын садиг хидмәтчиси олдуғу дејилмир. Бунунла белә, онда, ҹүзи дә олса, јахшылыг тапылмышды. «Рәббә гаршы» (КМ) олан бу јахшылыг, чох еһтимал ки, ибадәтлә бағлы иди. Раввин јазыларына әсасән демәк олар ки, Авија Јерусәлимдәки мәбәдә зијарәтә ҝетмишди. Јахуд да, ола билсин, халгын Јерусәлимә ҝетмәсинин гаршысыны алмаг үчүн атасынын гојдуғу кешикчиләри ҝөтүрмүшдү.

Авијанын һансы јахшылығы етдијини дәгиг билмәсәк дә, бу, Јеһованын диггәтиндән јајынмады. Илк нөвбәдә, о, буну сәмими-гәлбдән етмишди. Мүгәддәс Китабда дејилдији кими, онун етдији јахшылыг «онда», башга сөзлә, үрәјиндә иди. Икинҹиси, о, бу һәрәкәти илә башгаларындан фәргләнирди. «Јаровамын нәслиндән» олмасына бахмајараг, Авија јахшы бир иш ҝөрмүшдү. Бир алим дејир: «Пис мүһитдә вә аиләдә јашајан инсанын хејирхаһ олмасы чох тәрифәлајигдир». Диҝәр алимин сөзләринә ҝөрә исә, Авијанын етдији јахшылыг «зүлмәт ҝеҹәдә даһа да парлаг ҝөрүнән улдузлар вә чылпаг ағаҹлар арасында ҝөзәллији илә сечилән сидр ағаҹы кими нәзәрәчарпан иди».

Ән ваҹиби исә одур ки, 1 Падшаһлар 14:13 ајәси Јеһова Аллаһын шәхсијјәтинин ҝөзәл бир јөнүнү ачыглајыр вә Онун биздә нә ахтардығыны ҝөстәрир. Фикир вердинизсә, Аллаһ Авијада јахшы бир шеј ‘тапмышды’. Бу ҝөстәрир ки, Јеһова јахшы шеј тапана гәдәр Авијанын үрәјини арашдырмышды. Гоһум-әгрәбаларындан фәргли олараг, Авија, бир алимин дили илә десәк, «чајдашлары арасында» бир мирваријә бәнзәјирди. Јеһова онун јахшылығыны гијмәтләндирәрәк мүкафатландырды вә пис аиләнин үзвү олан бу инсана мүәјјән мәнада мәрһәмәт ҝөстәрди.

Гејри-камил олмағымыза бахмајараг, Јеһова Аллаһын биздә јахшы шејләри ахтардығыны вә онлары гијмәтләндирдијини билмәк мәҝәр бизи руһландырмыр? (Мәзмур 130:3). Гој бу, бизи үрәкләримизи диггәтлә арашдырараг зәррә гәдәр дә олсун јахшылыг тапмаг истәјән Аллаһа јахынлашмаға тәшвиг етсин!

[Һашијәләр]