ОНУНҸУ ФӘСИЛ
Аилә үзвләриндән бири хәстәләндикдә
1, 2. Шејтан, Ејубун нөгсансызлығыны сындырмаға чалышараг, фаҹиәли һадисәләр вә хәстәликдән неҹә истифадә етди?
ЕЈУБУН ады, шүбһәсиз олараг, хошбәхт аилә һәјаты сүрмүш инсанлар сырасында чәкилмәлидир. Мүгәддәс Китабда дејилир ки, о, “бүтүн шәрг оғулларындан... ән бөјүк” олмушдур. Ејубун он ушағы — једди оғлу, үч гызы варды. О, аиләсини јахшы тә’мин етмәк үчүн, кифајәт гәдәр зәнҝин иди. Ән башлыҹасы исә, аиләсинин руһани ишләриндә рәһбәрлији өз үзәринә ҝөтүрүр вә ушагларынын Јеһованын гаршысында тутдуглары мөвгејә мараг ҝөстәрирди. Бүтүн бунларын сајәсиндә, аилә мөһкәм вә хошбәхт иди (Ејуб 1:1–5).
2 Ејубун фираванлығы, Јеһова Аллаһын баш дүшмәни олан Шејтанын нәзәриндән јајынмады. Шејтан, Аллаһын хидмәтчиләринин нөгсансызлығыны сындырмаг үчүн даима имкан ахтарыр вә буна ҝөрә дә Ејуба һүҹум едәрәк, онун хошбәхт аиләсини мәһв етди. Сонра Шејтан, “Ејубу, ајағынын дабанындан тәпәсинә гәдәр пис чибанларла вурду”. Шејтан, фаҹиәли һадисәләр вә хәстәликлә Ејубун нөгсансызлығыны сындыраҹағына үмид едирди (Ејуб 2:6, 7).
3. Ејубун хәстәлијинин һансы әламәтләри варды?
3 Мүгәддәс Китабда, Ејубун хәстәлијинин дәгиг тибби ады верилмир. Анҹаг орада бу хәстәлијин әламәтләринә даир мә’лумат вар. Ејубун бәдәни гурдларла өртүлмүш, дәриси тамам готурлајараг иринләмишди. Ејубун нәфәси диксиндириҹи иди вә бәдәниндән пис иј ҝәлирди. Хәстәлик она әзаб верирди (Ејуб 7:5; 19:17; 30:17, 30). О, изтираб ичиндә күллүкдә отурараг, кирәмит гырығы илә өзүнү гашыјырды (Ејуб 2:8). Доғрудан да, аҹынаҹаглы мәнзәрә иди!
4. Һәр бир аилә бә’зән нә илә гаршылашмалы олур?
4 Белә ағыр хәстәлијә тутулсајдыныз, өзүнүзү неҹә һисс едәрдиниз? Бу ҝүн Шејтан, Ејуба етдији кими, Аллаһын хидмәтчиләрини хәстәлијә дүчар етмир. Буна бахмајараг, инсанын гејри–камиллијини, ҝүндәлик һәјатда баш верән стрессләри вә әтраф мүһитдә шәраитин ҝет–ҝедә писләшмәсини нәзәрә алараг, аиләдә һәрдән кимин исә хәстәләнә биләҹәјинә һазыр олмаг лазымдыр. Ејуб кими әзаб чәкән адамларын сајы аз олса да, тәтбиг едә биләҹәјимиз еһтијат тәдбирләринә бахмајараг, һамымыз хәстәликләрә мә’руз галырыг. Аиләдә бир нәфәр хәстәләнән заман, доғрудан да чәтинликләр јарана биләр. Буна ҝөрә дә, бәшәријјәтин гачылмаз дүшмәни олан хәстәлијин өһдәсиндән ҝәлмәкдә Мүгәддәс Китабын бизә неҹә көмәк етдијинә диггәт јетирәк (Ваиз 9:11; 2 Тимотејә 3:16).
СИЗИН БУНА МҮНАСИБӘТИНИЗ НЕҸӘДИР?
5. Аилә үзвләри мүвәггәти хәстәлијә адәтән неҹә мүнасибәт ҝөстәрирләр?
5 Һәр һансы сәбәбдән олурса–олсун, хүсусилә дә узунсүрән хәстәлик уҹбатындан ади һәјат тәрзинин позулмасына таб ҝәтирмәк асан дејил. Һәтта гысамүддәтли хәстәликләр заманы белә, нәји исә дәјишмәк, ҝүзәштләрә ҝетмәк вә фәдакарлыг етмәк ҝәрәкдир. Хәстәнин истираһәт етмәси үчүн, аиләнин сағлам үзвләринин сакитлијә риајәт етмәләри лазым ҝәлә биләр. Онлар һәр һансы мәшғулијјәтләриндән имтина етмәли ола биләрләр. Бунунла белә, аиләләрин әксәријјәтиндә кичик јашлы ушаглара һәрдән диггәтли олмағы хатырлатмаг лазым ҝәлсә дә, онлар хәстә баҹы вә гардашларына, јахуд валидејнләриндән биринә шәфгәт ҝөстәрирләр (Колослулара 3:12). Гысамүддәтли хәстәлик заманы, адәтән аилә лазым олан һәр шеји етмәјә һазырдыр. Бундан әлавә, аиләнин һәр бир үзвү, хәстәләнән заман она да ејни ҹүр диггәт ҝөстәрилмәсинә үмид едә биләр (Матта 7:12).
6. Аилә үзвләриндән бири ҹидди вә узунмүддәтли хәстәлијә дүчар олурса, бә’зән һансы һиссләр јараныр?
6 Әҝәр хәстәлик чох ҹиддидирсә, һәјатда көкүндән вә узунмүддәтли дәјишиклик етмәк лазым ҝәлирсә, бәс онда неҹә? Мәсәлән, әҝәр аилә үзвләриндән бири ифлиҹ олмуш, Алсһејмер хәстәлијиндән әзаб чәкир вә ја башга бир хәстәлик үзүндән табдан дүшмүшсә? Јахуд да ким исә шизофренија кими психи хәстәлијә тутулмушса? Әзиз адамын бу ҹүр ҝүҹлү әзаб чәкмәси адәтән әввәлҹә шәфгәт вә кәдәр һисси ојадыр. Лакин сонрадан шәфгәт һиссини башга һиссләр дә әвәз едә биләр. Аилә үзвләри, бир адамын хәстәлијинин онларын һәјатына нә дәрәҹәдә ҝүҹлү тә’сир ҝөстәрдијинә вә онларын азадлығыны мәһдудлашдырдығына ҝөрә бөјүк наразылыг һисс едә биләрләр. Онлардан ким исә өзүнә белә бир суал верә биләр: “Нәјә ҝөрә бу мәһз мәнимлә баш верди?”
7. Ејубун арвады онун хәстәлијинә неҹә мүнасибәт ҝөстәрди вә ҝөрүндүјү кими, о, нәји унутмушду?
7 Еһтимал ки, бу ҹүр фикирләр Ејубун арвадынын да ағлына ҝәлмишди. Хатырлајаг ки, о, артыг ушагларыны вә әмлакыны итирмишди. Һәмин фаҹиәли һадисәләр бир–биринин ардынҹа баш вердији үчүн, шүбһәсиз ки, ону даһа чох тәшвиш бүрүјүрдү. Нәһајәт, о, бир заманлар ишҝүзар вә гүввәтли әринин ишҝәнҹәли, нифрәт доғуран хәстәлијә тутулдуғуну ҝөрүнҹә, бүтүн бәдбәхтликләри арадан галдырмалы олан ваҹиб бир шеји, јә’ни әринин вә өзүнун малик олдуглары Аллаһла гаршылыглы мүнасибәтләрини унутду. Мүгәддәс Китабда дејилир: “Арвады она [Ејуба] деди: Сән һәлә дә нөгсансызлығыны горумагдасан? Аллаһа лә’нәт ет вә өл” (Ејуб 2:9).
8. Аиләдә ким исә ҹидди хәстәләнәндә, аиләнин диҝәр үзвләринин дүзҝүн нөгтеји–нәзәрләрини горумаларына Мүгәддәс Китабын һансы ајәси көмәк едәҹәкдир?
8 Чох вахт инсанлар, киминсә хәстәлији үзүндән һәјатларында чох шеји дәјишмәли олдугларына ҝөрә үмидсизлик, һәтта гәзәб һисси кечирирләр. Бунунла белә, јаранан вәзијјәтин үзәриндә дәриндән дүшүнән мәсиһчи, өз мәһәббәтинин сәмими олдуғуну сүбут етмәк үчүн имкан јарандығыны анламалыдыр. Әсл мәһәббәт “сәбирли, хејирхаһдыр... өз мәнфәәтини ахтармаз... һәр шејә гатлашар, һәр шејә инанар, һәр шејә үмид бәсләр, һәр шејә таб ҝәтирәр” (1 Коринфлиләрә 13:4–7). Мәнфи һиссләрин бизә үстүн ҝәлмәсинә јол вермәкдәнсә, онлары идарә етмәк үчүн әлимиздән ҝәләни етмәјимиз даһа јахшыдыр (Сүлејманын мәсәлләри 3:21).
9. Һансы әминликләр ҹидди хәстәси олан аиләјә руһани вә емосионал ҹәһәтдән көмәк едә биләр?
9 Аилә үзвләриндән ким исә ҹидди хәстәләндикдә, аиләнин руһани вә емосионал фираванлығыны горумаг үчүн нә етмәк олар? Әлбәттә ки, һәр бир хәстәлик хүсуси, өзүнә мүвафиг мүалиҹә вә гуллуг тәләб едир вә бу нәшрдә, мүалиҹәјә вә ја аиләдә хәстәјә неҹә гуллуг етмәјә даир һәр һансы бир мәсләһәт вермәк јерсиз оларды. Буна бахмајараг, Јеһова руһани мә’нада “бүтүн јыхыланлара дәстәк олар” (Мәзмур 145:14). Давуд падшаһ јазырды: “Нә бәхтијардыр о адам ки, дүшкүнләрә бахар; шәр ҝүнүндә Рәбб ону гуртарар. Рәбб ону тутар вә ону јашадар... Тагәтсизлик дөшәјиндә Рәбб она дәстәк олар” (Мәзмур 41:1–3). Емосионал ҹәһәтдән олдугҹа чох әзаб чәксәләр белә, Јеһова өз хидмәтчиләрини руһән сағлам сахлајыр (2 Коринфлиләрә 4:7). Аиләсиндә бир шәхсин ҹидди хәстәликдән әзаб чәкмәси илә растлашан инсанларын чоху, мәзмурчунун бу сөзләрини тәкрар едирләр: “Чох дүшкүнәм; ја Рәбб, сөзүнә ҝөрә мәни дирилт” (Мәзмур 119:107).
ШӘФАВЕРИҸИ РУҺ ЈҮКСӘКЛИЈИ
10, 11. а) Аилә үзвләриндән биринин тутулдуғу хәстәлијин өһдәсиндән мүвәффәгијјәтлә ҝәлмәк үчүн, хүсусилә ваҹиб олан нәдир? б) Бир гадын әринин хәстәлијинин өһдәсиндән неҹә ҝәлирди?
10 Мүгәддәс Китабын бир мәсәлиндә дејилир: “Инсанын руһу онун хәстәлијини дашыјар; фәгәт гырылмыш руһ — ким ону галдыра биләр?” (Сүлејманын мәсәлләри 18:14). Һәр һансы бир сарсынты, јалныз “инсанын руһуна” дејил, аиләнин руһ јүксәклијинә дә тә’сир едә биләр. Лакин “раһат үрәк бәдәнин һәјатыдыр” (Сүлејманын мәсәлләри 14:30). Аиләнин ҹидди хәстәлијин өһдәсиндән ҝәлмәјә мүвәффәг олуб олмамасы, даһа чох евдәкиләрин дүшүнҹә тәрзиндән вә ја руһ јүксәклијиндән асылыдыр. (Сүлејманын мәсәлләри 17:22 илә мүгајисә един.)
11 Бир мәсиһчи гадын, евләндикдән ҹәми алты ил сонра әри ифлиҹ оларкән чохлу әзијјәтә таб ҝәтирмәли олду. О хатырлајыр: “Хәстәлик әримин нитгинә олдугҹа ҝүҹлү тә’сир етмишди, онунла сөһбәт етмәк, демәк олар ки, мүмкүн дејилди. Нә демәк истәдијини баша дүшмәк үчүн, бөјүк зеһни ҝәрҝинлик тәләб олурду”. Әринин кечирдији әзаблары вә үмидсизлији тәсәввүр един. Бәс бу әрлә арвад неҹә даврандылар? Онлар мәсиһчи јығынҹағы кечирилән јердән узаг јашасалар да, баҹымыз, тәшкилатда баш верән бүтүн вәзијјәтләрдән хәбәрдар олмаға вә мүнтәзәм сурәтдә “Ҝөзәтчи Гүлләси” вә “Ојанын!” журналлары васитәсилә верилән руһани гиданы алмаға чалышараг, руһән мөһкәм галмаг үчүн әлиндән ҝәләни едирди. Бу, севимли әринин өлдүјү ҝүнә гәдәр, дөрд ил әрзиндә гуллуг етмәк үчүн она руһани ҝүҹ верирди.
12. Ејубла баш верән һадисәдән ҝөрүндүјү кими, бә’зән хәстә адамын өзү неҹә көмәк едә биләр?
12 Ејубла баш верән һадисәдә исә мәһз онун өзү — әзаб чәкән шәхс — ҝүҹлү галмышды. Ејуб арвадындан сорушду: “Неҹә! Аллаһдан јахшылыг гәбул едәк, пислик исә гәбул етмәјәкми?” (Ејуб 2:10). Сонралар Исанын шаҝирди Јагубун, сәбирли вә дөзүмлү олмаға аид ҝөзәл нүмунә кими Ејубдан бәһс етмәси тәәҹҹүблү дејил! Јагуб 5:11 (И–93) ајәсиндә охујуруг: “Ејубун сәбри барәсиндә ешитмисиниз вә Рәббин ахырда нә етдијини дә ҝөрдүнүз, чүнки Рәбб чох шәфгәтли вә мәрһәмәтлидир”. Бунун кими бу ҝүн дә, хәстәнин руһ јүксәклији, чох вахт гоһумларын мүсбәт әһвал–руһијјәни горумаларына көмәк едир.
13. Ҹидди хәстәликлә гаршылашан аилә һансы мүгајисәни етмәмәлидир?
13 Аиләсиндә хәстәликлә гаршылашан инсанларын әксәријјәти, адәтән башланғыҹда аилә үзвләринин һәгигәтлә үз–үзә ҝәләркән чәтинлик чәкдикләрини е’тираф едирләр. Онлар һәмчинин гејд едирләр ки, јаранан вәзијјәтә гаршы инсанын мүнасибәтиндән чох шеј асылыдыр. Ади ев ишләриндә нәји исә дәјишмәк вә гајдаја салмаг башланғыҹда чәтин ола биләр. Лакин инсан доғрудан да гүввә сәрф едәрсә, јени вәзијјәтә ујғунлашмаг мүмкүндүр. Бу заман өз вәзијјәтимизи, аиләсиндә хәстәси олмајан адамларла мүгајисә етмәмәјимиз, онларын һәјатынын асан олдуғуну вә “бунун әдаләтли олмадығыны” дүшүнмәмәјимиз ваҹибдир. Ахы, башгаларынын әслиндә һансы јүкү дашымаг мәҹбуријјәтиндә олдугларыны һеч ким билмир. Исанын: “Еј бүтүн јорғунлар вә јүкләри ағыр оланлар, Мәним јаныма ҝәлин вә Мән сизә раһатлыг верәрәм” сөзләри бүтүн мәсиһчиләрә тәсәлли верир (Матта 11:28).
ҮСТҮНЛҮК ТӘШКИЛ ЕДӘН ШЕЈЛӘРИ ЈЕРБӘЈЕР ЕТМӘК
14. Үстүнлүк тәшкил едән шејләри дүзҝүн сурәтдә неҹә јербәјер етмәк олар?
14 Әҝәр аиләдә ким исә ҹидди хәстәләнәрсә, Аллаһ тәрәфиндән илһамланмыш нөвбәти сөзләри һамынын јадда сахламасы фајдалы олар: “Өјүд верәнләрин чохлуғу илә [тәшәббүсләр] дурарлар” (Сүлејманын мәсәлләри 15:22). Мәҝәр аилә бир јерә јығылыб, хәстәлик үзүндән јаранан вәзијјәти мүзакирә едә билмәзми? Әлбәттә, буну дуа васитәсилә етмәк вә рәһбәрлик үчүн Аллаһын Кәламына мүраҹиәт етмәк дүзҝүн давраныш оларды (Мәзмур 25:4). Бу заман нәји мүзакирә етмәк лазымдыр? Мүалиҹә, вәсаит вә аиләдә олаҹаг дәјишикликләр кими мәсәләләр һәлл олунмалыдыр. Хәстәнин әсас гајғысыны ким чәкәҹәк? Хәстәјә гуллуг етмәкдә аилә үзвләри неҹә әмәкдашлыг едәҹәкләр? Бүтүн бу дәјишикликләр аиләнин һәр бир үзвүнә неҹә тә’сир едәҹәкдир? Хәстәјә әсас гајғыны ҝөстәрән шәхсин руһани вә диҝәр тәләбатлары неҹә тә’мин олунаҹагдыр?
15. Јеһова ҹидди хәстәси олан аиләләрә неҹә көмәк ҝөстәрир?
15 Дуада Јеһовадан сәмими гәлбдән рәһбәрлик диләмәјимиз, Онун Кәламы үзәриндә дәриндән дүшүнмәјимиз вә Мүгәддәс Китабда ҝөстәрилән јолда ҹәсарәтлә јеримәјимиз, әксәр һалларда, үмид етдикләримиздән дә артыг хејир–дуалара сәбәб олур. Хәстәлик һәр заман кечиб ҝетмир. Лакин һәр һалда, Јеһоваја бел бағламағымыз ән јахшы нәтиҹәләр ҝәтирир (Мәзмур 55:22). Мәзмурчу јазмышдыр: “Ја Рәбб, инајәтин мәни тутду. Ичимдә гајғыларын чохлуғунда, сәнин тәсәллиләрин ҹанымы фәрәһләндирир” (Мәзмур 94:18, 19; һәмчинин Мәзмур 63:6–8 ајәләринә дә бахын).
УШАГЛАРА КӨМӘК ҜӨСТӘРМӘК
16, 17. Кичик јашлы ушаглара, баҹы вә ја гардашларынын хәстәлији барәдә данышаркән нәјә диггәт јетирмәк лазымдыр?
16 Аилә үзвләриндән киминсә ҹидди хәстәлији ушаглар үчүн бир чох чәтинликләрә чеврилә биләр. Јаранан тәләбатлары вә бу ишдә ушагларын неҹә көмәк едә биләҹәкләрини анламагда, валидејнләрин онлара көмәк етмәләри ваҹибдир. Әҝәр аиләдә ушаглардан бири хәстәләнәрсә, диҝәр ушаглара баша салмаг лазымдыр ки, хәстә ушаға әлавә диггәт вә гајғы ҝөстәрилмәси, диҝәрләринин даһа аз севилдијини билдирмир. Ушагларда инҹиклик вә рәгабәт һиссләринин јаранмасына јол вермәк әвәзинә, валидејнләр, хәстәлик үзүндән аиләдә јаранан вәзијјәтин өһдәсиндән ҝәлмәк үчүн онларын бир–бирләринә јахын олмаларына вә бир–бирләринә сәмими мәһәббәт ҝөстәрмәләринә көмәк едә биләрләр.
17 Валидејнләр, узун–узады вә мүрәккәб тибби изаһатлар вермәк әвәзинә, кичик јашлы ушагларын һиссләринә мүраҹиәт едәндә, онлар адәтән даһа бөјүк һәвәслә һај верирләр. Буна ҝөрә дә хәстәнин чәкдији әзијјәт барәдә онлара бир гәдәр изаһат вермәк олар. Сағлам ушаглар онларын асанлыгла етдикләри иши хәстә баҹы вә ја гардашларынын едә билмәдикләрини ҝөрәндә, онлар даһа артыг “гардаш севән” вә “шәфгәтли” олаҹаглар (1 Петер 3:8).
18. Хәстәлик үзүндән аиләдә јаранан чәтинлији бөјүк ушагларын анламасына неҹә көмәк етмәк олар вә бу анлајыш онлар үчүн неҹә фајдалы ола биләр?
18 Бөјүк ушаглара да, евдә чәтин вәзијјәт јарандығыны вә аилә үзвләринин һәр бириндән фәдакарлыг тәләб олундуғуну анламаларына көмәк етмәк лазымдыр. Ола билсин, валидејнләр һәкимләрин һаггыны вә мүалиҹә илә әлагәдар мәсрәфләри өдәмәлидирләр вә буна ҝөрә дә онлар, о бири ушагларын истәдикләри һәр шеји ала билмирләр. Ушаглар бундан инҹијәрәк, өзләрини нәдәнсә мәһрум едилмишми һисс едәҹәкләр? Јохса, аиләнин чәтинликлә гаршылашдығыны анлајыб, нәји исә гурбан вермәјә һазыр олаҹаглар? Чох шеј бу суалларын неҹә мүзакирә олунмасындан вә аиләдә јаранан әһвал–руһијјәдән асылыдыр. Һәгигәтән дә, аиләләрин чохунда әзизләриндән биринин хәстәләнмәси, ушаглара Павелин мәсләһәт етдији кими давранмағы өјрәнмәкдә көмәк етмишдир. Павел јазырды: “Рәгабәт вә ја шөһрәтпәрәсликлә һеч бир шеј етмәјин, амма тәвазөкарлыгла бир–биринизи өзүнүздән јухары сајын. Һәр кәс јалныз өз мәнфәәтини дејил, башгаларынын да мәнфәәтини ҝүдсүн” (Филипилиләрә 2:3, 4).
МҮАЛИҸӘЈӘ НЕҸӘ МҮНАСИБӘТ ҜӨСТӘРИЛМӘЛИ?
19, 20. а) Аилә үзвләриндән бири хәстәләндикдә, аилә башчысынын үзәринә һансы мәс’улијјәт дүшүр? б) Мүгәддәс Китаб тибби дәрслик олмаса да, мүалиҹә мәсәләсиндә һансы рәһбәрлији верир?
19 Мүалиҹә заманы Аллаһын гануну позулмурса, мәсиһчиләр бу ҹүр мүалиҹәјә е’тираз етмирләр. Аилә үзвләриндән бири хәстәләндикдә, мәсиһчиләр онун әзабларыны јүнҝүлләшдирмәк үчүн үсуллар тапмаға чалышырлар. Бунунла бәрабәр, һәкимләр бир–биринә зидд олан мәсләһәтләр верә биләр, бу мәсләһәтләрин үзәриндә исә дәриндән дүшүнмәк лазымдыр. Бундан әлавә, сон илләрдә ҝөзләнилмәдән јени хәстәликләр мејдана чыхыр вә инсанларын сағламлығы писләшир ки, бунларын чохунун үмумү мүалиҹә үсуллары јохдур. Бә’зән садәҹә олараг дүзҝүн диагноз гојмаг да чәтин олур. Бәс белә олдугда мәсиһчиләр нә етмәлидирләр?
20 Мүгәддәс Китабын јазычыларындан биринин һәким олмасына, һәвари Павелин исә досту Тимотејә тибби нөгтеји–нәзәрдән фајдалы мәсләһәт вермәсинә бахмајараг, Мүгәддәс Јазылар тибби дәрслик дејил, инсан һәјатынын мә’нәви вә руһани саһәсиндә рәһбәрликдир (Колослулара 4:14; 1 Тимотејә 5:23). Буна ҝөрә дә, мүалиҹә мәсәләләриндә мәсиһчи аиләләринин башчылары, таразлашмыш шәхси гәрарлар гәбул етмәлидирләр. Ола билсин, онлар бир нечә мүтәхәссисин фикрини өјрәнмәји ҝәрәкли һесаб едәҹәкләр. (Сүлејманын мәсәлләри 18:17 илә мүгајисә един.) Әлбәттә ки, онлар хәстәләнмиш аилә үзвүнә даһа јахшы көмәк етмәк истәјирләр вә онларын әксәријјәти көмәк үчүн тәҹрүбәли һәкимләрә мүраҹиәт едирләр. Диҝәрләри гејри–ән’әнәви мүалиҹә үсулларына үстүнлүк верирләр. Бу да шәхси гәрардыр. Лакин мәсиһчиләр сағламлыгла бағлы проблемләри һәлл етдикдә, Аллаһын Кәламы онларын ајаглары “үчүн чыраг” вә јоллары “үчүн ишыг” олараг галмаға давам едир (Мәзмур 119:105). Онлар, Мүгәддәс Китабы әлдә рәһбәр тутмаға давам едирләр (Ишаја 55:8, 9). Беләликлә дә мәсиһчиләр, диагностиканын спиритизмлә бағлы ола билән үсулларындан узаг олур вә Мүгәддәс Китабын принсипләрини позан мүалиҹәдән имтина едирләр (Мәзмур 36:9; Һәвариләрин ишләри 15:28, 29; Вәһј 21:8).
21, 22. Асијадан олан бир гадын Мүгәддәс Китабын принсипи үзәриндә неҹә дүшүнүрдү вә дүшдүјү вәзијјәтдә онун гәбул етдији гәрарын дүзҝүнлүјү неҹә сүбут олунду?
21 Ҝәлин, Асијадан олан бир гадынын башына ҝәлән һадисәни нәзәрдән кечирәк. Бу гадын, Јеһованын Шаһидләри илә Мүгәддәс Китабы өјрәнмәјә башладыгдан аз сонра, вахтындан әввәл ҹәми 1 470 грам ағырлығында бир гыз ушағы дүнјаја ҝәтирди. Һәким, ушағын әгли ҹәһәтдән чох зәиф олаҹағыны вә һеч заман јеримәјәҹәјини сөјләјәндә, ананын үрәји парча–парча олду. Һәким анаја мәсләһәт етди ки, ушағы руһи хәстәханаја версин. Гадынын әри нә едәҹәјини билмирди. Бәс бу гадын кимә мүраҹиәт едә биләрди?
22 Гадын сөјләјир: “Мән, Мүгәддәс Китабда јазылан бу сөзләри јадыма салдым: “Ушаглар Рәббдән мирасдыр; бәтнин сәмәрәси мүкафатдыр” (Мәзмур 127:3). О өз “мирасыны” евә ҝәтирмәји вә гызынын гејдинә галмағы гәрара алды. Әввәлҹә ҝәнҹ анаја чох чәтин иди, лакин Јеһованын Шаһидләринин јерли јығынҹағындан олан мәсиһчи достлары она көмәк етдиләр; бунун сајәсиндә гадын бу чәтинлијин өһдәсиндән ҝәлди вә ушағына лазыми гајғыны ҝөстәрә билди. Он ики ил кечдикдән сонра һәмин гыз Падшаһлыг Залындакы јығынҹаглара ҝәлир вә орадакы һәмјашыдлары илә үнсијјәтдә олмагдан севинҹ дујурду. Ана дејир: “Дүзҝүн гәрар гәбул етмәкдә Мүгәддәс Китабын принсипләринин мәнә көмәк етдији үчүн чох миннәтдарам. Мүгәддәс Китаб, Јеһова Аллаһын гаршысында тәмиз виҹданымы горумагда вә һәјатым боју гәлбимдә әзаб чәкмәмәкдә мәнә көмәк етди”.
23. Мүгәддәс Китабда, хәстәләрә вә онларын гејдинә галанлара һансы тәсәлли верилир?
23 Хәстәликләр бизи даима тә’гиб етмәјәҹәк. Ишаја пејғәмбәр “орада јашајанын: хәстәјәм, демәјәҹәји” бир зәманәјә ишарә етди (Ишаја 33:24). Бу вә’д, сүр’әтлә јахынлашмагда олан јени дүнјада јеринә јетәҹәк. Һәләлик исә биз хәстәликләрлә вә өлүмлә мүбаризә апармалы олуруг. Хошбәхтликдән, Аллаһын Кәламы бизә рәһбәрлик вә көмәк тәгдим едир. Мүгәддәс Китабда верилән әсас әхлаг нормалары дәјишмәздир вә гејри–камил олан инсанларын дәјишкән фикирләриндән гат–гат үстүндүр. Буна ҝөрә дә, һәр бир ағыллы инсан мәзмурчунун сөзләри илә разылашыр: “Рәббин шәриәти [“гануну”, ЈД] камилдир; ҹаны тәзәләр; Рәббин шәһадәти садигдир; тәҹрүбәсиз адама һикмәт верәр... Рәббин һөкмләри һагдыр, һамысы доғрудур... Онлары тутмагда бөјүк мүкафат вардыр” (Мәзмур 19:7, 9, 11).