Јеһованын “фәрманы” јеринә јетмәјә билмәз
“Рәббин фәрманыны е’лан едәҹәјәм. Рәбб мәнә деди: “Сән Мәним оғлумсан... Мәндән ирс олараг милләтләри истә... сәнә верим” (МӘЗМУР 2:7, 8, МКШ).
1. Аллаһын нијјәти илә милләтләрин нијјәти арасында һансы фәрг мөвҹуддур?
ЈЕҺОВА АЛЛАҺЫН бәшәријјәтә вә јер үзүнә даир нијјәти вар. Милләтләрин дә өз нијјәти вар. Анҹаг бу нијјәтләр арасында неҹә дә бөјүк фәрг мөвҹуддур! Бурада тәәҹҹүб етмәли бир шеј јохдур, ахы Аллаһын Өзү дејир: “Ҝөјләр неҹә јердән јүксәкдирсә, јолларым сизин јолларыныздан вә дүшүнҹәләрим сизин дүшүнҹәләриниздән елә јүксәкдир”. Аллаһын нијјәти мүтләг јеринә јетәҹәкдир, бу Онун нөвбәти сөзләриндән ҝөрүнүр: “Јағмур вә гар неҹә ҝөјләрдән енәр вә ораја дөнмәзләрсә, фәгәт јери сулар вә ону беҹәриб әкини јердән битирәр вә әкинчијә тохум вә јејәнә чөрәк верәрсә; ағзымдан чыхан сөзүм дә елә олаҹагдыр; мәнә бош дөнмәјәҹәкдир, фәгәт мурад етдијим шеји едәҹәк вә етсин дејә ону ҝөндәрдијим иши баҹараҹаг” (Ишаја 55:9-11).
2, 3. Икинҹи Мәзмурдан нә ајдын олур вә һансы суаллар јараныр?
2 Аллаһын Хиласкар Падшаһлыға даир нијјәтинин јеринә јетәҹәји икинҹи Мәзмурдан ајдын ҝөрүнүр. Бу Мәзмурун мүәллифи олан гәдим Исраил падшаһы Давуд, Аллаһдан илһам алараг милләтләрин вурнухмаја дүшәҹәкләри мүһүм бир дөвр һаггында пејғәмбәрлик етмишдир. Онларын рәһбәрләри Јеһоваја вә Онун Мәсһ едилмишинә гаршы галхаҹаглар. Лакин Давуд һәмчинин јазмышдыр: “Рәббин фәрманыны е’лан едәҹәјәм. Рәбб мәнә деди: “Сән Мәним оғлумсан... Мәндән ирс олараг милләтләри истә, мүлк олараг јерин һәр тәрәфини сәнә верим” (Мәзмур 2:7, 8, МКШ).
3 Милләтләр үчүн Јеһованын “фәрманы” нә демәкдир? Бунун үмумиликдә бәшәријјәтә һансы тә’сири вар? Бүтүн бунлар икинҹи Мәзмуру охујан Аллаһ горхусуна малик олан инсанлар үчүн һансы мә’наны кәсб едир?
Милләтләр вурнухмаја дүшүбләр
4. Мәзмур 2:1, 2 ајәләриндәки әсас фикирләри гыса олараг өз сөзләринизлә неҹә дејәрдиниз?
4 Милләтләрин вә онларын рәһбәрләринин һәрәкәтләрини тәсвир едәрәк мәзмурчу нәғмәсини нөвбәти сөзләрлә башлајыр: “Нә үчүн милләтләр белә вурнухмаја дүшүр, үммәтләр бош шејләр дүшүнүр? Дүнја шаһлары јығышыр, һөкмдарлар Рәббә, Онун мәсһ етдијинә гаршы бирләшир” (Мәзмур 2:1, 2, МКШ)a.
5, 6. Үммәтләр һансы “бош шејләри” дүшүнүрләр?
5 Бизим ҝүнләрдә үммәтләр, јә’ни халглар һансы “бош шејләри” дүшүнүр? Аллаһын Мәсиһини гәбул етмәк әвәзинә, милләтләр өз һакимијјәтләрини әбәдиләшдирмәк истәјирләр. Икинҹи Мәзмурун бу сөзләри, I әсрдә јәһуди вә рома һакимијјәтләри сөзләшиб, Аллаһын Падшаһ ролуну һәвалә етдији Иса Мәсиһи өлдүрдүкләри заман да јеринә јетмишдир. Лакин бу сөзләр башлыҹа олараг 1914-ҹү илдә, Иса Мәсиһин сәмави Падшаһ олдуғу заман јеринә јетди. О вахтдан бәри һәлә һеч бир дөвләт Аллаһ тәрәфиндән тахта јүксәлдилмиш Падшаһы гәбул етмәјиб.
6 Мәзмурчунун “нә үчүн... үммәтләр бош шејләр дүшүнүр” дејә вердији суал нә демәкдир? Бу о демәкдир ки, милләтләрин нијјәти бошдур вә бу нијјәт мүвәффәгијјәтсизлијә уғрајаҹагдыр. Онлар јер үзүндә сүлһ вә һәмрә’јлији тә’мин етмәк игтидарында дејилләр. Лакин милләтләр Аллаһын рәһбәрлијинә гаршы дурурлар. Онлар Уҹа Олана вә Онун Мәсиһинә гаршы тәҹавүз едир вә онлара гаршы топлашырлар. Неҹә дә ағылсызлыгдыр!
Јеһованын галиб ҝәлмиш Падшаһы
7. Исанын илк давамчылары Мәзмур 2:1, 2 ајәләрини өз дуаларында неҹә тәтбиг етмишләр?
7 Илк мәсиһчиләр Мәзмур 2:1, 2 ајәләрини Исаја тәтбиг едирдиләр. Онлары иманлары үстүндә тә’гиб етдикләри заман белә дуа едирдиләр: “Мөвла [Һөкмдар Аллаһ Јеһова], Сән ки, ҝөјү, јери, дәнизи вә онларын ичиндәки һәр шеји јаратдын, Сән Мүгәддәс Руһ васитәсилә Өз гулун атамыз Давудун ағзы илә дедин: “Нә үчүн милләтләр азғынлашырлар вә халглар фајдасыз ишләр гәсдиндә олурлар? Дүнјанын һөкмдарлары ҹәбһә јаратдылар вә сәркәрдәләр Рәббә вә Онун Мәсиһинә гаршы бирләшдиләр”. Һирод [Антипа] вә Понти Пилат, Исраил халгы вә диҝәр милләтләрлә бирликдә, Мәсиһ тә’јин етдијин мүгәддәс Гулун Исаја гаршы, һәгигәтән бу шәһәрдә бир јерә топлашдылар” (Һәвариләрин ишләри 4:24-27; Лука 23:1-12)b. Ҝөрдүјүмүз кими, I әсрдә Аллаһын мәсһ едилмиш хидмәтчиси Исаја гаршы суи-гәсд һазырланмышды. Лакин јүзилликләр кечдикдән сонра бу мәзмур бир даһа јеринә јетмәли иди.
8. Мәзмур 2:3 ајәси мүасир милләтләрин үзәриндә неҹә јеринә јетир?
8 Гәдим Исраилдә Давуд кими инсан падшаһларын дөврүндә бүтпәрәст халглар вә рәһбәрләр Аллаһа вә Онун тахта јүксәлтдији мәсһ едилмишинин әлејһинә топлашырдылар. Бәс бизим ҝүнләр барәдә нә демәк олар? Мүасир милләтләр Јеһованын вә Мәсиһин тәләбләринә табе олмаг истәмирләр. Буна ҝөрә дә, онлар пејғәмбәрликдә нөвбәти сөзләри дејәнләр кими тәсвир едилирләр: “Ҝәлин онларын буховларыны гопараг, үстүмүздәки зәнҹирләрини атаг” (Мәзмур 2:3, МКШ). Аллаһ вә Мәсиһ тәрәфиндән гојулан һәр бир мәһдудијјәт рәһбәрләри вә милләтләри өзүндән чыхарыр. Лакин ‘буховлары гопармаг’ вә ‘үстләриндәки зәнҹирләри атмаг’ үчүн ҝөрүлән һәр бир ҹәһдләри, сөзсүз ки, боша чыхаҹагдыр.
Јеһова онлара истеһза едир
9, 10. Јеһова милләтләрә нәјә ҝөрә истеһза едир?
9 Рәһбәрләрин мүстәгиллик әлдә етмәк наминә ҝөстәрдикләри ҹәһдләр Јеһованы һеч дә нараһат етмир. Икинҹи Мәзмурда даһа сонра дејилир: “Ҝөјләрин сакини ҝүлүр, Худавәнд онлара истеһза едир” (Мәзмур 2:4, МКШ). Јеһова, бу рәһбәрләр јох имиш кими, Өз нијјәтини сакитҹә һәјата кечирир. Аллаһ онларын мәғрурлуғуна ҝүлүр вә онлара истеһза едир. Гој онлар нијјәт етдикләри ишләр үчүн ловғалансынлар. Онлар Јеһованын ҝөзүндә ҝүлүнҹ вәзијјәтдәдирләр. Аллаһ онларын бош јерә ҝөстәрдикләри мүгавимәтә ҝүлүр.
10 Давуд дүшмән олан инсанлар вә милләтләр һаггында башга мәзмурларда да охујурду: “Ја Рәбб, Ордулар Рәбби, Исраилин Аллаһы! Бүтүн милләтләрә ҹәза вермәк үчүн ојан, хәјанәткар писләрин һеч биринә рәһм етмә. Бу пис адамлар ахшамүстү гајыдырлар, көпәк кими мырылдајырлар, шәһәрдә сүләниб долашырлар. Ҝөр додагларындан нәләр төкүлүр, ағызларындан гылынҹлар чыхыр. Онлар зәнн едирләр ки, ешидән јохдур. Лакин, ја Рәбб, сән онлара ҝүлүрсән, бүтүн милләтләрә ришхәнд едирсән” (Мәзмур 59:5-8, МКШ). Јеһова милләтләрин ловғалығына вә бош јерә Она гаршы үсјан едәрәк дүшдүкләри долашыглыға ҝүлүр.
11. Милләтләр Јеһованын нијјәтинә гаршы һәрәкәт етмәк истәдикләри заман нә баш верир?
11 Икинҹи Мәзмурун сөзләри Јеһованын һәр ҹүр вәзијјәтин өһдәсиндән ҝәлә билдијинә олан иманымызы мөһкәмләндирир. Биз там әмин ола биләрик ки, Аллаһ һәмишә Өз ирадәсини јеринә јетирир вә Өз сәдагәтли хидмәтчиләрини һеч заман тәрк етмир (Мәзмур 94:14). Бәс милләтләр Јеһованын нијјәтинә гаршы һәрәкәт етмәк истәдикләри заман нә баш верир? Икинҹи Мәзмура ҝөрә, Аллаһ онларла “һиддәтлә” данышыр, Онун сөзләри шимшәјин дәһшәтли ҝурултусуна бәнзәјир. Бундан әлавә, Өз “гәзәби илә”, санки ҝүҹлү илдырым зәрбәси илә “онлары дәһшәтә” ҝәтирир (Мәзмур 2:5, МКШ).
Аллаһ Падшаһыны тахта јүксәлтди
12. Мәзмур 2:6 ајәсиндә кимин тахта јуксәлдилмәсиндән данышылыр?
12 Јеһованын мәзмурчунун васитәсилә даһа сонра дедикләри, сөзсүз ки, милләтләри тәшвишә салыр. Аллаһ бәјан едир: “Мән падшаһымы Мүгәддәс дағым Сионда әјләшдирмишәм” (Мәзмур 2:6, МКШ). Јерусәлимдәки Сион дағы Давудун бүтүн Исраил үзәринә падшаһ гојулдуғу тәпә иди. Лакин бу Хиласкар Падшаһ нә бу шәһәрдә, нә дә јер үзүнүн башга бир јериндә тахтда отурмајаҹагдыр. Әслиндә Јеһова сәмави Сион дағында Иса Мәсиһи артыг тахта отурдуб (Вәһј 14:1).
13. Јеһова Өз Оғлу илә һансы әһди бағлајыб?
13 Инди Хиласкар Падшаһын өзү дејир: “Рәббин фәрманыны [Јеһованын Өз Оғлу илә Падшаһлыг һаггында әһд бағладығы фәрманы] е’лан едәҹәјәм. Рәбб мәнә деди: “Сән Мәним оғлумсан, бу ҝүн сәнә Ата олдум” (Мәзмур 2:7, МКШ). Мәсиһ һәвариләри илә сөһбәтиндә дә Падшаһлыг һаггындакы әһди хатырлатмышды: “Кечирдијим сынагларда Мәнимлә бәрабәр оланлар сизсиниз вә Атам Мәнә бир сәлтәнәт [падшаһлыг] тапшырдығы кими Мән дә сизә бир сәлтәнәт [падшаһлыг] тапшырырам” (Лука 22:28, 29).
14. Нәјә ҝөрә демәк олар ки, падшаһ олмаг үчүн Иса тәкзибедилмәз һүгуга маликдир?
14 Мәзмур 2:7 ајәсиндә габагҹадан дејилдији кими, Јеһова Исанын вәфтиз олундуғу заман ону Өз Оғлу кими гәбул етмиш, сонра исә ону руһани һәјат үчүн дирилдәрәк буну бир даһа тәсдиг етмишдир (Марк 1:9-11; Ромалылара 1:4; Ибраниләрә 1:5; 5:5). Бәли, сәмави Падшаһлығын Падшаһы — Аллаһын ваһид Оғлудур (Јәһја 3:16). Иса Давудун падшаһлыг нәслиндән ҝәлдијинә ҝөрә, Падшаһ олмаг үчүн тәкзибедилмәз һүгуга маликдир (2 Самуел 7:4-17; Матта 1:6, 16). Икинҹи Мәзмура әсасән, Аллаһ Өз Оғлуна дејир: “Мәндән ирс олараг милләтләри истә, мүлк олараг јерин һәр тәрәфини сәнә верим” (Мәзмур 2:8, МКШ).
15. Иса нәјә ҝөрә “ирс олараг милләтләри” истәјир?
15 Падшаһ, јә’ни Аллаһын Оғлу һакимијјәтдә Јеһовадан сонра икинҹи јери тутур. Иса Јеһоваја олан садиглијини вә сәдагәтини сүбут етмиш вә Онун там е’тибарыны газанмышдыр. Бундан әлавә, О, Аллаһын Илкидир вә буна ҝөрә дә мираса маликдир. Иса Мәсиһ — “ҝөрүнмәјән Аллаһын сурәти вә бүтүн хилгәтин фөвгүндә дуран, илк доғулан”дыр (Колослулара 1:15). Онун “ирс олараг милләтләри... мүлк олараг јерин һәр тәрәфини” истәмәси кифајәтдир ки, Аллаһ она версин. Иса, инсанлары севдији, јер үзүнә вә бәшәријјәтә даир сәмави Атасынын нијјәтләрини јеринә јетирмәји ҝүҹлү арзу етдији үчүн белә бир хаһиши едир (Сүлејманын мәсәлләри 8:30, 31).
Милләтләрә гаршы Јеһованын “фәрманы”
16, 17. Мәзмур 2:9 ајәсинә әсасән милләтләри нә ҝөзләјир?
16 Икинҹи Мәзмур инди, Иса Мәсиһин ҝөрүнмәз иштиракы заманы јеринә јетдији үчүн, милләтләри нә ҝөзләјир? Падшаһ бир аздан Аллаһын фәрманыны һәјата кечирәҹәкдир, ‘дәмир әса илә онларын [милләтләрин] ҝүҹүнү гыраҹагдыр, сахсы габ кими онлары чилик-чилик едәҹәкдир’ (Мәзмур 2:9, МКШ).
17 Гәдимдә падшаһларын әсасы онларын падшаһлыг һакимијјәтинин символу иди. Икинҹи Мәзмурда хатырландығы кими, бә’зи әсалар дәмирдән дүзәлдилирди. Бурада, Падшаһ олан Мәсиһин милләтләри неҹә асанлыгла мәһв едәҹәји мәҹази диллә ҝөстәрилир. Дәмир әсанын мөһкәм зәрбәси, ҝилдән дүзәлдилмиш сахсы габы чилик-чилик кими едәр.
18, 19. Аллаһын илтифатыны газанмаг үчүн, јер үзүндә јашајан падшаһлара нә етмәк ҝәрәкдир?
18 Ҝөрәсән доғруданмы, милләтләрин рәһбәрләринин бу дәһшәтли мәһвә тамаша етмәкдән башга чыхыш јоллары јохдур? Чыхыш јолу вар вә мәзмурчу онлары чағырыр: “Инди, еј шаһлар, мүдрик олун! Еј дүнја һакимләри, ибрәт алын!” (Мәзмур 2:10, МКШ). Шаһлар дүшүнмәјә, ағылланмаға дә’вәт олунурлар. Онлара өз планларынын нә гәдәр бош олдуғуну вә онлардан фәргли олараг, Аллаһын Падшаһлығынын инсанларын рифаһына нәләр едәҹәјини дәрк етмәк лазымдыр.
19 Аллаһын илтифатыны газанмаг үчүн, јер үзүндә јашајан падшаһлара өз һәрәкәт тәрзләрини дәјишмәк ҝәрәкдир. Онлара ‘Рәббә горху илә гуллуг етмәк вә титрәјәрәк мәсрур олмаг’ нәсиһәт олунур (Мәзмур 2:11). Әҝәр онлар белә етсәјдиләр, нәтиҹәси нә оларды? Онлар вурнухмаја дүшмәздиләр, әксинә, Хиласкар Падшаһын һазырладығы шејләрә севинәрдиләр. Јер үзүндә јашајан рәһбәрләрә, онларын рәһбәрлијинә хас олан мәғрурулуғу вә дикбашлығы кәнара гојмаг лазымдыр. Онлара јубанмадан дәјишилмәк вә Јеһованын ән мүкәммәл олан али һакимијјәтинин үстүнлүјүнү вә Онун Хиласкар Падшаһынын дәфедилмәз гүввәсини е’тираф етмәк лазымдыр.
“Оғулу өпүн”
20, 21. “Оғулу өпүн” нә демәкдир?
20 Инди исә мәзмурчу милләтләрин рәһбәрләринә мәрһәмәт долу бир дә’вәтлә мүраҹиәт едир. Бирҝә мүгавимәт ҝөстәрмәјин әвәзинә, онлар үчүн нөвбәти мәсләһәтә риајәт етмәк даһа јахшыдыр: “Оғулу өпүн ки, [Јеһова Аллаһ] гәзәбләнмәсин, јохса тутдуғунуз јолда мәһв оларсыныз. Чүнки [Онун] гәзәби тезликлә аловланар” (Мәзмур 2:12а, МКШ). Јеһова Аллаһ фәрман чыхарырса, гулаг асмаг ҝәрәкдир. Аллаһ Өз Оғлуну тахта отурданда, јер үзүнүн рәһбәрләри ‘бош шејләри дүшүнмәјә’ сон гојмалы идиләр. Онлар дәрһал Падшаһы гәбул етмәли вә тамамилә Она табе олмалы идиләр.
21 “Оғулу өпүн” нә демәкдир? Бу мәзмурун бәстәләндији дөврдә өпүш достлуға ишарә едирди, һәмчинин гонагпәрвәрлик ҝөстәрәрәк өпүшлә гонаглары саламлајырдылар. Бундан әлавә, өпүш садиглији вә сәдагәти ифадә едирди (1 Самуел 10:1). Икинҹи Мәзмурун бу ајәсиндә “Оғулу өпүн” демәклә, Аллаһ милләтләрә Онун Оғлуну мәсһ едилмиш Падшаһ кими саламламағы бујурур.
22. Милләтләрин рәһбәрләринә һансы хәбәрдарлыға диггәт јетирмәк ҝәрәкдир?
22 Аллаһ тәрәфиндән сечилмиш Падшаһын һакимијјәтини гәбул етмәкдән имтина едән кәсләр, Јеһованы тәһгир етмиш олурлар. Онлар Јеһова Аллаһын һөкмранлығыны, о ҹүмләдән Онун инсанлар үчүн ән јахшы рәһбәр сечмәк һүгугуну вә баҹарығыны инкар едирләр. Аллаһын гәзәби милләтләрин рәһбәрләрини, онлар өз планларыны һәјата кечирмәјә ҹәһд етдикләри заман ҝөзләнилмәдән јахалајаҹагдыр. Онун “гәзәби тезликлә”, јә’ни сүр’әтлә вә гаршысыалынмаз шәкилдә аловланаҹагдыр. Милләтләрин рәһбәрләри бу хәбәрдарлығы миннәтдарлыгла гәбул етмәли вә она мүвафиг давранмалыдырлар. Бу јолла онлар өз һәјатларыны хилас едәҹәкләр.
23. Инсанларын һәләлик нәјә вахтлары вар?
23 Бу мә’налы мәзмур нөвбәти сөзләрлә сона јетир: “Она [Јеһоваја] пәнаһ ҝәтирәнләрин һамысы нә бәхтијардыр!” (Мәзмур 2:12б, МКШ). Инсанларын тәһлүкәсизлик әлдә етмәләри үчүн һәләлик вахтлары вар. Бу, милләтләрин бош планларынын тәрәфдары олан рәһбәрләрә дә аиддир. Онлар Падшаһлығын рәһбәрлијинә табе олараг, Јеһовада сығынаҹаг тапа биләрләр. Лакин онлар, Хиласкар Падшаһлыг мүгавимәт ҝөстәрән милләтләри мәһв етмәздән әввәл һәрәкәт етмәлидирләр.
24. Һәтта бу нараһат дүнјада белә биз неҹә хошбәхт ола биләрик?
24 Әҝәр биз Мүгәддәс Јазылары сә’јлә өјрәнир вә онун нәсиһәтләрини һәјата кечиририксә, һәтта бу нараһат дүнјада белә хошбәхт ола биләрик. Мүгәддәс Китабын мәсләһәтләрини тәтбиг етмәк аиләдәки мүнасибәтләри јахшылашдырыр вә бу дүнјаја хас олан бир чох нараһатчылыг вә һәјәҹан һиссиндән азад едир. Мүгәддәс Китабын рәһбәрлијинә риајәт етмәјимиз Јараданы разы салдығымыза әминлик верир. Каинатын Һөкмдарындан савајы һеч ким “индики вә ҝәләҹәк һәјат үчүн” зәманәт верә билмәз. “Ҝәләҹәк һәјат” — Падшаһлығын һакимијјәтини рәдд едәрәк, әдаләтли принсипләрдән үз чевирән кәсләри Аллаһ јер үзүндән тәмизләдикдән сонра башлајаҹагдыр (1 Тимотејә 4:8).
25. Јеһованын “фәрманы”нын һөкмән јеринә јетәҹәји үчүн, биз һансы һадисәләри ҝөзләјә биләрик?
25 Јеһованын “фәрманы” јеринә јетмәјә билмәз. О, бизим Јараданымыз олдуғуна ҝөрә бәшәријјәт үчүн нәјин даһа јахшы олдуғуну билир. Аллаһ Өз нијјәтини һәјата кечирәҹәк вә әзиз Оғлунун Падшаһлығы алтында итаәткар инсанлары сүлһ, мәмнунлуг вә әбәди тәһлүкәсизликлә тә’мин едәрәк, онлара хејир-дуа верәҹәкдир. Даниел пејғәмбәр бизим ҝүнләр һаггында јазмышды: “О падшаһларын ҝүнләриндә ҝөјләрин Аллаһы әбәдијјән дағылмајаҹаг бир падшаһлыг гураҹаг... бу падшаһлыгларын һамысыны о парчалајаҹаг вә мәһв едәҹәк, өзү исә әбәдијјән дураҹаг” (Даниел 2:44). Инди ‘Оғулу өпмәјин’ вә Һөкмдар Рәбб Јеһоваја хидмәт етмәјин әсл вахтыдыр!
[Һашијәләр]
a Әввәлҹә, ‘мәсһ едилмиш’ — Давуд падшаһ, “дүнја шаһлары” исә она гаршы орду топлајан филистимли рәһбәрләр иди.
b Јунанҹа Мүгәддәс Јазыларын башга ајәләриндә дә ҝөстәрилир ки, икинҹи Мәзмурда хатырланан Аллаһын мәсһ едилмиши Исадыр. Мәзмур 2:7 ајәсини Һәвариләрин ишләри 13:32, 33 вә Ибраниләрә 1:5; 5:5 ајәләри илә мүгајисә етдикдә бу даһа ајдын олур. Мәзмур 2:9 вә Вәһј 2:27 ајәләринә дә бахын.
Сиз неҹә ҹаваб верәрдиниз?
• Үммәтләр һансы “бош шејләри” дүшүнүрләр?
• Јеһова милләтләрә нәјә ҝөрә истеһза едир?
• Милләтләрә даир Јеһованын “фәрманы” нәдән ибарәтдир?
• “Оғулу өпүн” нә демәкдир?
[15-ҹи сәһифәдәки шәкил]
Рәһбәрләр Исраил халгы илә бирликдә Иса Мәсиһә гаршы суи-гәсд һазырламышдылар.
[16-ҹы сәһифәдәки шәкил]
Мәсиһ сәмави Сион дағында Падшаһ тә’јин едилиб.