Мүвәффәгијјәти неҹә газана биләрсиниз?
ВАЛИДЕЈНЛӘР ушагларынын гајғысына галдығы вә онларын уғур газанмасыны истәдији кими, сәмави Атамыз да бизим гајғымыза галыр вә уғурлу олмағымызы истәјир. Буна ҝөрә дә, О бизә мүвәффәгијјәт вә уғурсузлуг һаггында чох шеји өјрәдир. Аллаһын сөзләринә диггәт јетирән адам һаггында Мүгәддәс Китабда әминликлә дејилир: «[О] етдији һәр ишдә уғур газанар» (Мәзмур 1:3).
Бәс нә үчүн мүвәффәгијјәтли, хошбәхт вә мә’налы һәјат чохларына нәсиб олмур? Бу мәзмуру нәзәрдән кечирмәклә суалымыза ҹаваб тапаҹаг вә уғур газанмағын јолуну өјрәнәҹәјик.
«Писләрин мәсләһәти»
Мәзмурчу «писләрин мәсләһәти» илә ҝетмәјин тәһлүкәли олдуғу барәдә хәбәрдарлыг едир (Мәзмур 1:1). Писләрин ән бөјүјү исә Шејтан Иблисдир (Матта 6:13). Мүгәддәс Јазыларда дејилир ки, о «бу дүнјанын рәиси»дир вә «бүтүн дүнја... шәририн һакимијјәти алтындадыр» (Јәһја 16:11; 1 Јәһја 5:19). Буна ҝөрә дә, тәәҹҹүблү дејил ки, дүнјада верилән мәсләһәтләрин әксәријјәти Шејтанын дүшүнҹә тәрзини әкс етдирир.
Писләрин вердији мәсләһәт неҹә олур? Онлар адәтән ‘Аллаһа күфр едир’, јә’ни Она е’тинасызлыг ҝөстәрирләр (Мәзмур 10:13). Онларын мәсләһәтләри бүтүн дүнјаны бүрүјүб. Мүасир ҹәмијјәтдә «ҹисмани еһтирас, ҝөзләрин еһтирасы вә һәјатын тәкәббүрү» ашыланыр (1 Јәһја 2:16). Күтләви информасија васитәләри «баҹардығын гәдәр һәјатдан һәр шеји ҝөтүр» идејасыны инсанларын бејнинә јеридир. Бүтүн дүнјада компанијалар инсанлара еһтијаҹлары олуб-олмадығына бахмајараг, мәһсулларыны алдырмаг үчүн реклама илдә 500 милјард АБШ доллары хәрҹләјир. Бу рекламлар адамларын садәҹә алыш-вериш тәрзини дејил, мүвәффәгијјәтә бахышыны да тәһриф едиб.
Бу ҝүн инсанлар әввәлләр онлар үчүн әлчатмаз олан әшјалара саһиб олсалар да, јенә дә ҝөзләри дојмур. Онлар елә дүшүнүрләр ки, һансыса әшјалары әлдә етмәјинҹә хошбәхт олмајаҹаглар. Бу сәһв фикир «Атадан дејил, дүнјадандыр» (1 Јәһја 2:16).
Јарадан сәадәтимизин нәдән асылы олдуғуну билир. Онун мәсләһәти ‘писләрин мәсләһәтиндән’ фәргләнир. Бу сәбәбдән, һәм Аллаһы разы салмаг, һәм дә уғур газанмаг үчүн дүнјанын јоллары илә ҝетмәк, ики мүхтәлиф ҹығырла ејни заманда јеримәјә бәнзәјир. Бу исә һеч ҹүр мүмкүн дејил. Буна ҝөрә дә, Мүгәддәс Китабын «бу зәманәјә ујғунлашмајын» хәбәрдарлығы јериндәдир (Ромалылара 12:2).
Дүнјанын дүшүнҹәнизә тә’сир етмәсинә јол вермәјин
Шејтанын тә’сири алтында олан бу дүнја елә тәәссүрат ојатмаға чалышыр ки, ҝуја бизим гајғымыза галыр. Лакин диггәтли олмаг лазымдыр. Унутмајын ки, Шејтан өз мәнфәәтини ҝүдәрәк илк гадын Һәвваны алдатды. Сонра Шејтан ондан истифадә едәрәк Адәми ҝүнаһа сүрүкләди. Шејтан бу ҝүн дә өз пис мәсләһәтини јајмаг үчүн инсанлардан истифадә едир.
Мәсәлән, әввәлки мәгаләдә хатырланан Девид иш вахтындан артыг ишләмәли, тез-тез ишҝүзар сәфәрләр етмәли олурду. «Мән базар ертәси сәһәр тездән чыхыр, ҹүмә ахшамы ҝеҹә гајыдырдым», — дејә о данышыр. Дүнјада уғур газанмаг үчүн белә гурбанлар тәләб олундуғуну баша дүшән јахын достлары, аилә үзвләри вә иш јолдашлары она «аиләсинин хәтринә бу иши әлдән бурахмамағы» мәсләһәт едирдиләр. Онлар белә фикир јүрүдүрдүләр ки, о јалныз бир нечә ил, өзүнү тутанаҹан белә ишләмәли олаҹаг. Девид дејир: «Онларын сөзләринә ҝөрә, аиләм үчүн белә даһа јахшы олаҹагды, чүнки евә даһа чох пул ҝәтирәҹәк, даһа чох уғур газанаҹагдым. Аиләмин јанында олмадығыма бахмајараг, достларым мәни инандырырдылар ки, әслиндә онлар үчүн чох шеј едирәм». Бир чохлары Девид кими ҝеҹә-ҝүндүз ишләјирләр ки, аиләләрини, онларын зәннинҹә, еһтијаҹлары олан һәр шејлә тә’мин етсинләр. Анҹаг белә мәсләһәт уғур газандырармы? Әслиндә аиләнин нәјә еһтијаҹы вар?
Девид аиләсинин нәјә еһтијаҹы олдуғуну ишҝүзар сәфәрләрдән бириндә баша дүшдү. О дејир: «Бир дәфә гызым Анжелика илә телефонла данышанда о мәндән сорушду: “Атаҹан, ахы нијә бизимлә галмаг истәмирсән?” Бу мәним үчүн бир зәрбә олду». Гызынын сөзләри онун бу ишдән чыхмаг арзусуну даһа да ҝүҹләндирди. Девид аиләсинин һәгиги еһтијаҹыны өдәмәк, јә’ни өзүнү, вахтыны вә диггәтини онлара сәрф етмәк гәрарына ҝәлди.
Аллаһын мәсләһәтинә әмәл етмәк мүвәффәгијјәт газандырыр
Дүнјада ҝениш јајылан јанлыш дүшүнҹә тәрзинә гаршы дурмаг неҹә мүмкүндүр? Мәзмурчунун сөзләринә ҝөрә ‘Рәббин ганунундан зөвг алан, ҝеҹә-ҝүндүз бу тә’лиматы дәрин дүшүнән’ адам хошбәхт вә мүвәффәгијјәтлидир (Мәзмур 1:2).
Аллаһ Јешуаны Исраил халгынын башчысы тә’јин едәндә деди: «Ҝеҹә-ҝүндүз онун [Аллаһын Кәламы] үзәриндә дүшүн». Дүздүр, Аллаһын Кәламыны охумаг вә үзәриндә дүшүнмәк чох ваҹиб олса да, Јешуа һәм дә ‘орада јазылан һәр шејә дәгиг әмәл етмәли’ иди. Әлбәттә, Мүгәддәс Китабы охумаг сизә мө’ҹүзәли шәкилдә уғур газандырмајаҹаг. Ҝәрәк охудуғунуза әмәл едәсиниз. Јеһова Јешуаја демишди: «Онда јолун уғурлу олаҹаг вә мүвәффәгијјәт газанаҹагсан» (Јешуа 1:8).
Нәвазишли атанын гуҹағында отуруб, онунла бирликдә севимли һекајәсини охујан ушағын севинҹини тәсәввүр един. Һекајәни дәфәләрлә охумуш олсалар да, бу анлар онлар үчүн чох шириндир. Ејни тәрздә, Аллаһы севән инсан Мүгәддәс Китабы ҝүндәлик охујаркән сәмави Атасы илә бирҝә кечирдији хош дәгигәләрдән мәмнунлуг дујур. Јеһованын мәсләһәтини вә рәһбәрлијини гәбул едән инсан «ахар сулар кәнарында әкилән ағаҹ кими барыны мөвсүмүндә верәр, јарпағы солмаз, етдији һәр ишдә уғур газанар» (Мәзмур 1:3).
Мәзмурчунун тәсвир етдији ағаҹ өз-өзүнә шахә вермәјир. Бағбан ону ахар сулар кәнарында әкиб она гуллуг едир. Сәмави Атамыз да Мүгәддәс Јазылар васитәсилә мәсләһәт верәрәк бизим дүшүнҹә тәрзимизи дүзәлдир. Белә гајғынын сајәсиндә биз Аллаһа мәгбул бәһрәләр ҝәтирир вә јолларымызда уғурлу олуруг.
Анҹаг «пис адамлар белә дејил». Дүздүр, һәрдән адама елә ҝәлир ки, онларын һәр иши јахшы ҝәтирир, лакин белә инсанларын сону пис олаҹаг. Онлар ‘һөкм ҝүнүндә дајана билмәјәҹәкләр’. ‘Писләрин јолу онлары өлүмә апарыр’ (Мәзмур 1:4-6).
Беләликлә, гојмајын ки, дүнја сизин мәгсәд вә дәјәрләринизә тә’сир етсин. Исте’дадыныз вә дүнјада уғур газанмаг имканыныз олса белә, исте’дадынызы нәјә сәрф етдијинизә диггәт јетирин вә дүнјанын ондан истәдији кими истифадә етмәсинә јол вермәјин. Гаршысына мә’насыз мәгсәдләр гојан, вар-дөвләт далынҹа гачан инсан ‘солар’. Анҹаг Аллаһла јахшы мүнасибәт бизи һәгиги мүвәффәгијјәтә чатдырар вә хошбәхтлик ҝәтирәр.
Мүвәффәгијјәтә неҹә наил олмаг олар?
Инсан Аллаһын мәсләһәтинә әмәл едәндә нә үчүн һәр ишиндә уғур газаныр? Мәзмурчу бу дүнјада уғур газанмагдан данышмырды. Аллаһ адамынын уғуру Аллаһын ирадәсини јеринә јетирмәклә бағлыдыр, Онун ирадәси исә һеч вахт мүвәффәгијјәтсизлијә уғрамыр. Ҝәлин ҝөрәк Мүгәддәс Китаб принсипләрини һәјата кечирәрәк неҹә уғур газанмаг олар.
Аиләдә. Мүгәддәс Јазылар әрә ‘арвадыны, өз бәдәни гәдәр севмәји’, арвада исә ‘әринә һөрмәт етмәји’ нәсиһәт едир (Ефеслиләрә 5:28, 33). О, һәмчинин валидејнләри ушагларла вахт кечирмәјә, ҝүлүб-данышмаға вә һәјатда ваҹиб шејләри онлара өјрәтмәјә чағырыр (Ганунун тәкрары 6:6, 7; Ваиз 3:4). Аллаһын Кәламы валидејнләрә «ушагларынызы гәзәбләндирмәјин» мәсләһәтини дә верир. Онлар белә даврананда ушаглар үчүн дә «валидејнләринизә итаәт един», «атана вә анана һөрмәт ет» әмрләринә риајәт етмәк асан олур (Ефеслиләрә 6:1-4). Аллаһын бу мәсләһәтләринә әмәл етмәк аиләјә хошбәхтлик ҝәтирәр.
Достларла мүнасибәтдә. Инсанларын чоху дост арзусундадыр. Бизим севиб-севилмәјә еһтијаҹымыз вар. Иса давамчыларына ‘бир-бирләрини севмәји’ әмр етмишди (Јәһја 13:34, 35). Онларын арасында севәҹәјимиз, һәтта ән дәрин фикирләримизи вә һиссләримизи е’тибар едә биләҹәјимиз достлар тапырыг (Сүлејманын мәсәлләри 18:24б). Ән ваҹиби исә, Мүгәддәс Китаб принсипләрини тәтбиг етмәклә биз ‘Аллаһа јахынлашар’ вә һәтта Ибраһим кими, «Аллаһын досту» адланарыг (Јагуб 2:23; 4:8).
Һәјатын мә’насы. Сөзүн әсл мә’насында уғурлу олан инсанлар мә’насыз өмүр сүрмүрләр, онлар һәјатын мә’насыны тапмышлар. Белә инсанларын һәјаты гејри-сабит тәмәлләр үзәриндә гурулмајыб. Гаршыларына гојдуглары мәгсәдләр онлара һәгиги вә узунсүрән мәмнунлуг ҝәтирир, чүнки һәјатлары һәгиги мә’наја маликдир. Бәс инсанын һәјатынын мә’насы нәдәдир? «Аллаһдан горх, Онун әмрләрини јеринә јетир. Бәли, инсанын әсас вәзифәси будур» (Ваиз 12:13).
Үмид. Аллаһла достлуг, ејни заманда ҝәләҹәјә үмид верир. Һәвари Павел һәмиманлыларыны «ҝүвәнилә билмәјән вар-дөвләтә» дејил, ‘Аллаһа үмид бәсләмәјә’ чағырырды. Белә етмәклә онлар ‘өзләринә ҝәләҹәк үчүн јахшы тәмәл олаҹаг бир хәзинә топлајырлар ки, һәгиги һәјата наил олсунлар’ (1 Тимотејә 6:17-19, И–93). Сәмави Падшаһлыг тезликлә Јер күрәсиндә Ҹәннәти бәрпа едәҹәк, о заман һәгиги һәјат ҝерчәклијә чевриләҹәк (Лука 23:43).
Мүгәддәс Китаб принсипләрини тәтбиг етмәклә сиз бүтүн проблемләрдән мүдафиә олунмасаныз да, писләрин өзләрини дүчар етдији бир чох әзаб вә бәлалардан узаг олаҹагсыныз. Јухарыда хатырланан Девид вә онун кими милјонларла инсан Мүгәддәс Китаб принсипләрини тәтбиг етмәјин фајдасыны ҝөрдү. Әлверишли графики олан иш тапандан сонра Девид бу һагда дејир: «Јолдашым вә ушагларымла мүнасибәтим вә Јеһова Аллаһа јығынҹагда ағсаггал кими хидмәт етмәјим мәни чох севиндирир». Буна ҝөрә дә, Мүгәддәс Китабда Аллаһын мәсләһәтинә гулаг асан инсан һаггында «етдији һәр ишдә уғур газанар» дејилмәси тәәҹҹүблү дејил!
[6-ҹы сәһифәдәки ҹәдвәл]
МҮВӘФФӘГИЈЈӘТ ГАЗАНДЫРАН БЕШ АДДЫМ
1. Дүнјанын сизин дүшүнҹә тәрзинизә тә’сир етмәсинә јол вермәјин.
2. Аллаһын Кәламыны һәр ҝүн охујун вә үзәриндә дүшүнүн.
3. Мүгәддәс Китаб мәсләһәтләринә әмәл един.
4. Аллаһла дост олун.
5. Һәгиги Аллаһдан горхун вә Онун әмрләрини јеринә јетирин.
[7-ҹи сәһифәдәки шәкилләр]
Мүвәффәгијјәтә апаран аддымлары атырсынызмы?