Јеһованын иззәти халгына ишыг сачыр
“Рәбб сәнин әбәди ишығын олаҹаг” (ИШАЈА 60:20).
1. Јеһова садиг хидмәтчиләринә неҹә хејир-дуа верир?
“РӘББ өз халгындан разыдыр; тәвазөкарлары гуртулушу илә ҝөзәлләшдирир” (Мәзмур 149:4). Бу сөзләри бир заманлар мәзмурчу демишдир вә онун сөзләринин һәгигәт олдуғуну тарих дәфәләрлә сүбута јетирмишдир. Јеһованын хидмәтчиләри Она садиг галдыгда, О, онларын гејдинә галыр, сәмәрәли едир вә горујур. Кечмишдә Аллаһ халгына дүшмән үзәриндә гәләбә бәхш едирди. Бу ҝүн исә, руһән мөһкәм галмагда онлара көмәк едир вә Иса Мәсиһин фидијә гурбанлығы әсасында хилас әлдә етмәјин мүмкүн олдуғуна онлара зәманәт верир (Ромалылара 5:9). Јеһова буну она ҝөрә едир ки, халгы Онун ҝөзүндә ҝөзәлдир.
2. Мүгавимәтләрә бахмајараг, Аллаһын халгы нәјә әминдир?
2 Гаранлыға гәрг олмуш дүнјада “Аллаһ јолунда... јашамаг истәјәнләр”, шүбһәсиз ки, мүгавимәтләрлә үзләшәҹәкләр (2 Тимотејә 3:12). Лакин Јеһова дүшмәнләрин һәрәкәтләринә ҝөз гојур, онлары хәбәрдар едир: “Сәнә гуллуг етмәјән милләт вә өлкә јох олаҹаг; вә о милләтләр тамамилә хараб олаҹаг” (Ишаја 60:12). Буҝүнкү мүгавимәтләр мүхтәлиф формалар алыр. Бә’зи өлкәләрдә дүшмәнләр сәмими гәлбли мәсиһчиләрин Јеһоваја ибадәтләринә мәһдудијјәт гојмаға, јахуд ону гадаған етмәјә чалышырлар. Башга өлкәләрдә фанатикләр Јеһованын хидмәтчиләринә һүҹум едир, онларын мүлкүнү јандырырлар. Лакин унутмајаг ки, Јеһованын ирадәсини јеринә јетирәнләрә гаршы едилән һәр бир мүгавимәтлә нә баш верәҹәјини Јеһова әввәлҹәдән мүәјјән едиб. Дүшмәнләр мәғлуб едиләҹәк. Өвладлары тәрәфиндән тәмсил едилән Сиона гаршы мүбаризә апаран кәсләр мүвәффәгијјәтсизлијә уғрајаҹаглар. Бөјүк Аллаһымыз Јеһованын вердији бу зәманәт мәҝәр бизи руһландырмырмы?
Ҝөзләнилдијиндән дә артыг хејир-дуалар
3. Јеһованын хидмәтчиләринин ҝөзәл олдуглары вә бол сәмәрә вердикләри әјани сурәтдә неҹә тәсвир едилир?
3 Индики системин сон ҝүнләриндә Јеһова халгына ҝөзләнилдијиндән дә артыг хејир-дуалар верир. Бу, хүсусилә дә ибадәт јерләринә, һәмчинин Онун адыны дашыјанлара аиддир. Вахт кечдикҹә Јеһова ибадәт јерләрини даһа да иззәтләндирир. Ишајанын пејғәмбәрлијинә әсасән, Јеһова Сиона бу сөзләрлә мүраҹиәт едир: “Ливанын иззәти олан сәрв, чинар вә шүмшад ағаҹы мүгәддәсимин јерини ҝөзәлләшдирмәк үчүн һамысы бирдән сәнә ҝәләҹәкләр; вә ајагларымын јерини иззәтли гылаҹағам” (Ишаја 60:13). Галын мешәләрлә өртүлән дағлар гаршымызда ҝөзәл мәнзәрә ачыр. Буна ҝөрә дә, бөјүк вә гәшәнҝ ағаҹлар Јеһованын хидмәтчиләринин ҝөзәл олдугларыны вә бол сәмәрә вердикләрини мүнасиб тәрздә тәсвир едир (Ишаја 41:19; 55:13).
4. “Мүгәддәс јер” вә Јеһованын ‘ајагларынын јери’ нә демәкдир вә онлар неҹә ҝөзәлләшир?
4 Бәс Ишаја 60:13 ајәсиндә хатырланан “мүгәддәс јер” вә Јеһованын ‘ајагларынын јери’ ифадәләриндә нәзәрдә тутулан нәдир? Бу ифадәләр, Јеһованын бөјүк руһани мә’бәдинин һәјәтләринә — Јеһоваја ибадәт етмәк вә Иса Мәсиһ васитәсилә Она јахынлашмаг үчүн олан гурулуша аиддир (Ибраниләрә 8:1-5; 9:2-10, 23). Јеһова һәмин руһани мә’бәдә, бүтүн халглардан олан инсанлары ибадәт үчүн топламагла иззәтләндирәҹәји һагда нијјәтини билдирди (Һаггај 2:7). Бүтүн инсанлардан олан издиһамын Јеһоваја ибадәт үчүн јүксәк даға неҹә ахышдыгларыны Ишаја артыг габагҹадан ҝөрмүшдү (Ишаја 2:1-4). Чох јүзилликләр сонра исә һәвари Јәһја рө’јада “һәр милләтдән, бүтүн гәбиләләрдән, халглардан вә дилләрдән олан, кимсәнин сајмаға гадир олмадығы бөјүк бир издиһам” ҝөрмүшдү. Онлар “Аллаһын тахты гаршысында” дурурдулар вә “Онун мә’бәдиндә ҝеҹә-ҝүндүз Она” хидмәт едирдиләр (Вәһј 7:9, 15). Бизим ҝүнләрдә, бу пејғәмбәрлијин јеринә јетдији бир дөврдә, Јеһованын евинин ҝөзәлләшдијини ҝөзләримизлә ҝөрүрүк.
5. Сионун өвладлары илә јахшылыға доғру һансы бөјүк дәјишикликләр баш верди?
5 Бу, Сион үчүн јахшылыға доғру бөјүк дәјишиклик демәк иди. Јеһова дејир: “Сән бурахылмыш вә нифрәт ҝөрмүш олдуғуна вә ичиндән кимсә кечмәдијинә әвәз олараг, сәни әбәди өјүнмә вә чох нәсилләрә севинҹ гылаҹағам” (Ишаја 60:15). Биринҹи Дүнја мүһарибәсинин сонуна доғру “Аллаһын Исраили” һәгигәтән дә виранәлик дөврүнү јашајырды (Галатијалылара 6:16). О, доғрудан да өзүнү “бурахылмыш” һисс едирди, белә ки, онун јер үзүндәки өвладлары Аллаһын ирадәсинин онлар үчүн нәдән ибарәт олдуғуну анламырдылар. Сонра, 1919-ҹу илдә, Јеһова мәсһ едилмиш хидмәтчиләрини јенидән һәјата дирчәлтди вә о вахтдан бәри онлары ҝөзәл руһани чичәкләнмә илә хејир-дуаландырыр. Бәс Ишаја 60:15 ајәсиндә јазылмыш вә’д бизи руһландырмырмы? Јеһова Сиону “әбәди өјүнмә” санаҹаг. Бәли, һәм Сионун өвладлары, һәм дә Јеһова Сионла фәхр едәҹәкләр. Сион “севинҹә” чевриләҹәк, сонсуз шәнлијә сәбәб олаҹаг. Үстәлик, бу һансыса гыса мүддәт әрзиндә давам етмәјәҹәк. Јердә јашајан өвладлары тәрәфиндән тәгдим едилән Сиона гаршы илтифат нәсилдән нәслә давам едәҹәк. Бу илтифат һеч заман битмәјәҹәк.
6. Мәсиһин давамчылары милләтләрин вәсаитләриндән неҹә истифадә едирләр?
6 Инди исә Аллаһын даһа бир вә’дини динләјәк. Јеһова Сиона мүраҹиәт едәрәк дејир: “Милләтләрин сүдүнү әмәҹәксән вә падшаһларын дөшләрини әмәҹәксән; вә биләҹәксән ки, сәни гуртаран вә фидијә илә Хиласкарын олан, Јагубун Гадири, Рәбб мәнәм” (Ишаја 60:16). Сион һансы мә’нада “милләтләрин сүдүнү... падшаһларын дөшләрини” әмәҹәк? О мә’нада ки, мәсһ едилмиш мәсиһчиләр вә онларын һәмкарлары олан “башга гојунлар” һәгиги ибадәтин јајылмасы үчүн милләтләрин гијмәтли вәсаитләриндән истифадә едирләр (Јәһја 10:16). Көнүллү сурәтдә ианә едилмиш пуллар, ҝениш мигјаслы үмумдүнја тәблиғ вә тә’лим ишинин мүмкүн олмасына көмәк едир. Габагҹыл техниканын мүдрик шәкилдә тәтбиг едилмәси, Мүгәддәс Китабын вә она әсасланан әдәбијјатын јүзләрлә дилләрдә чап едилмәсини асанлашдырыр. Һәлә һеч заман Мүгәддәс Китаб һәгигәти бу гәдәр әлчатан олмамышдыр. Чохсајлы дөвләтләрин вәтәндашлары өјрәнирләр ки, мәсһ едилмиш хидмәтчиләрини руһани әсарәтдән хилас едән Јеһова һәгигәтән дә Хиласкардыр.
Тәшкилати ирәлиләјишләр
7. Сионун өвладлары һансы әламәтдар ирәлиләјиш дөврүнү јашајыр?
7 Јеһова халгыны башга ҹәһәтдән дә ҝөзәлләшдирир. О, халгына тәшкилатда јахшылыға доғру едилән дәјишикликләрлә хејир-дуа верир. Ишаја 60:17 ајәсиндә охујуруг: “Тунҹ јеринә гызыл ҝәтирәҹәјәм вә дәмир јеринә ҝүмүш вә ағаҹ јеринә тунҹ вә даш јеринә дәмир ҝәтирәҹәјәм. Вә мә’мурларыны сүлһ едәҹәјәм, нәзарәтчиләрини дә әдаләт [“сүлһү сәнин нәзарәтчиләрин, әдаләти тапшырыг верәнләрин кими тә’јин едәҹәјәм”, ЈД]”. Тунҹун гызыл илә әвәз олунмасы ирәлиләјишдир, ејни фикри ајәдә хатырланан диҝәр материаллара да аид етмәк олар. Бунунла әлагәдар, сон ҝүнләр әрзиндә Аллаһын Исраили тәшкилати ҹәһәтдән дурмадан ирәлиләјир. Буна бир нечә нүмунә.
8-10. 1919-ҹу илдән е’тибарән баш верән бә’зи тәшкилати дәјишикликләри тәсвир един.
8 Аллаһын халгынын јығынҹагларында 1919-ҹу илә гәдәр рәһбәрлик ишләрини, јығынҹағын үзвләринин демократик јолла сечдикләри ағсаггаллар вә дјаконлар иҹра едирдиләр. Һәмин илдән е’тибарән “садиг вә ағыллы гул” һәр бир јығынҹагда хидмәти рәһбәрләр тә’јин етмәјә башлады. Онларын вәзифәсинә тәблиғ фәалијјәтинә нәзарәт етмәк дахил иди (Матта 24:45-47). Лакин бу, бир чох јығынҹагларда бөјүк наилијјәтә сәбәб олмады, чүнки сечилмиш бә’зи ағсаггаллар хош хәбәри јајмаг ишини там мә’нада дәстәкләмирдиләр. Бу сәбәбдән, 1932-ҹи илдә јығынҹаглара артыг ағсаггал вә дјаконлар сечмәмәк тапшырығы верилди. Инди јығынҹаглар, хидмәти рәһбәрлә әмәкдашлыг едәҹәк хидмәти комитә сечмәли иди. Бу, бөјүк ирәлиләјиш иди — “ағаҹ”ы “тунҹ”ла әвәз етмишдиләр!
9 Бүтүн дүнја үзрә мөвҹуд олан јығынҹагларда, 1938-ҹи илдә Мүгәддәс Јазылара даһа чох мүвафиг ҝәлән јенилик гәбул етмәк гәрарлашдырылды. Јығынҹағын ишләрини достлуг хидмәтчиси вә диҝәр хидмәтчиләр идарә етмәјә башладылар. Онларын һамысы “садиг вә ағыллы гулун” рәһбәрлији алтында тә’јин едилдиләр. Даһа сечкиләр кечирилмирди. Јығынҹаглар теократик јолла тә’јинат алмаға башлады. “Даш”ы “дәмир”лә, “тунҹ”у исә “гызыл”ла әвәз етдиләр.
10 Лакин ирәлиләјишләр бунунла битмәди. Мәсәлән, 1972-ҹи илдә ајдын олду ки, әҝәр јығынҹаглардакы нәзарәт теократик јолла тә’јин олунмуш вә араларында әмәкдашлыг едән, ејни заманда һеч биринин башгалары үзәриндә сәлаһијјәти олмајан ағсаггаллар шурасы тәрәфиндән иҹра олунарса, бу, биринҹи әсрин мәсиһчи јығынҹагларынын рәһбәрлик үсулуна даһа чох мүвафиг олар. Тәхминән ики ил әввәл исә ирәлијә доғру даһа бир аддым атылды. Бә’зи һүгуг корпорасијаларындакы рәһбәрликдә дәјишиклик баш верди, бу дәјишиклијин сајәсиндә Рәһбәрлик шурасы, баш верән һүгуги мәсәләләрә јајынмадан Аллаһын халгынын руһани марагларына даһа чох диггәт ајыра билди.
11. Аллаһын халгы арасында баш верән тәшкилати дәјишикликләрин архасында дуран кимдир вә бу дәјишикликләр нәјә сәбәб олмушдур?
11 Бу ирәлиләјишләрин архасында дуран кимдир? Әлбәттә ки, Јеһова Аллаһ. О дејир: “Гызыл ҝәтирәҹәјәм”. Сонра давам едир: “Сүлһү сәнин нәзарәтчиләрин, әдаләти тапшырыг верәнләрин кими тә’јин едәҹәјәм”. Бәли, Јеһова халгынын гајғысына галмагда мәс’улијјәт дашыјыр. Халгынын ҝөзәлләшдирилмәсинә габагҹадан дејилмиш тәшкилати ирәлиләјишләр дә дахилдир. Бунун сајәсиндә Јеһованын Шаһидләри чохлу хејир-дуалар алырлар. Ишаја 60:18 ајәсиндә охујуруг: “Артыг мәмләкәтиндә зоракылыг, сәрһәдләриндә сојғун вә гырғын ешидилмәјәҹәк; фәгәт диварларына Гуртулуш вә гапыларына Һәмд адыны верәҹәксән”. Неҹә дә ҝөзәл сөзләрдир! Бәс онлар неҹә јеринә јетди?
12. Нәјин сајәсиндә мәсиһчиләр арасында сүлһ һөкм сүрүр?
12 Мәсиһчиләр Јеһованын вердији тә’лим вә рәһбәрлијә диггәтлә јанашырлар. Бунун нәтиҹәсиндә исә Ишајанын дедији сөзләр јеринә јетир: “Бүтүн оғулларын Рәбб тәрәфиндән өјрәдилмиш олаҹаг; вә оғулларынын әмин-аманлығы чох олаҹаг” (Ишаја 54:13). Бундан әлавә, Јеһованын руһу Онун халгына тә’сир ҝөстәрир, бу руһун сәмәрәсинә исә сүлһ дахилдир (Галатијалылара 5:22, 23). Јеһованын халгынын сүлһсевәрлији, онлары бу гәддар дүнјада тәравәтләндириҹи сығынаҹаг едир. Мәсиһчиләр арасында мөвҹуд олан, әсасыны бир-биринә мәһәббәт тәшкил едән сүлһ, јени системдәки һәјат һаггында тәсәввүр јарадыр (Јәһја 15:17; Колослулара 3:14). Һәр биримиз бу сүлһә чох шадыг вә бөјүк мәмнунлугла буна имкан јарадырыг. Бу исә, Аллаһымыза шәрәф вә иззәт ҝәтирир, һәмчинин руһани ҹәннәтимизин әсас тәркиб һиссәсини тәшкил едир (Ишаја 11:9).
Јеһованын ишығы сачмаға давам едәҹәк
13. Нәјә ҝөрә әмин ола биләрик ки, Јеһованын ишығы халгы үзәринә әбәдијјән сачаҹаг?
13 Јеһованын ишығы Онун халгы үзәринә сачмаға давам едәҹәкми? Бәли. Ишаја 60:19, 20 ајәләриндә охујуруг: “Ҝүндүз сәнин ишығын артыг ҝүнәш олмајаҹаг; вә ајдынлыг үчүн ај сәнә ишыг вермәјәҹәк; анҹаг әбәди ишығын Рәбб вә иззәтин өз Аллаһын олаҹаг. Артыг ҝүнәшин батмајаҹаг вә ајын чәкилмәјәҹәк; чүнки Рәбб сәнин әбәди ишығын олаҹаг вә јас ҝүнләрин сона јетәҹәк”. 1919-ҹу илдә руһани әсирләрин “јас”ы баша чатдыгда, Јеһова онларын үзәринә ишыг сачмаға башлады. Үстүндән 80 илдән артыг вахт кечдикдән сонра, онлар һәлә дә Јеһованын лүтфүндән фајдаланырлар, Онун ишығы исә сачмаға давам едир. Вә бу ишыг һеч заман сөнмәјәҹәк. Аллаһымыз һеч заман өз хидмәтчиләри үчүн ҝүнәш кими “батмајаҹаг” вә ај кими “чәкилмәјәҹәк”. Өз ишығыны онларын үзәринә әбәдијјәт боју сачаҹагдыр. Бу фикир, бу гаранлыг дүнјанын сон ҝүнләрини јашајан бизләри неҹә дә руһландырыр!
14, 15. а) Аллаһын бүтүн хидмәтчиләри һансы мә’нада “салеһдирләр”? б) Башга гојунлар Ишаја 60:21 ајәсинин һансы ваҹиб иҹрасыны ҝөзләјирләр?
14 Аллаһын Исраилинә — Сионун јер үзүндәки нүмајәндәләринә даир Јеһованын даһа бир вә’ди Ишаја 60:21 ајәсиндә јазылыб: “Сәнин халгын, һамысы салеһ адамлар олаҹаг; онлар ки, иззәт тапым дејә әкдијим фидан, әлләримин ишидирләр, дијары әбәдијјән мүлк едәҹәкләр”. 1919-ҹу илдә, мәсһ едилмиш мәсиһчиләр өз фәалијјәтләрини бәрпа едән заман, гејри-ади инсанлар групуну тәмсил едирдиләр. Ҝүнаһа гәрг олмуш бу дүнјада онлар Иса Мәсиһин фидијә гурбанлығына олан сарсылмаз иманлары сајәсиндә “салеһ” сајылыблар (Ромалылара 3:24; 5:1). Сонра онлар, Бабил әсарәтиндән азад олмуш исраиллиләрә бәнзәр тәрздә руһани “мәмләкәтә” — фәалијјәт даирәсинә малик олдулар. Онлар бу мәмләкәтдә һөкм сүрән руһани ҹәннәтә севинирләр (Ишаја 66:8). Һәмин мәмләкәтин ҹәннәт ҝөзәллији һеч заман солмајаҹаг, чүнки, гәдим Исраилдән фәргли олараг, Аллаһын Исраили үмумиликдә сәдагәтсизлик етмәјәҹәк. Аллаһын Исраилинин иманы, сарсылмазлығы вә сә’ји Аллаһын адына иззәт ҝәтирмәкдән түкәнмәјәҹәк.
15 Бу руһани халгын бүтүн үзвләри јени әһдә дахилдирләр. Һамысынын үрәјиндә Јеһованын ганунлары јазылыб, Јеһова исә Исанын фидијә гурбанлығы сајәсиндә онларын ҝүнаһларыны бағышлајыб (Јеремја 31:31-34). Јеһова онлары өз оғуллары кими, салеһ сајыр вә онларла камил инсанлар имиш кими давраныр (Ромалылара 8:15, 16, 29, 30). Исанын фидијә гурбанлығы сајәсиндә, онларын һәмкарлары олан башга гојунларын да ҝүнаһы бағышланыр, онлар да Ибраһим кими иманлары сајәсиндә Аллаһын достлары олараг салеһ сајылырлар. Онлар “либасларыны јујуб, онлары Гузунун ганы илә ағартдылар”. Мәсһ едилмишләрин һәмкарлары олан бу башга гојунлар башга бөјүк мүкафаты ҝөзләјирләр. Онлар “бөјүк мәшәггәтдән” сағ чыхараг, јахуд дирилдиләрәк, бүтүн јер үзү ҹәннәтә чеврилән заман Ишаја 60:21 ајәсиндә јазылан сөзләрин иҹрасыны ҝөрәҹәкләр (Вәһј 7:14; Ромалылара 4:1-3). О заман “һәлимләр дүнјаны мирас алаҹаглар вә сүлһ боллуғунда ләззәт тапаҹаглар” (Мәзмур 37:11, 29).
Артым давам едир
16. Јеһова һансы ҝөзәл вә’ди верди вә бу вә’д неҹә јеринә јетди?
16 “Ишаја” китабынын 60-ҹы фәслинин ахырынҹы ајәсиндә, Јеһованын бу фәсилдәки сонунҹу вә’ди јазылыб. О, Сиона дејир: “Кичији мин киши вә зәифи гүввәтли бир милләт олаҹаг; мән, Рәбб, вахт ҝәлинҹә буну тезләндирәҹәјәм” (Ишаја 60:22). Бизим ҝүнләрдә Јеһова өз сөзүнә садиг чыхды. 1919-ҹу илдә мәсһ едилмиш мәсиһчиләр өз фәалијјәтләрини бәрпа едәркән сајлары чох дејилди. Онларын сајы һәгигәтән дә “кичик” иди. Лакин сыраларына јени руһани исраиллиләр дахил олдугда, онларын сајы артды. Сонра исә ҝетдикҹә онлара даһа чох башга гојунлар гошулмаға башладылар. Аллаһын халгы арасында һөкм сүрән сүлһ вә Онун “мәмләкәтиндә” мөвҹуд олан руһани ҹәннәт о гәдәр сәмими гәлбли инсанлары ҹәлб етди ки, ән “зәиф” милләт “гүввәтли бир милләтә” чеврилди. Һал-һазырда бу “милләт” — Аллаһын Исраили вә Аллаһа садиг олан алты милјондан чох “әҹнәбиләр” — бир чох мүасир дөвләтләрин әһалисиндән сајҹа чохдур (Ишаја 60:10). Бу “мәмләкәтин” вәтәндашларынын һамысы Јеһованын ишығыны әкс етдирдикләринә ҝөрә Онун ҝөзүндә ҝөзәлдирләр.
17. “Ишаја” китабынын 60-ҹы фәслини нәзәрдән кечирмәк сизә неҹә тә’сир бағышлајыр?
17 Бәли, “Ишаја” китабынын 60-ҹы фәслиндән олан ваҹиб фикирләри нәзәрдән кечирмәк иманы мөһкәмләдир. Јеһова әввәлҹәдән билирди ки, Онун халгы руһани әсарәтә дүшәҹәк, сонра исә гајыдаҹагдыр. Јеһованын бу ҹүр узагҝөрән олдуғуну билмәк неҹә дә тәскинлик верир! Бизи һејрәтә салан одур ки, Јеһова хидмәтчиләринин сајындакы мүасир артымы нечә илләр габагҹадан сөјләмишдир. Јеһованын бизи һеч заман тәрк етмәјәҹәјини билмәк дә тәсәлливериҹидир! “Әбәди һәјата тә’јин олунанлары” гонагпәрвәрликлә гәбул етмәк үчүн “шәһәрин” дарвазаларынын һәмишә ачыг олмасында нә гәдәр мәһәббәт вә зәманәт әкс олунур! (Һәвариләрин ишләри 13:48, ЈД). Јеһова бундан сонра да халгынын үзәринә ишыг сачаҹагдыр. Сион исә јенә дә өјүнмәјә сәбәб олаҹаг, чүнки онун өвладлары бундан сонра да ишыгларынын даһа парлаг тәрздә нур сачмасына имкан верәҹәкләр (Матта 5:16). Биз Аллаһын Исраили илә сых мүнасибәтдә олмаға вә Јеһованын ишығыны әкс етдирмәк кими дәјәрли имканы гијмәтләндирмәјә һәмишәкиндән даһа чох мејллијик!
Изаһ едә биләрсинизми?
• Падшаһлыг ишинә гаршы ҝөстәрилән мүгавимәтләрә бахмајараг биз нәјә әминик?
• Сионун өвладлары һансы мә’нада “милләтләрин сүдүнү әмирләр”?
• Јеһова неҹә “ағаҹ јеринә тунҹ” верир?
• Ишаја 60:17, 21 ајәләриндә һансы ики кејфијјәт вурғуланыр?
• Ән “зәиф” милләт “ән гүввәтли бир милләтә” неҹә чеврилди?
[28-ҹи сәһифәдәки чәрчивә/шәкилләр]
Ишајанын пејғәмбәрлији бүтүн бәшәријјәт үчүн ишыгдыр
Бу мәгаләләрин мөвзусу, 2001-2002-ҹи илләрдә кечирилән “Аллаһ Кәламынын мүәллимләри” адлы вилајәт конгресиндә сәсләнән мә’рузәдә тәгдим едилмишдир. Демәк олар ки, конгресин кечирилдији һәр јердә бу мә’рузәнин сонунда натиг “Ишајанын пејғәмбәрлији — бүтүн бәшәријјәт үчүн ишыгдыр” китабынын II ҹилдинин бурахылышыны е’лан етмишдир. Бир ил әввәл бу китабын I ҹилди бурахылмышдыр. Инди, артыг II ҹилдин бурахылышындан сонра, әлимиздә “Ишаја” китабынын, демәк олар ки, бүтүн ајәләрини мүасир анлајышла изаһ едән нәшр вар. Бу ики ҹилдли китаб, иманы мөһкәмләдән Ишајанын пејғәмбәрлик китабыны дәриндән анлајыб, даһа чох гијмәтләндирмәјә көмәк едәҹәк.
[25-ҹи сәһифәдәки шәкилләр]
Сәрт мүгавимәтләрә бахмајараг, Јеһова өз халгыны “гуртулушу илә ҝөзәлләшдирир”.
[26-ҹы сәһифәдәки шәкилләр]
Аллаһын хидмәтчиләри, һәгиги ибадәтин јајылмасы үчүн милләтләрин дәјәрли вәсаитләриндән истифадә едирләр.
[27-ҹи сәһифәдәки шәкил]
Јеһова өз халгына тәшкилати ирәлиләјиш вә сүлһ вермәклә хејир-дуаландырыр.