«ӘН КИЧИЈИНДӘН мин нәфәр, ән балаҹасындан гүдрәтли халг төрәјәҹәк. Мән Јеһова вахты јетишәндә бу иши сүрәтләндирәҹәјәм» (Әшј. 60:22). Бу пејғәмбәрлик сөзләри неҹә јеринә јетиб? Онун јеринә јетмәси бүтүн дүнјада узун илләр Јеһова Аллаһа хидмәт едән инсанлара неҹә тәсир едиб?
Бөрје Нилссон (84 јаш, 1943-ҹү илдә вәфтиз олуб): «Јадыма 1920-ҹи илләрдә китабпајлајан мәсһ олунмуш гардаш дүшүр. Исвечин јарыдан чохуна тәблиғ етмәји тапшырыланда о, итаәткарлыгла тәблиғ етмәјә башламышды. Онун вә диҝәр садиг хидмәтчиләрин ҝөрдүкләри иш мүкафатландырылыб! Инди бурада 22 000-дән чох тәблиғчи вар. Һал-һазырда аһыл јашда олмағыма бахмајараг, бундан сонра да Јеһоваја итаәткарлыгла хидмәт етмәк истәјирәм. Ким билир, Јеһованын һәлә бизим үчүн һансы сүрпризләри вар?!»
Етјен Естерһајсе (83 јаш, 1942-ҹи илдә вәфтиз олуб): «Өтән илләрә нәзәр саланда Ҹәнуби Африкада Јеһованын Шаһидләринин сајынын 1942-ҹи илдән бу ҝүнә гәдәр 1500 нәфәрдән 94 000-ә чатдығыны ҝөрмәк һејрәтамиздир. Бу ҹүр бөјүк тәшкилатын үзвү олмаг инсанын иманыны мөһкәмләндирир».
Кит Гајдан (82 јаш, 1948-ҹи илдә вәфтиз олуб): «Бөјүк Британијада тәблиғчиләрин сајынын 1948-ҹи илдән бу ҝүнә гәдәр 13 700-дән 137 000-ә чатдығынын шаһиди олмағын сајәсиндә бир даһа әмин олурам ки, бу, Јеһованын ишидир. Буна инсан ҝүҹү илә наил олмаг мүмкүн олмазды, анҹаг Јеһова “харигәләр јарадан” Аллаһдыр» (Чых. 15:11).
Улрике Кролоп (77 јаш, 1952-ҹи илдә вәфтиз олуб): «Икинҹи Дүнја мүһарибәсиндән сонра Алманијадакы јығынҹаглар насистләрин амансыз тәгибләринә синә ҝәрән баҹы-гардашларын јүксәк әһвал-руһијјәси сајәсиндә ҹанланды. Инсанларын тәсәллијә еһтијаҹы вар иди вә биз Шаһидләр бу дәһшәтли мүһарибәдә иштирак етмәдијимиз үчүн буну ҹәсарәтлә едирдик. Артыг 60 илдән чохдур ки, Аллаһын руһунун Онун халгыны неҹә идарә етдијини ҝөрүрәм. Бу ҝүн бурада 164 000-дән чох Јеһованын Шаһиди вар. Мәҝәр бу һејрәтамиз дејил?»
Марија Бринетскаја (77 јаш, 1955-ҹи илдә вәфтиз олуб): «Һәбс олунмајаг дејә мәни ҝеҹәјарысы вәфтиз етдиләр. Сонра исә Јеһованын Шаһиди олдуғу үчүн әрими әмәк дүшәрҝәсинә ҝөндәрдиләр. Мән исә еһтијатла өз кәндимиздә тәблиғ етмәјә давам едирдим вә гоншуларымдан бир нечәси һәгигәти гәбул етмишди. Онда Русијада баҹы-гардашларын сајы чох аз иди. Севинирәм ки, бу ҝүн өлкәмиздә Јеһованын Шаһидләринин сајы 168 000-дән чохдур!»
Кимико Јамано (79 јаш, 1954-ҹү илдә вәфтиз олуб): «1970-ҹи илдә Јапонијада тәблиғчиләрин сајынын 10 000 нәфәр олдуғуну биләндә севинҹдән ҝөз јашларымы сахлаја билмәдим вә Јеһоваја сөз вердим ки, өләнәдәк Она садиг галаҹағам. Инди 216 000 тәблиғчинин олмасы мәни даһа да хошбәхт едир!»
Даниел Одоҝен (83 јаш): «Мән 1950-ҹи илдә вәфтиз оланда Ниҝеријада 8000 тәблиғчи вар иди. Бу ҝүн исә тәхминән 351 000 тәблиғчи вар! Топлантылара бу гәдәр чох инсанын ҝәлмәси мәни севиндирир вә Һәггај 2:7 ајәсиндә јазылан сөзләрин үзәриндә дүшүнмәјә тәшвиг едир. Јеһова, һәгигәтән дә, үммәтләри силкәләјир вә халгларын сәрвәтини Өзүнә сары ҝәтирир. Мән һәлә дә баҹардығым гәдәр чох тәблиғ етмәјә чалышырам вә бунунла Јеһоваја миннәтдарлығымы билдирирәм».
Карлос Силва (79 јаш): «Мән 1952-ҹи илдә вәфтиз оланда Бразилијада 5000 тәблиғчи вар иди. Һәмин ил биз бөјүк топлантыны Сан-Паулунун ҝимназија залында кечирмишдик. Дајанаҹагда ҹәми ики машын вар иди. Бир гардаш јахынлыгдакы Пакаембу стадионуну ҝөстәрәрәк мәндән сорушду: “Неҹә фикирләширсән, биз нә вахтса бу стадиону долдура биләрик?” Бу, гејри-мүмкүн ҝөрүнүрдү, анҹаг 1973-ҹү илдә кечирилән бөјүк топлантыда һәмин стадион ағзынаҹан долмушду: иштирак едәнләрин сајы 94 586 нәфәр иди! Инди Бразилијада 767 000 баҹы-гардаш вар. Бу артымы ҝөрмәк чох хошдур!»
Карлос Касарес (73 јаш): «Мән 1954-ҹү илдә вәфтиз олмушам. Һәмин вахт Мексикада 10 500 тәблиғчи вар иди. Мәсул гардашлара бөјүк тәләбат олдуғундан 21 јашымда мәни рајон нәзарәтчиси тәјин етдиләр. Әшија 60:22 ајәсиндәки сөзләрин неҹә јеринә јетдијинин шаһиди олмаг әсил хејир-дуадыр! Һал-һазырда сајымыз 806 000-дән чохдур вә бир милјондан чох инсанла Мүгәддәс Китаб өјрәнмәси кечиририк! Бу чох һејрәтамиздир!»