Мүгәддәс ҝөрүшләримизә һөрмәтлә јанашырыг
«[Онлары] мүгәддәс дағыма ҝәтириб дуа евимдә севиндирәҹәјәм» (ЈЕШАЈА 56:7).
1. Ҝөрүшләримизин һөрмәтә лајиг олдуғуну Мүгәддәс Јазылар неҹә ҝөстәрир?
ЈЕҺОВА мәсһ олунмушлары вә диҝәр мәсиһчиләри, јә’ни халгыны Она ибадәт етмәк үчүн ‘мүгәддәс дағына’ топлајыб. Аллаһ онлары ‘бүтүн халглар үчүн дуа евиндә’, руһани мә’бәдиндә севиндирир (Јешаја 56:7; Марк 11:17). Халгларын топланмасындан ҝөрүнүр ки, Јеһоваја ибадәт мүгәддәс, саф вә уҹадыр. Ҝөрүшләримиз Мүгәддәс Китабы өјрәнмәк, Аллаһа ибадәт етмәк үчүн тәшкил олунуб. Бу ҝөрүшләрә лајигинҹә һөрмәт бәсләмәклә Јеһованын мүгәддәслијә олан бахышына шәрик олдуғумузу ҝөстәририк.
2. Нәдән ҝөрүнүр ки, Јеһова ибадәт үчүн сечдији јери мүгәддәс сајырды вә Мәсиһ Аллаһын бахышына шәрик олдуғуну неҹә ҝөстәрмишди?
2 Гәдим Исраилдә Јеһованын ибадәт үчүн сечдији јер мүгәддәс сајылмалы иди. Һүзур чадыры, о ҹүмләдән, онун аваданлыглары вә ләвазиматлары мүгәддәс олмаг үчүн мәсһ вә тәгдис едилмәли идиләр (Чыхыш 30:26-29). Һүзур чадырынын отагларындан бири «Мүгәддәс Јер», о бириси исә «Әгдәс», јә’ни Ән Мүгәддәс јер адланырды (Ибраниләрә 9:2, 3). Сонралар Һүзур чадырынын әвәзинә Јерусәлимдә мә’бәд тикилди. Јеһоваја ибадәтин мәркәзи олдуғу үчүн Јерусәлим ‘мүгәддәс шәһәр’ адланырды (Неһемја 11:1; Матта 27:53). Иса јер үзүндә хидмәт едәркән мә’бәдә лајигинҹә һөрмәт ҝөстәрирди. Мәсәлән, бир дәфә о, мә’бәдин һәјәтиндә тиҹарәт едән вә ондан кәсмә јол кими истифадә едән инсанлара гәзәбләнмишди (Марк 11:15, 16).
3. Исраилин топлантыларынын мүгәддәслијини нә ҝөстәрир?
3 Исраиллиләр Јеһоваја ибадәт етмәк вә Онун Ганунуна гулаг асмаг үчүн мүнтәзәм олараг бирликдә јығылырдылар. Бајрамларын мүәјјән ҝүнләри «мүгәддәс топланты» вә ја «тәнтәнәли топланты» адланырды ки, бу да онларын мүгәддәс олдуғуну ҝөстәрирди (Левилиләр 23:2, 3, 36, 37). Езра вә Неһемјанын ҝүнләриндә кечирилән топлантыда левилиләр ‘Гануну халга изаһ едирдиләр’. ‘Бүтүн халг Ганунун сөзләрини ешидәркән ағладығы’ үчүн «левилиләр “сусун, кәдәрләнмәјин чүнки бу ҝүн мүгәддәсдир” дејә бүтүн халгы сакитләшдирди». Бундан сонра исраиллиләр ‘чох бөјүк севинҹлә’ једди ҝүнлүк Чардаглар бајрамыны гејд етдиләр. ‘Биринҹи ҝүндән сонунҹу ҝүнә гәдәр һәр ҝүн Аллаһын Ганун китабындан охудулар. Онлар једди ҝүн бајрам кечиртдиләр, сәккизинҹи ҝүн исә гајда-гануна ҝөрә тәнтәнәли топланты гурулду’ (Неһемја 8:7-11, 17, 18). Бу, һәгигәтән дә еһтирама лајиг мүгәддәс топланты иди.
Бизим ҝөрүшләримиз мүгәддәсдир
4, 5. Ҝөрүшләримиз нәјә ҝөрә мүгәддәсдир?
4 Доғрудур, бу ҝүн јер үзүндә Јеһоваја ибадәт етмәк үчүн мүгәддәс шәһәр вә хүсуси мә’бәд јохдур. Анҹаг нәзәрдән гачырмамалыјыг ки, Јеһоваја ибадәт етмәк үчүн тәшкил олунан ҝөрүшләр мүгәддәсдир. Һәфтәдә үч дәфә Мүгәддәс Јазылары охујуб өјрәнмәк үчүн ҝөрүшүрүк. Бурада Неһемјанын ҝүнләриндә олдуғу кими Јеһованын Кәламынын ‘мә’насы изаһ едилир’ (Неһемја 8:8). Ҝөрүшләримизин һамысы дуа илә башлајыб, дуа илә битир, әксәријјәтиндә Јеһоваја һәмд нәғмәләри охунур (Мәзмур 26:12). Јығынҹаг ҝөрүшләри ибадәтимизин бир һиссәси олдуғу үчүн онлара еһтирам вә һөрмәтлә јанашмалыјыг.
5 Аллаһын халгы ибадәт етмәк, Мүгәддәс Китабы өјрәнмәк вә хош үнсијјәт етмәк үчүн бир јерә топлашанда Јеһова она хејир-дуа верир. Әмин ола биләрик ки, Аллаһ мәһз ҝөрүшләрә ‘бәрәкәт верилмәсини бујуруб’ (Мәзмур 133:1, 3). Ҝөрүшләрдә иштирак едиб, руһани програмы изләјәндә, Аллаһдан хејир-дуа алырыг. Бундан әлавә Иса демишдир: «Һарадаса ики вә ја үч киши Мәним адымла бир јерә топлашмыш олурса, Мән орада, онларын арасындајам». Контекстдән ајдын олур ки, бу сөзләр мәсиһчиләр арасында ҹидди проблемләри һәлл етмәк үчүн ағсаггалларын кечирдији ҝөрүшә аиддир. Анҹаг бу принсипи јығынҹаг ҝөрүшләринә дә аид етмәк олар (Матта 18:20). Мәсиһчиләр Мәсиһин ады илә бир јерә топлашанда о, мүгәддәс руһун васитәсилә орада иштирак едир. Белә исә бу ҝөрүшләр мүгәддәс һесаб едилмәли дејилми?
6. Ҝөрүшләрин кечирилдији бөјүк вә ја кичик тикилиләр һансы мүнасибәтә лајигдир?
6 Дүздүр, Јеһова әл илә тикилән мә’бәдләрдә јашамыр. Бунунла белә, Падшаһлыг Залларымыз һәгиги ибадәт јеридир (Һәвариләрин ишләри 7:48; 17:24). Биз орада Јеһованын Кәламыны өјрәнмәк, Она дуа етмәк вә һәмд нәғмәләри охумаг үчүн топлашырыг. Конгрес залларына да бу мәгсәдлә ҝәлирик. Иҹарәјә ҝөтүрүлән мәдәнијјәт сарајлары, сәрҝи комплексләри вә ја стадионлар конгрес заманы ибадәт јеринә чеврилир. Бөјүк вә ја кичик олмасына бахмајараг бу тикилиләр һөрмәтә лајигдир вә бу һөрмәти давранышымыз вә мүнасибәтимизлә ҝөстәрмәлијик.
Ҝөрүшләрә неҹә һөрмәт ҝөстәрә биләрик?
7. Ҝөрүшләрә һөрмәт етдијимизи неҹә ҝөстәрә биләрик?
7 Ҝөрүшләримизә олан һөрмәт мүхтәлиф шејләрдә әкс олунур. Бунлардан бири Падшаһлыг маһныларыны охујан заман залда олмагдыр. Маһнылардан чоху дуа формасында јазылдығы үчүн еһтирамла ифа едилмәлидир. 22-ҹи мәзмурдан ситат ҝәтирәрәк һәвари Павел Иса һаггында јазырды: «Сәнин адыны Мәним гардашларыма аҝаһ едәҹәјәм; ҹамаат ичиндә Сәнә нәғмә илә һәмд едәҹәјәм» (Ибраниләрә 2:12). Буна ҝөрә дә апарыҹы маһнынын нөмрәсини е’лан етмәмиш артыг јеримиздә олмалы, охујанда диггәтимизи маһнынын мә’насына ҹәмләшдирмәлијик. Ҝәлин биз дә мәзмурчу кими бу маһнылары ејни һиссләрлә охујаг: «Әмәлисалеһләр мәҹлисиндә, иҹма арасында Рәббә бүтүн гәлбимлә шүкүр едәҹәјәм» (Мәзмур 111:1). Бәли, Јеһоваја һәмд нәғмәләри охумаг ҝөрүшләрә вахтында ҝәлмәк вә ахыра кими галмаг үчүн ваҹиб сәбәбләрдән биридир.
8. Мүгәддәс Китабдакы һансы нүмунә дуаја һөрмәтлә јанашмағын зәрурилијини ҝөстәрир?
8 Ҝөрүшләримизин дәјәрини артыран башга бир сәҹијјәви хүсусијјәт топлашанларын адындан едилән сәмими дуадыр. Бир дәфә биринҹи әср мәсиһчиләри Јерусәлимдә бир јерә топлашараг, ‘јекдилликлә Аллаһа дуа едирдиләр’. Бундан сонра тә’гибләрә бахмајараг, онлар ‘Аллаһын сөзүнү ҹәсарәтлә сөјләмәјә’ давам етдиләр (Һәвариләрин ишләри 4:24-31). Дуа вахты орадакылардан киминсә фикринин башга јердә долашдығыны тәсәввүр етмәк олармы? Хејр, онлар «јекдилликлә» дуа едирдиләр. Ҝөрүшләримиздә едилән дуа орадакыларын һиссләрини ифадә едир. Бу дуалара һөрмәтлә јанашмаг лазымдыр.
9. Ҝејимимиз вә давранышымызла мүгәддәс ҝөрүшләримизә һөрмәт етдијимизи неҹә ҝөстәририк?
9 Бундан башга ҝејимимизлә дә ҝөрүшләримизин мүгәддәслијинә бөјүк һөрмәт бәсләдијимизи ҝөстәририк. Һәм ҝејимимиз һәм дә сач дүзүмүмүз ҝөрүшләримизә лајиг олмалыдыр. Һәвари Павел мәсләһәт едирди: «Мән истәјирәм ки, кишиләр һәр јердә пак әлләр галдырлб, гәзәбләнмәјәрәк вә мүбаһисә етмәјәрәк дуа етсинләр; гадынлар да утанҹаглыг вә мө’тәдилликлә, әдәбли гијафәтлә өзләрини бәзәсинләр. Сачларыны һөрмәклә, гызыл, мирвари јахуд баһалы палтарла дејил, Аллаһа һөрмәт етдикләрини иддиа едән гадынлара јарашан тәрздә өзләрини хејирли ишләрлә бәзәсинләр» (1 Тимотејә 2:8-10). Ачыг стадионларда кечирилән конгресләрдә иштирак едәндә ҝејимимиз һаваја ујғун олмагла јанашы, һәм дә лајигли олмалыдыр. Бундан башга, ҝөрүшләримизә һөрмәт едириксә, програм заманы јемәк јемәјәҹәк, саггыз чејнәмәјәҹәјик. Лајигли ҝејим вә давраныш Јеһова Аллаһа, ибадәтимизә вә һәмиманлыларымыза шәрәф ҝәтирир.
Аллаһын евинә лајиг давраныш
10. Һәвари Павел неҹә ҝөстәрмишди ки, мәсиһчи ҝөрүшләриндә јүксәк давраныш тәләб олунур?
10 Коринфлиләрә мәктубунда һәвари Павел мәсиһчи ҝөрүшләринин кечирилмәсинә даир мүдрик мәсләһәт верир. О, фикринә јекун вурараг дејир: «Гој һәр шеј әдәблә вә низамла едилсин» (1 Коринфлиләрә 14:40). Ҝөрүшләр јығынҹағын ваҹиб саһәси олдуғу үчүн орада Јеһованын евинә лајиг давранмалыјыг.
11, 12. а) Ҝөрүшләрә ҝәлән ушаглара нә ашыланмалыдыр? б) Ҝөрүшләр заманы ушаглар иманларыны неҹә ифадә едирләр?
11 Ҝөрүшләримиздә өзләрини апармаг гајдасыны хүсусилә ушаглара өјрәтмәк лазымдыр. Мәсиһчи валидејнләр ушагларына баша салмалыдырлар ки, Падшаһлыг Залы вә китаб өјрәнмәси кечирилән јер ојнамаг јери дејил. Орада биз Јеһоваја ибадәт едир вә Онун Кәламыны өјрәнирик. Мүдрик Падшаһ Сүлејман јазырды: ‘Аллаһын евинә ҝетдијин заман һәрәкәтләринә диггәт ет. Гулаг асмаг үчүн ораја ҝир’ (Ваиз 5:1). Муса исраиллиләрә бөјүкләр вә ‘ушагларла’ бирликдә јығышмағы тапшырды. О деди: ‘Халгы топлајын. Гој һамы ешидиб өјрәнсин вә Аллаһыныз Рәбдән горхуб, ганунун бүтүн сөзләринә дәгиг әмәл етсин. Гој гануну билмәјән ушаглар да ешитсинләр вә мүлк олараг алмаг үчүн Иордан чајындан кечиб ҝедәҹәјиниз өлкәдә өмүр боју Аллаһыныз Рәбдән горхмағы өјрәнсинләр’ (Ганунун тәкрары 31:12, 13).
12 Бу ҝүн ушаглар валидејнләри илә бирликдә гулаг асмаг вә өјрәнмәк үчүн јығынҹаға ҝәлирләр. Ушаглар мүзакирә олунан материалы вә ән әсас Мүгәддәс Китаб тә’лимләрини баша дүшмәјә башлајанда гыса шәрһләр верәрәк иманларыны ‘ағызлары илә играр едә’ биләрләр (Ромалылара 10:10). Балаҹа ушаг әввәлҹә баша дүшдүјү суала бир нечә сөзлә ҹаваб верә биләр. Илк вахтлар ҹавабы үздән охуса да, вахт кечдикҹә фикрини өз сөзләри илә ифадә етмәјә чалышаҹаг. Бу, ушаг үчүн һәм фајдалыдыр, һәм дә мараглы. Ушаглар иманларыны белә сәмими шәкилдә ифадә едәндә јығынҹагдакы бөјүкләрин дә үрәји севинир. Тәбии ки, валидејнләр өзләри шәрһ вермәклә ушагларына нүмунә гојурлар. Јахшы олар ки, ушагларын өзләринин Мүгәддәс Китабы, нәғмә китабы вә өјрәнилән әдәбијјаты олсун. Онлар белә әдәбијјатлара һөрмәтлә јанашмағы өјрәнмәлидирләр. Бүтүн бунлар ушаглара ҝөрүшләримизин мүгәддәс олдуғуну ашылајаҹаг.
13. Ҝөрүшләримизә илк дәфә ҝәлән адамда һансы тәәссүратын јаранмасыны истәјирик?
13 Әлбәттә биз истәмирик ки, ҝөрүшләримиз христиан килсәләриндә кечирилән ајинләрә бәнзәсин, јә’ни нә сојуг, һәддиндән артыг мө’мин, нә дә сәс-күјлү олсун. Падшаһлыг Залында достјана вә меһрибан аб-һава олса да, орада һәддиндән артыг сәрбәстлијә јол верилмәмәлидир. Ҝөрүшләрә Јеһоваја ибадәт етмәк үчүн ҝәлдијимиздән онлар лајигли тәрздә кечирилмәлидир. Бизим арзумуз будур ки, ҝөрүшә илк дәфә ҝәлән адам програма гулаг асандан, бизим вә ушагларымызын давранышыны мүшаһидә едәндән сонра: «Аллаһ һәгигәтән араныздадыр!» десин (1 Коринфлиләрә 14:25).
Ибадәтимизин ајрылмаз һиссәси
14, 15. а) ‘Аллаһымызын мә’бәдинә лагејд јанашмамаг’ үчүн биз нә етмәлијик? б) Јешаја 66:23 ајәси инди неҹә јеринә јетир?
14 Јухарыда дејилдији кими, Јеһова халгыны ‘дуа евиндә’, јә’ни руһани мә’бәдиндә топлајараг ‘севиндирир’ (Јешаја 56:7). Садиг Неһемја јәһудиләрә хатырлатды ки, онлар ианәләр етмәклә мә’бәдә лајигинҹә һөрмәт ҝөстәрмәли идиләр. О деди: «Биз Аллаһымызын мә’бәдинә лагејд јанашмајаҹағыг» (Неһемја 10:39). Биз дә Јеһованын Она ‘дуа евиндә’ ибадәт етмәк чағырышына лагејд јанашмамалыјыг.
15 Јешаја ибадәт етмәк үчүн мүнтәзәм ҝөрүшмәјин ваҹиблијини ҝөстәрәрәк пејғәмбәрлик етмишди: «“Һәр Тәзә ај мәрасиминдә, һәр шәнбә ҝүнүндә бүтүн бәшәр ҝәлиб гаршымда сәҹдә едәҹәк”, Рәбб дејир» (Јешаја 66:23). Һәмин пејғәмбәрлик бу ҝүн јеринә јетир. Садиг мәсиһчиләр һәр һәфтә Јеһоваја ибадәт етмәк үчүн бир јерә топлашырлар, јә’ни башга ишләри илә јанашы мәсиһчи ҝөрүшләринә ҝәлир вә тәблиғ едирләр. Сән дә ‘ҝәлиб [Аллаһын] гаршысында сәҹдә едирсәнми’?
16. Нә үчүн ҝөрүшләрдә мүнтәзәм иштирак етмәк елә индидән һәјатымызын ајрылмаз һиссәси олмалыдыр?
16 Јешаја 66:23 ајәси Јеһованын вә’д етдији јени дүнјада там һәјата кечәҹәк. О заман һәрфи мә’нада «бүтүн бәшәр» әбәдијјәт бојунҹа һәфтәбәһәфтә ҝәлиб Јеһоваја «сәҹдә», јә’ни ибадәт едәҹәк. Јеһоваја ибадәт јени дүнјада руһани һәјатымызын ајрылмаз һиссәси олаҹағы үчүн, елә индидән мүгәддәс ҝөрүшләримизи һәјатымызын ајрылмаз һиссәси етмәли дејиликми?
17. ‘О Ҝүнүн јахынлашдығы нисбәтдә’ нә үчүн ҝөрүшләрә хүсусән еһтијаҹымыз вар?
17 Сон јахынлашдығы үчүн мәсиһчи ҝөрүшләрини бурахмамаға даһа гәтијјәтли олмалыјыг. Ҝөрүшләримизин мүгәддәслијинә һөрмәтдән ирәли ҝәләрәк биз ишә, мәктәб дәрсләринә, әлавә курслара ҝөрә мәсиһчи ҝөрүшләримизи бурахмырыг. Бундан башга, бизим һәмиманлыларымызла үнсијјәтин вердији ҝүҹә еһтијаҹымыз вардыр. Јығынҹаг ҝөрүшләриндә бир-биримизлә таныш олур, бир-биримизи руһландырыр, һәмчинин «мәһәббәтә вә хејирли ишләрә» тәшвиг едирик. Хүсусән, ‘о Ҝүнүн јахынлашдығы нисбәтдә’ буну етмәк даһа ваҹибдир (Ибраниләрә 10:24, 25). Буна ҝөрә ҝәлин, лајигли ҝејим, давраныш вә мүнтәзәм иштиракымызла мүгәддәс ҝөрүшләрә һөрмәт ҝөстәрәк. Бундан бәлли олаҹаг ки, биз Јеһованын мүгәддәс шејләрә олан бахышына шәрикик.
Тәкрар үчүн суаллар
• Нәдән ҝөрүнүр ки, Јеһоваја ибадәт үчүн тәшкил едилән ҝөрүшләр мүгәддәс һесаб едилмәлидир?
• Ҝөрүшләримиз нәјә ҝөрә мүгәддәсдир?
• Ушаглар ҝөрүшләрин мүгәддәслијинә һөрмәт етдикләрини неҹә ҝөстәрә биләрләр?
• Нә үчүн биз ҝөрүшләрдә мүнтәзәм иштиракы һәјатымызын ајрылмаз һиссәси етмәлијик?
[28-ҹи сәһифәдәки шәкилләр]
Һарада кечирилмәсиндән асылы олмајараг, Јеһоваја ибадәт етмәк үчүн тәшкил едилән ҝөрүшләр мүгәддәсдир.
[31-ҹи сәһифәдәки шәкил]
Ушаглар ‘гулаг асмаг вә өјрәнмәк’ үчүн ҝөрүшләрә ҝәлирләр.