Ишыгда ҝәзәнләр үчүн севинҹ
“Ҝәлин РӘББИН ишығында јеријәк” (ИШАЈА 2:5).
1, 2. а) Ишыг нә дәрәҹәдә ваҹибдир? б) Јер үзүнү зүлмәтин өртәҹәји һаггындакы хәбәрдарлыг нәјә ҝөрә белә ҹидди хәбәрдарлыгдыр?
ЈЕГОВА - ишыг Мәнбәјидир. Мүгәддәс Китаб Ону, “ҝүндүзүн ишыг олмасы үчүн ҝүнәши верән, ҝеҹәнин ишыг олмасы үчүн ајын вә улдузларын ганунларыны гојан” адландырыр (Јеремја 31:35; Мәзмур 8:3). Космик фәзаја бөјүк мигдарда енержи, хүсусилә дә истилик вә ишыг туллајан нәһәнҝ нүвә собасыны, Ҝүнәши мәһз О јаратмышдыр. Бизим планетимизә бу енержинин ҝүнәш ишығы формасында јалныз кичиҹик бир һиссәси ҝәлиб чатыр, лакин Јер күрәсиндә һәјатын давам етмәси үчүн бу мигдар кифајәт едир. Ҝүнәш ишығы олмадан биз дә мөвҹуд олмаздыг. Јер күрәси ҹансыз бир планетә чевриләрди.
2 Буну хатырлајараг, биз Ишаја пејғәмбәрин бәһс етдији вәзијјәтин бүтүн ҹиддилијини баша дүшә биләрик. О деди: “Будур, дүнјаны гаранлыг вә үммәтләри зүлмәт өртәҹәк” (Ишаја 60:2). Әлбәттә, бу пејғәмбәрликдә һәгиги зүлмәтдән данышылмыр. Ишаја Ҝүнәшин, Ајын вә улдузларын ишыг сачмајаҹаглары бир ҝүнүн ҝәләҹәјини нәзәрдә тутмурду (Мәзмур 89:36, 37; 136:7—9). О, руһани зүлмәтдән данышырды. Анҹаг руһани зүлмәт өлдүрүҹүдүр. Нәтиҹә е’тибары илә руһани ишыг бизим һәјатымыз үчүн һәгиги ишыгдан һеч дә аз ваҹиб дејил (Лука 1:79).
3. Ишајанын сөзләрини нәзәрә алараг, мәсиһчиләр нә етмәлидирләр?
3 Буну нәзәрә алараг гејд етмәк ваҹибдир ки, Ишајанын сөзләри Јәһуда үзәриндә кечмишдә јеринә јетсә дә, бу сөзләр бөјүк мигјасда бу ҝүн јеринә јетир. Бәли, бизим ҝүнләрдә дүнја руһани зүлмәтә гәрг олуб. Белә тәһлүкәли вәзијјәтдә руһани ишыг даһа зәрури мә’на кәсб едир. Елә буна ҝөрә дә мәсиһчиләр Исанын, “гој сизин ишығыныз инсанларын гаршысында... парласын” чағырышына гулаг асмалыдырлар (Матта 5:16). Садиг мәсиһчиләр, тәвазөкар инсанлара зүлмәт гаранлыгда һәјат әлдә етмәк имканы верәрәк јолу ишыгландыра биләрләр (Јәһја 8:12).
Исраилдә зүлмәт дөврү
4. Ишајанын пејғәмбәрлик сөзләри илк дәфә нә заман јеринә јетди вә Ишајанын јашадығы вахтда һансы вәзијјәт јаранмышды?
4 Ишајанын јер үзүнү өртән зүлмәт һаггындакы сөзләри илк дәфә Јәһуда торпағы виран едиләркән вә јәһуди халгы әсир олараг Бабилә апарыларкән јеринә јетди. Лакин халгын бөјүк һиссәси о вахта гәдәр, һәлә Ишајанын ҝүнләриндә руһани зүлмәтә гәрг олмушду. Белә вәзијјәт, Ишајаны тәшвиг етди ки, өз һәмјерлиләрини “еј Јагуб еви, ҝәлин РӘББИН ишығында јеријәк”,- дејә чағырсын (Ишаја 2:5; 5:20).
5, 6. Ишајанын ҝүнләриндә зүлмәтин јајылмасына сәбәб олан нә иди?
5 Ишаја, Јәһуда дијарында “Јәһуда падшаһлары Уззија, Јотам, Аһаз вә Һизкијанын ҝүнләриндә” пејғәмбәрлик едирди (Ишаја 1:1). Бу, сијаси чахнашмаларын, дини ријакарлығын, һакимләрин сатгынлығынын вә фағырларын истисмарынын һәјәҹанлы дөврү иди. Һәтта өлкәдә Аллаһа Јотам кими сәдагәтлә хидмәт едән падшаһларын идарә етдикләри вахтда белә, тәпәләрдә јалан танрылара уҹалдылан гурбанҝаһлар ҝөрүнүрдү. Сәдагәтсиз падшаһларын вахтында исә вәзијјәт даһа да писләширди. Мәсәлән, залым Аһаз падшаһ һәддини о дәрәҹәдә ашмышды ки, өз ушағыны Молох танрысына гурбан ҝәтирмишди. Өлкәни һәгигәтән дә зүлмәт бүрүмүшдү! (2 Краллар 15:32—34; 16:2—4).
6 Халглар арасындакы мүнасибәтләр дә үрәкачан дејилди. Моаб, Едом вә Филистија Јәһуда дијарынын сәрһәдләри үчүн тәһлүкә јарадырды. Јәһуда дијарына гоһум сајылан шимали Исраил падшаһлығы, онун гаты дүшмәни олду. Јәһуда дијарындан шимал тәрәфдә јерләшән, Јәһуданын әмин-аманлығына тәһлүкә јарадан дөвләтләрдән бири дә Сурија иди. Лакин гәддар вә башга торпаглары зәбт етмәјә ҹәһд ҝөстәрән Ассурија даһа чох тәһлүкә јарадырды. Ишајанын пејғәмбәрлик етдији вахтларда Ассурија Исраили зәбт етмиш вә Јәһуданы, демәк олар ки, бүтүнлүклә виран етмишди. Вахт варды ки, Јерусәлимдән башга, бүтүн јәһуди шәһәрләри Ассуријанын әсарәти алтында иди (Ишаја 1:7, 8; 36:1).
7. Исраил вә Јәһуда һансы јолу сечдиләр вә Јегова буна неҹә јанашды?
7 Исраил вә Јәһуда Аллаһа садиг олмадыглары үчүн, бүтүн бу мүсибәтләр Аллаһын әһд бағладығы халгын үзәринә дүшүрдү. Онлар, Сүлејманын мәсәлләри китабында хатырладылан кәсләр кими, “гаранлығын јолларында јеримәк үчүн, доғрулуг јолларыны бурахдылар” (Сүлејманын мәсәлләри 2:13). Анҹаг Јегова өз халгына гәзәбләнсә дә, ону бүтүнлүклә инкар етмирди. Әксинә, О, Ишајаны вә башга пејғәмбәрләри ҝөндәрирди ки, онлар, һеч нәјә бахмајараг халг арасында Јеговаја сәдагәтлә хидмәт етмәјә сә’ј ҝөстәрән инсанлара руһани ишыг версинләр. Пејғәмбәрләр васитәсилә әләнән бу ишыг неҹә дә гијмәтли иди! О һәјат бәхш едирди.
Зүлмәтин мүасир дөврү
8, 9. Мүасир дүнјада зүлмәтин јајылмасына сәбәб олан нәдир?
8 Бизим бу ҝүн ҝөрдүкләримиз, Ишајанын ҝүнләриндә баш верән һадисәләрә чох охшардыр. Бизим ҝүнләрдә дүнјанын сијаси рәһбәрләри Јеговадан вә Онун тахта јүксәлтдији Иса Мәсиһдән үз чевирмишләр (Мәзмур 2:2, 3). Христиан аләминин дин рәһбәрләри һәмиманлыларыны алдадырлар. Онлар Аллаһа хидмәт етдикләрини иддиа едирләр, әмәлдә исә онлардан әксәријјәти нәинки бу дүнјанын танрыларына - милләтчилијә, һәрбчилијә, зәнҝинлијә, танынмыш адамлара ибадәт етмәји тәблиғ едир, һабелә инсанлара бүтпәрәст тә’лимләри дә ашылајырлар.
9 Мүхтәлиф јерләрдә бир-биринин ардынҹа, етник тәмизләмәләрә вә диҝәр дәһшәтләрә ҝәтириб чыхаран мүһарибәләр баш верир. Бу мүһарибәләрдә исә Христиан аләми динләринин әли олур. Бундан әлавә, Мүгәддәс Китаба әсасланмыш әхлаг нормаларыны мүдафиә етмәк әвәзинә, килсәләрин әксәријјәти әхлагсызлыға, мәсәлән, зинаја вә һомосексуализмә ја ҝөз јумур, ја да бу ҹүр һәрәкәтләри фәал тәрздә мүдафиә едирләр. Мүгәддәс Китаб нормаларына ҝөстәрдикләри е’тинасызлыг нәтиҹәсиндә, Христиан аләминә мәнсуб олан диндарлар, гәдим вахтларда мәзмурчунун бәһс етдији кәсләрә бәнзәјирләр: “Билмәзләр вә анламазлар; гаранлыгда ҝәзмәкдәдирләр” (Мәзмур 82:5). Һәгигәтән дә Христиан аләми гәдим Јәһуда дијарына бәнзәр тәрздә дәрин зүлмәтдәдир (Вәһј 8:12).
10. Бу ҝүн нәјә ҝөрә зүлмәт ичиндә ишыг парлајыр вә бу ишыг тәвазөкар инсанлара һансы фајданы ҝәтирир?
10 Јегова бу зүлмәтин арасында тәвазөкар инсанлар үчүн ишыг тәгдим едир. Буну етмәк үчүн О, јер үзүндә олан, “каинатда улдузлар кими парлајан” мәсһ едилмиш хидмәтчиләрини - “садиг вә ағыллы гулу” истифадә едир (Матта 24:45; Филипилиләрә 2:15). Милјонларла “башга гојунлар” тәрәфиндән дәстәкләнән бу гул синфи, Аллаһын Кәламы олан Мүгәддәс Китабдан изһар олунан руһани ишығы әкс етдирир (Јәһја 10:16). Бу ишыг, зүлмәтә гәрг олунмуш дүнјада тәвазөкар инсанлара үмид верир, онлара, Аллаһла мүнасибәти инкишаф етдирмәјә вә руһани тәләләрә дүшмәмәјә көмәк едир. Бу ишыг гијмәтлидир- һәјат верир.
“Исминә һәмд едәрәм”
11. Јегова Ишајанын ҝүнләриндә һансы мә’луматлары верирди?
11 Ишајанын јашадығы зүлмәт ҝүнләрдә вә бундан даһа артыг зүлмәт олан - Јегованын халгы бабиллиләр тәрәфиндән әсир ҝөтүрүлән ҝүнләрдә, Јегова һансы рәһбәрлији тәгдим едирди? Јегова јалныз әхлаги ҹәһәтдән рәһбәрлик тәгдим етмирди, һабелә халгына аид нијјәтләрини неҹә јеринә јетирәҹәјини дә габагҹадан ајдын тәрздә ҝөстәрирди. Ҝәлин, мисал үчүн, Ишаја китабынын 25-дән 27-јә гәдәр фәсилләриндә олан ҝөзәл пејғәмбәрликләрә диггәт јетирәк. Бу пејғәмбәрликләрдән, Јегованын һадисәләри Ишајанын ҝүнләриндә, һәмчинин бизим ҝүнләрдә неҹә идарә етдијини өјрәнирик.
12. Ишаја үрәкдән ҝәлән һансы сөзләри сөјләјир?
12 Ишаја әввәлҹә дејир: “Ја РӘБ, Аллаһым сәнсән; сәни јүксәлдәрәм, сәнин исминә һәмд едәрәм”. Ишаја бу һәмди неҹә дә үрәкдән тәзаһүр етдирир! Пејғәмбәри бу ҹүр дуа етмәјә тәшвиг едән нә иди? Бу барәдә ајәнин икинҹи һиссәсиндән өјрәнирик: “Чүнки сән [Јегова] валеһедиҹи шејләр јаратдын, әзәлдән гурулмуш нијјәтләр, сәдагәт вә һәгигәт” (Ишаја 25:1).
13. а) Ишајанын Јеговаја олан миннәтдарлығыны һансы биликләр мөһкәмләндирди? б) Ишајанын нүмунәси әсасында биз неҹә өјрәнә биләрик?
13 Јегова Ишајанын јашадығы дөврә гәдәр, Исраил үчүн артыг “валеһедиҹи” чох ишләр јаратмышды вә бу ишләр һаггында јазылы шәһадәтнамәләр горунуб сахланырды. Еһтимал ки, Ишаја һәмин јазыларла таныш иди. Мисал үчүн, о билирди ки, Јегова өз халгыны Мисир көләлијиндән азад етмиш вә Гырмызы дәнизин јахынлығында бу халгы фир’онун гошунларындан хилас етмишдир. О, һәмчинин билирди ки, Јегова өз халгыны сәһрадан кечирмиш вә ону Вә’д едилән торпаға апармышдыр (Мәзмур 136:1, 10—26). Бу ҹүр тарихи мә’луматлар ҝөстәрирди ки, Јегова Аллаһ садиг вә һәгигидир. Онун “нијјәтләри” - нәзәрдә тутдуглары - јеринә јетир. Аллаһын тәгдим етдији дәгиг биликләр, Ишајанын ишыгда јеримәк арзусуну ҝүҹләндирди. Бунунла о бизә ҝөзәл нүмунә верди. Әҝәр Аллаһын Кәламыны дәриндән өјрәнир вә ону һәјатымызда тәтбиг едириксә, онда биз дә ишыгда галаҹағыг (Мәзмур 119:105; 2 Коринфлиләрә 4:6).
Шәһәр мәһв едилиб
14. Шәһәр һаггында һансы пејғәмбәрлик сөјләнмишди вә еһтимал едилдији кими, бу һансы шәһәр иди?
14 Аллаһын “нијјәти” илә әлагәли бир нүмунәни Ишаја 25:2-ҹи ајәсиндән охумаг олар, орада дејилир: “Сән шәһәри бир даш јығынына; диварлы шәһәри бир виранәјә чевирдин, әҹнәбиләрин сарајыны шәһәр вәзијјәтиндән чыхардын; әбәдијјән гурулмајаҹагдыр”. Бурада сөһбәт һансы шәһәрдән ҝедир? Чох ҝүман ки, Ишаја Бабил һаггында пејғәмбәрлик едирди. Бир заманлар бөјүк олан бу шәһәрин даш јығынына чеврилмәк вахты һәгигәтән дә јахынлашмышды.
15. Бу ҝүн һансы “бөјүк шәһәр” мөвҹуддур вә онунла нә баш верәҹәкдир?
15 Бизим ҝүнләрдә Ишајанын хатырлатдығы шәһәрин бәнзәри вармы? Бәли. Вәһј китабында, “јер үзүнүн падшаһлары үзәриндә шаһлыг едән бөјүк шәһәр” һаггында дејилир (Вәһј 17:18). Бу, јалан динләрин дүнја империјасы олан “бөјүк Бабил”дир (Вәһј 17:5). Бу ҝүн бөјүк Бабилдә апарыҹы јери Христиан аләми тутур. Христиан аләминин руһаниләри Јегованын халгынын Падшаһлыг һаггындакы хош хәбәри тәблиғ етмәсинә һамыдан чох манечилик төрәдирләр (Матта 24:14). Лакин, гәдим Бабил кими, бөјүк Бабил дә тезликлә мәһв олунаҹаг вә артыг бир даһа јенидән бәрпа едилмәјәҹәк.
16, 17. Јегованын дүшмәнләри Ону гәдим заманларда вә бизим ҝүнләрдә неҹә иззәтләндирмишләр?
16 Ишаја бу “диварлы шәһәр” һаггында даһа һансы пејғәмбәрлији сөјләјир? О, Јеговаја мүраҹиәт едәрәк, дејир: “Гүввәтли бир халг сәнә иззәт верәҹәк; горхунҹ милләтләрин шәһәри сәндән горхаҹаг” (Ишаја 25:3). “Горхунҹ милләтләрин шәһәри”, дүшмән мөвгеји тутан бир шәһәр Јегованы неҹә иззәтләндирәҹәк? Бабилин ән гүдрәтли падшаһы Новуходоносорун башына ҝәләнләри хатырлајын. Онун бүтүн зәифлијини ҝөстәрән ајылдыҹы һадисәдән сонра, Новуходоносор Јегованын бөјүклүјүнү вә Онун мисилсиз ҝүҹүнү е’тираф етмәјә мәҹбур олду (Даниел 4:34, 35). Јегова гүдрәтини ҝөстәрәндә, һәтта Онун дүшмәнләри белә, көнүлсүз дә олса Онун бөјүк ишләрини е’тираф етмәјә мәҹбур олурлар.
17 Бөјүк Бабил Јегованын гүдрәтли ишләрини нә вахтса е’тираф етмәли олмушдурму? Бәли. Биринҹи дүнја мүһарибәси заманы, Јегованын мәсһ едилмиш хидмәтчиләри чох чәтин шәраитләрдә тәблиғ едирдиләр. Ҝөзәтчи Гүлләси Ҹәмијјәтиндә олан мәс’ул гардашлары 1918-ҹи илдә һәбсханаја саланда, мәсһ едилмишләр руһани әсарәтә дүшдүләр. Тәшкил олунмуш тәблиғ фәалијјәти һәгиги мә’нада дајандырылды. Сонра 1919-ҹу илдә, Јегова онлары бәрпа етди вә өз руһу илә мөһкәмләтди. Бундан сонра мәсһ едилмишләр, онлара һәвалә олунмуш мүждәни бүтүн халглара тәблиғ етмәк тапшырығыны јеринә јетирмәјә башладылар (Марк 13:10). Бүтүн бунларын, һәмчинин бу һадисәләрин дүшмәнләрә неҹә тә’сир едәҹәји, Вәһј китабында габагҹадан дејилмишди. Инди дүшмәнләр “горху ичиндә олуб, Сәмави Аллаһа һәмд етдиләр” (Вәһј 11:3, 7, 11—13). Бу о демәк дејил ки, онларын һамысы һәгиги имана дөндүләр. Лакин, Ишајанын габагҹадан дедији кими, онлар бу һалда Јегованын гүдрәтли иш ҝөрдүјүнү е’тираф етмәјә мәҹбур олмушлар.
“Фағыр үчүн гала”
18, 19. а) Нәјә ҝөрә дүшмәнләр Јегованын халгынын нөгсансызлығыны сындырмаг игтидарында дејилләр? б) “Горхунҹ адамларын зәфәр тәранәси” неҹә алчалаҹаг?
18 Јегованын ишыгда ҝәзәнләрә ҝөстәрдији хејирхаһлығы гејд едәрәк, Ишаја Јеговаја дејир: “Горхунҹ адамларын нәфәси дивара чарпан туфан кими олунҹа, сән фағыр үчүн гала, сыхынты ичиндә олан јохсул үчүн гала, туфана гаршы сығынаҹаг јер, истијә гаршы көлҝәлик олдун. Гураг јердә истинин етдији кими, әҹнәбиләрин вәлвәләсини алчалдаҹагсан; булуд көлҝәсилә исти азалдығы кими, горхунҹ адамларын зәфәр тәранәси алчалаҹаг” (Ишаја 25:4, 5).
19 Дини вә сијаси зүлмкарлар Аллаһын һәгиги ибадәтчиләринин нөгсансызлығыны сындырмаг үчүн, 1919-ҹу илдән бәри әлләриндән ҝәләни едирләр, амма буна мүвәффәг олмурлар. Нәјә ҝөрә? Она ҝөрә ки, Јегова өз халгы үчүн һәм сығынаҹаг, һәм дә мүдафиәдир. О, тә’гибләрин јандырыҹы истисиндән мүдафиә едән тәравәтләндириҹи көлҝә тәгдим едир. О, мөһкәм бир дивар кими, мүгавимәтләрин туфаны гаршысында дурур. Биз, Аллаһын ишығында ҝәзәнләр, “горхунҹ адамларын зәфәр тәранәсинин алчалаҹағы” вахты әминликлә ҝөзләјирик. Бәли, биз Јегованын дүшмәнләринин мәһв олаҹағы ҝүнү сәбирсизликлә ҝөзләјирик.
20, 21. Јегова неҹә шәнлик тәшкил едир вә јени дүнјада бу сүфрәјә нәләр дахил олаҹагдыр?
20 Јегова өз хидмәтчиләрини јалныз мүдафиә етмир. О, севән Ата кими онлара гајғы ҝөстәрир. 1919-ҹу илдә өз халгыны бөјүк Бабилин әсарәтиндән азад етдикдән сонра, Јегова халгы үчүн бајрам шәнлији кечирди вә она боллугла руһани гида верди. Бу Ишаја 25:6-ҹы ајәсиндә габагҹадан дејилмишди. Биз охујуруг: “Бу дағда ордуларын РӘББИ бүтүн халглара јағлы шејләрдән бир зијафәт, көһнә шәраблардан, иликлә долу јағлы шејләрдән, сүзмә көһнә шәраблардан зијафәт верәҹәк”. Бу ҹүр шәнликдә иштирак етмәк неҹә дә бөјүк хејир-дуадыр! (Матта 4:4). “Јегованын сүфрәси” дадлы јемәкләрлә долудур (1 Коринфлиләрә 10:21, ЈД). “Садиг вә ағыллы гул” васитәсилә, бизә руһани нөгтеји-нәзәрдән лазым олан һәр шеји алырыг.
21 Лакин Аллаһын тәшкил етдији бу шәнлик даһа бөјүк мә’на дашыјыр. Бу ҝүн иштирак етдијимиз руһани шәнлик бизә ону хатырладыр ки, Аллаһын вә’д етдији јени дүнјада физики гиданын боллуғу олаҹаг. О заман “јағлы шејләрдән” ибарәт олан зијафәтә физики гида боллуғу да дахил олаҹаг. Һеч кәс нә руһани, нә дә физики ҹәһәтдән аҹлыг чәкмәјәҹәк. Бу, Исанын иштиракынын “әламәти” һаггындакы пејғәмбәрликдә хатырладылан “гытлыглардан” бу ҝүн әзијјәт чәкән һәмиманлыларымыз үчүн неҹә дә ҝөзәл тәсәллидир! (Матта 24:3, 7). Әлбәттә ки, онлара мәзмурчунун сөзләри тәсәлли верир. О охујурду: “Јердә, дағлар башында, буғда боллуғу олсун” (Мәзмур 72:16).
22, 23. а) Һансы “өртүк” ҝөтүрүләҹәкдир вә бу һансы тәрздә едиләҹәкдир? б) Јегованын халгы үзәриндән“рүсвајчылыг” неҹә галдырылаҹагдыр?
22 Инди исә даһа ҝөзәл вә’ди динләјин. Ҝүнаһы вә өлүмү “өртүклә” мүгајисә едәрәк, Ишаја дејир: “Бүтүн халглары өртән өртүјүн үзүнү, бүтүн милләтләр үзәринә чәкилмиш пәрдәни [Јегова] бу дағда јох едәҹәк” (Ишаја 25:7). Бирҹә тәсәввүр един! Исти өртүк кими инсанларын үзәринә сәрилмиш ҝүнаһ вә өлүм бир даһа олмајаҹаг. Биз, Аллаһа итаәткар вә садиг инсанларын, Исанын фидијә гурбанлығындан там мә’нада фајда әлдә едәҹәкләри ҝүнү неҹә дә сәбирсизликлә ҝөзләјирик! (Вәһј 21:3, 4).
23 О ҝөзәл вахта ишарә едәрәк, Аллаһдан илһам алмыш пејғәмбәр бизи әмин едир: “Өлүмү әбәдијјән удду; вә РӘБ Јегова бүтүн үзләрдән ҝөз јашларыны силәҹәк; вә бүтүн дүнја үзәриндән халгынын рүсвајчылығыны галдыраҹаг; чүнки РӘБ сөјләди” (Ишаја 25:8). Һеч кәс гоҹалыг вә ја хәстәликдән өлмәјәҹәк. Һеч кәс севдији адамын иткисини ағламајаҹаг. Неҹә дә бөјүк хејир-дуадыр! Бундан әлавә, јер үзүндә һеч јанда, Аллаһын вә хидмәтчиләринин узун мүддәт дөздүкләри сөјүш вә јалан тәблиғат олмајаҹаг. Нәјә ҝөрә олмајаҹаг? Она ҝөрә ки, Јегова бу пис әмәлләрин мәнбәјини - Шејтан Иблиси, јаланын атасыны арадан галдыраҹагдыр. Шејтанын зүрријјәтинә дә сон гојулаҹагдыр (Јәһја 8:44).
24. Ишыгда јеријәнләр, Јегованын онлар үчүн етдији бөјүк ишләрә неҹә мүнасибәт ҝөстәрирләр?
24 Јегованын гүдрәтинин бу тәрздә изһар олунмасы үзәриндә дүшүнәрәк, ишыгда јеријәнләр бу сөзләри нида етмәјә тәшвиг һисси дујурлар: “Будур, Аллаһымыз будур; ону ҝөзләдик вә бизи гуртараҹагдыр; РӘБ будур; ону ҝөзләдик, онун гуртулушу илә мәмнун олаҹағыг вә севинәҹәјик” (Ишаја 25:9). Тезликлә бүтүн салеһ инсанлар севинәҹәкләр. Зүлмәт тамамилә чәкиләҹәк, садиг инсанлар исә Јегованын вердији ишыгдан әбәдијјән һәзз алаҹаглар. Бундан даһа ҝөзәл үмид ола биләрми? Әлбәттә ки, јох!
Изаһ едә биләрсинизми?
• Бу ҝүн ишыгда јеримәк нә үчүн ваҹибдир?
• Ишаја Јегованын адыны нәјә ҝөрә иззәтләндирди?
• Аллаһын халгынын нөгсансызлығыны сындырмаға дүшмәнләр нә үчүн һеч вахт наил ола билмәјәҹәкләр?
• Ишыгда јеријәнләри һансы бол хејир-дуалар ҝөзләјир?
[22 вә 23-ҹү сәһифәләрдәки шәкил]
Јәһуданын сакинләри ушагларыны Молоха гурбан ҝәтирирдиләр.
[25-ҹи сәһифәдәки шәкилләр]
Јегованын бөјүк ишләри барәсиндә олан биликләр, Ишајаны Јегованын адына иззәт ҝәтирмәјә тәшвиг етди.
[26-ҹы сәһифәдәки шәкил]
Салеһ инсанлар Јегованын вердији ишыгдан әбәдијјән һәзз алаҹаглар.