Јеһова Она үмид едәнләри горујур

«Ја Рәбб... даим мәни мәһәббәтинлә, һәгигәтинлә гору» (МӘЗМУР 40:11).

1. Падшаһ Давуд Јеһовадан нәји хаһиш едирди вә Аллаһ онун истәјини неҹә јеринә јетирди?

ГӘДИМ Исраилин падшаһы Давуд Јеһованы ‘сәбр едәрәк ҝөзләјирди’ вә бир дәфә демишди: «[Јеһова] мәнә тәрәф дөнәрәк фәрјадымы ешитди» (Мәзмур 40:1). Давуд өз тәҹрүбәсиндән билирди ки, Јеһова Ону севәнләри горујур. Буна ҝөрә дә, Аллаһдан ону даим горумасыны хаһиш едирди (Мәзмур 40:11). «Даһа јахшы дирилмәјә» (И–93) наил олаҹаглары вә’дини алмыш садиг киши вә гадынлар арасында јер тутан Давуд инди ән тәһлүкәсиз јердә, Јеһованын јаддашындадыр (Ибраниләрә 11:32-35). Давудун бу мүкафаты алаҹағына шүбһә етмирик, чүнки онун ады Јеһованын «јаддаш китабы»нда һәкк олунуб (Малаки 3:16).

2. Јеһованын Өз хидмәтчиләрини һансы мә’нада горудуғуну баша дүшмәкдә Мүгәддәс Китаб бизә неҹә көмәк едир?

² Ибраниләрә мәктубун 11-ҹи фәслиндә ады чәкилән садиг инсанлар Иса Мәсиһин јер үзүнә ҝәлишиндән әввәл јашасалар да, Исанын сөзләринә мүвафиг тәрздә һәјат сүрүрдүләр: «Ҹаныны севән ону зај едәр; бу дүнјада ҹанына нифрәт едән әбәди һәјат үчүн ону сахлар» (Јәһја 12:25). Ҝөрүндүјү кими, Јеһованын бизи горумасы изтираб вә тә’гибләрдән мүһафизә олунмаг демәк дејил. Әксинә, Јеһова бизи руһани мә’нада горујур. Бу ҹүр мүдафиәнин сајәсиндә биз Она даима мәгбул ола биләрик.

3. Јеһованын Иса Мәсиһи горудуғуну нә сүбут едир вә бунун нәтиҹәси нә олду?

³ Исанын өзү дә гәддар тә’гибләрин нә олдуғуну јахшы билирди. Сонда дүшмәнләри ону, һәтта биабырчы вә ишҝәнҹәли өлүмә дә мәһкум етдиләр. Амма демәк олмаз ки, Јеһова сөзүнүн үстүндә дуруб, Мәсиһи горумады (Јешаја 42:1-6). Иса бу ҹүр дәһшәтли өлүмдән үч ҝүн сонра дирилди. Бу ону сүбут едир ки, Јеһова Давудун фәрјадыны ешитдији кими, онун фәрјадына да һај верди вә ҹавабында нөгсансызлығыны горујуб сахлаја билсин дејә Исаја лазыми гүввәни верди (Матта 26:39). Нәтиҹәдә, Иса ҝөјләрдә өлмәз һәјата малик олду. Онун фидијә гурбанлығына иман ҝәтирән милјонларла инсанын да әбәди јашамаг үмиди вар.

4. Јеһова мәсһ едилмиш мәсиһчиләри вә «башга гојунлары» нәјә әмин едир?

⁴ Там әминликлә демәк олар ки, Давудун вә Исанын ҝүнләриндә олдуғу кими, бизим зәманәдә дә Јеһованын Өз хидмәтчиләрини горумаға һәм ҝүҹү, һәм дә арзусу вар (Јагуб 1:17). Јер үзүндә галмыш аз сајлы мәсһ едилмишләрә Јеһова бу вә’ди верир: «Ҝөјләрдә сизин үчүн... чүрүмәз, ләкәсиз, солмаз бир мирас» сахланмышдыр. «Сиз Аллаһын гүдрәти илә ахыр вахтда кәшф олунмаға һазыр бир гуртулуша иман васитәсилә мүһафизә олунурсунуз» (1 Петер 1:4, 5). Мәзмурчу кими, јердә јашамаг үмидинә малик олан «башга гојунлар» да Аллаһа вә Онун вә’динә ҝүвәнә биләрләр: «Рәбби севин, сиз еј бүтүн мө’минләр! Рәбб һәмишә Она садиг галаны горујур» (Јәһја 10:16; Мәзмур 31:23).

Руһани мүһафизә

5, 6. а) Бизим ҝүнләрдә Аллаһ халгыны неҹә горујур? б) Мәсһ едилмишләрин вә јер үмидинә малик мәсиһчиләрин Јеһова илә һансы мүнасибәтләри вар?

⁵ Јеһова халгыны бу ҝүн дә руһани ҹәһәтдән горумаг үчүн бир чох тәдбирләр ҝөрүб. Ахыр ҝүнләрә хас олан бәдбәхтликләрдән, чәтинликләрдән вә ја тә’гибләрдән халгыны мүдафиә етмәсә дә, Онунла јахын мүнасибәти горујуб сахламаг үчүн хидмәтчиләринә зәрури олан көмәји вә стимулу верир. Аллаһла бу ҹүр мүнасибәтләр гурмаг олар. Бу Онун бәшәријјәтә мәһәббәтлә тәгдим етдији фидијә гурбанлығына олан иманын васитәсилә мүмкүндүр. Аллаһ бу ҹүр садиг мәсиһчиләрдән бә’зиләрини Өз руһу илә мәсһ едиб онлара ҝөјдә Мәсиһ илә бәрабәр һөкмранлыг етмәк имканыны вериб. Онлар Аллаһын руһани оғуллары олдуғу үчүн салеһ е’лан едилибләр. Колослулара 1:13, 14 ајәләриндәки сөзләр онлара аиддир: «О, бизи зүлмәт һакимијјәтиндән хилас едиб, Өз севимли Оғлунун сәлтәнәтинә көчүртдү. Оғул сајәсиндә биз Онун ганы васитәсилә хиласа вә ҝүнаһларымызын әфвинә маликик».

⁶ Милјонларла башга садиг мәсиһчиләр дә Аллаһын тәгдим етдији фидијә гурбанлығындан фајда әлдә едә биләрләр. Мүгәддәс Китабда охујуруг: «Инсан Оғлу да Она хидмәт едилмәк үчүн дејил, хидмәт етмәјә вә бир чохлары үчүн ҹаныны фидијә олараг вермәјә ҝәлмишдир» (Марк 10:45). Бу мәсиһчиләр «Аллаһын өвладларынын иззәтли азадлығына говушаҹаг»лары вахты сәбирсизликлә ҝөзләјирләр (Ромалылара 8:21). Онлар Аллаһла олан достлугларыны јүксәк гијмәтләндирир вә ону даһа да мөһкәмләндирмәк үчүн әлләриндән ҝәләни едирләр.

7. Јеһова бу ҝүн халгынын руһани рифаһынын гејдинә неҹә галыр?

⁷ Јеһова халгына даима тә’лим вермәклә дә онун руһани рифаһынын гејдинә галыр. Аллаһын вердији тә’лимин сајәсиндә мәсиһчиләр даһа дәгиг биликләрә јијәләнирләр. Јеһова, һәмчинин Өз Кәламы, тәшкилаты вә мүгәддәс руһу васитәсилә дә хидмәтчиләринә рәһбәрлик верир. «Ағыллы вә садиг гулун» рәһбәрлији сајәсиндә Аллаһын халгы дүнјада бејнәлхалг бир аилә кими фәалијјәт ҝөстәрир. «Гул» синфи Јеһованын хидмәтчиләринин миллијјәтиндән вә ҹәмијјәтдә тутдуглары мөвгедән асылы олмајараг онларын руһани, һәтта лазым ҝәләндә физики тәләбатларынын да гајғысына галыр (Матта 24:45).

8. Јеһова Она сәдагәтли оланлара даир нәдә әминдир вә Өзү онлары нәјә әмин едир?

⁸ Јеһова Аллаһ Исаны дүшмәнләрин гәзәбли һүҹумларындан мүдафиә етмәдији кими, мәсиһчиләри дә бу ҹүр мүдафиә етмир. Амма бунунла һеч дә халгындан наразы олдуғуну ҝөстәрмәк истәмир. Әксинә, бу ону ҝөстәрир ки, Јеһова хидмәтчиләринин ваҹиб мүбаһисәли суалда Онун тәрәфини тутаҹагларына әминдир (Әјјуб 1:8-12; Сүлејманын мәсәлләри 27:11). Јеһова Она сәдагәтли оланлары әсла атмаз, ‘чүнки әдаләти севир, һеч заман мө’минләри тәрк етмир’. Мәзмур 37:28 ајәси бизи әмин едир: «Салеһләр даим мүдафиә олунаҹаг».

Аллаһын мәһәббәти вә һәгигәти бизи горујур

9, 10. а) Јеһованын һәгигәти Онун халгыны неҹә горујур? б) Мүгәддәс Китаб Јеһованын сәдагәтли оланлары мәһәббәти илә горудуғуну неҹә ҝөстәрир?

⁹ Давуд 40-ҹы мәзмурда Јеһовадан ону мәһәббәти вә һәгигәти илә горумасыны хаһиш едир. Јеһова һәгигәти вә салеһлији севдијинә ҝөрә Өз нормаларыны ајдын шәкилдә ифадә едир. Аллаһын нормаларына ујғун јашајанлар, бу нормалары инкар едәнләрин дүчар олдуғу изтираблардан, горхулардан вә проблемләрдән өзләрини әһәмијјәтли дәрәҹәдә горујурлар. Мәсәлән, әҝәр спиртли ичкиләрдән суи-истифадә етмир вә наркотик маддәләр гәбул етмириксә, о ҹүмләдән зоракы һәјат тәрзиндән вә ҹинси әхлагсызлыгдан узаг дуруругса, онда һәм өзүмүзү, һәм дә әзизләримизи үрәк ағрыларындан горумуш оларыг. Бә’зән Давуд кими, мәсиһчиләр дә һәгигәт јолундан дөнүрләр. Амма онлар әмин ола биләрләр ки, әҝәр төвбә едиб әмәлләриндән әл чәксәләр, Аллаһ онлар үчүн «сығынаҹаг јери» олмаға һазырдыр. Белә инсанлар севинҹлә дејирләр: «Мәни дардан һифз едирсән» (Мәзмур 32:7). Аллаһ Өз мәһәббәтини неҹә дә ҝөзәл тәрздә ифадә едир!

¹⁰ Аллаһын мәһәббәтини, јә’ни севҝи долу хејирхаһлығыны диҝәр шејдә дә ҝөрмәк олар. Бу залым дүнјаны тезликлә мәһв едәҹәји үчүн Аллаһ хидмәтчиләрини ондан ајры дурмаға тәшвиг едир. Мүгәддәс Китабда охујуруг: «Дүнјаны вә дүнјада олан шејләри севмәјин. Ким дүнјаны севәрсә, онда Атанын мәһәббәти јохдур. Чүнки дүнјада олан һәр шеј, јә’ни ҹисмани еһтирас, ҝөзләрин еһтирасы вә һәјатын тәкәббүрү Атадан дејил, дүнјадандыр». Бу хәбәрдарлыға гулаг асыб она ујғун шәкилдә һәрәкәт етсәк, һәјатымызы әбәдијјән горумуш оларыг, чүнки һәмин ајәдә дејилир: «Дүнја вә онун еһтирасы кечиб ҝедир, амма Аллаһын ирадәсини јеринә јетирән әбәди јашајыр» (1 Јәһја 2:15-17).

Идрак, дәрракә вә һикмәт бизи горујур

11, 12. Идрак, дәрракә вә һикмәтин бизи неҹә горудуғуну изаһ един.

¹¹ Аллаһы разы салмаг истәјәнләр Сүлејманын вердији бу мәсләһәтдән фајдалана биләрләр: «Идрак сәни һифз едәр, дәрракә сәни горујар». О һәмчинин тәшвиг едирди: «Һикмәт газан... Һикмәтдән ајрылмасан, о сәни горујар, әҝәр ону севсән, сәни сахлајар» (Сүлејманын мәсәлләри 2:11; 4:5, 6).

¹² Идрак бизә Аллаһын Кәламындан өјрәндијимиз шејләр үзәриндә дәриндән дүшүнмәјә көмәк едир. Онун сајәсиндә биз даһа дәрракәли олур вә һәјатымызда әсас шејләрә үстүнлүк вермәји өјрәнирик. Бунун зәрури олдуғуну һәр кәс өз тәҹрүбәсиндән јахшы билир. Инсанларын гәсдән вә ја өзләри дә билмәдән һәјатларында әсас шејләрә үстүнлүк вермәмәси бир чох проблемләрә сәбәб олур. Шејтан дүнјасы гаршымыза мадди ҹәһәтдән варланмаг, мәшһурлашмаг вә јүксәк вәзифәјә саһиб олмаг кими мәгсәдләр гојдуғу һалда, Јеһова фикримизи руһани дәјәрләрин үзәриндә ҹәмләшдирмәји өјрәдир. Әҝәр Шејтанын тәклифинә ујсаг, бу, аиләләримизин дағылмасына, достлуг мүнасибәтләринин позулмасына вә руһани шејләрә гаршы марағымызын сојумасына ҝәтириб чыхара биләр. Бәли, Иса: «Инсан бүтүн дүнјаја јијәләниб өз ҹаныны итирәрсә, она нә фајда олар?» дедикдә тамамилә һаглы иди (Марк 8:36). Һикмәт бизи Исанын сөзләринә гулаг асмаға тәшвиг едир: «Әввәлҹә Аллаһын Сәлтәнәтини [Падшаһлығыны] вә Онун салеһлијини ахтарын; вә бунларын һамысы сизә әлавә олараг вериләҹәкдир» (Матта 6:33).

Өзүнүзү егоизмдән ҝөзләјин

13, 14. Егоизм нәдир вә егоистлик нәјә ҝөрә мүдрик давраныш дејил?

¹³ Инсанын өзү илә марагланмасы тәбиидир. Амма шәхси истәкләр вә мараглар һәјатда өн плана чыханда проблемләр баш галдырыр. Буна ҝөрә дә, Јеһова, Онунла достлуг мүнасибәтимизи горујуб сахламаг үчүн өзүмүзү егоизмдән ҝөзләмәји мәсләһәт едир. Бәс егоизм нәдир? Бу, өз марагларыны, еһтијаҹларыны јүксәк тутмаг вә анҹаг өз мәнфәәтини ҝүдмәк демәкдир. Сизҹә, бу, зәманәмизин бир чох адамларыны јахшы характеризә етмирми? Елә Мүгәддәс Китаб да Шејтанын пис системинин ‘ахыр ҝүнләриндә’ «инсанларын худбин», јә’ни егоист олаҹағыны пејғәмбәрлик едир (2 Тимотејә 3:1, 2).

¹⁴ Мәсиһчиләр Мүгәддәс Китабын башгаларынын мәнфәәтини үстүн тутмаг вә өзләрини севдикләри кими онлары да севмәк әмринин мүдриклијини анлајырлар (Лука 10:27; Филипилиләрә 2:4). Чохлары бу әмри зәманәмизә ујғун ҝәлмәјән һесаб едир. Амма әҝәр биз уғурлу никаһдан, хошбәхт аилә һәјатындан вә һәгиги достлуг мүнасибәтләриндән һәзз алмаг истәјириксә, бу әмрә риајәт етмәк сон дәрәҹә ваҹибдир. Мәһз елә бу сәбәбдән Јеһованын хидмәтчиси јол вермәмәлидир ки, өзүнә олан тәбии мараг һисси һәјатда ән ваҹиб јер тутан ишә, јә’ни Јеһова Аллаһын ирадәсини јеринә јетирмәјә үстүн ҝәлсин.

15, 16. а) Егоизм нәјә ҝәтириб чыхара биләр вә буну кимин нүмунәсиндән ҝөрүрүк? б) Башгаларыны мүһакимә едән адам әслиндә нә едир?

¹⁵ Егоизм хәстәлијинә тутулан инсан артыг өз ҝөзүндә салеһ олмаға башлајыр вә ҝет-ҝедә дардүшүнҹәли олур. Белә инсанлар адәтән өзләриндән чох разы олурлар. Мүгәддәс Китаб ҝөзәл вурғулајыр: «Сән еј башгасыны мүһакимә едән адам, ким олурсан ол, сән дә үзүрсүзсән. Чүнки башгасыны мүһакимә етдикдә, өзүнү дә мәһкум едирсән; зира башгасыны мүһакимә едәрәк, өзүн дә ејни ҹүр һәрәкәт едирсән» (Ромалылара 2:1; 14:4, 10). Исанын ҝүнләриндә јашајан дин рәһбәрләри өзләринин салеһ олдугларына о гәдәр әмин идиләр ки, Исаны вә онун давамчыларыны мүһакимә етмәјә һүгуглары олдуғуну дүшүнүб өзләрини һаким кими апарырдылар. Амма өз нөгсанларына ҝөз бағладыглары үчүн, әслиндә өзләрини һөкмә дүчар едирдиләр.

¹⁶ Исаны әлә верән Јәһуда Искарјот да, һакимтәк башгаларыны мүһакимә етмәјә башлады. Бир дәфә Бејтанја шәһәриндә Лазарын баҹысы Мәрјәм Исанын ајагларына хош әтирли јағ сүртәндә, бу, Јәһуданын һеч хошуна ҝәлмәди. О һиддәтлә деди: «Нә үчүн бу јағ үч јүз динара сатылыб јохсуллара верилмәди?» Амма ҝөрүн әслиндә ону нараһат едән нә иди: «Буну да јохсуллара гајғыкешлик етдијиндән дејил, оғру олдуғундан сөјләди. Пул гутусу онун өзүндә иди вә ора гојуланы апарырды» (Јәһја 12:1-6). Ҝәлин биз дә, башгаларыны мүһакимә едән Јәһуда вә ја һәмин дин рәһбәрләри кими олмајаг, әкс тәгдирдә өзүмүзү мүһакимә етмиш оларыг.

17. Тәкәббүрлү олмағын вә ја өзүнә ҝүвәнмәјин тәһлүкәли олмасына даир нүмунә ҝәтирин.

¹⁷ Еркән мәсиһчиләр Јәһуда кими оғру олмасалар да, тәәссүфләр олсун ки, онларын да арасында гүрурлу вә өзү һагда јүксәк фикирдә оланлар варды. Јагуб онлар барәдә јазырды: «Сиз өз тәкәббүрлүјүнүзлә өјүнүрсүнүз». Сонра исә давам едирди: «Бүтүн бу ҹүр өјүнмә писдир» (Јагуб 4:16). Јеһоваја хидмәтдә алдығы хүсуси имтијазлары илә вә ја газандығы һәр һансы бир наилијјәтлә өјүнән инсан өзүнә пислик едир (Сүлејманын мәсәлләри 14:16). Биз Петерлә баш верән һадисәни хатырлајырыг. Бир дәфә о өзүнә ҝүвәнәрәк деди: «Һамы Сәндән дөнсә дә, мән әсла дөнмәјәҹәм... Сәнинлә бәрабәр өлмәк лазым ҝәлсә белә, Сәни әсла инкар етмәјәҹәјәм». Әслинә галса, өзүмүзлә өјүнмәјә һеч дәјмәз дә. Һәр нәјимиз варса, һамысына јалныз Јеһованын севҝи долу хејирхаһлығынын сајәсиндә маликик. Буну јахшы мәнимсәмәклә өзүмүзү тәкәббүрлүкдән горујаҹағыг (Матта 26:33-35, 69-75).

18. Јеһова тәкәббүрлүјә неҹә јанашыр?

¹⁸ Мүгәддәс Јазылар бизи хәбәрдар едир: «Әҹәлдән әввәл тәкәббүр ҝәләр, фәлакәтдән әввәл ловғалыг руһу ҝәләр». Нијә? Јеһова ҹаваб верир: «Ловғалыға [вә] тәкәббүрә... нифрәт едәрәм» (Сүлејманын мәсәлләри 8:13; 16:18). Бу сәбәбдән, ‘Ашшур падшаһынын гүрурлу үрәјинә вә тәкәббүрлү бахышларына ҝөрә’ Јеһованын бу гәдәр гәзәбләндији тәәҹҹүблү дејил (Јешаја 10:12). Сонда Јеһова бу ловға адама лајиг олдуғу ҹәзаны верди. О тезликлә Шејтанын бүтүн дүнјасыны — ҝөзә ҝөрүнән вә ҝөрүнмәјән, бүтүн гүрурлу, өзүндән разы рәһбәрләрини дә ҹәзаландыраҹаг. Ҝәлин һеч вахт Јеһованын дүш­мәнләринә хас олан өзбашыналыға јол вермәјәк!

19. Аллаһын хидмәтчиләри тәвазөкар олсалар да, нә илә фәхр едирләр?

¹⁹ Мәсиһчиләр Јеһованын хидмәтчиләри олмалары илә фәхр едирләр (Јеремја 9:24). Диҝәр тәрәфдән, онларын тәвазөкар олмаларына да там әсаслар вар. Нијә? Чүнки «һамы ҝүнаһ ишләтмиш вә Аллаһын иззәтиндән мәһрум галмышлар» (Ромалылара 3:23). Ҝөрдүјүмүз кими, әҝәр Јеһоваја мәгбул хидмәтчиләр олмаг истәјириксә, онда һәвари Павелин әһвал-руһијјәсини әкс етдирмәлијик. О дејирди: «Мәсиһ Иса ҝүнаһкарлары хилас етмәк үчүн дүнјаја ҝәлди. О ҝүнаһкарлардан ән јаманы мәнәм» (1 Тимотејә 1:15).

20. Јеһова халгыны инди неҹә горујур вә ҝәләҹәкдә буну неҹә едәҹәк?

²⁰ Мәсиһчиләр мәмнунијјәтлә шәхси марагларыны арха плана, Аллаһын Падшаһлығыны исә өн плана чәкдикләринә ҝөрә, Јеһова онлары мүтләг руһани ҹәһәтдән горумаға давам едәҹәк. Бундан башга, әмин ола биләрик ки, бөјүк мәшәггәт заманы Јеһова халгыны нәинки руһани, һәмчинин физики ҹәһәтдән дә горујаҹаг. Аллаһын вә’д етдији јени дүнјаја дахил оларкән онлар севинҹлә дејәҹәкләр: «Будур бизим Аллаһымыз! Она е’тибар етдик, О бизи гуртарды, Рәбб Одур, биз Она үмид етдик. Инди исә О бизи гуртардығына ҝөрә севиниб шадланаг!» (Јешаја 25:9).

Хатырлајырсынызмы?

• Аллаһ падшаһ Давуду вә Иса Мәсиһи неҹә горуду?

• Јеһова халгыны бу ҝүн неҹә горујур?

• Өзүмүзү егоизмдән нә үчүн ҝөзләмәлијик?

• Фәхр етмәјә һансы сәбәбимиз вар вә буна бахмајараг, нә үчүн тәвазөкар олмалыјыг?

[17-ҹи сәһифәдәки шәкилләр]

Јеһова Давуду вә Исаны неҹә горуду?

[18 вә 19-ҹу сәһифәләрдәки шәкилләр]

Аллаһ халгыны бу ҝүн руһани мә’нада һансы јолларла горујур?

[20-ҹи сәһифәдәки шәкилләр]

Јеһованын хидмәтчиләри олдуғумузла фәхр етсәк дә, һәмишә тәвазөкар олмалыјыг.