Садиг мәсиһчиләр һәгигәтдә јеримәјә давам едирләр
“Өвладларымын һәгигәтдә јеридијини ешитмәкдән даһа бөјүк севинҹим јохдур” (3 ЈӘҺЈА 4, И–93).
1. “Мүждәнин һәгигәти” кимә вә нәјә ҹәмләшдирилиб?
ЈЕҺОВА јалныз Она “руһән вә һәгигәтән” ибадәт едән кәсләри бәјәнир (Јәһја 4:24). Онлар, Аллаһын Кәламына әсасланан мәсиһчи тә’лиминин бүтүн мәҹмусуну е’тираф едәрәк, һәгигәтә табе олурлар. Бу “Мүждәнин һәгигәти” Иса Мәсиһә вә Падшаһлыг васитәсилә илә Јеһованын һакимијјәтинә бәраәт газандырмаға ҹәмләшдирилиб (Галатијалылара 2:14). Аллаһ ‘алдадыҹы бир ҝүҹүн’ тә’сиринә јол версә дә, һәр биримизин хиласы хош хәбәрә иман ҝәтирмәкдән вә һәгигәтдә јеримәкдән асылыдыр (2 Салониклиләрә 2:9-12; Ефеслиләрә 1:13, 14).
2. Һәвари Јәһја хүсусилә нәјә ҝөрә севинирди вә онун Гај илә мүнасибәти неҹә иди?
2 Падшаһлығын тәблиғчиләри ‘һәгигәтдә һәмкардырлар’ (ЈД). Онлар, һәвари Јәһја вә онун досту Гај кими, һәгигәтдә гәтијјәтлә дурур вә онда јеријирләр. Јәһја, Гајы нәзәрдә тутараг, јазырды: “Өвладларымын һәгигәтдә јеридијини ешитмәкдән даһа бөјүк севинҹим јохдур” (3 Јәһја 3-8, И–93). Гајы һәгигәтлә Јәһја таныш етмәсә дә, онун ихтијар олмасы, мәсиһчи јеткинлији вә сәмими аталыг һиссләри, ҝөрүндүјү кими, Јәһјадан ҹаван олан Гајы онун руһани өвладларындан бири һесаб едилмәкдә өзүнү тамамилә доғрулдурду.
Һәгигәт вә мәсиһчи ибадәти
3. Илк мәсиһчиләр һансы мәгсәдлә ҝөрүшләрә топлашырдылар вә онлар һансы фајданы әлдә едирдиләр?
3 Һәгигәти өјрәнмәк үчүн илк мәсиһчиләр јығынҹаг һалында ҝөрүшүрдүләр, онларын ҝөрүшләри чох вахт шәхси евләрдә кечирилирди (Ромалылара 16:3-5). Бунунла онлар руһланыр, бир-бирләрини мәһәббәтә вә хејирли ишләрә тәшвиг едирдиләр (Ибраниләрә 10:24, 25). Өзләрини мәсиһчи адландыранлар һаггында сонрадан Тертуллиан (тәх. 155-ҹи ил, 220-ҹи илдән сонра) јазмышдыр: “Биз бир јерә топлашырыг ки, Аллаһдан назил олан Јазылары охујаг... Биз Мүгәддәс Јазыларын васитәсилә, шүбһәсиз ки, иманымызы гидаландырыр, үмидимизи артырыр, әминлијимизи мөһкәмләдирик” (“Apology”, 39-ҹу фәсил, инҝ.).
4. Мәсиһчи ҝөрүшләриндә охунан маһнылар һансы ролу ојнајыр?
4 Еһтимал ки, илк мәсиһчиләрин ҝөрүшләрдә маһны охумаг адәтләри варды (Ефеслиләрә 5:19; Колослулара 3:16). Профессор Һенри Чадвик јазыр ки, II әсрдә јашамыш тәнгидчи Селс, өзләрини мәсиһчи адландыран кәсләрин аһәнҝдар дини нәғмәләрини “о гәдәр ҝөзәл” санырды ки, “онларын һиссләрә тохунмасы ону өзүндән чыхарырды”. Чадвик әлавә едир: “Илк мәсиһчи јазычыларындан бири олан Искәндәријјәли Климент, һансы мусигинин мәсиһчиләр үчүн мүвафиг олдуғуну мүзакирә едир. О гејд едир ки, бу ҹүр мусиги еротик рәгсләрлә мүшајиәт едилән мусигијә бәнзәмәли дејил” (“The Early Church”, 274, 275-ҹи сәһифәләр). Ҝөрүндүјү кими, ҝөрүшләриндә маһны охујан илк мәсиһчиләрә бәнзәр тәрздә, Јеһованын Шаһидләри дә тез-тез Мүгәддәс Китаба әсасланан маһнылар, о ҹүмләдән Аллаһы вә Падшаһлығы иззәтләндирән әзәмәтли һимнләр ифа едирләр.
5. а) Илк мәсиһчиләрин јығынҹагларында руһани рәһбәрлик неҹә һәјата кечирилирди? б) Мәсиһчиләр, Исанын Матта 23:8, 9 ајәләриндәки сөзләринә неҹә риајәт едирдиләр?
5 Илк мәсиһчиләрин јығынҹагларында нәзарәтчиләр һәгигәти өјрәдир, хидмәти көмәкчиләр исә һәмиманлыларына мүхтәлиф саһәләрдә көмәк ҝөстәрирдиләр (Филипилиләрә 1:1). Рәһбәрлик шурасы Аллаһын Кәламына вә мүгәддәс руһа е’тибар едәрәк, руһани рәһбәрлији һәјата кечирирди (Һәвариләрин ишләри 15:6, 23-31). Дини титуллардан истифадә едилмирди, белә ки, Иса шаҝирдләринә ҝөстәриш вермишди: “Сиз өзүнүзә “Рабби” дедиртмәјин; чүнки сизин Мүәллиминиз бирдир, о да Мәсиһдир вә сиз һамыныз гардашсыныз. Јер үзүндә кимсәјә ата демәјин; чүнки Атаныз бирдир, сәмави Атадыр” (Матта 23:8, 9). Бу вә диҝәр саһәләрдә илк мәсиһчиләрлә Јеһованын Шаһидләри арасында охшарлыглар вар.
Һәгигәти тәблиғ етдикләринә ҝөрә тә’гиб олунурлар
6, 7. Мәсиһин һәгиги давамчыларынын тәблиғ етдикләри хәбәр сүлһ мәрамлы олса да, онлар һансы мүнасибәтлә гаршылашырдылар?
6 Илк мәсиһчиләрин тәблиғ етдикләри Падшаһлыг һаггындакы хәбәр сүлһ мәрамлы олса да, Иса кими, онлары да тә’гиб едирдиләр (Јәһја 15:20; 17:14). Тарихчи Ҹон фон Мосһајм биринҹи әсрин мәсиһчиләрини “һеч заман ағылларына дөвләтә зијан вурмаг ҝәлмәјән ән зәрәрсиз инсанлар групу” адландырмышдыр. Доктор Мосһајмын сөзләринә ҝөрә, “башга халгларын дини ајинләри илә һеч бир охшарлығы олмајан мәсиһчи ибадәтинин садәлији ромалылары гәзәбләндирирди”. О әлавә едир: “Мәсиһчиләрдә нә гурбан ҝәтирмәк, нә мә’бәд, нә дини сурәтләр, нә фалчылыг, нә дә каһинлик рүтбәси варды, елә бу, садаланан ајинләри олмајан дини әслиндә дин һесаб етмәјән авам издиһам тәрәфиндән мәзәммәт олунмаг үчүн кифајәт иди. Мәсиһчиләрә атеист кими бахырдылар, Рома ганунуна ҝөрә исә, атеизмдә иттиһам олунан инсан ҹәмијјәт үчүн тәһлүкәли һесаб олунурду”.
7 Бүтпәрәстлијин һесабына јашајан каһинләр, сәнәткарлар вә башга инсанлар халгы, бүтпәрәст адәтләрдә иштирак етмәјән мәсиһчиләрә гаршы галдырырдылар (Һәвариләрин ишләри 19:23-40; 1 Коринфлиләрә 10:14). Тертуллиан јазырды ки, әлејһдарлар мәсиһчиләри “ҹәмијјәтдә баш верән һәр бир фәлакәтдә, халга үз верән бәдбәхтликләрдә ҝүнаһкар һесаб едирдиләр. Әҝәр Тибер шәһәрин диварларына чатыбса, әҝәр Нил саһәләри сувармырса, әҝәр сәма јағмур вермирсә, әҝәр зәлзәлә баш верирсә, әҝәр аҹлыг вә јолухуҹу хәстәлик јаранырса, о саат гышгырырлар: “Мәсиһчиләри ширләрә атын”. Мәсиһин һәгиги давамчыларына баһа баша ҝәлсә дә, онлар ‘өзләрини бүтләрдән горујурдулар’ (1 Јәһја 5:21).
Һәгигәт вә дини бајрамлар
8. Һәгигәтдә јеријәнләр нә үчүн Милад ҝүнүнү бајрам етмирләр?
8 Һәгигәтдә јеријәнләр Мүгәддәс Китаба әсасланмајан бајрамлардан гачынырлар, ахы “ишыгла гаранлыг арасында нә шәриклик ола биләр?” (2 Коринфлиләрә 6:14-18). Мәсәлән, онлар 25 декабрда гејд едилән Милад ҝүнүнү бајрам етмирләр. “Уорлд бук” енсиклопедијасында е’тираф едилир ки, “Мәсиһин анадан олма тарихини дәгиг билән јохдур” (“The World Book Encyclopedia”). Башга бир енсиклопедијада дејилир: “Декабрын ортасында гејд олунан Рома бајрамы Сатурналија, Миладла бағлы олан бир чох әјләндириҹи бајрамларын әсасыны тәшкил едир” (“The Encyclopedia Americana”, 1956-ҹы илин нәшри). Макклинтокун вә Стронгун енсиклопедијасында исә гејд едилир: “Милад ҝүнүнүн бајрам едилмәси Аллаһ тәрәфиндә тә’сис едилмәмиш вә башланғыҹыны Ә[һди] Ҹ[әдиддән] ҝөтүрмәмишдир”. “Иса Мәсиһин дөврүндәки ҝүндәлик һәјат” адлы китабда дејилир: “Сүрү... гышы өртүлү јердә кечирирди. Елә јалныз бунун өзү она ишарә едир ки, гыш фәслинә дүшән ән’әнәви Милад ҝүнүнүн тарихини, чәтин ки, доғру һесаб етмәк олар, чүнки Мүждәјә әсасән чобанлар һәмин вахты саһәдә олублар” (Лука 2:8-11) (“Daily Life in the Time of Jesus”).
9. Јеһованын хидмәтчиләри Пасха бајрамыны нәјә ҝөрә нә кечмишдә, нә дә инди гејд етмирләр?
9 Христиан дүнјасынын килсәләри тәрәфиндән гејд едилән Пасха бајрамы, ҝуја Мәсиһин дирилмәсинә әламәтдир, лакин нүфузлу мәнбәләр бу бајрамы јалан ибадәтлә әлагәләндирир. Бир Мүгәддәс Китаб лүғәтиндә дејилир ки, Пасха “әввәлҹә, англосаксҹа Еастра (вә ја Еостра) ады илә мәшһур олуб, ишыг вә јазын Тевтон илаһәси шәрәфинә гејд олунан јаз бајрамы иди” (“The Westminster Dictionary of the Bible”). Һәр неҹә олса да, “Британија енсиклопедијасы”нда (11-ҹи нәшр) дејилдији кими, “Әһди Ҹәдиддә һеч бир шеј Мәсиһин дирилмәсинин бајрам едилмәсинә ишарә етмир” (“Encyclopædia Britannica”). Пасха бајрамыны илк мәсиһчиләр бајрам етмәмишләр вә ону Јеһованын Шаһидләри дә бајрам етмирләр.
10. Иса һансы бајрамы тә’сис етди вә кимләр бу бајрамы лазым олдуғу кими гејд едир?
10 Иса давамчыларына, өзүнүн анадан олма вә ја дирилмә ҝүнүнү бајрам етмәји бујурмады, әксинә, гурбанлыг өлүмүнүн Хатирә Ҝеҹәсини тә’сис етди (Ромалылара 5:8). Бәли, бу, онун шаҝирдләринә гејд етмәји тапшырдығы јеҝанә һадисә иди (Лука 22:19, 20). Илдә бир дәфә кечирилән бу һадисәни Јеһованын Шаһидләри индијәдәк гејд едирләр (1 Коринфлиләрә 11:20-26).
Һәгигәт дүнјанын һәр јериндә бәјан едилир
11, 12. Һәгигәтдә јеријән инсанлар тәблиғ фәалијјәтләрини һәмишә неҹә тә’мин едирдиләр?
11 Һәгигәти билән кәсләр, вахтларыны, гүввәләрини вә вәсаитләрини хош хәбәрин тәблиғ ишинә сәрф етмәји өзләринә шәрәф билирләр (Марк 13:10). Илк мәсиһчиләрин тәблиғ фәалијјәти көнүллү ианәләр һесабына тә’мин едилирди (2 Коринфлиләрә 8:12; 9:7). Тертуллиан јазырды: “Биздә пул гутусуна бәнзәр гуту олса да, санки дин һәрраҹа гојулубмуш кими, фәхри ад үчүн верилән пул һесабына долдурулмур. Һәр кәс ајын биринҹи ҝүнүндә, јахуд истәдији вахт, анҹаг әҝәр истәји вә имканы варса, бир аз ианә едир, чүнки буна һеч ким мәҹбур едилмир, амма һәр кәс көнүллү олараг ианә едир” (“Аполоҝј”, 39-ҹу фәсил, инҝ.).
12 Јеһованын Шаһидләринин дә Падшаһлыг һаггындакы үмумдүнја тәблиғ фәалијјәти көнүллү ианәләр һесабына тә’мин едилир. Нәинки Шаһидләр, һәмчинин һәгигәтлә марагланан миннәтдар инсанлар да бу фәалијјәтә ианә етмәји өзләринә шәрәф билирләр. Бурада јенә дә илк мәсиһчиләрлә Јеһованын Шаһидләри арасындакы охшарлығы ҝөрүрүк.
Һәгигәт вә давраныш
13. Давраныш мәсәләсиндә Јеһованын Шаһидләри һансы мәсләһәтә риајәт едирләр?
13 Һәгигәтдә јеријән кәсләр кими, илк мәсиһчиләр һәвари Петерин мәсләһәтинә табе олурдулар: “Иман ҝәтирмәјәнләр арасында мүсбәт һәјат сүрүн ки, писликедәнләрмишсиниз кими сизә ифтира атсалар да, хејирли ишләринизи ҝөрүб, Аллаһын онлара јахынлашдығы ҝүндә, Она иззәт версинләр” (1 Петер 2:12). Јеһованын Шаһидләри бу сөзләрә ҹидди јанашырлар.
14. Әхлагсыз әјләнҹәләрә гаршы мәсиһчиләрин нөгтеји-нәзәри неҹәдир?
14 Һәтта дөнүклүк башлајан заман, өзләрини Мәсиһин давамчылары адландыран кәсләр әхлагсыз мәшғулијјәтләрдән гачынырдылар. Килсә тарихи үзрә профессор олан В. Д. Киллен јазырды: “II вә III әсрләрдә бөјүк шәһәр сакинләринин севимли јерләри театр иди. Актјорлар олдугҹа әдәбсиз идиләр вә онларын тамашасы һәмишә һәмин дөврә хас олан еһтираслары өдәмәјә истигамәтләнирди... Мәсиһин һәгиги давамчыларынын һамысы театра нифрәт бәсләјирди... Һәмин театрларын әдәбсизлији онлара пис тә’сир бағышлајырды, дурмадан јаланчы танры вә илаһәләрә ибадәт исә онларын дини һиссләринә тохунурду” (“The Ancient Church”, 318, 319-ҹу сәһифәләр). Исанын һәгиги давамчылары әдәбсиз вә позғун әјләнҹәләрдән бу ҝүн дә гачынырлар (Ефеслиләрә 5:3-5).
Һәгигәт вә “һакимләр”
15, 16. “Һакимләр” кимләрдир вә һәгигәтдә јеријәнләр онлара неҹә мүнасибәт бәсләјирләр?
15 Илк мәсиһчиләрин әдәбли давранышларына бахмајараг, Рома императорларынын әксәријјәти онлар һаггында јанлыш фикирдә идиләр. Тарихчи Е. Ҹ. Һардинин сөзләринә ҝөрә, императорлар онлары “мәнфур фанатикләр” санырдылар. Битинија валиси Кичик Плини илә император Трајанын мәктублашмаларындан ҝөрүнүр ки, идарә едән даирәләр үмумиликдә мәсиһчилик һаггында дүзҝүн тәсәввүрә малик дејилдиләр. Мәсиһчиләр һакимијјәтә неҹә јанашырлар?
16 Исанын илк давамчылары кими, Јеһованын Шаһидләри дөвләт “һакимләринә” нисби табе олурлар (Ромалылара 13:1-7). Әҝәр инсанларын тәләби Аллаһын ирадәсинә зидд ҝедирсә, Шаһидләр нөвбәти сөзләрдә ифадә олунан мөвгеји тутурлар: “Инсанлардан артыг, Аллаһа итаәт етмәк ҝәрәкдир” (Һәвариләрин ишләри 5:29). “Исадан сонра Христианлығын зәфәри” адлы китабда дејилир: “Мәсиһчиләр императора ибадәтдә иштирак етмәсәләр дә, онлар үсјан галдырмырдылар, онларын гејри-ади сајылан вә бә’зән бүтпәрәстләрин нөгтеји-нәзәри бахымындан јол верилмәз олан дини исә, империја үчүн һеч бир реал тәһлүкә јаратмырды” (“After Jesus—The Triumph of Christianity”).
17. а) Илк мәсиһчиләр һансы һакимијјәтә тәрәфдар идиләр? б) Мәсиһин һәгиги давамчылары Ишаја 2:4 ајәсинә мүвафиг тәрздә неҹә давранырдылар?
17 Илк мәсиһчиләр Аллаһын Падшаһлығынын тәрәфдарлары идиләр; тајфа башчылары олан Ибраһим, Исһаг вә Јагуб да “баниси Аллаһ олан” вә’д едилмиш бу шәһәрә иман едирдиләр (Ибраниләрә 11:8-10). Рәббләри кими, Исанын шаҝирдләри ‘дүнјадан дејилдиләр’ (Јәһја 17:14-16). Инсанлар арасындакы мүһарибә вә мүнагишәләрә ҝәлдикдә исә, илк мәсиһчиләр бу ишләрдә иштирак етмирдиләр, чүнки “гылынҹларыны котан дәмирләрә” чевирмишдиләр (Ишаја 2:4). Килсә тарихи үзрә лектор Ҹеффри Наталл бир мараглы охшарлыға диггәт јетирир: “Е’тираф етмәк чәтин олса да, илк мәсиһчиләрин мүһарибәјә олан мүнасибәтләри, өзләрини Јеһованын Шаһидләри адландыран кәсләрин мүнасибәтләри илә чох охшардыр”.
18. Нәјә ҝөрә һакимијјәтләрин Јеһованын Шаһидләриндән горхмаға әсасы јохдур?
18 Битәрәфлији горујан вә “һакимләрә” табе олан илк мәсиһчиләр, һеч бир сијаси гурулуш үчүн тәһлүкә јаратмырдылар. Буну Јеһованын Шаһидләри һаггында да демәк олар. Шимали Америкада дәрҹ едилән габагҹыл нәшрләрин мүәллифи јазыр: “Јеһованын Шаһидләринин һансыса сијаси режим үчүн тәһлүкә јарада биләҹәкләрини, јалныз габагҹадан јаранмыш јанлыш фикирләр вә шүбһәләрдә батыб галан кәсләр дүшүнә биләр. Бу, һакимијјәт үчүн олдугҹа тәһлүкәсиз вә сүлһсевәр дини бир тәшкилатдыр”. Һакимијјәтин тәһсилли нүмајәндәләри билирләр ки, Јеһованын Шаһидләриндән горхмаға һеч бир әсас јохдур.
19. Верҝиләрлә әлагәдар илк мәсиһчиләр вә Јеһованын Шаһидләри һаггында нә демәк олар?
19 Илк мәсиһчиләрин “һакимләрә” һөрмәти онларын, башга шејләрлә јанашы, верҝиләри өдәмәләриндә әкс олунурду. Шәһид Јустин Антонија Пиј адлы Рома императоруна (138-161) јазырды ки, мәсиһчиләр верҝиләри “башга инсанлардан даһа һәвәслә” өдәјирләр (“First Apology”, 17-ҹи фәсил, инҝ.). Тертуллиан исә Рома һөкмдарларына дејирди ки, онларын верҝи јығанлары верҝиләри виҹданла өдәдикләринә ҝөрә “мәсиһчиләрә миннәтдарлыг етмәлидирләр” (“Apology”, 42-ҹи фәсил, инҝ.). Мәсиһчиләр “Пах Романа”нын, јә’ни Рома дүнјасынын гајда-ганунларындан, јахшы јолларындан вә дәниздә нисбәтән тәһлүкәсиз сәјаһәт етмәк имканындан истифадә едирдиләр. Ҹәмијјәт гаршысындакы вәзифәләрини дәрк едәрәк, мәсиһчиләр Исанын сөзләринә диггәт јетирирдиләр: “Гејсәринкини гејсәрә, Аллаһынкыны Аллаһа верин” (Марк 12:17). Бу ҝүн Јеһованын хидмәтчиләри бу сөзләрә мүвафиг јашајырлар вә онлары дүрүст олмаларына, мәсәлән, верҝиләри өдәмәкдә ҝөстәрдикләри дүрүстлүјә ҝөрә тә’рифләјирләр (Ибраниләрә 13:18).
Һәгигәт — бирлијин бағыдыр
20, 21. Илк мәсиһчиләр сүлһсевәр гардашлыға малик олдугларыны неҹә ҝөстәрирдиләр вә буну Јеһованын мүасир хидмәтчиләри неҹә ҝөстәрирләр?
20 Илк мәсиһчиләр һәгигәтдә јеридикләринә ҝөрә онлары сүлһсевәр гардашлыг телләри бағлајырды, буну, Јеһованын буҝүнкү Шаһидләри һаггында да демәк олар (Һәвариләрин ишләри 10:34, 35). “Москва вахты” гәзетиндә дәрҹ олунан мәктубда дејилирди: “[Јеһованын Шаһидләри] хошаҝәлән, хејирхаһ вә һәлим инсанлар кими танынырлар, онларла иш ҝөрмәк асандыр, онлар һеч заман әтрафдакылара тәзјиг ҝөстәрмирләр вә һәмишә истәнилән динә мәхсус олан инсанларла сүлһ мүнасибәтиндә олмаға ҹан атырлар... Онларын арасында рүшвәт алан, ички дүшкүнү вә ја наркоман јохдур, буну изаһ етмәк чох асандыр: онлар, данышыглары вә етдикләри һәр бир ишдә Мүгәддәс Китаба әсасланан е’тигадларыны рәһбәр тутмаға чалышырлар. Әҝәр бүтүн дүнјада јашајан инсанлар Јеһованын Шаһидләри кими Мүгәддәс Китаба мүвафиг јашамаға, һеч олмаса, ҹәһд ҝөстәрсәјдиләр, бизим залым дүнјамыз тамамилә башга оларды” (“The Moscow Times”).
21 Бир енсиклопедијада дејилир: “Илк килсә өзүнү, әввәлләр дүшмәнчилик едән јәһудиләр вә гејри-јәһудиләр арасында сүлһ вә һәмрә’јлик ичиндә јашајан јеҝанә јени “бәшәријјәт” санырды (“Encyclopedia of Early Christianity”). Јеһованын Шаһидләри дә өзлүјүндә сүлһсевәр бејнәлхалг гардашлығы — һәгиги мә’нада јени дүнја ҹәмијјәтини тәшкил едирләр (Ефеслиләрә 2:11-18; 1 Петер 5:9; 2 Петер 3:13). Преторијада (CAR) “Шоу-Граундс” стадионуна конгресә топлашан мүхтәлиф иргдән олан Шаһидләри нәзәрдән кечирәрәк, һәмин комплексин мүһафизә дәстәсинин рәиси гејд етди: “Онларын һамысы мүлајим идиләр, бир-бирләри илә меһрибан сөһбәт едир вә ҝөзәл әһвал-руһијјәдә идиләр. Бурада сон бир нечә ҝүн әрзиндә баш верән һадисәләр шәһадәт едир ки, сизин ҹәмијјәтин үзвләри чох ҝөзәл инсанлардыр вә онлар ваһид хошбәхт аилә кими јашајырлар”.
Һәгигәти өјрәндикләринә ҝөрә хејир-дуа алыблар
22. Мәсиһчиләрин ‘һәгигәти ачыг е’лан етмәләри’ сајәсиндә нә баш верир?
22 Павел вә башга мәсиһчиләр өз давраныш вә тәблиғ фәалијјәтләри илә ‘һәгигәти ачыг е’лан етмишләр’ (2 Коринфлиләрә 4:2). Разы дејилсинизми ки, Јеһованын Шаһидләри дә ејни иши ҝөрүр вә бүтүн халглары һәгигәтә өјрәдирләр? Бүтүн дүнјада инсанлар Аллаһа һәгигәтдә ибадәт етмәјә башлајыр вә “Рәбб евинин дағы”на даһа чох сајда ахышырлар (Ишаја 2:2, 3). Һәр ил минләрлә инсанлар өзләрини Аллаһа һәср етдикләринә ишарә олараг вәфтиз олунурлар вә нәтиҹәдә чохлу јени јығынҹаглар јараныр.
23. Бүтүн халглары һәгигәтә өјрәдән кәсләрә сиз неҹә јанашырсыныз?
23 Јеһованын хидмәтчиләри мүхтәлиф мәншәли инсанлар олсалар да, онлар һәгиги ибадәтдә бирләшибләр. Ҝөстәрдикләри мәһәббәт әсасында онлары Исанын шаҝирдләри кими таныјырлар (Јәһја 13:35). Аллаһын һәгигәтән дә онларын арасында олдуғуну ҝөрүрсүнүзмү? (1 Коринфлиләрә 14:25). Бүтүн халглары һәгигәтә өјрәдән кәсләрә тәрәфдарсынызмы? Әҝәр еләдирсә, онда һәр заман һәгигәтә ҝөрә миннәтдар олун. Арзу едирик ки, сиз әбәди олараг бу јолда јеримәјә лајиг оласыныз.
Сиз неҹә ҹаваб верәрдиниз?
• Илк мәсиһчиләрлә Јеһованын Шаһидләринин ибадәти нәдә охшардыр?
• Һәгигәтдә јеријәнләр һансы јеҝанә дини бајрамы гејд едирләр?
• “Һакимләр” кимләрдир вә мәсиһчиләр онлара неҹә мүнасибәт бәсләјирләр?
• Һәгигәт бирләшдириҹи телләрә неҹә чеврилир?
[17-ҹи сәһифәдәки шәкил]
Мәсиһчи ҝөрүшләри һәгигәтдә јеријәнләр үчүн һәмишә хејир-дуа олмушдур.
[18-ҹи сәһифәдәки шәкилләр]
Иса давамчыларына онун гурбанлыг өлүмүнүн Хатирә Ҝеҹәсини гејд етмәји һәвалә етди.
[20-ҹи сәһифәдәки шәкил]
Илк мәсиһчиләр кими, Јеһованын Шаһидләри “һакимләрә” һөрмәт едирләр.