СӘҺНӘДӘН, јахуд сөһбәт едәркән Аллаһын нијјәти һаггында данышанда дедикләрин Мүгәддәс Јазылара әсасланмалыдыр. Бунун үчүн тез-тез Мүгәддәс Китабдан ајәләр охумаг лазым ҝәлир. Буну исә јахшы етмәк ҝәрәкдир.

Һиссләри ифадә ет. Ајәләри һиссләрлә охумаг лазымдыр. Ҝәлин бир нечә нүмунәјә бахаг. Мәзмур 37:11 ајәсини охујанда бурада вәд олунан сүлһү севинҹлә ҝөзләдијин сәсиндә әкс олунмалыдыр. Вәһј 21:4 ајәсиндәки пејғәмбәрлији охујаркән кәдәр вә өлүмдән гуртулуша ҝөрә миннәтдарлыг сәсиндә өз әксини тапмалыдыр. Ҝүнаһа гәрг олмуш ‘Бөјүк Бабилдән’ чыхмаг чағырышы јазылан Вәһј 18:2, 4, 5 ајәләрини елә охумаг лазымдыр ки, тәхирә салмадан һәрәкәтә кечмәјин ваҹиблији дујулсун. Һиссләр шиширдилмиш јох, сәмими олмалыдыр. Нә дәрәҹәдә һиссләрлә охујаҹағын мәтнин өзүндән вә ону һансы мәгсәдлә охумағындан асылыдыр.

Лазыми сөзләри вурғула. Әҝәр ајәнин јалныз бир һиссәсини шәрһ едирсәнсә, охујан заман һәмин һиссәни вурғуламаг лазымдыр. Мәсәлән, Матта 6:33 ајәсиндәки ‘әввәлҹә Аллаһын Сәлтәнәтини ахтарын’ сөзләринин мәнасыны изаһ етмәк истәјирсәнсә, онда ајәни охујаркән «Онун салеһлијини» вә «бунларын һамысы» сөзләрини вурғуламаг лазым дејил.

Туталым, Хидмәти ҝөрүшдә чыхыш едәркән Матта 28:19 ајәсини охумағы планлашдырырсан. Ајәнин һансы сөзләрини вурғуламаг лазымдыр? Әҝәр һәмиманлыларыны Мүгәддәс Китаб өјрәнмәсинә башламаг үчүн сәј ҝөстәрмәјә тәшвиг етмәк истәјирсәнсә, онда вурғуну «шаҝирдим един» сөзләринә вур. Јох әҝәр, Мүгәддәс Китаб һәгигәтини әҹнәбиләрлә бөлүшмәк мәсулијјәти һагда данышмаг вә ја бәзи тәблиғчиләри даһа чох тәләбат олан јерләрә көчмәјә тәшвиг етмәк истәјирсәнсә, онда «бүтүн халглары» сөзләрини вурғуламаг олар.

Чох вахт ајәләр суала ҹаваб вермәк вә ја башгаларына зиддијјәтли ҝөрүнән дәлилләри тәсдиг етмәк үчүн охунур. Ајәдәки бүтүн фикирләри ејни дәрәҹәдә вурғуласан, динләјиҹиләр әлагәни ҝөрмәјәҹәкләр. Ајәнин нәјә ҝөрә охундуғу сәнин үчүн ајдын олса да, динләјиҹиләринә гаранлыг галаҹаг.

Мәсәлән, Мүгәддәс Китабдан Аллаһын ады јазылан Јешаја 12:2 (КМ) ајәсини охујаркән вурғуну «гуртулушумдур» сөзүнә вурсан, Аллаһын адынын олмасынын ајдын бир факт кими ҝөрүнмәсинә бахмајараг, ев саһиби буну баша дүшмәјә биләр. Буна ҝөрә «Јеһова» адыны вурғуламаг лазымдыр. Анҹаг бу ајәни Јеһованын Хиласкар олдуғуну ҝөстәрмәк үчүн охусан, әсас вурғуну «гуртулушумдур» сөзүнә вурмаг лазым ҝәләҹәк. Ејни тәрздә, иманы әмәлләрлә тамамламағын ваҹиблијини ҝөстәрмәк үчүн Јагуб 2:24 ајәсини охујанда әсас вурғуну «әмәлләри» сөзү әвәзинә, «салеһ сајылыр» ифадәсинә вурсан, ешидәнләр фикри тутмајаҹаглар.

Башга бир фајдалы нүмунәни Ромалылара 15:7-13 ајәләриндә тапа биләрик. Бу, һәвари Павелин һәм јәһудиләрдән, һәм дә башга милләтләрдән олан мәсиһчиләрдән ибарәт јығынҹаға јаздығы мәктубдан бир парчадыр. Бурада һәвари, ‘диҝәр халгларын Аллаһа мәрһәмәтинә ҝөрә иззәт вермәләри’ үчүн Мәсиһин хидмәтинин тәкҹә сүннәт олунмуш јәһудиләрә јох, һәмчинин башга милләтләрдән олан инсанлара да фајда ҝәтирдијинә даир дәлилләр ҝәтирир. Сонра Павел диггәти башга милләтләр үчүн ачылан имкана јөнәлдәрәк дөрд ајәдән ситат ҝәтирир. Павелин нәзәрдә тутдуғу фикри вурғуламаг үчүн һәмин ситатлары неҹә охумаг лазымдыр? Әҝәр вурғулајаҹағын ифадәләри гејд етмәк истәјирсәнсә, онда 9-ҹу ајәдә «диҝәр халглар» вә «милләтләр», 10-ҹу ајәдә «еј милләтләр», 11-ҹи ајәдә «еј бүтүн милләтләр» вә «еј бүтүн халглар», 12-ҹи ајәдә «диҝәр халглара», «халглар» сөзләрини нишанла. Сонра Ромалылара 15:7-13 ајәләрини ифадәли охумаға чалыш. Белә етсән, Павелин јүрүтдүјү мүлаһизә даһа ајдын олаҹаг вә ону изләмәк асанлашаҹаг.

Сөзләри вурғуламағын үсуллары. Әсас фикри ҝөстәрән вә нәзәрә чарпдырмаг истәдијин сөзләри вурғуламағын мүхтәлиф үсуллары вар. Истифадә етдијин үсул ајәјә вә вәзијјәтә ујғун олмалыдыр. Ашағыда үсуллардан бәзиләри ҝәтирилир.

Интонасијанын дәјишдирилмәси. Бу заман әсас фикри ҝөстәрән сөзләрин ҹүмләнин диҝәр һиссәсиндән сечилмәси үчүн интонасијаны дәјишмәк лазымдыр, мәсәлән, сәси јүксәлдиб, ендирмәклә. Бир чох дилләрдә тону дәјишмәк вурғуламаға көмәк едир. Анҹаг бәзи дилләрдә бу, мәнаны бүтүнлүклә дәјишә биләр. Әсас ифадәләри дејәндә темпи азалтмаг онлары санбаллы едир. Интонасијаны дәјишмәклә сөзләри вурғуламаг мүмкүн олмајан дилләрдә буну һәмин дил үчүн мәгбул олан истәнилән башга үсулла етмәк лазымдыр.

Фасилә. Фасиләни ајәнин әсас һиссәсини охумаздан сонра, әввәл, ја да һәм сонра, һәм дә әввәл етмәк олар. Әввәл едилән фасилә динләјиҹиләри интизарда сахлајыр; сонра едилән фасилә исә ешитдикләриндән алдыглары тәәссүраты ҝүҹләндирир. Анҹаг тез-тез фасилә етсән, һеч нәји нәзәрә чарпдыра билмәјәҹәксән.

Тәкрар. Һансыса фикри нәзәрә чарпдырмағын диҝәр үсулу охумағына ара вериб сөзү вә ја ифадәни јенидән охумагдыр. Бир чох натигләр, адәтән, ајәни ахыра кими охујуб, сонра әсас ифадәни тәкрар етмәјә үстүнлүк верирләр.

Жестләр. Жестләр вә үз ифадәләри сөзләрә рәнҝ гатыр.

Сәс тону. Бәзи дилләрдә мүәјјән сәс тонлары сөзү нәинки вурғулајыр, һәтта онун мәнасына да тәсир едир. Бу заман да, хүсусилә кинајә ифадә едәркән, еһтијатлы олмаг лазымдыр.

Ајәни башгасы охујанда. Ајәни ев саһиби охујанда, ола биләр, лазым олмајан сөзләри вурғуласын, ја да үмумијјәтлә һеч бир сөзү вурғуламасын. Бу заман нә етмәли? Ән јахшысы ајәни изаһ едәрәк онун мәнасыны ајдынлашдырмагдыр. Сонра һәмсөһбәтинин диггәтини бирбаша олараг ајәдәки әсас фикирләри билдирән сөзләрә ҹәмләмәк олар.

БАШГАЛАРЫНЫ өјрәдәркән Мүгәддәс Китабдан ајәләри садәҹә охумаг кифајәт етмир. Һәвари Павел әмәкдашы Тимотејә јазмышды: «Чалыш ки, өзүнү Аллаһа сынагдан чыхмыш, утанмаға әсасы олмајан вә һәгигәт сөзүнү доғрулугла өјрәдән бир ишчи кими тәгдим едәсән» (2 Тим. 2:15).

Һәгигәт сөзүнү доғрулугла өјрәтмәк ајәләри Мүгәддәс Китабын тәлимләринә ујғун изаһ етмәк демәкдир. Бунун үчүн контексти нәзәрә алмаг лазымдыр. Садәҹә хошумуза ҝәлән ифадәләри сечиб, өз фикирләримизи онлара әлавә етмәк олмаз. Јеремја пејғәмбәр васитәсилә Јеһова Онун адындан данышдыгларыны иддиа едән, әслиндә исә «ујдурдуглары ҝөрүнтүләри» данышан пејғәмбәрләрә гулаг асмамағы тапшырмышды (Јер. 23:16). Һәвари Павел мәсиһчиләри хәбәрдар етмишди ки, Аллаһын Кәламыны инсан фәлсәфәси илә тәһриф етмәсинләр. О јазмышды: «Лакин биз ҝизли, ејибли үсуллары рәдд етдик. Һијләҝәрлик илә һәрәкәт етмирик, Аллаһын кәламыны тәһриф етмирик». О вахтлар фырылдагчы шәраб таҹирләри чох газанҹ әлдә етмәк үчүн шәраба су гатырдылар. Биз Аллаһын Кәламына инсан фәлсәфәсини гатараг ону тәһриф етмирик. Павел дејирди: «Биз бир чохлары кими Аллаһ кәламынын хырдаватчылары дејилик, лакин Аллаһдан ҝөндәрилән вә Мәсиһә аид олан адамлар олараг, Аллаһын һүзурунда сәмими гәлбдән вәз едирик» (2 Кор. 2:17; 4:2).

Ола биләр, һәрдән һансыса принсипи вурғуламаг үчүн ајә охујаг. Мүгәддәс Китабда мүхтәлиф вәзијјәтләрдә неҹә давранмаға даир дүзҝүн рәһбәрлик тәгдим едән чохлу принсипләр вар (2 Тим. 3:16, 17). Анҹаг әмин олмаг лазымдыр ки, ајә дүзҝүн тәтбиг едилиб. Әкс тәгдирдә, әслиндә белә олмадығы һалда, елә ҝөрүнә биләр ки, ајә сәнин дедикләрини тәсдиг едир (Мәз. 91:11, 12; Мат. 4:5, 6). Ајәни Јеһованын нијјәтинә, еләҹә дә бүтүн Мүгәддәс Китаба ујғун шәкилдә тәтбиг етмәк лазымдыр.

‘Һәгигәт сөзүнү доғрулугла өјрәтмәк’ Мүгәддәс Китабда дејиләнләрин руһуну анламағы да өзүнә дахил едир. Мүгәддәс Китаб инсанлара һәдә-горху ҝәлмәк үчүн олан «дәјәнәк» дејил. Иса Мәсиһә гаршы чыхан дин рәһбәрләри Мүгәддәс Јазылардан тез-тез ситатлар ҝәтирирдиләр, анҹаг онлар Аллаһын тәләб етдији даһа ҹидди мәсәләләрә — әдаләт, мәрһәмәт вә сәдагәтә бармагарасы бахырдылар (Мат. 22:23, 24; 23:23, 24). Аллаһын Кәламыны өјрәдәркән Иса Атасынын хүсусијјәтләрини әкс етдирирди. Иса һәгигәтә гаршы шөвг дујмагла јанашы, өјрәтдији инсанлары да дәрин мәһәббәтлә севирди. Биз дә онун нүмунәсини изләмәјә чалышмалыјыг (Мат. 11:28).

Ајәләри дүзҝүн изаһ етдијимизә неҹә әмин ола биләрик? Мүгәддәс Китабы мүнтәзәм охумағын бөјүк көмәји дәјәҹәк. Һәмчинин Јеһованын руһла мәсһ олунмуш мәсиһчиләрдән ибарәт «садиг вә ағыллы гул» синфини гијмәтләндирмәлијик, белә ки, Јеһова онларын васитәсилә хидмәтчиләринә руһани гида верир (Мат. 24:45). Шәхси өјрәнмә, еләҹә дә мүнтәзәм олараг јығынҹаг ҝөрүшләринә ҝетмәк вә орада иштирак етмәк, садиг вә ағыллы гул синфи васитәсилә верилән тәлимдән фајдаланмаға көмәк едәҹәк.

Әҝәр билдијин дилдә «Мүгәддәс Јазыларын әсасында мүлаһизә» китабы варса вә ондан јахшы истифадә етмәји өјрәнирсәнсә, хидмәтдә тез-тез истифадә етдијимиз јүзләрлә ајәнин дүзҝүн изаһыны орадан асанлыгла тапа биләрсән. Таныш олмајан ајәдән истифадә етмәји планлашдырырсанса, јахшы оларды ки, тәвазөкарлыг ҝөстәрәрәк арашдырма апарасан. Белә етсән, һәгигәт сөзүнү доғрулугла өјрәдә биләҹәксән (Сүл. мәс. 11:2).

Ајәнин неҹә тәтбиг олундуғуну ајдын ҝөстәр. Башгаларыны өјрәдәркән әмин ол ки, онлар мүзакирә етдијин мөвзу илә ајә арасындакы әлагәни ајдын баша дүшүрләр. Ајәни охумаздан әввәл суал версән, динләјиҹиләр онун суала неҹә ҹаваб вердијини ҝөрәҹәкләр. Әҝәр һансыса фикри тәсдиг етмәк үчүн ајә охујурсанса, өјрәнән адам ајәнин һәмин фикри неҹә сүбут етдијини ајдын ҝөрмәлидир.

Ајәни һәтта ифадәли олса белә, садәҹә охумаг чох вахт кифајәт етмир. Јадда сахла ки, тәблиғдә раст ҝәлдијимиз инсанларын чоху Мүгәддәс Китабла таныш дејил вә чох еһтимал ки, ајәни јалныз охумагла нә демәк истәдијини баша дүшмәјәҹәкләр. Диггәти ајәнин бирбаша мүзакирә етдијин мөвзуја аид олан һиссәсинә јөнәлт.

Бунун үчүн адәтән әсас сөзләри, јәни мүзакирә олунан фикрә билаваситә аид олан сөзләри хүсуси гејд етмәк лазымдыр. Ән асан үсул һәмин сөзләри тәкрар етмәкдир. Әҝәр бир нәфәрлә сөһбәт едирсәнсә, она һәмин сөзләри мүәјјән етмәјә көмәк едәҹәк суал вермәк олар. Аудиторија гаршысында чыхыш едәркән бәзи натигләр бу мәгсәдә чатмаг үчүн синоним сөзләрдән истифадә едир, јахуд фикри бир дә тәкрар едирләр. Анҹаг сән дә белә етмәк гәрарына ҝәлсән, диггәт јетир ки, динләјиҹиләр ајәнин сөзләри илә мүзакирә олунан фикир арасындакы әлагәни нәзәрдән гачырмасынлар.

Әсас сөзләри хүсуси нәзәрә чарпдырдыгда сән артыг јахшы тәмәл гојмуш олурсан. Анҹаг бунунла кифајәтләнмә. Ајәни охумаздан әввәл ону ҝәтирмәјинин сәбәбини ајдын ҝөстәрмисәнми? Әҝәр беләдирсә, онда динләјиҹиләринә ешитмәләри үчүн һазырладығын фикирләрлә вурғуладығын сөзләр арасындакы әлагәни ҝөстәр. Һәмин әлагәнин нәдән ибәрәт олдуғуну ајдын шәкилдә билдир. Әҝәр ајәни охумаздан әввәл буну етмәмисәнсә, сонра мүтләг етмәк лазымдыр.

Фәрисејләр Исаја онларын зәннинҹә чәтин олан бир суал вердиләр: «Һәр сәбәбә ҝөрәми гадыны бошамаг ҹаиздир?» Иса ҹавабыны Јарадылыш 2:24 ајәсинә әсасландырды. Фикир вер ки, Иса диггәти ајәнин јалныз бир һиссәсинә јөнәлтди вә сонра ону изаһ етди. Киши илә гадынын «бир бәдән» олдуғуну вурғуладыгдан сонра Иса сөзләринә белә јекун вурду: «Беләликлә, Аллаһын бирләшдирдијини инсан ајырмамалыдыр» (Мат. 19:3-6).

Ајәнин неҹә тәтбиг олундуғунун ајдын баша дүшүлмәси үчүн нә гәдәр изаһат вермәк лазымдыр? Бу, аудиторијаны тәшкил едән адамлардан вә мүзакирә едилән фикрин ваҹиблијиндән асылыдыр. Садә вә конкрет олмағы гаршына мәгсәд гој.

Мүгәддәс Јазылар әсасында мүлаһизә јүрүт. Һәвари Павелин Салоникдәки хидмәти илә бағлы Һәвариләрин ишләри 17:2, 3 ајәләриндә дејилир ки, о, ‘Мүгәддәс Јазылара әсасланараг сөһбәт апарырды’ (ЈД), башга сөзлә десәк, мүлаһизә јүрүдүрдү. Јеһованын һәр бир хидмәтчиси бу баҹарыға јијәләнмәјә ҹан атмалыдыр. Мәсәлән, Павел Исанын һәјаты вә хидмәти илә бағлы фактлар ҝәтирдикдән сонра бунларын Ибрани Мүгәддәс Јазыларында габагҹадан дејилдијини ҝөстәрмиш, сонра исә «Сизә тәблиғ етдијим бу Иса, Мәсиһдир» дејәрәк сөзләринә тәсирли јекун вурмушду.

Ибраниләрә јаздығы мәктубунда Павел дәфәләрлә Ибрани Мүгәддәс Јазыларындан ситат ҝәтирмишди. Һансыса мәгамы вурғуламаг, јахуд ајдынлашдырмаг үчүн о, бир сөзү вә ја кичик ифадәни ајырыб, сонра онун мәнасыны ачыглајырды (Ибр. 12:26, 27). «Ибраниләрә» китабынын 3-ҹү фәслиндән олан парчада Павел Мәзмур 95:7-11 ајәләрини ситат ҝәтирмишди. Диггәт јетир ки, о, үч мәгамы әтрафлы тәһлил етмишди: 1) үрәк мөвзусуну (Ибр. 3:8-12), 2) «Бу ҝүн» сөзүнүн ваҹиблијини (Ибр. 3:7, 13-15; 4:6-11), 3) «Онлар верәҹәјим истираһәтә наил олмајаҹаглар» сөзләринин мәнасыны (Ибр. 3:11, 18, 19; 4:1-11). Һәр дәфә ајәнин неҹә тәтбиг едилдијини изаһ едәндә Павелин нүмунәсини изләмәјә чалыш.

Лука 10:25-37 ајәләриндә јазылдығы кими, Исанын Мүгәддәс Јазылар әсасында мүкәммәл сурәтдә неҹә мүлаһизә јүрүтдүјүнә диггәт јетир. Бир дәфә, Гануну јахшы билән бир нәфәр ондан сорушду: «Мүәллим! Әбәди һәјаты мирас алмаг үчүн мән нә етмәлијәм?» Әввәлҹә Иса ҹаваб олараг ону өз фикрини ифадә етмәјә тәшвиг едән бир суал верди вә сонра Аллаһын Кәламында дејиләнләри јеринә јетирмәјин ваҹиблијини вурғулады. Ајдын оланда ки, һәмин адам мәсәләнин мәғзини баша дүшмүр, Иса ајәдән тәкҹә бир сөзү, «гоншу» сөзүнү тәһлил етди. О, бунун нә демәк олдуғуну ачыгламады, әвәзиндә һәмин адамын өзүнүн дүзҝүн нәтиҹәјә ҝәлмәси үчүн мәсәл чәкди.

Ҝөрдүјүмүз кими, суаллара ҹаваб верәркән Иса конкрет, ајдын ҹаваб тәгдим едән ајәләри садәҹә ситат ҝәтирмәклә кифајәтләнмирди. О, ајәләрдә дејиләнләри тәһлил едир, сонра онлары верилән суала әсасән изаһ едирди.

Садукејләр дирилмә үмидини шүбһә алтына аланда Иса диггәти Чыхыш 3:6 ајәсинин конкрет бир һиссәсинә јөнәлтди. Анҹаг о, ајәни тәкҹә ситат ҝәтириб сөзүнү битирмәди. Дирилмәнин Аллаһын нијјәтинин бир һиссәси олдуғуну ајдын ҝөстәрмәк үчүн онун үзәриндә мүлаһизә јүрүтдү (Марк 12:24-27).

Мүгәддәс Јазылар әсасында дүзҝүн вә ефектив сүрәтдә мүлаһизә јүрүтмәк баҹарығына јијәләнмәк мәһарәтли мүәллим олмаг үчүн ваҹиб амилдир.

БИР инсана вә ја бөјүк аудиторијаја мүраҹиәт етмәјиндән асылы олмајараг, дүшүнмә ки, мүзакирә етдијин мөвзу сәнин үчүн мараглыдырса, онлара да мараглы олаҹаг. Дүздүр, чатдырмаг истәдијин мәлумат ваҹибдир, анҹаг онун практики фајдасыны ајдын ҝөстәрмәсән, чәтин ки, сәнә узун мүддәт марагла гулаг ассынлар.

Бу, Падшаһлыг Залындакы аудиторијаја да аиддир. Әҝәр ҝәтирдијин нүмунәни вә ја данышдығын һадисәни биринҹи дәфә ешидирләрсә, онда диггәтлә гулаг асаҹаглар. Анҹаг артыг билдикләри шеји данышырсанса, хүсусән дә, әҝәр мөвзуну ҝениш ачыгламырсанса, онларын фикри јајынаҹаг. Дедикләринин онлар үчүн нәјә ҝөрә вә неҹә фајдалы олдуғуну ҝөрмәләринә көмәк етмәк лазымдыр.

Мүгәддәс Китаб бизи һәр шејә сағлам шүурла, башга сөзлә, практики мүдрикликлә бахмаға чағырыр (Сүл. мәс. 3:21). Јеһова Вәфтизчи Јәһјанын васитәсилә инсанлары «салеһләрин һикмәтинә», јәни практики мүдриклијинә јөнәлтмишди (Лука 1:17). Бу, Јеһова гаршысында сағлам горхуја әсасланан мүдрикликдир (Мәз. 111:10). Бу һикмәт онун дәјәрини анлајанлара һәм бу һәјатын чәтинликләринин өһдәсиндән ҝәлмәјә, һәм дә һәгиги, јәни ҝәләҹәк әбәди һәјата наил олмаға көмәк едир (1 Тим. 4:8; 6:19).

Нитгин практики олсун. Нитгин практики олмасы үчүн тәкҹә материалы диггәтлә сечмәк јох, һәм дә аудиторијаны нәзәрә алмаг лазымдыр. Онлара садәҹә бир груп кими бахма. Һәмин груп ајры-ајры инсанлардан вә аиләләрдән ибарәтдир. Онларын ичиндә ушаглар, јенијетмәләр, јеткин инсанлар вә јашлылар ола биләр. Бәлкә дә араларында һәгигәтә јени ҝәләнләр, еләҹә дә сән дүнјаја ҝәлмәздән әввәл Јеһоваја хидмәт етмәјә башлајан инсанлар вар. Ола биләр, бәзиләри руһани ҹәһәтдән јеткиндир, башгалары исә һәлә дә дүнјадакы бахышларын вә нормаларын ҝүҹлү тәсири алтындадыр. Өзүнә нөвбәти суаллары вер: «Мүзакирә едәҹәјим материал динләјиҹиләримә һансы фајданы ҝәтирә биләр? Онлара фајданын нәдән ибарәт олдуғуну ҝөрмәјә неҹә көмәк едә биләрәм?» Ола билсин, әсас диггәти јухарыда хатырланан бир вә ја ики груп инсана јөнәлтмәји лазым биләҹәксән. Анҹаг диҝәрләрини дә тамамилә јаддан чыхарма.

Әҝәр Мүгәддәс Китабын әсас тәлимләриндән биринә ајдынлыг ҝәтирмәлисәнсә, онда неҹә? Нә едә биләрсән ки, нитгин артыг бу тәлимлә разы оланлар үчүн дә мараглы олсун? Онларын буна инамыны мөһкәмләндирмәјә чалыш. Неҹә? Мүгәддәс Јазылардан бу тәлими тәсдиг едән сүбутлары әтрафлы тәһлил ет. Бундан әлавә, динләјиҹиләрин һәмин тәлимин дәјәрини даһа дәриндән баша дүшмәләринә көмәк едә биләрсән. Бунун үчүн онун Мүгәддәс Китабын башга һәгигәтләри вә Јеһованын хүсусијјәтләри илә неҹә узлашдығыны ҝөстәрмәк олар. Бу тәлимин дүзҝүн баша дүшүлмәсинин инсанлара неҹә фајда ҝәтирдијини вә ҝәләҹәјә олан бахышларына неҹә тәсир етдијини ҝөстәрән нүмунәләр ҝәтир. Әҝәр мүмкүндүрсә, һәјатдан ҝөтүрүлмүш нүмунәләр чәк.

Елә фикирләшмә ки, практики фајданы нитгин сонунда бир нечә сөзлә ҝөстәрмәк кифајәт едәр. Нитгин лап әввәлиндән динләјиҹиләрин һәр бири мүзакирә олунан мөвзунун шәхсән она аид олдуғуну һисс етмәлидир. Белә тәмәл гојдугдан сонра, јекун да дахил олмагла, нитгин һәр әсас бәндини ачыгладыгҹа, мүзакирә олунан фикирләри неҹә тәтбиг етмәји ҝөстәр.

Мүзакирә олунан фикирләри һәјатда неҹә тәтбиг етмәји ҝөстәрәркән Мүгәддәс Китаб принсипләрини унутма. Јәни буну мәһәббәтлә вә шәфгәтлә ет (1 Пет. 3:8; 1 Јәһ. 4:8). Салоник шәһәриндә јаранмыш ҹидди проблеми һәлл едәркән белә, һәвари Павел орадакы баҹы-гардашларын һансы саһәләрдә руһани наилијјәт әлдә етдикләрини гејд етмәји унутмамышды. О һәмчинин мүзакирә етдији суалла бағлы онларын дүзҝүн давранмаг истәдикләринә әмин олдуғуну да билдирмишди (1 Салон. 4:1-12). Бизим үчүн неҹә дә ҝөзәл нүмунәдир!

Ола билсин, нитгинин мәгсәди тәблиғ вә тәлим ишиндә фәал иштирак етмәјә тәшвиг етмәкдир. О заман чалыш ки, онларын үрәјиндә хидмәтә һәвәс вә миннәтдарлыг ојадасан. Анҹаг белә едәркән, јадда сахла ки, һамынын имканы бу ишдә ејни ҹүр иштирак етмәјә јол вермир вә бу, Мүгәддәс Китабда да нәзәрә алыныр (Мат. 13:23). Елә данышма ки, һәмиманлыларын өзләрини ҝүнаһкар һисс етсинләр. Ибраниләрә 10:24 ајәси бизи ‘бир-биримизи мәһәббәтә вә хејирли ишләрә тәшвиг етмәјә’ сәсләјир. Әҝәр биз башгаларыны мәһәббәтә тәшвиг етсәк, бу, дүзҝүн нијјәтдән ирәли ҝәлән хејирхаһ әмәлләр доғураҹаг. Онларын итаәткарлыг ҝөстәрмәсини тәләб етмә, унутма ки, Јеһова инсанлары ‘иман ҝәтириб итаәт етмәјә’ тәшвиг етмәјимизи истәјир (Ром. 16:26). Буну јадда сахлајараг, биз һәм өзүмүзүн, һәм дә башгаларынын иманыны мөһкәмләндирмәјә чалышырыг.

Инсанлара практики фајданы ҝөрмәјә көмәк ет. Инсанлара шаһидлик едәркән хош хәбәрин практики фајдасыны вурғула. Бунун үчүн әразиниздәки инсанлары нәјин нараһат етдијини билмәк лазымдыр. Буну неҹә өјрәнмәк олар? Телевизорда вә ја радиода верилән хәбәрләрә гулаг ас. Гәзетләрин өн сәһифәләринә бах. Һәмчинин инсанлары сөһбәтә ҹәлб етмәјә чалыш вә онлар данышанда гулаг ас. Ола билсин, онлары һәмин анда һансы проблемләрин нараһат етдијини анлајаҹагсан. Бу, ишсизлик, кирајә һаггынын јүксәк олмасы, хәстәлик, јахын адамын өлүмү, ҹинајәткарлыг горхусу, сәлаһијјәтли шәхсләр тәрәфиндән һагсызлыг, аиләнин дағылмасы, ушагларын сөзә бахмамасы вә саирә ола биләр. Мүгәддәс Китабын бу кими проблемләри оланлара көмәји дәјә биләрми? Сөзсүз.

Чох еһтимал ки, фикриндә һансыса конкрет мөвзуну тутуб сөһбәтә башлајаҹагсан. Анҹаг һал-һазырда инсаны башга шејин нараһат етдијини ҝөрүрсәнсә вә әҝәр ачыглаја биләҹәксәнсә, дәрһал ону марагландыран мөвзуну мүзакирә ет, јахуд лазыми мәлуматы ахтарыб јенидән ҝәлмәји тәклиф ет. Сөзсүз ки, биз ‘башгаларынын ишинә бурнумузу сохмур’, садәҹә бөјүк мәмнунијјәтлә Мүгәддәс Китабдан практики мәсләһәтләри инсанларла бөлүшүрүк (2 Салон. 3:11). Ајдындыр ки, Мүгәддәс Китабын билаваситә һәјатларына аидијјәти олан мәсләһәтләри инсанлара тәсир едәҹәк.

Инсан сөзләримиздә она аидијјәти олан һеч бир шеј ҝөрмәсә, сөһбәти дәрһал дајандырар. Һәтта сөһбәти кәсмәсә белә, мөвзунун практики фајдасыны ачыгламасаг, дедијимиз сөзләрин, чох еһтимал ки, онун һәјатына һеч бир тәсири олмајаҹаг. Анҹаг чатдырдығымыз билијин ҝәтирдији фајданы ҝөстәрсәк, бу сөһбәт инсанын һәјатында дөнүш нөгтәси ола биләр.

Һәмчинин Мүгәддәс Китаб өјрәнмәси кечирәркән алынан билијин неҹә тәтбиг едилмәсини изаһ етмәк лазымдыр (Сүл. мәс. 4:7). Өјрәнәнә Јеһованын јоллары илә јеримәјә көмәк едән Мүгәддәс Китабдакы мәсләһәтләри, принсипләри вә нүмунәләри баша дүшмәјә көмәк ет. Әсас диггәти бундан әлдә олунан фајдаја јөнәлт (Јешаја 48:17, 18). Бу, өјрәнәни һәјатыны дәјишмәјә тәшвиг едәҹәк. Инсанларын үрәјиндә Јеһоваја мәһәббәт вә Ону разы салмаг арзусу ојандыр вә гој Аллаһын Кәламындакы мәсләһәтләри тәтбиг етмәк онларын үрәјиндән ҝәлсин.