«Узун сүрән хәстәлик 39 иллик һәјат јолдашым Софијаныa әлимдән алды. Һәмин вахтлар достларымын мәнә бөјүк дәстәји олду, өзүм дә чалышырдым башымы нә иләсә гатым. Бунунла белә, дүз бир ил өзүмә ҝәлә билмәдим. Әһвалым тез-тез дәјиширди, ҝаһ өзүмү јахшы һисс едирдим, ҝаһ пис. Онун өлүмүндән үч ил кечсә дә, вахташыры гәм-кәдәр һисси мәни чулғајыр вә бу һиссләр, адәтән, гәфил мәни јахалајыр» (Костас).

Әҝәр сиз дә әзиз адамынызы итирмисинизсә, онда Костасын һиссләри сизә танышдыр. Бәлкә дә инсана һәјат јолдашынын, гоһумунун, јахуд әзиз достунун өлүмү гәдәр ағры ҝәтирән икинҹи бир шеј јохдур. Кәдәрин ҝәтирдији ағры-аҹыны тәдгиг едән мүтәхәссисләр бу фикри тәсдигләјир. Бир журналда дәрҹ едилән мәгаләјә әсасән, «шүбһәсиз, өлүм иткинин ән узун сүрән вә ән ағыр формасыдыр» («The American Journal of Psychiatry»). Бу ҹүр дөзүлмәз ағры илә үз-үзә дуран инсаны нөвбәти суаллар нараһат едә биләр: «Бу һиссләр нә вахта кими давам едәҹәк? Бир дә үзүм ҝүләҹәк? Һарадан тәсәлли тапа биләрәм?»

«Ојанын!» журналынын бу сајында јухарыдакы суаллар ҹавабландырылаҹаг. Нөвбәти мәгаләдә әзизини јениҹә итирмиш инсанын үзләшә биләҹәји һаллардан данышылаҹаг. Сонракы мәгаләләрдә исә кәдәри јүнҝүлләшдирмәјә көмәк едән үсуллар ҝөстәриләҹәк.

Үмидварыг ки, нөвбәти мәгаләләр кәдәрли инсанлара тәсәлли верәҹәк вә онлара кәдәрдән гуртулмаға көмәк едәҹәк.

Бәзи мүтәхәссисләр кәдәрин мүәјјән мәрһәләләрдән ибарәт олдуғуну гејд едир. Бунунла белә, һәр кәс кәдәри бир ҹүр јашајыр. Бәс инсанларын һиссләрини мүхтәлиф ҹүр ифадә етмәси о демәкдирми ки, бәзи инсанлар әзизләринин өлүмүнә ҝөрә аз кәдәрләнир, ја да һиссләрини боғур? Әсла белә дејил! Бәли, инсанын итки илә барышмасы вә кәдәрини ифадә етмәси вәзијјәтини јүнҝүлләшдирә биләр. Амма кәдәри ифадә етмәјин бир јох, бир нечә доғру јолу вар. Бу мәсәләдә инсанын мәдәнијјәти, хасијјәти, һәјат тәҹрүбәси, еләҹә дә әзиз адамынын неҹә өлдүјү бөјүк рол ојнајыр.

КӘДӘРИН НӘТИҸӘЛӘРИ

Ола билсин, әзизини јениҹә итирмиш инсан гаршыда ону нәләр ҝөзләдијини билмир. Бунунла белә, чохларынын јашадығы һиссләр вә чәтинликләр охшардыр вә онлары габагҹадан сезмәк мүмкүндүр. Ҝәлин ашағыдакы һаллара нәзәр салаг:

Емосионал сарсынты. Ағламаг, өлән инсанын һәсрәтини чәкмәк, ани әһвал дәјишиклији кими һаллар ҝөзләниләндир. Өлән инсанла бағлы хатирәләр вә јухулар инсанын дәрдини тәзәләјир. Тәзә-тәзә инсан шокда ола, баш верәнләрә инанмаја биләр. Һәјат јолдашы Тимону гәфил итирән Тина адлы бир гадын дејир: «Әввәл-әввәл кеј кими идим. Һеч ағлаја да билмирдим. Һәрдән елә пис олурдум ки, аз гала нәфәсим кәсилирди. Башыма ҝәләнләрә инана билмирдим».

Нараһатчылыг, гәзәб вә ҝүнаһкарлыг һисси. Иван адлы бир нәфәр дејир: «24 јашлы оғлумуз Ерикин өлүмүндән сонра јолдашым Јоланда илә мән бир мүддәт јаман әсәби идик. Бу вәзијјәт бизә гәрибә ҝәлирди. Чүнки һеч вахт әсәби инсан олдуғумузу дүшүнмәмишдик. Һәм дә өзүмүзү ҝүнаһкар һисс едирдик. Фикирләширдик ки, ҝөрәсән, оғлумузун дәрдинә чарә тапмаг үчүн даһа нәсә едә биләрдик?» Узун сүрән хәстәлик уҹбатындан һәјат јолдашыны итирән Алехандро да өзүнү гынајыр: «Әввәлҹә елә дүшүнүрдүм ки, пис инсан олдуғум үчүн Аллаһ башыма бу гәдәр бәла ҝәтирир. Сонра да өзүмү гынамаға башладым, мәнә елә ҝәлирди ки, бу ҹүр фикирләшмәклә Аллаһы ҝүнаһландырырам». Әввәлки мәгаләдә ады чәкилән Костас дејир: «Бәзән Софијаја да гәзәбләнирдим ки, нијә өлүб?! Сонра буна ҝөрә өзүмү гынајырдым. Ахы бу онун ҝүнаһы дејилди!»

Нараһат дүшүнҹәләр. Бәзи мәгамларда инсанын фикирләри дәјишкән, јахуд јанлыш ола биләр. Мәсәлән, доғмасыны тәзәҹә итирән инсана елә ҝәлә биләр ки, мәрһумун сәсини ешитмәк, ону ҝөрмәк вә ја варлығыны һисс етмәк мүмкүндүр. Јахуд да она диггәтини бир шејә ҹәмләмәк, нәјисә јадына салмаг чәтин ола биләр. Тина дејир: «Бәзән киминләсә сөһбәт едәндә фикрим башга јердә олурду. Бејнимдә анҹаг Тимонун өлүмү илә бағлы һадисәләр долашырды. Диггәтими ҹәмләјә билмәмәјим мәни јорурду».

Тәклијә чәкилмәк истәји. Гәмли инсан башгаларынын јанында сыхыла, өзүнү нараһат һисс едә биләр. Костас дејир: «Евли инсанларын арасында өзүмү “бешинҹи тәкәр” кими һисс едирдим. Субајларын арасында да өзүмү артыг ҝөрүрдүм». Иванын һәјат јолдашы Јоланда хатырлајыр: «Ади проблемләрә ҝөрә шикајәтләнән инсанларын арасында олмаг чох чәтин иди. Һалбуки онларын проблеми бизимки илә мүгајисәјә белә ҝәлмәз. Ушагларынын наилијјәтләри һагда данышан инсанларын да арасында олмаг чох чәтин иди. Онлара ҝөрә севинирдим, амма ди ҝәл ки, бу сөһбәтләри ешитмәк олдугҹа ағыр иди. Әримлә икимиз дә баша дүшүрдүк ки, һәјат давам едир. Бунунла белә, һәјатла мүбаризә апармаға нә истәјимиз, нә дә сәбримиз вар иди».

Сәһһәтлә бағлы проблемләр. Иштаһадан кәсилмәк, чәки итирмәк вә јухусузлуг кәдәрли инсанларын әксәријјәтиндә раст ҝәлинән һаллардыр. Арон адлы бир нәфәр атасынын өлүмүндән сонракы бир ил һагда белә сөзләр дејир: «Јухум тамамилә әршә чәкилмишди. Һәр ҝеҹә ејни вахтда ајылыб атамын өлүмү һагда дүшүнүрдүм».

Алехандро сағламлығында мүәммалы проблемләр олдуғуну хатырлајараг дејир: «Дәфәләрлә һәким мүајинәсиндән кечсәм дә, сағлам олдуғуму дејирдиләр. Шүбһәләнирдим ки, мәндәки физики симптомлар гәм-гүссә уҹбатындандыр». Нәһајәтдә бу симптомлар кечиб ҝетди. Истәнилән һалда, Алехандронун һәким мүајинәсиндән кечмәси ағыллы һәрәкәт иди. Чүнки кәдәр һисси иммун системини зәифләдә, сәһһәтдәки проблемләри ағырлашдыра, һәтта јени хәстәликләрә јол ача биләр.

Ваҹиб ишләрин өһдәсиндән ҝәлә билмәмәк. Иван дејир: «Ерикин өлүм хәбәрини тәкҹә гоһумлара вә достлара јох, һәмчинин башгаларына, онун мүдиринә вә ев саһибинә дә билдирмәли идик. Үстәлик, чохлу һүгуги сәнәдләри долдурмаг, бир јандан да Ерикин шәхси әшјаларыны саф-чүрүк етмәк лазым иди. Әгли, физики вә емосионал ҹәһәтдән јорғун олдуғумуз вахтда бүтүн бунлары һәлл етмәли идик».

Бәзиләри үчүн әсл проблем сонрадан башлајыр. Чүнки вахты илә өлән әзизләринин өһдәсинә дүшән ишләр артыг онларын өһдәсинә дүшүр. Буну Тинанын һадисәсиндән ҝөрмәк олар. О бөлүшүр: «Банк вә диҝәр ишләрлә бағлы мәсәләләри һәмишә Тимо һәлл едирди. Инди исә бунлары мән етмәлијдим. Кечирдијим стресс азмыш кими, бу мәсулијјәтләр дә бир тәрәфдән мәни стрессә салырды. Дүшүнүрдүм ки, ҝөрәсән, бу ишләрин өһдәсиндән дүз-әмәлли ҝәлә биләҹәјәм?»

Јухарыда садаланан емосионал, әгли вә физики проблемләр кәдәр јүкүнүн нә гәдәр ағыр олдуғуну ҝөстәрир. Бәли, доғмасыны итирмәк инсана дәрин јара вурур. Амма габагҹадан өзүнү буна һазырламаг әзизини јениҹә итирмиш инсана кәдәр јүкүндән азад олмаға көмәк едә биләр. Бир шеји дә унутмајын ки, кәдәрин бүтүн нәтиҹәләрини һеч дә һәр кәс дадмыр. Әзизини итирмиш инсана кечирдији кәдәр һиссинин нормал олдуғуну билмәк дә тәсәлли верә биләр.

БИР ДӘ ҮЗҮМ ҜҮЛӘҸӘК?

Чәтин дөнәм. Ҝүҹлү кәдәр һисси даими дејил, вахт ҝәләҹәк бу ағры сәнҝијәҹәк. Амма бу о демәк дејил ки, инсан доғмасыны тамамилә унудаҹаг. Садәҹә ҝүҹлү кәдәр ағрысы тәдриҹән азалаҹаг. Бәзән өлән инсанла бағлы хатирәләр гәфилдән јада дүшәндә, јахуд мүәјјән вахтларда, мәсәлән, евлилик вә өлүм илдөнүмләриндә ҝүҹлү кәдәр һисси јенидән баш галдыра биләр. Бунунла белә, әксәр инсанлар өзләрини топарлајыб ишләринә, ҝүндәлик һәјатларына давам едирләр. Инсан буна, адәтән, аилә үзвләринин, достларынын көмәји сајәсиндә вә кәдәр һиссиндән гуртулмаг үчүн лазыми аддымлар атанда мүвәффәг олур.

Бу һиссләр нә вахта кими давам едәҹәк? Бәзиләриндә кәдәр һисси ајларла давам едә биләр. Әксәр инсанлара исә өзләринә ҝәлмәк үчүн бир-ики ил вахт лазым ҝәлир. Еләләри дә вар ки, онлара даһа чох вахтa лазымдыр. Алехандро дејир: «Дәрин кәдәр һисси мәни дүз үч ил раһат бурахмады».

Тәмкинли олун. Диггәти сабаһкы јох, буҝүнкү проблемләрин һәллинә ҹәмләјин, өз һәјат темпинизлә јашајын вә унутмајын ки, кәдәр ағрысы әбәди дејил. Фикирләшин, кәдәринизи јүнҝүлләшдирмәк вә онун мәнасыз јерә узанмасынын гаршысыны алмаг үчүн бу ҝүн нә едә биләрсиниз?

Кәдәрлә мүбаризә апармаг үчүн мәсләһәт ахтарсаныз, еһтимал ки, сајсыз-һесабсыз фикирләр тапаҹагсыныз. Онлардан бәзиләри диҝәрләринә нисбәтән даһа фајдалы ола биләр. Јәгин бунун сәбәби, әввәлки мәгаләдә дә вурғуландығы кими, һәр кәсин кәдәри мүхтәлиф ҹүр јашамасыдыр. Бир инсан үчүн ишә јарајан мәсләһәт диҝәри үчүн ишә јарамаја биләр.

Буна рәғмән, бир чохларына хејри дәјән бәзи әсас төвсијәләр мөвҹуддур. Бу төвсијәләр мәсләһәтчиләр тәрәфиндән тез-тез вурғуланыр вә онлар һикмәтлә зәнҝин олан гәдими китабдакы, Мүгәддәс Китабдакы заман танымајан принсипләрлә үст-үстә дүшүр.

1. АИЛӘНИЗИН ВӘ ДОСТЛАРЫНЫЗЫН КӨМӘЈИНИ ГӘБУЛ ЕДИН

• 

  Бәзи мүтәхәссисләр бунун кәдәрлә мүбаризәдә ән ваҹиб үсул олдуғуну дүшүнүрләр. Буна бахмајараг, һәрдән тәк галмаг истәјә биләрсиниз. Һәтта ола билсин, сизә көмәк етмәјә чалышан инсанлара әсәбиләшәсиниз. Бу нормалдыр.

• Елә дүшүнмәјин ки, һәмишә инсанларын арасында олмалысыныз, ејни заманда да онлары өзүнүздән тамамилә узаглашдырмајын. Ахы ҝәләҹәкдә онларын дәстәјинә еһтијаҹ дуја биләрсиниз. Гојун башгалары сизин һал-һазырда нәјә еһтијаҹыныз олуб-олмадығыны өјрәнсин.

• Еһтијаҹыныза ујғун олараг башгалары илә кечирдијиниз вахтла тәк олдуғунуз вахт арасында таразлыг јарадын.

ПРИНСИП: «Ики нәфәр бир нәфәрдән јахшыдыр... Әҝәр бири јыхылса, диҝәри јолдашыны галдыраҹаг» (Ваиз 4:9, 10).

2. ГИДАЛАНМАҒЫНЫЗА ДИГГӘТ ЈЕТИРИН ВӘ ИДМАНА ВАХТ АЈЫРЫН

• Дүзҝүн гидаланмаг кәдәрлә мүбаризәдән јаранан стрессин өһдәсиндән ҝәлмәјә көмәк едәҹәк. Мүхтәлиф нөв мејвә-тәрәвәз јејин вә јағсыз зүлал тәркибли гидалар гәбул един.

• Боллуҹа су вә башга сағлам ичкиләр ичин.

• Әҝәр иштаһадан кәсилмисинизсә, онда ҝүн әрзиндә аз мигдарда олмагла тез-тез јемәк јејин. Сиз һәкиминиздән гида әлавәләри һагда да мәсләһәт ала биләрсинизa.

• Сүрәтли јериш вә диҝәр идман һәрәкәтләри мәнфи емосијалары азалда биләр. Бу һәрәкәтләр әзизини итирмиш бәзи инсанлара һазыркы вәзијјәти һагда дүшүнмәјә, бәзиләринә исә бир мүддәт әзизинин өлүмү илә бағлы фикирләрдән узаг олмаға көмәк едә биләр.

ПРИНСИП: «Елә бир адам јохдур ки, өз бәдәнинә нифрәт етсин, әксинә, инсан өз бәдәнинин гејдинә галыр» (Ефеслиләрә 5:29).

3. ДОЈУНҸА ЈАТЫН

• 

  Јатмаг һәр заман ваҹибдир, хүсусилә дә кәдәрли инсанлар үчүн, чүнки кәдәр инсаны даһа да әлдән салыр.

• Нә гәдәр кофеин вә спиртли ички гәбул етдијинизә диггәт јетирин. Чүнки бунлар јухуну гачырыр.

ПРИНСИП: «Бир овуҹ истираһәт ики овуҹ зәһмәтдән вә күләк далынҹа гачмагдан јахшыдыр» (Ваиз 4:6).

4. ВӘЗИЈЈӘТӘ ТЕЗ УЈҒУНЛАШЫН

• 

  Һәр кәсин кәдәри мүхтәлиф ҹүр јашадығыны гәбул един. Өзүнүз үчүн вәзијјәтинизи нәјин јүнҝүлләшдирдијини мүәјјән един.

• Чохлары кәдәри башгалары илә бөлүшмәјин фајдалы олдуғуну дүшүнүр, бәзиләри исә кәдәри бөлүшмәмәјә үстүнлүк верир. Кәдәрлә мүбаризәдә һиссләри ифадә етмәјин фајдалы олуб-олмадығына даир мүтәхәссисләрин фикирләри фәрглидир. Әҝәр кимәсә үрәјинизи бошалтмаг истәјир, амма чәкинирсинизсә, онда јахын достунузла үрәјиниздәкиләри бөлүшмәјин сајәсиндә буну етмәк сизә ҝет-ҝедә асан ҝәлә биләр.

• Бәзи инсанлар кәдәрдән гуртулмағын чарәсини ағламагда ҝөрүр. Диҝәрләри исә дүшүнүр ки, нә гәдәр аз ағласа, кәдәрдән бир о гәдәр тез гуртулаҹаг.

ПРИНСИП: «Үрәк өз дәрдини билир» (Мәсәлләр 14:10).

5. ЗӘРӘРЛИ ВӘРДИШЛӘРДӘН УЗАГ ДУРУН

• 

  Доғмасыны јениҹә итирмиш бәзи инсанлар дәрдләрини јүнҝүлләшдирмәк үчүн спиртли ичкијә вә ја наркотикә алудә олур. Бу ҹүр дырнагарасы чыхыш јолу инсана зәрәрдән башга һеч нә ҝәтирмир. Инсанын бунлардан дујаҹағы раһатлыг мүвәггәтидир вә ҹидди фәсадлара сәбәб ола биләр. Дәрдинизи јүнҝүлләшдирмәк үчүн зәрәрсиз јоллардан истифадә един.

ПРИНСИП: «Ҝәлин ҹисми вә руһу мурдарлајан һәр шејдән өзүмүзү тәмизләјәк» (2 Коринфлиләрә 7:1).

6. ВАХТ МӘСӘЛӘСИНДӘ ТАРАЗЛЫҒЫ ГОРУЈУН

• Чохлары һүзн вә кәдәр дөврүнү мүвәггәти фасиләләрлә, јәни онлары ағры-аҹыдан мүвәггәти дә олса, узаглашдыран мәшғулијјәтләрлә әвәз етмәјин фајдасыны ҝөрүрләр.

• Достлуг мүнасибәтләри гурмагла, бу мүнасибәтләри ҝүҹләндирмәклә, јени баҹарыглара јијәләнмәклә вә ја әјләнҹәјә вахт ајырмагла мүвәггәти олараг раһатлыг тапа биләрсиниз.

• Вахт кечдикҹә вәзијјәт дәјишәҹәк. Сиз ҝөрәҹәксиниз ки, јухарыда һаггында данышдығымыз фасиләләр даһа узун чәкәҹәк вә даһа тез-тез олаҹаг. Бу исә сағалма просесинин бир һиссәсидир.

ПРИНСИП: «Һәр шејин өз вахты вар... Ағламағын өз вахты, ҝүлмәјин өз вахты; фәған етмәјин өз вахты, рәгс етмәјин өз вахты» (Ваиз 3:1, 4).

7. РЕЖИМЛӘ ЈАШАЈЫН

• 

  Тез бир заманда нормал һәјат режиминә гајыдын.

• Јуху, иш вә диҝәр мәшғулијјәтләрлә бағлы режимә риајәт едәндә, еһтимал ки, әввәлки һәјат режиминә гајыдаҹагсыныз.

• Фајдалы мәшғулијјәтләр ағры-аҹынызы јүнҝүлләшдирә биләр.

ПРИНСИП: «Аллаһ онун башыны севинҹлә гарышдырдығы үчүн өмрүнүн неҹә кечдијиндән хәбәр тутмајаҹаг» (Ваиз 5:20).

8. ВАҸИБ ГӘРАРЛАР ВЕРМӘЈӘ ТӘЛӘСМӘЈИН

• Доғмасыны итирәндән гыса мүддәт сонра ваҹиб гәрарлар верән әксәр инсанлар сонрадан бу гәрарлара ҝөрә пешманчылыг чәкибләр.

• Мүмкүнсә, көчмәјә, ишинизи дәјишмәјә вә ја итирдијиниз әзизинизин шәхси әшјаларыны атмаға тәләсмәјин, ҝөзләјин кифајәт гәдәр вахт кечсин.

ПРИНСИП: «Чалышганын нијјәти уғур ҝәтирәр, тәләскән еһтијаҹа јуварланар» (Мәсәлләр 21:5).

9. ӨЛӘН ӘЗИЗИНИЗИ ХАТЫРЛАЈЫН

• 

  Јаслы инсанларын әксәријјәти өлән әзизләринин хатирәсини јашадан шејләри етмәјин фајдалы олдуғуну ҝөрүрләр.

• Өлән инсанын шәкилләрини вә ондан јадиҝар галан әшјалары топламаг, јахуд хатырламаг истәдијиниз һадисәләрин вә ја һекајәләрин ҝүндәлијини јаратмаг сизә раһатлыг ҝәтирә биләр.

• Хош хатирәләри јадыныза салан әшјалары сахлајын вә өзүнүзү мәнән һазыр һисс едәндә онлара бахын.

ПРИНСИП: «Кечмиш чағлары јада салын» (Ганунун тәкрары 32:7).

10. ИСТИРАҺӘТӘ ВАХТ АЈЫРЫН

• Тәтилә чыхмаг һагда фикирләшә биләрсиниз.

• Әҝәр узунмүддәтли тәтилә чыхмаг алынмырса, онда ән азындан, бир-ики ҝүнлүк истираһәт едә биләрсиниз. Мәсәлән, паркда, дәниз кәнарында ҝәзишә вә ја достларынызла бирҝүнлүк һараса ҝедә биләрсиниз.

• Һәтта әввәлләр етмәдијиниз бир ишлә мәшғул олмаг сизә кәдәрдән гуртулмаға көмәк едә биләр.

ПРИНСИП: «Ҝәлин сакит бир јерә ҝедәк, бир аз динҹинизи алын» (Марк 6:31).

11. БАШГАЛАРЫНА КӨМӘК ЕДИН

• 

  Унутмајын ки, башгаларына вахт ајырыб көмәк етсәниз, өзүнүзү даһа јахшы һисс едә биләрсиниз.

• Илк олараг әзизинизин өлүмүнә ҝөрә кәдәрләнән вә тәсәллијә еһтијаҹ дујан инсанлара, мәсәлән, достларыныза, гоһумларыныза көмәк едә биләрсиниз.

• Башгаларына дәстәк олмаг вә тәсәлли вермәк севинҹинизи вә һәјат амалынызы сизә ҝери гајтараҹаг.

ПРИНСИП: «Вермәк алмагдан даһа чох хошбәхтлик ҝәтирир» (Һәвариләрин ишләри 20:35).

12. НӘЈИН ДАҺА ВАҸИБ ОЛДУҒУНУ МҮӘЈЈӘН ЕДИН

• Кәдәр әслиндә нәјин ваҹиб олдуғуну даһа јахшы баша дүшмәјә көмәк едә биләр.

• Бундан сонра неҹә һәјат сүрәҹәјиниз һагда дүшүнүн.

• Лазым ҝәлсә, ваҹиб сајдығыныз шејләрдә дәјишиклик един.

ПРИНСИП: «Јас евинә ҝетмәк зијафәт евинә ҝетмәкдән јахшыдыр, чүнки һәр кәсин ахыры будур. Һәр бир јашајан буну јадында сахламалыдыр» (Ваиз 7:2)

Дүзүнү десәк, һеч нә ағры-аҹынызы тамамилә арадан галдыра билмәз. Бунунла белә, әзизини итирән инсанларын чоху бу мәгаләдә садаланан аддымларын онлара тәсәлли вердијини өз тәҹрүбәләриндә ҝөрә биләр. Сөз јох ки, бу мәгаләдә кәдәрдән гуртулмағын бүтүн јолларындан данышылмыр. Амма бу мәсләһәтләрдән бәзиләринә әмәл етсәниз, мүәјјән гәдәр тәсәлли тапа биләрсиниз.

ДОҒМА ИНСАНЫ ИТИРМӘК АҸЫСЫ СОН ИЛЛӘР ӘН ЧОХ ТӘДГИГ ОЛУНАН МӘСӘЛӘЛӘРДӘН БИРИДИР. Әввәлки мәгаләдән ҝөрдүк ки, ән јахшы мүтәхәссис мәсләһәти Мүгәддәс Китабда јатан гәдими һикмәт хәзинәси илә чох вахт үст-үстә дүшүр. Бу, Мүгәддәс Китаб мәсләһәтләринин һәр заман актуал олдуғундан хәбәр верир. Амма Мүгәддәс Китаб садәҹә етибарлы мәсләһәт мәнбәји дејил. Кәдәрли инсанларын үрәјинә су сәпән, тајы-бәрабәри олмајан тәсәлли сөзләрини јалныз орадан тапмаг олар.

• Өлүм јухусуна ҝетмиш әзизләримизин әзаб чәкмәдијинә әмин олун

  Төвратда дејилир ки, «өлүләр һеч нә билмир» (Ваиз 9:5). Онларын «дүшүнҹәләри... јох олур» (Зәбур 146:4). Буна мүвафиг олараг, Мүгәддәс Китаб өлүмү јухуја бәнзәдир (Јәһја 11:11).

• Мәрһәмәтли Аллаһа ҝүҹлү иман тәсәлли ҝәтирир

  Зәбур 34:15 ајәсиндә дејилир: «Јеһованынa ҝөзү салеһләрин үзәриндәдир, гулағы онларын јалварышыны ешидир». Дуада Аллаһа һиссләримизи билдирмәк садәҹә тәсәлли тапмаға вә ја дүшүнҹәмизи нәзарәт алтында сахламаға көмәк етмир. Дуа сајәсиндә Өз ҝүҹү васитәсилә бизә тәсәлли верән Јараданымызла сых мүнасибәтләр гуруруг.

• Һәсрәтлә ҝөзләдијимиз ҝөзәл ҝәләҹәк

  Белә бир ҝәләҹәји тәсәввүр един: гәбирләрдә оланлар јенидән јер үзүндә һәјата гајыдыр! Мүгәддәс Китабда бу ҝөзәл дөвран һагда дәфәләрлә данышылыр. Орада һәмин вахт јер үзүндә ҝүзәранын неҹә олаҹағы тәсвир олунур, дејилир ки, Аллаһ ҝөзләримиздән бүтүн јашлары силәҹәк. «Артыг өлүм олмајаҹаг. Нә дәрд, нә фәрјад, нә дә ағры олмајаҹаг» (Вәһј 21:3, 4).

Јеһоваја иман ҝәтирәнләрин чоху әзизләрини јенидән ҝөрмәк үмидинә сығындыглары үчүн өзләриндә һәдсиз ҝүҹ тапыб кәдәрлә мүбаризә апара билирләр. Мәсәлән, 65 иллик һәјат јолдашыны итирмиш Анн дејир: «Мүгәддәс Китаб мәни әмин едир ки, өлән әзизләримиз әзаб чәкмир вә Аллаһ јаддашында олан һәр кәси дирилдәҹәк. Һәр дәфә һәјат јолдашым һагда дүшүнәндә бу фикирләр јадыма дүшүр. Беләҹә, һәјатымын бу ән ағыр дәрдинә дөзә билирәм».

Өтән мәгаләләрдә ады чәкилән Тина бөлүшүр: «Тимо өләндән бәри Аллаһын мәнә дајаг олдуғуну һисс едирәм. Чәтин анларымда Јеһованын әлини ачыг-ашкар өз үзәримдә ҝөрүрәм. Мүгәддәс Китабдакы дирилмә вәдинин ҝерчәк олдуғуна инанырам. Бу, мәнә Тимону ҝөрәҹәјим ҝүнә кими мөһкәм галмаға көмәк едир».

Бу дүшүнҹәләр Мүгәддәс Китабын мөтәбәр мәнбә олдуғуна инанан милјонларла инсанын ағлындан кечән дүшүнҹәләрдир. Әҝәр сизә елә ҝәлирсә ки, Мүгәддәс Китабда јазыланлар бир хүлјадыр, онда орадакы мәсләһәтләрин вә вәдләрин доғрулуғуна әмин олмаг үчүн арашдырма апарын. Буну етсәниз, ҝөрәҹәксиниз ки, кәдәрли инсанларын дәрдинә ән јахшы дәрман Мүгәддәс Китабдыр!

ӨЛӘНЛӘР ҮЧҮН ҮМИД ҺАГДА ДАҺА ЧОХ ӨЈРӘНИН

Бу барәдә видеолара рәсми сајтымызда, jw.org сајтында баха биләрсиниз

АЛЛАҺЫН КӘЛАМЫ ӨЛҮЛӘР ҺАГДА НӘ ДЕЈИР?

Инсан өләндән сонра нә баш верир? Мүгәддәс Китабын ајдын ҹавабы бизә раһатлыг вә тәсәлли верир

КИТАБХАНА > ВИДЕОЛАР бөлмәсинә дахил олун (видеоархив: МҮГӘДДӘС КИТАБ)

ХОШ ХӘБӘР ЕШИТМӘК ИСТӘЈИРСИНИЗ?

Бу ҝүн анҹаг пис хәбәрләр ешидирик. Бәс ҝөзәл хәбәрләр һарадан ешидә биләрик?

МҮГӘДДӘС КИТАБ ТӘЛИМЛӘРИ > ХОШБӘХТЛИК ВӘ ГӘЛБ РАҺАТЛЫҒЫ бөлмәсинә дахил олун