Достлуғу горујуб сахламаг үчүн достла үнсијјәт етмәк лазымдыр. Достлар данышанда бир-биринә гулаг асырлар. Онлар башгаларына достлары һаггында јахшы шејләр данышырлар. Бунлар Аллаһла достлуға да аиддир. Бу барәдә Мүгәддәс Китабын дедикләри үзәриндә дүшүн:

Јеһова илә дуада мүнтәзәм даныш. «Даима дуа един» (Ромалылара 12:12).

Аллаһын Кәламыны — Мүгәддәс Китабы оху. «Мүгәддәс Јазылардакы һәр кәлмә Аллаһдандыр вә тәлим, тәнбеһ, ислаһ үчүн... фајдалыдыр» (2 Тимутијә 3:16).

Инсанлара Аллаһ һаггында даныш. «Ҝедин вә бүтүн халгларын ичиндә шаҝирд һазырлајын,.. сизә әмр етдијим һәр шејә риајәт етмәји онлара өјрәдин» (Мәтта 28:19, 20).

Аллаһын достлары илә достлуг ет. «Һикмәтли илә отуруб-дуран һикмәтли олар» (Мәсәлләр 13:20).

Ибадәт евиндә кечирилән ҝөрүшләрдә иштирак ет. «Ҝәлин бир-биримизә гаршы диггәтли олуб бир-биримизи мәһәббәтә вә јахшы ишләрә тәшвиг едәк,.. бир-биримизи руһландыраг» (Ибраниләрә 10:24, 25).

Падшаһлыг ишини дәстәклә. «Гој һәр кәс үрәјиндә гәт етдији кими версин, көнүлсүз вә ја мәҹбури вермәсин, ахы Аллаһ ҝүләр үзлә верәни севир» (2 Коринфлиләрә 9:7).

Достлуг мәһәббәт үзәриндә гурулур. Јеһова һаггында даһа чох өјрәндикҹә, Ону бир о гәдәр чох севәҹәксән. Аллаһа гаршы мәһәббәтин артдыгҹа, Она хидмәт етмәјә һәвәсин дә артаҹаг. Үрәјиндә Иса Мәсиһин давамчысы олмаг истәји ојанаҹаг (Мәтта 28:19). Хошбәхт бир аиләјә, Јеһованын Шаһидләринин сыраларына гошулмагла Аллаһла әбәдијјәт боју дост ола биләрсән. Бунун үчүн нә етмәлисән?

Аллаһын ганунларына табе олмагла Ону севдијини ҝөстәрмәлисән. «Аллаһы севмәк Онун әмрләринә риајәт етмәк демәкдир, Онун әмрләри исә ағыр дејил» (1 Јәһја 5:3).

Өјрәндикләрини һәјатында тәтбиг ет. Иса буну изаһ етмәк үчүн бир әһвалат данышды. Бир ағыллы адам евини даш үзәриндә тикди. Ағылсыз адам исә евини гум үзәриндә тикди. Ҝүҹлү туфан заманы гум үзәриндәки ев учуб дағылды, даш үзәриндәки ев исә дурду. Иса деди ки, онун тәлимләрини ешидиб әмәл едәнләр евини даш үзәриндә тикмиш ағыллы адама бәнзәјирләр. Онун тәлимләрини динләјиб әмәл етмәјәнләр исә евини гум үзәриндә тикмиш ағылсыз адама охшајырлар. Сән һансы адама бәнзәмәк истәјәрдин? (Мәтта 7:24—27).

Һәср олунма. Бу о демәкдир ки, Јеһоваја дуада Онун ирадәсини әбәди јеринә јетирмәк истәдијини билдирирсән. Аллаһын ирадәсини јеринә јетирмәклә Иса Мәсиһин давамчысы олдуғуну ҝөстәрәҹәксән (Мәтта 11:29).

Вәфтиз. «Вәфтиз ол, онун адыны чағыр ки, ҝүнаһларын бағышлансын» (Һәвариләрин ишләри 22:16).

Аллаһа ҹанла-башла хидмәт ет. «Һәр нә едирсинизсә, ҹанла-башла един, санки, инсанлар үчүн јох, Јеһова үчүн едирсиниз» (Колослулара 3:23).

Дост газанмаға сәј лазым олдуғу кими, достлуғу горујуб сахламаг үчүн дә сәј тәләб олунур. Аллаһла достлашмаға вә бу достлуғу горујуб сахламаға сәј ҝөстәрдијин үчүн боллуҹа хејир-дуа алаҹагсан. Иса она инананлара демишди: «Һәгигәт сизи азад едәҹәк» (Јәһ­ја 8:32). Бу нә демәкдир?

Артыг индидән азад ола биләрсән. Шејтанын јајдығы ујдурма тәлимләрдән вә јаланлардан азад ола биләрсән. Јеһованы танымајан милјонларла инсаны севинҹдән мәһрум едән үмидсизликдән гуртула биләрсән (Ромалылара 8:22). Аллаһын достлары һәтта өлүм горхусундан да азаддырлар (Ибраниләрә 2:14, 15).

Аллаһын јени дүнјасында азад ола биләрсән. Сән ҝәләҹәкдә еҹазкар азадлыға говуша биләрсән! Јер үзүндәки Ҹәннәтдә мүһарибә, хәстәлик вә ҹинајәткарлыг олмајаҹаг. Јохсуллуг вә аҹлыг, горху, әзаб-әзијјәт вә һагсызлыг, гоҹалыг вә өлүм јох олаҹаг. Мүгәддәс Китаб Аллаһ һаггында дејир: «Әлини ачырсан, һәр бир мәхлугу истәјинә чатдырырсан» (Зәбур 145:16).

Аллаһын достлары әбәди јашајаҹаглар. Аллаһ өз достларына гијмәтли бир һәдијјә — әбәди һәјат бәхш едәҹәк (Ромалылара 6:23). Һеч билирсән әбәди јашамаг нә демәкдир?!

Чох шејә вахтын чатаҹаг. Ола билсин, сән һәр һансы бир мусиги аләтиндә чалмағы вә јахуд да рәссамлыг вә ја дүлҝәрлик сәнәтини мәнимсәмәк истәјирсән. Ја да һејванлар вә биткиләр аләми һаггында өјрәнмәји хошлајырсан. Јәгин, сәјаһәт етмәк, мүхтәлиф јерләри вә инсанлары ҝөрмәк истәјәрдин. Әбәди һәјат бүтүн бунлара имкан јарадаҹаг!

Чох адамла достлашмаға вахтын олаҹаг. Әбәди һәјат Аллаһын достлары илә таныш олмаға имкан верәҹәк. Онларын истедады вә ҝөзәл кејфијјәтләри һаггында өјрәнәҹәксән, онлар да сәнин достларын олаҹаглар. Бир-биринизлә меһрибан олаҹагсыныз (1 Коринфлиләрә 13:8). Әбәди һәјат сәнә бүтүн јер үзүндә јашајан инсанларла достлашмаға имкан верәҹәк! Ән башлыҹасы исә әсрләр кечдикҹә Јеһова илә достлуғун даһа да мөһкәмләнәҹәк. Биз сәнә әбәдијјәт боју Аллаһла дост олмағы арзулајырыг!