Аллаһын Кәламындакы мүждә «һәр халга, тајфаја, дилә вә үммәтә» бәјан едилмәлидир. Елә бу мәгсәдлә биз 750-дән чох дилдә нәшрләр дәрҹ едирик (Вәһј 14:6). Сөзсүз ки, бу иш асан баша ҝәлмир. Бу ишә мүхтәлиф өлкәләрдән олан јазычылар вә тәрҹүмәчиләр әмәк гојур. Онларын һамысы Јеһованын Шаһидидир.

Мәтн инҝилис дилиндә јазылыр. Рәһбәрлик Шурасы баш идарәдә јерләшән Јазы шөбәсинин фәалијјәтинә нәзарәт едир. Бу шөбә исә баш идарәдә вә бәзи филиалларда хидмәт едән јазычыларын ишини идарә едир. Јазычыларын башга-башга мәншәләрдән олмасы сајәсиндә нәшрләримиздә мүхтәлиф халгларын мәдәнијјәтинә аид мөвзулар дәрҹ едилир. Бунунла да нәшрләримиз һамы үчүн мараглы олур.

Мәтн тәрҹүмәчиләрә ҝөндәрилир. Һазыр мәтн редактә едилдикдән вә Рәһбәрлик Шурасы тәрәфиндән тәсдиг олундугдан сонра електрон форматда бүтүн тәрҹүмә групларына ҝөндәрилир. Тәрҹүмәчиләр мәтни тәрҹүмә едирләр. Бу мәрһәләдә тәрҹүмә олунмуш мәтнин дәгиглији вә тәбиилији дә јохланылыр. Тәрҹүмәчиләр инҝилис мәтниндәки фикирләри там долғунлуғу илә ана дилләриндә вермәкдән өтрү «һәгигәт сөзләрини дүзҝүн» јазмаға чалышырлар (Ваиз 12:10).

Компүтерләрин фајдасы. Дүздүр, компүтер јазычылары вә тәрҹүмәчиләри әвәз едә билмәз, амма онун фајдасыны да данмаг олмаз. Електрон лүғәтләр, ахтарыш програмлары вә башга вәсаитләр ишин сүрәтини хејли артырыр. Јеһованын Шаһидләри тәрәфиндән јарадылан чохдилли електрон нәшријјат системи (MEPS) сајәсиндә мәтн јүзләрлә дил графикасында јазылыр, шәкилләрлә бәрабәр јығылыр вә чапа һазырланыр.

Бәли, биз бу ишдән өтрү ҝүҹ-гүввәмизи әсирҝәмирик. Чалышырыг ки, нәшрләримиз һәтта бир нечә мин адамын данышдығы дилдә дә дәрҹ олунсун. Чүнки Јеһова Аллаһ истәјир ки, «һәр ҹүр инсан хилас олуб һәгигәт барәсиндә дәгиг билијә јијәләнсин» (1 Тимутијә 2:3, 4).

• Нәшрләримизин јазылмасы барәдә нә демәк олар?

• Нәјә ҝөрә нәшрләримиз чохлу дилләрә тәрҹүмә олунур?

«Јеһованын Шаһидләри» тәшкилаты һәр ил јүз милјонларла Мүгәддәс Китаб вә башга нәшрләр дәрҹ едиб пајлајыр. Бу нәшрләр сатыш үчүн нәзәрдә тутулмур. Тәшкилат һәмчинин ибадәт евләри, филиаллар тикир вә онлара техники хидмәт ҝөстәрир. Бундан әлавә, бејтеллиләрә, хүсуси тәјинатлы мүждәчиләрә мадди дәстәк олур вә фәлакәт баш верән әразиләрә јардым ҝөндәрир. Јәгин сизә мараглыдыр бүтүн бунлар неҹә малијјәләшир.

Пул јығылмыр. Мүждәчилик ишини һәјата кечирмәк үчүн чохлу пул лазым олса да, биз һеч кимдән пул тәләб етмирик. XIX әсрдә «Ҝөзәтчи гүлләси» журналынын икинҹи бурахылышында јазылырды ки, бизим архамызда Јеһова Аллаһ дурур, одур ки, тәшкилатымыз «көмәк үчүн һеч вахт һеч кимә ағыз ачмајаҹаг». Бу ҝүнә кими белә дә олуб! (Мәтта 10:8).

Фәалијјәтимиз ианәләр һесабына малијјәләшир. Мүгәддәс Китаб үзрә маарифләндирмә ишимизи чох адам гијмәтләндирир вә бу ишә көнүллү ианә верир. Јеһованын Шаһидләринин өзләри дә бүтүн дүнјада Аллаһын ишини иҹра етмәк үчүн вахтларыны, ҝүҹләрини вә вәсаитләрини сәрф едирләр (1 Салнамәләр 29:9). Бу ишин ирәлиләмәсинә јардым етмәк истәјәнләр ибадәт евләриндә вә топланты залларында олан гутулара ианә ата биләрләр. Һәмчинин ианәләри jw.org сајты васитәсилә дә ҝөндәрмәк олар. Ианәнин чох һиссәсини орта имканлы адамлар верир. Онлар мәбәдин хәзинә габына ики хырда пул салан вә Иса пејғәмбәрин тәрифләдији касыб дул гадын кими сәхавәт ҝөстәрирләр (Лука 21:1—4). Беләликлә, көнлү истәјән һәр кәс үрәјиндә гәт етдији кими мүәјјән мигдарда пул ајырыб ианә едә биләр (1 Коринфлиләрә 16:2; 2 Коринфлиләрә 9:7).

Мүждәчилик ишини дәстәкләмәк истәјән инсанлар һәмишә олуб вә олаҹаг. Биз әминик ки, Јеһова Аллаһ бундан сонра да белә инсанларын васитәсилә Өз ишини ирәли апараҹаг (Мәсәлләр 3:9).

• Тәшкилатымыз неҹә малијјәләшир?

• Көнүллү ианәләр нәјә хәрҹләнир?

Јеһованын Шаһидләринин бирҝә јығышдыглары мәкан ибадәт еви адланыр. Бурада Мүгәддәс Китабын вә Иса пејғәмбәрин тәблиғинин әсас мөвзусу олан Аллаһын Падшаһлығы һаггында тәлим верилир (Лука 8:1).

Саф ибадәт мәканы. Аллаһын Падшаһлығы һаггында мүждәчилик иши мәһз бурадан һәјата кечирилир (Мәтта 24:14). Ибадәт евләринин өлчүсү вә гурулушу мүхтәлиф олур. Бунунла белә, онларын һамысы садә тикилидир вә чохунда бир нечә јығынҹаг ҝөрүш кечирир. Јығынҹаглар артдыгҹа ибадәт евләринә дә тәләбат артыр. Бу сәбәбдән сон илләрдә Јеһованын Шаһидләри он минләрлә јени ибадәт евләри (орта һесабла ҝүнә беш бина) тикмишләр. Бу, неҹә мүмкүндүр? (Мәтта 19:26).

Үмуми фонда едилән ианәләр һесабына тикилир. Јығылан бу ианәләр филиала ҝөндәрилир. Филиал да бу пулу ибадәт биналарынын тикилмәсинә, ја да һазыр биналарын тәмири вә бәрпасына хәрҹләјир.

Көнүллүләр тәрәфиндән тикилир. Бир чох өлкәләрдә Ибадәт евләринин тикинти бригадалары тәшкил олунмушдур. Тикинти бригадасы вә башга көнүллүләр өлкә дахилиндә бир јердән башга јерә ҝедәрәк тикинти лајиһәләринин һәјата кечирилмәсинә башчылыг едир вә јерли Шаһидләрә бу иш үчүн лазыми баҹарыглар өјрәдирләр. Башга өлкәләрдә мүәјјән бөлҝә дахилиндә ибадәт евләринин тикинти вә бәрпа ишләринә нәзарәт етмәк үчүн бу саһәдә тәҹрүбәси олан Јеһованын Шаһидләри тәјин олунур. Һәр лајиһәдә диҝәр әразиләрдән ҝәлән пешәкар көнүллүләр чалышса да, әсас ишчи гүввәсини јерли јығынҹағын үзвләри тәшкил едир. Онлар көнүллү вә ҹан-дилдән бу ишдә иштирак едирләр. Бүтүн бунлар јалныз Јеһованын руһунун вә Онун халгынын фәдакар әмәји сајәсиндә мүмкүн олур (Зәбур 127:1; Колослулара 3:23).

• Ибадәт евләри һансы мәгсәдлә тикилир?

• Бүтүн дүнјада ибадәт евләринин тикилмәси нәјин сајәсиндә мүмкүн олур?