Мәсиһчи олдуғуну һеч заман унутма

«Рәбб бәјан едир: “Сизсиниз Мәним шаһидләрим”» (ЈЕШАЈА 43:10).

1. Јеһова неҹә инсанлары Өзүнә ҹәлб едир?

ПАДШАҺЛЫГ ЗАЛЫНДА оларкән әтрафына нәзәр саланда кимләри ҝөрүрсән? Орада, Мүгәддәс Китаб мүдриклијинә дәриндән јијәләнмәк истәјән ҝәнҹ оғлан вә гызлары ҝөрә биләрсән (Мәзмур 148:12, 13). Јахуд, аилә дәјәрләрини һеч едән дүнјада јашасалар да, Аллаһы разы салмаг истәјән аилә башчыларыны ҝөрә биләрсән. Ола биләр, гоҹалығын ҝәтирдији насазлыглара бахмајараг, мәтанәтлә Аллаһа һәср олунмаларына мүвафиг јашамаға давам едән јашлы баҹы-гардашлары да ҝөрүрсән (Сүлејманын мәсәлләри 16:31). Онларын һамысы Јеһованы дәрин мәһәббәтлә севир, Аллаһ да белә инсанлары мәмнунијјәтлә Өзүнә ҹәлб едир. Иса Мәсиһ дејирди: «Әҝәр Мәни ҝөндәрән Атам ҹәлб етмирсә, һеч ким Мәним јаныма ҝәлә билмәз» (Јәһја 6:37, 44, 65).

2, 3. Нәјә ҝөрә мәсиһчи олдуғумузу јадда сахламаг асан дејил?

² Мәҝәр биз Јеһованын гијмәтләндирдији вә хејир-дуа вердији инсанларын арасында олмағымыза шад дејиликми? Лакин бу гејри-ади «чәтин анлар»да мәсиһчи олдуғумузу јадда сахламаг асан дејил (2 Тимотејә 3:1). Мәсиһчи аиләләриндә тәрбијә алан ҝәнҹ оғлан вә гызлар буну хүсусилә һисс едирләр. Бир ҝәнҹ оғлан е’тираф едир: «Јығынҹаглара ҝетсәм дә, мәним нә дәгиг руһани мәгсәдләрим, нә дә, ачығыны десәм, Јеһоваја хидмәт етмәјә бөјүк арзум варды».

³ Бә’зиләри Јеһоваја сәмими гәлбдән хидмәт етмәк истәсәләр дә, һәмјашыдларынын ҝүҹлү тәзјиги, дүнјанын тә’сири вә ҝүнаһлы мејлләри уҹбатындан иманда бүдрәјә биләрләр. Белә ҝүҹлү ҝәрҝинлијин тә’сири алтында кимсә мәсиһчи олдуғуну унуда биләр. Мәсәлән, бу дүнјада чохлары Мүгәддәс Китабын әхлаг нормаларыны көһнәлмиш вә мүасир һәјатда тәтбиголунмаз һесаб едир (1 Петер 4:4). Башгалары исә Аллаһа Онун истәдији кими ибадәт етмәјин о гәдәр дә ваҹиб олмадығыны зәнн едир (Јәһја 4:24). Ефеслиләрә јаздығы мәктубунда Павел бу дүнјанын өз «руһу», јә’ни ҝүҹлү тә’сирә малик олан әһвал-руһијјәси олдуғуну гејд етмишдир (Ефеслиләрә 2:2). Бу руһ инсанлары Јеһованы танымајан ҹәмијјәтин дүшүндүјү кими дүшүнмәјә вадар едир.

4. Иса мәсиһчилијә хас олан сәҹијјәви хүсусијјәтләри итирмәјин нә гәдәр тәһлүкәли олдуғуну неҹә вурғулады?

⁴ Лакин Јеһованын сәдагәтли хидмәтчиләри олан бизләр баша дүшүрүк ки, јашындан асылы олмајараг, мәсиһчијә хас олан сәҹијјәви хүсусијјәтләри итирмәјимиз чох фаҹиәви ола биләр. Јалныз Јеһованын норма вә тәләбләринә мүвафиг јашадығымыз һалда, өзүмүзү мәсиһчи сана биләрик. Чүнки, биз Онун сурәтиндә јарадылмышыг (Јарадылыш 1:26; Микеја 6:8). Мүгәддәс Китабда мәсиһчиләрин сәҹијјәви хүсусујјәтләри һамынын ҝөрдүјү палтарла мүгајисә олунур. Иса бизим ҝүнләр һаггында дејирди: «Будур, оғру кими ҝәлирәм! Ојаг олан, чылпаг ҝәзмәсин вә ајыбы ҝөрүнмәсин дејә, палтарларыны мүһафизә едән нә бәхтијардыр!» (Вәһј 16:15, И–93)a. Биз, мәсиһчилијә хас олан әхлаг нормаларындан узаглашмаг вә Шејтан дүнјасынын бизи өз чәрчивәсинә салмасына јол вермәк истәмирик. Әкс тәгдирдә «палтарымыздан» мәһрум оларыг. Бу нәинки кәдәрли, һәм дә биабырчылыг олар.

5, 6. Нәјә ҝөрә иманда мөһкәм дурмаг ваҹибдир?

⁵ Мәсиһчинин иманда нә гәдәр мөһкәм олмасы, бүтүн һәјатына тә’сир ҝөстәрәҹәк. Неҹә? Әҝәр Јеһованын хидмәтчиси өзүнүн ким олдуғуну унударса, мәгсәдләрини вә һәјатында дәгиг истигамәти итирә биләр. Мүгәддәс Китаб гәтијјәтсизлијә даир дөнә-дөнә хәбәрдарлыг едир. Шаҝирд Јагуб јазырды: «Шүбһә едән, күләјин галдырдығы вә тәлатүмә ҝәтирдији дәниз далғасына бәнзәр. Гој белә бир адам дүшүнмәсин ки, Рәббдән бир шеј алаҹагдыр. Мүтәрәддид адам етдији һеч бир шејдә сабит дејил» (Јагуб 1:6-8; Ефеслиләрә 4:14; Ибраниләрә 13:9).

⁶ Биз өз иманымызда неҹә мөһкәм ола биләрик? Күлл-Ихтијар Аллаһа хидмәт етмәјин бөјүк шәрәф олдуғуну һәмишә јадда сахламагда бизә нә көмәк едә биләр? Ҝәлин бу суаллары нәзәрдән кечирәк.

Мәсиһчи јолунда мөһкәм дајан

7. Нәјә ҝөрә Јеһовадан бизи сынагдан кечирмәсини хаһиш етмәк лазымдыр?

⁷ Јеһова илә мүнасибәтләрини даима мөһкәмләндир. Мәсиһчинин саһиб олдуғу ән дәјәрли шеј Аллаһ илә олан мүнасибәтидир (Мәзмур 25:14; Сүлејманын мәсәлләри 3:32). Әҝәр иманымыза даир шүбһәләримиз јаранырса, онда бу мүнасибәтләрин кејфијјәт вә дәринлијини јохламағын әсл вахтыдыр. Мәзмурчунун етдији дуа бу саһәдә бизә јахшы нүмунәдир: «Ја Рәбб, мәни сынагдан кечир, Сән мәни имтаһан ет, гәлбими, фикирләрими саф ет» (Мәзмур 26:2). Нәјә ҝөрә белә бир сынаг зәруридир? Она ҝөрә ки, ҝизли фикирләримизи, һиссләримизи вә мејлләримизи өзүмүз објектив сурәтдә гијмәтләндирә билмирик. Буну етмәјә јалныз Јеһова гадирдир (Јеремја 17:9, 10).

8. а) Нәјә ҝөрә Јеһованын јол вердији сынаглар бизә фајда ҝәтирир? б) Мәсиһчи кими инкишаф етмәјиниздә сизә нә көмәк едир?

⁸ Јеһовадан бизи сынамасыны хаһиш етмәклә, үрәјимиздә оланлары јохламасыны истәмиш олуруг. О, бизим әсл мејлләримизин вә үрәјимиздә оланларын үзә чыхмасына сәбәб олан вәзијјәтләрә јол верә биләр (Ибраниләрә 4:12, 13; Јагуб 1:22-25). Бу сынаглара севинмәлијик, чүнки онлар бизим Јеһоваја олан сәдагәтимизин дәринлијини сүбут етмәјә имкан јарадыр. Онлар бизим «һеч бир нөгсаны олмајан, камил вә там адамлар» олуб-олмадығымызы ҝөстәрир (Јагуб 1:2-4). Бундан савајы, сынагларын сајәсиндә биз руһән инкишаф едирик (Ефеслиләрә 4:22-24).

9. Нә үчүн Мүгәддәс Китаб һәгигәтләрини шәхсән тәдгиг етмәк ваҹибдир? Изаһ един.

⁹ Мүгәддәс Китаб һәгигәтләрини тәдгиг ет. Өзүмүзү там әсасла Јеһованын хидмәтчиси һесаб етмәк үчүн, Аллаһын Кәламыны јахшы билмәлијик (Филипилиләрә 1:9, 10). Јашындан асылы олмајараг, һәр бир мәсиһчи инандығы шејләрин һәгигәтән дә Мүгәддәс Китаба әсасландығына даир өзү сүбутлар тапмалыдыр. Павел һәмиманлыларыны тәшвиг едирди: «Һәр шеји тәдгиг един; јахшылыға бағлы олун» (1 Салониклиләрә 5:21). Мәсиһчи аиләләриндә тәрбијә алан ушаглар дәрк етмәлидирләр ки, садәҹә валидејнләринин иманына бел бағлаја билмәзләр. Давуд оғлу Сүлејмана нәсиһәт верирди: «Атанын Аллаһыны таны, сәмими гәлбдән... Она гуллуг ет» (1 Салнамәләр 28:9). Ҝәнҹ Сүлејмана садәҹә атасынын Јеһоваја неҹә хидмәт етдијини мүшаһидә етмәк кифајәт дејилди. О, өзү шәхсән Јеһованы јахындан танымалы иди. Вә о, белә дә давранырды. Сүлејман Аллаһа јалварырды: «Мәнә һикмәт вә билик вер ки, бу халга нә едиб-етмәјәҹәјими билим» (2 Салнамәләр 1:10).

10. Дүзҝүн нијјәтләрдән ирәли ҝәләрәк, сәмими суаллар вермәк нәјә ҝөрә мүнасибдир?

¹⁰ Мөһкәм иман билијә әсасланыр. Павел дејирди: «Иман ешитмәкдән... олур» (Ромалылара 10:17). О нәји нәзәрдә тутурду? Павел демәк истәјирди ки, Аллаһын Кәламыны өјрәнмәклә, биз Јеһоваја, Онун вә’дләринә вә тәшкилатына олан иманымызы вә е’тибарымызы мөһкәмләндиририк. Мүгәддәс Китаба даир вердијимиз сәмими суаллар иманымызын һәгигилијинә бир даһа әмин олмагда бизә көмәк едир. Павел Ромалылара 12:2 ајәсиндә: «Аллаһын јахшы, мәгбул вә камил ирадәсинин нә олдуғуну» тәдгиг етмәји төвсијә едирди. Бәс буну неҹә едә биләрик? Һәгигәт һаггында дәгиг билик әлдә етмәклә (Титуса 1:1). Јеһованын руһу Онун Кәламынын дәринликләрини белә анламаға көмәк едир (1 Коринфлиләрә 2:11, 12). Әҝәр нә исә ајдын дејилсә, јахшы оларды ки, көмәк үчүн Аллаһа дуа едәк (Мәзмур 119:10, 11, 27). Јеһова истәјир ки, биз Онун Кәламыны анлајыб она е’тибар едәк вә табе олаг. О, дүзҝүн нијјәтләрдән ирәли ҝәлән суаллары алгышлајыр.

Даим Аллаһы разы сал

11. а) Һансы тәбии истәк тәләјә чеврилә биләр? б) Бүтүн ҹәсарәтимизи топлајараг, һәмјашыдларын тәзјигинә гаршы неҹә дура биләрик?

¹¹ Инсанлары дејил, Аллаһы разы салмаға чалыш. Әтрафдакыларын хошуна ҝәлмәји арзуламагда пис бир шеј јохдур. Достлар һәр кәсә лазымдыр вә әтрафдакыларын јахшы мүнасибәти һәр инсана хош ҝәлир. Јеткин јашларында олдуғу кими, ҝәнҹлик дөврүндә дә һәмјашыдларын тәзјиги о гәдәр ҝүҹлү ола биләр ки, инсанда башгаларынын хошуна ҝәлмәк вә өзүнү онлар кими апармаг истәји ашыб-даша биләр. Лакин дост вә һәмјашыдларымыз һәр заман бизим јахшылығымызы истәмәзләр. Бә’зән онлар һансыса пислији етмәк үчүн өзләринә јолдаш ахтарырлар (Сүлејманын мәсәлләри 1:11-19). Адәтән мәсиһчи киминсә пис тә’сири алтына дүшәндә, өз кимлијини ҝизләтмәјә чалышыр (Мәзмур 26:4). Лакин һәвари Павел хәбәрдарлыг едирди: «Бу зәманәјә ујғунлашмајын» (Ромалылара 12:2). Әтрафдакыларын ҝөстәрдији тәзјиглә мүбаризә апармағымыз үчүн, Јеһова лазым олан гүввәни верир (Ибраниләрә 13:6).

12. Аллаһла мүнасибәтләримизи горумагда һансы принсип вә нүмунә бизә көмәк едир?

¹² Пис тәзјигләрә гаршы дураркән јадда сахламаг лазымдыр ки, Аллаһа садиг галмаг, ҹәмијјәтин фикриндән вә дүнјанын әһвал-руһијјәсиндән даһа ваҹибдир. Чыхыш 23:2 ајәсиндәки принсип бизи мүдафиә едир: «Шәр иш ҝөрән издиһама гошулмајын». Исраиллиләрин әксәријјәти Јеһованын вердији вә’дләри јеринә јетирәҹәјинә даир шүбһә етдикдә, Калев чохлуғун далынҹа дүшмәкдән гәтијјәтлә имтина етди. О, Аллаһын вә’дләринин е’тибарлы олдуғуна әмин иди вә бунун сајәсиндә бол хејир-дуа алды (Сајлар 13:30; Јешуа 14:6-11). Бәс сән Аллаһла олан мүнасибәтини горумаг үчүн чохлуғун рә’јинә зидд ҝетмәјә һазырсанмы?

13. Мәсиһчи олдуғуну башгаларына билдирмәк нәјә ҝөрә мүдриклик оларды?

¹³ Гој һамы сәнин мәсиһчи олдуғуну билсин. Неҹә дејәрләр, ән јахшы мүдафиә һүҹумдур. Езранын ҝүнләриндә садиг исраиллиләрә Јеһованын ирадәсини јеринә јетирмәкдә мане олан заман, онлар бәјан етдиләр: «Биз ҝөјләрин вә јерин Аллаһынын гулларыјыг» (Езра 5:11). Дүшмән мөвге тутан инсанларын тә’сиринә алтына дүшмәк олмаз, әкс тәгдирдә горху бизи сәрбәст һәрәкәт етмәкдән мәһрум едәҹәк. Һамыны разы салмаг истәјән адам һеч нәјә наил олмајаҹаг. Буна ҝөрә дә, горхма. Јахшы олар ки, һәмишә башгаларына Јеһованын Шаһиди олдуғуну билдирәсән. Бир мәсиһчи кими саһиб олдуғун дәјәрләри, е’тигадлары вә тутдуғун мөвгеји һөрмәтҹил сурәтдә, ејни заманда мәтанәтлә изаһ едә биләрсән. Гој башгалары билсин ки, сәнин Јеһованын јүксәк әхлаг нормаларына ујғун јашамаг гәрарын гәтидир. Гој һамы сәни бу јолдан дөндәрмәјә ҹәһд ҝөстәрмәјин әбәс олдуғуну анласын. Әхлагҹа тәмиз һәјат сүрмәјинлә фәхр ет (Мәзмур 64:10). Гәти мөвге тутмағын, сәнә көмәк вә мүдафиә олаҹаг, бу, һәтта башгаларыны Јеһова вә Онун халгы һаггында даһа чох өјрәнмәјә тәшвиг едә биләр.

14. Истеһза вә ја мүгавимәтләрлә үзләшәркән руһдан дүшмәјә дәјәрми? Изаһ един.

¹⁴ Сөзсүз ки, киминсә сәнә истеһза едәҹәји вә ја мүгавимәт ҝөстәрәҹәји дә истисна дејил (Јәһуда 18). Әҝәр өз мөвгени изаһ етмәк ҹәһдин уғурлу олмамышса, руһдан дүшмә (Језекел 3:7, 8). Нә гәдәр гәтијјәтли даврансан да, инанмаг истәмәјән адам, һеч вахт инанмајаҹаг. Фир’ону јадына сал. Һеч бир ҹәза вә мө’ҹүзә, һәтта илк ушағыны итирмәји белә, ону инандыра билмәди ки, Муса Јеһованын адындан данышырды. Буна ҝөрә дә, инсанлар гаршысындакы горхунун сәни сарсытмасына јол вермә. Аллаһа иман вә е’тибарымыз горхунун өһдәсиндән ҝәлмәкдә бизә көмәк ­едәҹәкдир (Сүлејманын мәсәлләри 3:5, 6; 29:25).

Кечмишдән өјрән, ҝәләҹәјә һазыр ол

15, 16. а) Руһани мирасымыз өзүнә нәји дахил едир? б) Аллаһын Кәламынын әсасында өз руһани мирасымыз һаггында дәриндән дүшүнмәк нәјә ҝөрә фајдалыдыр?

¹⁵ Руһани мирасыны гијмәтләндир. Мәсиһчиләрә Аллаһын Кәламы әсасында зәнҝин руһани мираслары һаггында дәриндән дүшүнмәк фајдалыдыр. Бу мираса Јеһованын Кәламынын һәгигәтләри вә әбәди һәјат үмиди, һәмчинин хош хәбәри јајараг Аллаһын нүмајәндәси олмаг шәрәфи дахилдир. Сән, Падшаһлыг һаггындакы хиласедиҹи тәблиғ ишиндә иштирак едән Аллаһын Шаһидләринин арасында өзүнү ҝөрүрсәнми? Унутма ки, Јеһова Өзү демишдир: «Сизсиниз Мәним шаһидләрим» (Јешаја 43:10).

¹⁶ Өзүндән соруш: «Мән руһани мираса ҝөрә миннәтдараммы? Ону нә дәрәҹәдә гијмәтләндирирәм? Аллаһын ирадәсини јеринә јетирмәк үчүн һәјатымда она башлыҹа јер ајырыраммы? Бу мирасдан өтрү дүнјанын тәклиф етдији һәр ҹүр һәвәсә мүгавимәт ҝөстәрмәјә һазыраммы?» Руһани мирасымызын сајәсиндә, јалныз Јеһованын тәшкилатында тапа биләҹәјимиз мөһкәм руһани тәһлүкәсизлији даһа чох һисс едә биләрик (Мәзмур 91:1, 2). Јеһованын тәшкилатынын дәрин тәәссүрат бағышлајан һадисәләрлә долу мүасир тарихини нәзәрдән кечирәркән әмин ола биләрик ки, һеч ким вә һеч нә Аллаһын халгынын көкүнү јер үзүндән тамамилә кәсә билмәз (Јешаја 54:17; Јеремја 1:19).

17. Садәҹә руһани мирасдан әлавә даһа нә тәләб олунур?

¹⁷ Әлбәттә, садәҹә руһани мирасымыза бел бағламамалыјыг. Өзүмүз Аллаһла јахын мүнасибәт гурмалыјыг. Филипидә јашајан мәсиһчиләрин инамларыны мөһкәмләндирмәк үчүн сә’јлә чалышан Павел онлара јазырды: «Демәли, севимли гардашларым, нәинки мән јанынызда оланда, һәтта даһа чох инди мән олмајанда, һәмишә итаәтли олдуғунуз кими, өз хиласынызы баша чатдырмаг үчүн горху вә ләрзә илә һәрәкәт един» (Филипилиләрә 2:12). Хиласымыз өзүмүздән башга һеч бир кәсдән асылы дејил.

18. Теократик фәалијјәт өзүмүзү әсл мәсиһчи һисс етмәјимизә неҹә көмәк едир?

¹⁸ Теократик ишләрлә фәал мәшғул ол. Тәҹрүбә ҝөстәрир ки, «әмәк инсаны бир шәхсијјәт кими формалашдырыр». Мәсиһчиләрә Аллаһын Падшаһлығы һаггында хош хәбәри јајмаг кими һәјати ваҹиб бир тапшырыг һәвалә олунуб. Павел дејирди: «Мән гејри-јәһудиләрә һәвари олараг ҝөндәрилдијимә ҝөрә, өз хидмәтими иззәтли сајырам» (Ромалылара 11:13). Тәблиғ иши бизи бу дүнјадан фәргләндирир вә бу ишдә фәал иштиракымыз әсл мәсиһчи олдуғумузу сүбут едир. Јығынҹаг ҝөрүшләриндә вә Падшаһлыг Залларынын тикилмәсиндә иштирак етмәк, һабелә еһтијаҹы оланлара көмәк ҝөстәрмәк кими теократик ишләрлә фәал мәшғул олмаг өзүмүзү әсл мәсиһчи һисс етмәјимизә көмәк едир (Галатијалылара 6:9, 10; Ибраниләрә 10:23, 24).

Ким олдуғумузу унутмамаг һәгиги хејир-дуалар ҝәтирир

19, 20. а) Мәсиһчи олмағын сәнә һансы фајданы ҝәтирир? б) Әслиндә ким олдуғумузу нә мүәјјән едир?

¹⁹ Мәсиһчи олдуғунун нә гәдәр фајда вә хејир-дуа ҝәтирдији үзәриндә бир ан дүшүн. Мәсәлән, Јеһова бизи шәхсән таныјыр. Малаки пејғәмбәр дејирди: «О заман Рәбдән горханлар бир-бирләри илә данышды. Рәбб бу сөзләрә гулаг асыб динләди. Рәбдән горхуб адына һөрмәт едәнләр үчүн Онун өнүндә бир јаддаш китабы јазылды» (Малаки 3:16). Аллаһ бизә Өз достлары кими бахыр (Јагуб 2:23). Бизим һәјатымыз мә’на вә сағлам мәгсәдләрлә долудур. Биз һәмчинин әбәди ҝәләҹәк үмидинә маликик (Мәзмур 37:9).

²⁰ Унутма ки, сәнин ким олдуғуну вә әсл дәјәрини инсанлар дејил, Аллаһ Өзү мүәјјән едир. Инсанлар өз гејри-камил нөгтеји-нәзәрләринә әсасланараг бизи мүһакимә едә биләрләр. Анҹаг Аллаһ бизи севир вә гијмәтләндирир, чүнки биз Она мәхсусуг (Матта 10:29-31). Гаршылыглы олараг биз дә Аллаһы севирик вә бу бизим ким олдуғумузу вә нә үчүн јашадығымызы ајдын дәрк етмәјимизә көмәк едир. «Ким Аллаһы севирсә, о адам Онун тәрәфиндән таныныр» (1 Коринфлиләрә 8:3).

[Һашијә]

Хатырлајырсынызмы?

• Мәсиһчи олдуғумузу һәмишә јадда сахламаг нәјә ҝөрә ваҹибдир?

• Мәсиһчи јолунда неҹә мөһкәм дајана биләрик?

• Кими разы салмаг мәсәләсини һәлл едәркән, дүзҝүн гәрар гәбул етмәкдә бизә нә көмәк едәр?

• Һәјатымыз Јеһова илә јахын мүнасибәтләрдән неҹә асылыдыр?

[17-ҹи сәһифәдәки шәкилләр]

Теократик ишләрлә мәшғул олмағымыз өзүмүзү мәсиһчи кими һисс етмәјимизә көмәк едир.