РӘҺБӘРЛИК ШУРАСЫНЫН МӘКТУБУ
ИСАНЫН нүмунәсинә риајәт едәрәк биз дә Аллаһа «адын мүгәддәс тутулсун», дејә үрәкдән дуа едирик. Јеһованын Шаһидләри кими һәјат сүрмәјимизлә Аллаһын адынын мүгәддәс тутулмасыны үрәкдән арзу етдијимизи ҝөстәририк. Әлбәттә, садәҹә Аллаһын адыны билмәкдән даһа чох шеј тәләб олунур. Биз һәр бир имкандан истифадә едәрәк Онун адына иззәт ҝәтирмәлијик. Һәгигәтән дә, Јеһованын Шаһидләри адыны дашымаг һәр биримиз үчүн бөјүк шәрәфдир (Мат. 6:9; Јешаја 43:10, КМ).
Аллаһын халгы Мәзмур 110:3 ајәсиндә дејилдији кими, Онун әмр етдији иши көнүллү сурәтдә вә ҹанла-башла јеринә јетирирләр. Јашындан вә сосиал мөвгејиндән асылы олмајараг инсанлары тәблиғ ишиндә бөјүк сә’јлә чалышмаға нә тәшвиг едир? Әсас сәбәб, онларын Аллаһа олан мәһәббәти вә сәдагәтидир. Ганунун тәкрары 6:5, 6 ајәләриндә бизә Јеһова Аллаһы ‘бүтүн гәлбимизлә, бүтүн варлығымызла, вар ҝүҹүмүзлә севмәк’ әмр едилир. Үрәкдән ҝәлән мәһәббәт бизи тәшвиг едир ки, вахтымызы, ҝүҹүмүзү вә имканларымызы Аллаһын Падшаһлығынын марагларынын ирәлиләмәсинә сәрф едәк. Бу о демәкдир ки, имканымыз дахилиндә хидмәтдә там иштирак едирик.
Јеһова бәшәријјәтә олан мәһәббәтини Падшаһлыг һаггында хош хәбәрин бүтүн дүнјада јајылмасына рәһбәрлик етмәси илә тәзаһүр етдирир. О, киминсә һәлак олмасыны јох, әксинә, һамынын пис јолундан әл чәкиб јашамаг үчүн Јарадана тәрәф дөнмәсини истәјир (2 Пет. 3:9). Јеһова дејир: ‘Мән пис адамын өлүмүндән јох, онун өз јолундан дөнүб јашамасындан зөвг алырам’ (Јез. 33:11). Бизим хидмәтдә иштирак етмәјимиз Јеһованын инсанлара олан мәһәббәтинин парлаг сүбутудур. Шүбһәсиз ки, буну билмәк, хидмәтдә севинҹ вә мәмнунлуг дујмағымыза көмәк едир.
Јеһоваја олан дәрин мәһәббәтимиз Онун илһамландырдығы Мүгәддәс Јазылара мүнасибәтимиздән дә ҝөрүнмәлидир. Мүгәддәс Китаб олмасајды, биз нә Аллаһы таныјар, нә дә Јагуб 4:8 ајәсинин тәшвиг етдији кими, Аллаһа јахынлаша биләрдик. Биз нә үчүн јашадығымызы вә ҝәләҹәкдә бизи нә ҝөзләдијини билмәздик. Аллаһын Кәламы олмасајды, биз проблемләримизин сәбәбкарынын улу валидејнимиз Адәм олдуғуну билмәздик (Ром. 5:12). Аллаһын Өз јеҝанә Оғлуну бизим уғрумузда фидијә вермәси илә тәзаһүр етдирдији бөјүк мәһәббәтиндән дә хәбәримиз олмазды. Мүгәддәс Китабын сајәсиндә Јеһова Өз билијинин, һикмәтинин вә идракынын бир гисмини бизимлә бөлүшүр. Аллаһын бу ән’амыны, Онун илһамландырдығы Кәламы биз неҹә дә јүксәк гијмәтләндирмәлијик! Бу ҝөзәл ән’ама ҝөрә миннәтдарлыг һисси бизи, Аллаһын сөзләрини охумаг, өјрәнмәк вә онларын үзәриндә дәриндән дүшүнмәк үчүн ‘һәр фүрсәтдән истифадә етмәјә’ тәшвиг едир (Ефес. 5:15, 16; Мәз. 1:1-3). Аллаһын Кәламыны һәр ҝүн охумаг үчүн сәрф етдијимиз вахта һејфимиз ҝәлмәмәлидир. Әксинә, Аллаһа мәһәббәт Ону дәрк етмәкдә вә мәһәббәтимизи даһа да мөһкәмләндирмәкдә бизә көмәк едән Мүгәддәс Китаба јөнәлтмәлидир.
Мүгәддәс Китабдан өјрәнмишик ки, Адәм Јеһова Аллаһа гаршы ҝүнаһ ишләтмәклә, биз дә дахил олмагла, ҝәләҹәк нәслини аҹынаҹаглы вә үмидсиз вәзијјәтә гәрг етди. Лакин Аллаһ нәинки бәшәријјәти азад етмәјә гадирдир, һәтта јер үзү илә бағлы нијјәтинин мүтләг һәјата кечмәси үчүн ҝәрәкли аддымлар да атды (Јар. 3:15).
Шүбһәсиз ки, һамымыз Аллаһымызын е’ҹазкар адыны мүгәддәс тутмағы үрәкдән арзулајырыг. Јеһованын ҝөзәл шәхсијјәти илә таныш олдугҹа Онунла вә тәшкилаты илә бирҝә чалышыб бөјүк адыны вә нијјәтини һамыја чатдырмаг истәјирик. Јеһованын бизи хејир-дуаландырдығына вә биздән разы олдуғуна, һәмчинин гаршыда бизи әбәди һәјат ҝөзләдијинә әминик.
Әзиз гардашлар вә баҹылар, биз — Рәһбәрлик шурасынын үзвләри сизи севир вә ‘Бөјүк мәшәггәтә’ гәдәр галан вахт әрзиндә хош хәбәри даһа чох адама чатдырмаг үчүн ҝөстәрдијиниз сәʼји јүксәк гијмәтләндиририк (Вәһј 7:14). Бунун сајәсиндә, онларын да, Аллаһ вә Мәсиһ һаггында әбәди һәјата апаран билији алмаг имканы јараныр (Јәһ. 17:3).
Сизин гардашларыныз, Јеһованын Шаһидләринин Рәһбәрлик шурасы