1, 2. Рајон нәзарәтчиләри бир чох јығынҹагларда нәји мүшаһидә етмишләр?

РАЈОН нәзарәтчиси ағсаггаллар шурасы илә ҝөрүшүнү битирмәк үзрәдир. О, чалышган, бәзиси һәтта атасы јашында олан бу ағсаггаллара меһрибанлыгла бахыр. Бунунла белә, ону нараһат едән бир мәгам барәдә онлара суал верир: «Гардашлар, јығынҹагдакы гардашлара тәлим вермәк үчүн нә етмисиниз?» Ағсаггалларын јахшы јадындадыр, рајон нәзарәтчиси сонунҹу дәфә баш чәкәндә тапшырмышды ки, јығынҹагдакы гардашлара тәлим вермәјә даһа чох фикир версинләр. Ағсаггаллардан бири дејир: «Сөзүн ачығы, чох аз иш ҝөрмүшүк». Диҝәр ағсаггаллар да башларыны тәрпәдәрәк онун сөзүнү тәсдигләјирләр.

² Әҝәр сән мәсиһи ағсаггалсанса, јәгин һәмин ҝөрүшдәки вәзијјәт сәнә танышдыр. Бүтүн дүнјадакы рајон нәзарәтчиләри фикир вермишләр ки, бир чох јығынҹагларда ағсаггаллар јығынҹағын гејдинә галмагда онлара көмәк етсинләр дејә һәм ҝәнҹ, һәм дә јашлы гардашлара тәлим вермәк үчүн чох иш ҝөрмәлидирләр. Бу, асан дејил. Ҝәлин ҝөрәк нијә?

3. а) Мүгәддәс Јазылар тәлим вермәјин ваҹиблијини неҹә ҝөстәрир вә нәјә ҝөрә бу, һамымызы марагландырмалыдыр? (Һашијәјә бахын.) б) Нәјә ҝөрә бәзи ағсаггаллар үчүн гардашлара тәлим вермәк чәтиндир?

³ Сөзсүз, сән бир ағсаггал кими баша дүшүрсән ки, гардашлара тәлим вермәк ваҹибдирa. Билирсән ки, јығынҹагларын руһән мөһкәм олмасы вә јени јығынҹагларын јаранмасы үчүн даһа чох гардаша еһтијаҹ вар. (Әшија 60:22 ајәсини охујун.) Аллаһын Кәламы да сәни тәлим вермәјә тәшвиг едир. (2 Тимутијә 2:2 ајәсини охујун.) Буна бахмајараг, јухарыда хатырланан ағсаггаллар кими, буну етмәк сәнин үчүн чәтин ола биләр. Аилә, иш, јығынҹаг мәсулијјәтләри вә диҝәр тәхирәсалынмаз ишләрә ҝөрә јығынҹагдакы гардашлара тәлим вермәјә вахтын галмаја биләр. Бунунла белә, ҝәлин ҝөрәк гардашлара тәлим вермәк ишинә нә дәрәҹәдә ҹидди јанашылмалыдыр.

ТӘЛИМ ВЕРМӘК ТӘҸИЛИДИР

4. Гардашлара тәлим вермәјин тәхирә салынмасына нә сәбәб ола биләр?

⁴ Бәзи ағсаггалларын тәлим вермәјә вахт тапа билмәмәләринә нә сәбәб олур? Бәзиләри дүшүнә биләр: «Тәлим вермәк ваҹибдир, лакин јығынҹағын тәхирәсалынмаз ишләри гәдәр тәҹили дејил. Әҝәр гардашлара тәлим вермәји бир мүддәт тәхирә салсам, јығынҹаға һеч нә олмаз». Дүздүр, јығынҹагда дәрһал һәлл едиләси ишләр вар, анҹаг тәлим вермәк иши јубадылса, јығынҹағын руһанилији зәрәр ҝөрәр.

5, 6. Сүрүҹүнүн нүмунәсиндән нә өјрәнирик вә буну гардашлара тәлим вермәјә неҹә шамил етмәк олар?

⁵ Ҝәлин бир нүмунәјә бахаг. Сүрүҹү билир ки, автомобили вә мүһәррики ишләк вәзијјәтдә сахламаг үчүн јағы мүнтәзәм дәјишмәлидир. Бунунла белә, о, фикирләшә биләр ки, јағы дәјишмәк јанаҹаг долдурмаг гәдәр тәҹили дејил. Ахы јанаҹаг долдурмаса, машын дајанар, јары јолда галар. Сүрүҹү фикирләшә биләр: «Инди јағы дәјишмәјә вахт јохдур, галсын сонраја. Онсуз да мүһәррик һәлә бир мүддәт ишләјәҹәк». Амма бу, тәһлүкәлидир. Әҝәр сүрүҹү ҝүнү-ҝүнә сатыб мүһәрријин јағыны дәјишмәсә, автомобил бирдәфәлик дајанаҹаг. Онда автомобили тәмир едиб сүрмәк үчүн чохлу вахт вә пул лазым олаҹаг. Бундан нә нәтиҹә чыхарырыг?

⁶ Ағсаггалларын өһдәсинә дүшән бир чох мәсәләләр дәрһал һәлл едилмәлидир. Әкс һалда, јығынҹаг зијан ҝөрәр. Нүмунәдәки сүрүҹү автомобилин чәнинә вахтлы-вахтында јанаҹаг долдурдуғу кими, ағсаггаллар да «даһа ваҹиб шејләри ајырд» етмәлидирләр (Филип. 1:10). Анҹаг бәзи ағсаггалларын башы ваҹиб ишләрә о гәдәр гарыша биләр ки, гардашлара тәлим вермәјә, неҹә дејәрләр, мүһәрријә гуллуға биҝанә јанашарлар. Ағсаггаллар гардашлара тәлим вермәји елә һеј тәхирә салсалар, ҝеҹ-тез јығынҹағын ишләрини ҝөрмәјә јарарлы гардашлар чатышмајаҹаг.

7. Гардашлара тәлим верән ағсаггаллара неҹә јанашмалыјыг?

⁷ Беләликлә, биз дүшүнмәмәлијик ки, тәлим вермәк иши елә дә тәҹили дејил. Узагҝөрәнлик едиб тәҹрүбәси аз олан гардашлара тәлим верән ағсаггаллар мүдрик нөкәрбашыдырлар вә бүтүн јығынҹаг үчүн чох дәјәрлидирләр. (1 Бутрус 4:10 ајәсини охујун.) Бәс гардашлара верилән тәлимин јығынҹаға фајдасы нәдир?

ҜӘЛӘҸӘЈӘ СӘРМАЈӘ

8. а) Һансы хүсусијјәт вә ҝерчәклик ағсаггаллары гардашлара тәлим вермәјә тәшвиг етмәлидир? б) Бөјүк тәләбат олан әразидә хидмәт едән ағсаггалларын үзәринә һансы тәхирәсалынмаз иш дүшүр? («Тәхирәсалынмаз иш» чәрчивәсинә бахын.)

⁸ Һәтта ән тәҹрүбәли ағсаггаллар белә тәвазөкарлыгла етираф етмәлидирләр ки, вахт кечдикҹә јаш өз сөзүнү дејәҹәк вә онлар јығынҹаг үчүн чох шеј едә билмәјәҹәкләр (Мик. 6:8). Һәмчинин онлар бу реаллығы да гәбул етмәлидирләр ки, ола биләр, «вахт вә тәсадүф» нәтиҹәсиндә јығынҹағын ишләрини даһа әввәлки кими ҝөрә билмәсинләр (Ваиз 9:11, 12; Јаг. 4:13, 14). Демәли, Јеһованын сүрүсүнүн јахшылығыны дүшүнән узагҝөрән ағсаггаллар сәдагәтлә хидмәт етдикләри узун илләрин тәҹрүбәсини јери дүшдүкҹә ҹаван гардашларла бөлүшмәлидирләр. (Зәбур 71:17, 18 ајәләрини охујун.)

9. Ҝәләҹәкдә баш верәҹәк һансы һадисәјә ҝөрә гардашлара тәлим вермәк олдугҹа ваҹибдир?

⁹ Гардашлара тәлим верән ағсаггалларын јығынҹаг үчүн дәјәрли олмасынын даһа бир сәбәби вар: онлар јығынҹағын мүдафиәсини ҝүҹләндирирләр. Неҹә? Онларын тәлим вермәсинин сајәсиндә даһа чох гардаш тәкҹә инди јох, хүсусилә дә, бөјүк мүсибәтдә јығынҹағын мөһкәм вә вәһдәтдә олмасына көмәк едә биләҹәк (Һизг. 38:10—12; Мик. 5:5, 6). Буна ҝөрә дә, әзиз ағсаггаллар, хаһиш едирик, ҝүнү бу ҝүндән гардашлара мүнтәзәм олараг тәлим верин.

10. Гардашлара тәлим вермәјә вахт тапсын дејә ағсаггал нә етмәлидир?

¹⁰ Биз баша дүшүрүк ки, јығынҹағын ваҹиб ишләрини ҝөрдүкләри үчүн ағсаггалларын бош вахты галмыр. Амма ағсаггал бу ишләрә сәрф етдији вахтын бир гисмини гардашлара тәлим вермәјә ајырмалыдыр (Ваиз 3:1). Бунунла о, ҝәләҹәјә сәрмајә гојаҹаг.

ЈАХШЫ ЗӘМИН ЈАРАДЫН

11. а) Мүхтәлиф өлкәләрдән олан ағсаггалларын мәсләһәтләриндә мараглы мәгам нәдир? б) Мәсәлләр 15:22 ајәсинә әсасән нәјә ҝөрә ағсаггалларын вердији мәсләһәти нәзәрдән кечирмәк фајдалы олаҹаг?

¹¹ Гардашлара руһани ҹәһәтдән бөјүмәјә көмәк едән бир груп ағсаггала неҹә тәлим вердикләри барәдә бу јахынларда суал верилибb. Бу ағсаггаллар мүхтәлиф өлкәләрдән олсалар да, мараглыдыр ки, онларын вердији мәсләһәтләр чох охшардыр. Бу, нәдән хәбәр верир? Мүгәддәс Китаба әсасланан тәлим, һәвари Булусун дөврүндә олдуғу кими, «һәр јердә, бүтүн јығынҹагларда» өјрәнәнләр үчүн фајдалыдыр (1 Кор. 4:17). Буна ҝөрә дә бу вә нөвбәти мәгаләдә һәмин ағсаггалларын вердији бәзи мәсләһәтләри нәзәрдән кечирәҹәјик (Мәс. 15:22). Асан олсун дејә, бу мәгаләләрдә тәлим верәнләр «мүәллим», тәлим аланлар исә «шаҝирд» адландырылаҹаг.

12. Мүәллим әввәлҹә нә етмәлидир вә нә үчүн?

¹² Тәлим вермәк үчүн мүәллим јахшы зәмин јаратмалыдыр. Бағбан тохум әкмәздән әввәл торпағы белләдији вә ја шумладығы кими, мүәллим дә шаҝирдә јени шејләр өјрәтмәздән әввәл онун үрәјини һазырламалы, јахуд үрәјиндә һәвәс ојатмалыдыр. Бәс мүәллим тәлим вермәк үчүн јахшы зәмини неҹә јарада биләр? Бу ишдә гәдимдә јашамыш бир пејғәмбәрин нүмунәси көмәк едә биләр. Ҝәлин ҝөрәк о, нә етмишди.

13-15. а) Ишмуил пејғәмбәр һансы тапшырығы алмышды? б) О, бу тапшырығы неҹә иҹра етди? (Мәгаләнин әввәлиндәки шәклә бахын.) в) Нә үчүн ағсаггаллар Ишмуилин нүмунәсинә диггәт јетирмәлидир?

¹³ Тәхминән 3000 ил бундан габаг Јеһова аһыл јашлы Ишмуил пејғәмбәрә демишди: «Сабаһ тәхминән бу вахт сәнин јанына Бинјамин торпағындан бир адам ҝөндәрәҹәјәм. Ону халгым Исраилин башчысы олараг мәсһ ет» (1 Ишм. 9:15, 16). Ишмуил баша дүшүрдү ки, о, артыг халга башчылыг етмәјәҹәк. О, Јеһованын бујруғу илә өз јеринә башгасыны мәсһ етмәли иди. Јәгин пејғәмбәр фикирләширди ки, ону бу ишә неҹә һазырласын. О ҝөтүр-гој едиб бир тәдбир төкдү.

¹⁴ Ертәси ҝүн Ишмуил Талуту ҝөрәндә Јеһова она деди: «Дедијим адам будур». Онда Ишмуил планлашдырдығы кими һәрәкәтә кечди. О, Талуту наһара дәвәт етди. Талутла нөкәрини јахшы јердә отуздурду вә әтин ән јахшы тикәсини онун габағына гојуб деди: «Је. Бу пај сәнин үчүн ајрылыб». Сонра Ишмуил јолбоју Талутла сөһбәт едә-едә ону евинә апарды. Дадлы јемәк вә хош ҝәзинти онларын арасында јахшы мүнасибәт јаратды. Ишмуил јаранан хош мүнасибәтдән истифадә едиб Талуту евинин дамына дәвәт етди вә јатана гәдәр ахшамын сәринлијиндә онунла «сөһбәтини давам етдирди». Сәһәри ҝүн Ишмуил Талуту мәсһ едиб өпдү вә она әлавә ҝөстәришләр верди. Бундан сонра Талуту јола салды. Беләҹә, пејғәмбәр Талуту сонракы һадисәләрә һазырлады (1 Ишм. 9:17—27; 10:1).

¹⁵ Дүздүр, Ишмуил Талуту халгын башчысы кими мәсһ етмишди. Бу, гардаша ағсаггал вә ја јығынҹаг хидмәтчиси олмасы үчүн тәлим вермәкдән фәргли шејдир. Бунунла белә, буҝүнкү ағсаггаллар Ишмуилдән чох шеј өјрәнә биләрләр. Ҝәлин бунлардан икисини нәзәрдән кечирәк.

ҺӘВӘСЛИ МҮӘЛЛИМ ВӘ ӘСИЛ ДОСТ ОЛУН

16. а) Халг падшаһ истәјәндә Ишмуил һансы һиссләри кечирди? б) Ишмуил Талуту һансы әһвал-руһијјә илә мәсһ етди?

¹⁶ Ҹандәрди јох, һәвәслә един. Ишмуил ешидәндә ки, исраиллиләр өзләринә падшаһ истәјир, мәјус олду, она елә ҝәлди ки, халг ону рәдд едир (1 Ишм. 8:4—8). О, һеч ҹүр халгын тәләбини јеринә јетирмәк истәмирди. Буна ҝөрә Јеһова дүз үч дәфә она деди ки, халгын истәјини јеринә јетирсин (1 Ишм. 8:7, 9, 22). Буна рәғмән, Ишмуил онун јерини тутаҹаг адама үрәјиндә нә гәзәбләнди, нә дә кин сахлады. Јеһова Талуту мәсһ етмәји бујуранда пејғәмбәр буну борҹ һиссиндән ирәли ҝәләрәк, ҹандәрди јох, үрәкдән, һәвәслә јеринә јетирди.

17. Ағсаггаллар Ишмуилдән нәдә өрнәк алырлар вә бу, онларда һансы һиссләри доғурур?

¹⁷ Ишмуил кими, бу ҝүн дә тәҹрүбәли ағсаггаллар тәлим вердикләри гардашлара хош мүнасибәт бәсләјирләр (1 Бут. 5:2). Бу ҹүр ағсаггаллар гардашлара һәвәслә тәлим верирләр. Јығынҹагдакы бәзи мәсулијјәтләри онлара өтүрмәли олаҹагларындан горхмурлар. Ҹомәрд мүәллимләр һәвәслә өјрәнән шаҝирдләрә рәгиб кими јох, әмәкдаш кими, јығынҹаг үчүн дәјәрли һәдијјә кими бахырлар (2 Кор. 1:24; Ибр. 13:16). Бу ҹүр хејирхаһ мүәллимләр тәлим вердикләри гардашларын јығынҹаға фајда вердијини ҝөрәндә үрәкләри даға дөнүр! (Һәв. 20:35).

18, 19. Ағсаггал шаҝирдин үрәјини неҹә һазырлаја биләр вә нәјә ҝөрә бу, чох ваҹибдир?

¹⁸ Садәҹә мүәллим олма, һәм дә дост ол. Ишмуил пејғәмбәр Талуту ҝөрәндә тәләм-тәләсик јағы башына төкүб ону јола сала биләрди. Дүздүр, Талут падшаһ кими мәсһ олунаҹагды, амма тамамилә һазырлыгсыз олаҹагды. Ишмуил исә вахт ајырыб јаваш-јаваш онун үрәјини һазырлады. Дадлы јемәкдән, хош ҝәзинтидән, узун сөһбәтдән вә истираһәтдән сонра пејғәмбәр һисс еләди ки, артыг Талуту мәсһ етмәјин вәдәси јетишиб.

¹⁹ Ејнилә, бу ҝүн дә мүәллимләр тәлим верәндә әввәлҹә вахт ајырыб хош аб-һава јаратмалы, шаҝирдлә достлашмалыдыр. Јашадыглары өлкәдән, јерли шәраитдән вә адәт-әнәнәдән асылы олараг, ағсаггаллар мүхтәлиф үсулларла хош мүнасибәт јарада биләрләр. Анҹаг һарада јашамағындан асылы олмајараг, ишин чох олдуғу һалда белә, шаҝирдә вахт ајырырсанса, санки, она дејирсән: «Сән мәним үчүн дәјәрлисән». (Ромалылара 12:10 ајәсини охујун.) Һәвәслә өјрәнән һәр бир шаҝирд әмәлдә ҝөстәрилән бу мәһәббәти дәрһал дујаҹаг вә чох гијмәтләндирәҹәк.

20, 21. а) Јахшы мүәллим неҹә олмалыдыр? б) Нөвбәти мәгаләдә нәји арашдыраҹағыг?

²⁰ Ағсаггаллар, јадда сахлајын ки, јахшы мүәллим тәкҹә өјрәтмәји севмир, һәмчинин өјрәтдији адамы да севир. (Јәһја 5:20 ајәси илә мүгајисә един.) Шаҝирд мүәллимдәки бу ваҹиб ҹәһәти дәрһал дујур вә бу, онун тәлимә мүнасибәтинә бөјүк тәсир ҝөстәрир. Она ҝөрә дә, әзиз ағсаггаллар, тәлим верәркән садәҹә мүәллим олмајын, дост олун (Мәс. 17:17; Јәһ. 15:15).

²¹ Шаҝирдин үрәјини һазырладыгдан сонра ағсаггал она лазыми шејләри өјрәтмәлидир. Бәс о, һансы үсуллардан истифадә едә биләр? Буну нөвбәти мәгаләдә арашдыраҹағыг.

1. а) Аллаһын гәдимдә јашамыш хидмәтчиләри тәлимлә бағлы нәји билирдиләр вә бу, бизим ҝүнләр үчүн нәјә ҝөрә актуалдыр? б) Бу мәгаләдә нәји мүзакирә едәҹәјик?

АЛЛАҺЫН гәдимдә јашамыш хидмәтчиләри билирдиләр ки, тәлим уғурун ачарыдыр. Мәсәлән, Ибраһим пејғәмбәр «дөјүшмәји баҹаран», јәни тәлим алмыш гулларыны ҝөтүрүб Луту хилас етмәјә ҝетмиш вә зәфәр чалмышды (Јар. 14:14—16). Давуд падшаһын ҝүнләриндә бәзи лавилиләр Аллаһын евиндә «Јеһоваја мәзмур охумаг үчүн тәлим [алмышдылар]» вә онлар Јеһова Аллаһа һәмд-сәна едирдиләр (1 Салн. 25:7). Бу ҝүн биз Шејтанла вә онун тәрәфдарлары илә руһани мүһарибә апарырыг (Ефес. 6:11—13). Ејни заманда вар ҝүҹүмүзлә чалышырыг ки, Јеһова Аллаһы мәдһ едәк (Ибр. 13:15, 16). Буна ҝөрә дә Аллаһын кечмишдәки хидмәтчиләри кими уғур газанмаг истәјириксә, биз дә тәлим алмалыјыг. Јеһова јығынҹагда тәлим вермәк мәсулијјәтини ағсаггаллара һәвалә едиб (2 Тим. 2:2). Тәҹрүбәли ағсаггаллар гардашлара јығынҹағын гајғысына галмаг үчүн тәлим верирләр. Бәс онлар һансы үсуллардан истифадә едирләр?

ШАҜИРДИ РУҺАНИ ҸӘҺӘТДӘН МӨҺКӘМЛӘНДИР

2. Шаҝирдә јени шејләр өјрәтмәздән габаг ағсаггал нә етсә јахшы оларды вә нә үчүн?

² Ағсаггалы бағбанла мүгајисә етмәк олар. Бағбан тохум әкмәздән әввәл торпағын мәһсулдарлығыны артырмаг үчүн она ҝүбрә вурур. Буна бәнзәр тәрздә, тәҹрүбәси аз олан гардаша нә исә өјрәтмәздән әввәл ағсаггал онунла Мүгәддәс Јазылардан бәзи фикирләри бөлүшә биләр. Бу, һәмин гардаша көмәк едәҹәк ки, өјрәнәҹәји шејләри јеринә јетирмәјә һазыр олсун (1 Тим. 4:6).

3. а) Шаҝирдлә сөһбәт едәркән Исанын Марк 12:29, 30 ајәләриндәки сөзләриндән неҹә истифадә етмәк олар? б) Ағсаггалын шаҝирд үчүн дуа етмәсинин она һансы фајдасы ола биләр?

³ Падшаһлыг һагда һәгигәтин шаҝирдин дүшүнҹәләринә вә һәрәкәтләринә нә дәрәҹәдә тәсир етдијини билмәк үчүн ондан соруша биләрсән: «Јеһова Аллаһа һәср олунмағын һәјатына неҹә тәсир едиб?» Бу суалын сајәсиндә инсанын бүтүн варлығы илә хидмәт етмәсинин нә демәк олдуғу барәдә мараглы сөһбәт алына биләр. (Марк 12:29, 30 ајәләрини охујун.) Сөһбәтин сонунда исә дуа едиб Јеһовадан шаҝирд үчүн мүгәддәс руһ диләјә биләрсән. Белә ки, ахыраҹан тәлим алмаг үчүн онун мүгәддәс руһун көмәјинә еһтијаҹы вар. Гардаш да сәнин онун үчүн дуа етдијини ҝөрәндә чох руһланаҹаг!

4. а) Мүгәддәс Китабын һансы парчалары шаҝирдә руһани ҹәһәтдән инкишаф етмәјә көмәк едә биләр? Нүмунә чәкин. б) Ағсаггаллар гардашлара тәлим верәркән мәгсәдләри нә олмалыдыр?

⁴ Тәлим вермәјә башлајаркән шаҝирдә хидмәтә һазыр, етибарлы вә тәвазөкар олмағын ваҹиблијини ҝөстәрмәк үчүн Мүгәддәс Китабдан бәзи парчалары онунла мүзакирә ет (1 Пад. 19:19—21; Нәһ. 7:2; 13:13; Һәв. 18:24—26). Торпаг үчүн ҝүбрә нә дәрәҹәдә ваҹибдирсә, бу кими кејфијјәтләр дә шаҝирд үчүн о дәрәҹәдә ваҹибдир. Бу кејфијјәтләр руһани инкишафы сүрәтләндирир. Франсадан олан Жан-Клод адлы бир ағсаггал дејир: «Тәлим верәркән әсас мәгсәдим шаҝирдә руһани дүшүнҹәјә саһиб олмаға көмәк етмәкдир. Фүрсәт дүшәндә она мүәјјән ајәләри охујурам ки, Аллаһын Кәламындакы ҝөзәлликләри ҝөрмәси үчүн ҝөзләри ачылсын» (Зәб. 119:18). Бәс шаҝирдин руһанилијини даһа неҹә мөһкәмләндирмәк олар?

МӘГСӘДЛӘР ВӘ СӘБӘБЛӘР

5. а) Шаҝирдлә руһани мәгсәдләр барәдә данышмаг нәјә ҝөрә ваҹибдир? б) Ағсаггаллар јенијетмәләрә нәјә ҝөрә тәлим вермәлидир? (Һашијәјә бахын.)

⁵ Шаҝирддән руһани мәгсәдләри барәдә соруш. Әҝәр һеч бир мәгсәди јохдурса, она гаршысына әлчатан мәгсәд гојмаға көмәк ет. Бир вахтлар өз гаршына гојдуғун һансыса бир руһани мәгсәд барәдә даныш вә бу мәгсәдә чатанда неҹә севиндијини бөлүш. Бу үсул садә ҝөрүнсә дә, чох еффективдир. Африкада ағсаггал вә пионер кими хидмәт едән Виктор дејир: «Мән ҝәнҹ оланда бир ағсаггал мәнә мәгсәдләрим барәдә бир нечә суал вермишди. Бу суаллар мәни хидмәтим барәдә ҹидди дүшүнмәјә тәшвиг етди». Тәҹрүбәли ағсаггаллар гардашлара јенијетмә јашларындан тәлим вермәјин — онлара јығынҹагда јашларына ујғун ишләр тапшырмағын ваҹиблијини вурғулајырлар. Бунун сајәсиндә јенијетмәләр мүстәгил һәјата гәдәм гојанда, һабелә манеәләрлә үзләшәндә руһани мәгсәдләрә ҹан атаҹагларa. (Зәбур 71:5, 17 ајәләрини охујун.)

6. Исанын тәлим вермәк үсулунда диггәтәлајиг мәгам һансыдыр?

⁶ Бундан башга, шаҝирдә тәкҹә нә етмәли олдуғуну јох, һәмчинин нә үчүн етмәли олдуғуну изаһ етсән, бу да онун хидмәтә һәвәсини артыраҹаг. Һәр һансы иши ҝөрмәјин нә үчүн ваҹиб олдуғуну демәклә сән Даһи Устад Исаны тәглид етмиш олурсан. Мисал үчүн, Иса Мәсиһ һәвариләринә шаҝирд һазырламаг тапшырығыны вермәздән әввәл она нә үчүн итаәт етмәли олдугларыны демишди: «Ҝөјдә вә јердә бүтүн һакимијјәт мәнә верилиб». Даһа сонра исә әлавә етмишди: «Буна ҝөрә дә ҝедин вә бүтүн халгларын ичиндә шаҝирд һазырлајын» (Мәт. 28:18, 19). Бәс сән Иса кими неҹә тәлим верә биләрсән?

7, 8. а) Ағсаггаллар Иса кими неҹә тәлим верә биләрләр? б) Шаҝирди тәрифләмәк нә үчүн ваҹибдир? в) Һансы мәсләһәтләр тәлим вермәк ишиндә ағсаггаллара көмәк едә биләр? («Гардашлара тәлим вермәјин үсуллары» адлы чәрчивәјә бахын.)

⁷ Шаҝирдә һансыса иш тапшыранда Мүгәддәс Јазылар әсасында бу ишин ваҹиблијини она баша сал. Бунунла она Мүгәддәс Китаб принсипләри әсасында дүшүнмәјә көмәк едәҹәксән. Мисал үчүн, тутаг ки, гардаша Падшаһлыг залынын ҝиришиндә тәмизлијин вә тәһлүкәсизлијин гејдинә галмағы тапшырмысан. Онда она Титус 2:10 ајәси әсасында изаһ едә биләрсән ки, ҝөрдүјү иш «Хиласкарымыз Аллаһын тәлимини» неҹә бәзәјир. Һәмчинин шаҝирди јығынҹагдакы јашлылар һагда вә ҝөрдүјү ишин јашлылара неҹә көмәк едәҹәји барәдә дүшүнмәјә тәшвиг ет. Гардаша тәлим верәркән бу ҹүр сөһбәтләр етсән, о, гајда-ганунлар һагда јох, адамлар һагда дүшүнәҹәк. Етдији хидмәтин баҹы-гардашлара неҹә фајда ҝәтирдијини ҝөрмәк гардашы севиндирәҹәк.

⁸ Һәмчинин шаҝирд вердијин мәсләһәтләрә әмәл едәндә ону тәрифләмәји унутма. Бу, чох ваҹибдир! Су биткини неҹә ҹанландырырса, сәмими тәриф дә шаҝирдә елә гол-ганад верәҹәк. (Мәтта 3:17 ајәси илә мүгајисә един.)

ДИҜӘР ЧӘТИНЛИК

9. а) Варлы өлкәләрдә ағсаггаллар һансы чәтинликлә үзләширләр? б) Нәјә ҝөрә бәзи ҝәнҹләрин һәјатында һәгигәт биринҹи јердә дејил?

⁹ Варлы өлкәләрдә јашајан ағсаггаллар диҝәр бир чәтинликлә дә гаршылашырлар. Белә ки, ијирми-отуз јашларында олан гардашларда јығынҹағын ишләринә мараг ојатмаг чәтин олур. Биз тәхминән 20 гәрб өлкәсиндә хидмәт едән тәҹрүбәли ағсаггаллардан бәзи ҝәнҹ гардашларын јығынҹагда үзәрләринә нәјә ҝөрә мәсулијјәт ҝөтүрмәк истәмәдикләрини сорушдуг. Ән чох бу ҹавабы алдыг: онлардан бәзиләрини ушаглыгдан һеч ким руһани мәгсәдләрә ҹан атмаға тәшвиг етмәјиб. Һәтта бәзиләри белә мәгсәдләрә мејилли олсалар да, валидејнләри онлары дүнјәви мәгсәдләрә јөнәлдиб. Һәгигәт һеч вахт бу ҝәнҹләрин һәјатында биринҹи јердә олмајыб (Мәт. 10:24).

10, 11. а) Ағсаггал мәсулијјәтләрә ҹан атмајан гардаша неҹә көмәк едә биләр? б) Ағсаггал белә гардашла Мүгәддәс Јазылардан һансы фикирләри мүзакирә едә биләр вә нә үчүн? (Һашијәјә бахын.)

¹⁰ Әҝәр гардаш мәсулијјәтләрә ҹан атмырса, онун дүшүнҹәсини дәјишмәк үчүн чохлу ҝүҹ сәрф етмәк вә сәбирли олмаг лазым ҝәләҹәк. Бу, мүтләг өз бәһрәсини верәҹәк. Бағбан бөјүјән ағаҹын ҝөвдәсини јаваш-јаваш дүзәлдә билдији кими, сән дә бәзи гардашлара мәсулијјәтләрә мүнасибәтләрини дәјишмәли олдугларыны јаваш-јаваш баша сала биләрсән.

¹¹ Бунун үчүн гардашла достлашмаға чалыш. Она јығынҹаға лазым олдуғуну баша сал. Сонра вахташыры онунла мүәјјән ајәләри мүзакирә ет, һәмчинин она Јеһова Аллаһа һәср олунмасы үзәриндә дүшүнмәјә көмәк ет (Ваиз 5:4; Әшј. 6:8; Мәт. 6:24, 33; Лука 9:57—62; 1 Кор. 15:58; 2 Кор. 5:15; 13:5). Ондан соруша биләрсән: «Өзүнү Јеһоваја һәср едәндә Она нә сөз вермишдин?» Нөвбәти суаллары верәрәк онун үрәјинә тәсир етмәјә чалыш: «Неҹә фикирләширсән, сән вәфтиз олан ҝүн Јеһова һансы һиссләри кечирирди?» (Мәс. 27:11). «Бәс Шејтан нә һисс едирди?» (1 Бут. 5:8). Унутма ки, Мүгәддәс Китабдан диггәтлә сечиб охудуғун ајәләр гардаша ҝүҹлү тәсир едә биләрb. (Ибраниләрә 4:12 ајәсини охујун.)

ШАҜИРДЛӘР, САДИГ ОЛУН

12, 13. а) Әлјәсәдә бир шаҝирд кими һансы әһвал-руһијјә вар иди? б) Јеһова Әлјәсәни садиглијинә ҝөрә неҹә мүкафатландырды?

¹² Ҝәнҹләр, јығынҹағын сизин көмәјинизә еһтијаҹы вар! Һансы әһвал-руһијјә сизә хидмәтдә уғур газанмаға көмәк едәҹәк? Ҝәлин бу суала ҹаваб вермәк үчүн кечмишдә јашамыш бир шаҝирдин һәјатындан бәзи һадисәләрә нәзәр салаг.

¹³ Тәхминән 3000 ил бундан әввәл Илјас пејғәмбәр ҹаван Әлјәсәни она хидмәт етмәјә дәвәт етмишди. Әлјәсә дәрһал бу дәвәти гәбул етди вә јашлы пејғәмбәрә сәдагәтлә нөкәрчилик етди (2 Пад. 3:11). Әлјәсә тәхминән алты ил тәлим аландан сонра Илјас пејғәмбәр Исраилдә ишинин баша чатдығыны она билдирди. Илјас пејғәмбәр јахшы тәлим алмыш јолдашына деди ки, даһа онун ардынҹа ҝәлмәсин. Амма Әлјәсә үч дәфә Илјаса ондан ајрылмајаҹағыны сөјләди. О, өз устадынын јанында мүмкүн гәдәр чох олмаг истәјирди. Јеһова да садиглијинә вә вәфалы олмасына ҝөрә Әлјәсәни мүкафатландырды, она Илјасын мөҹүзәви шәкилдә ҝетмәсини ҝөстәрди (2 Пад. 2:1—12).

14. а) Тәлим алан гардашлар Әлјәсәјә неҹә охшаја биләрләр? б) Нәјә ҝөрә шаҝирдләрин садиг олмасы ваҹибдир?

¹⁴ Бәс сиз Әлјәсәјә неҹә охшаја биләрсиниз? Һәр бир тапшырығы, һәтта ашағы һесаб едиләни белә дәрһал гәбул един. Мүәллиминизә дост кими бахын вә сизин үчүн чәкдији зәһмәти гијмәтләндирдијинизи она билдирин. Сиз бу әһвал-руһијјә илә она, санки, дејирсиниз: «Сәндән ајрылмајаҹағам». Ән ваҹиби, алдығыныз һәр бир тапшырығы сәдагәтлә јеринә јетирин. Бу, нәјә ҝөрә ваҹибдир? Чүнки сиз садиг вә етибарлы олдуғунузу ҝөстәрдијиниз тәгдирдә ағсаггаллар әмин олаҹаглар ки, Јеһова сизә јығынҹагда әлавә мәсулијјәтләр верилмәсини истәјир (Зәб. 101:6; 2 Тимутијә 2:2 ајәсини охујун).

ҺӨРМӘТ ҜӨСТӘРИН

15, 16. а) Әлјәсә өз мүәллиминә һөрмәт етдијини неҹә ҝөстәрди? (Мәгаләнин әввәлиндәки шәклә бахын.) б) Пејғәмбәрләр Әлјәсәјә нәјә ҝөрә етибар етдиләр?

¹⁵ Илјасын давамчысы олан Әлјәсәнин нүмунәси һәмчинин ҝөстәрир ки, гардашларын тәҹрүбәли ағсаггаллара һөрмәт ҝөстәрмәси чох ваҹибдир. Илјасла Әлјәсә Әриһада бир дәстә пејғәмбәрә баш чәкиб Иордан чајына тәрәф ҝетдиләр. Чаја чатанда «Илјас палтарыны чыхарыб бүрмәләди вә суја вурду, сулар ортадан ајрылды». Онлар гуру јердән чајы кечәндән сонра «сөһбәт едә-едә» јолларына давам етдиләр. Ајдындыр ки, Әлјәсә артыг һәр шеји билдијини дүшүнмүрдү. Илјасын јанында олдуғу сон дәгигәјә кими о, устадынын ағзындан чыхан һәр сөзү үрәјинә һәкк едирди. Сонра Илјас гасырғанын ичиндә ҝөјә галхды. Бундан сонра Әлјәсә Иордан чајына гајытды вә Илјасын палтарыны суја вуруб деди: «Илјасын Аллаһы Јеһова һарададыр?» Сулар бу дәфә дә ајрылды (2 Пад. 2:8—14).

¹⁶ Диггәт јетирдинизсә, Әлјәсәнин ҝөстәрдији илк мөҹүзә Илјасын ҝөстәрдији сонунҹу мөҹүзә илә ејни иди. Бу, нәдән хәбәр верир? Әлјәсә дүшүнмүрдү ки, артыг сүкан онун әлиндәдир вә о, дәрһал дәјишиклик етмәлидир. Әксинә, Илјасын гојдуғу јолла ҝедәрәк Әлјәсә мүәллиминә һөрмәт етдијини ҝөстәрди. Елә буна ҝөрә дә диҝәр пејғәмбәрләр она етибар етдиләр (2 Пад. 2:15). Әлјәсә пејғәмбәр кими хидмәт етдији 60 ил әрзиндә Јеһованын көмәји илә Илјасдан даһа чох мөҹүзә ҝөстәрди. Бәс бу ҝүн тәлим алан гардашлар бундан нә өјрәнә биләрләр?

17. а) Бу ҝүн шаҝирдләр Әлјәсәјә неҹә бәнзәјә биләрләр? б) Ҝәләҹәкдә Јеһова садиг шаҝирдләрдән неҹә истифадә едә биләр?

¹⁷ Јығынҹагда бир гәдәр мәсулијјәт алан кими дүшүнмәјин ки, мүтләг дәјишиклик етмәли, һәр шеји әввәлкиндән тамамилә фәргли етмәлисиниз. Дәјишиклијин лазым олмасы сизин истәјинизә ҝөрә јох, јығынҹағын тәләбатларына вә Јеһованын тәшкилатындан ҝәлән ҝөстәришә әсасән мүәјјән едилир. Әлјәсә өз һәрәкәтләри илә диҝәр пејғәмбәрләрин етибарыны газандығы вә Илјасын јолу илә ҝедәрәк она һөрмәт ҝөстәрдији кими, сиз дә тәҹрүбәли ағсаггалларын Мүгәддәс Китаба әсасланан үсулларыны тәтбиг едәрәк онлара һөрмәт ҝөстәрә вә иман баҹы-гардашларынызын етибарыны газана биләрсиниз. (1 Коринфлиләрә 4:17 ајәсини охујун.) Шүбһәсиз, тәҹрүбәниз артдыгҹа Јеһованын ирәлиләјән тәшкилаты илә ајаглашмасы үчүн јығынҹагда едилән дәјишикликләрдә сизин дә ролунуз олаҹаг. Әлјәсә кими, бу ҝүн дә тәлим алан садиг гардашлар Јеһованын көмәји илә өз мүәллимләриндән даһа бөјүк ишләр ҝөрә биләрләр (Јәһ. 14:12).

18. Нә үчүн бу ҝүн гардашлара тәлим вермәк тәҹилидир?

¹⁸ Үмид едирик ки, бу вә әввәлки мәгаләдә олан мәсләһәтләр ағсаггаллары гардашлара тәлим вермәк үчүн вахт ајырмаға тәшвиг етсин. Арзумуз будур ки, јарарлы гардашлар ҹанла-башла тәлим алсынлар, сонра исә өјрәндикләрини Јеһованын халгынын гајғысына галмаг үчүн ағылла тәтбиг етсинләр. Белә олса, дүнјадакы бүтүн јығынҹаглар мөһкәмләнәҹәк. Бу исә һәр биримизә ҝәләҹәкдә олаҹаг мүһүм һадисәләр гаршысында садиг галмаға көмәк едәҹәк.