1, 2. Һизгијал 47:1—12 ајәләринә әсасән, Һизгијал нәјин шаһиди олур? (Фәслин әввәлиндәки шәклә бахын.)

БУ КИ, әсл мөҹүзәдир! Мәбәдин кандарынын алтындан булаг гајнајыр. Булағын бүллур кими шәффаф сују мәбәдин шәрг дарвазасынын јахынлығындан ахыб кечир. (Һизгијал 47:1—12 ајәләрини охујун.) Мәләк Һизгијалы сујун кәнары илә апарыр. Онлар мәбәддән узаглашдыгҹа мәләк арабир јолу өлчүр. О, бир нечә дәфә Һизгијалы судан кечирдир вә һәр дәфәсиндә су хејли дәринләшир. Бир гәдәр сонра су ҝур чаја чеврилир вә елә дәринләшир ки, ону анҹаг үзүб кечмәк олар.

² Һизгијала мәлум олур ки, чај ахыб Өлү дәнизә төкүлүр вә дәнизин шор, ҹансыз суларына гарышдығы јердә дәниз сулары шәфа тапыр, һәмин јерләрдә балыглар гајнашыр. Чајын һәр ики саһили бојунҹа ҹүрбәҹүр ағаҹлар битир. Онлар һәр ај бар ҝәтирир, јарпаглары исә шәфа верир. Јәгин Һизгијал бүтүн бунлары ҝөрәндә гәлби раһатлыг тапыр, үрәјиндә үмид јараныр. Ҝәлин ҝөрәк Һизгијалын мәбәдлә бағлы ҝөрдүјү ҝөрүнтүнүн бу һиссәси онун үчүн вә әсарәтдә олан јәһудиләр үчүн һансы мәнаны кәсб едир вә бу ҝөрүнтүнүн бизим дөврә һансы аидијјәти вар.

Чајын әсирликдә олан јәһудиләр үчүн мәнасы

3. Нәјә ҝөрә јәһудиләр Һизгијалын ҝөрдүјү чајы һәгиги мәнада гәбул етмирдиләр?

³ Гәдимдә јашајан јәһудиләр, сөзсүз ки, ҝөрүнтүдәки чајы һәгиги мәнада гәбул етмирдиләр. Јәгин ҝөрүнтүнүн бу һиссәси дирчәлишлә бағлы башга пејғәмбәрлији онларын јадына салмышды. Бу пејғәмбәрлији Јуил пејғәмбәр, еһтимал ки, ики әср әввәл јазмышды. (Јуил 3:18 ајәсини охујун.) Јәһуди әсирләр Јуилин сөзләрини охујанда дүшүнмүрдүләр ки, һәрфи мәнада дағлардан ширин шәраб дамаҹаг, тәпәләрдән сүд ахаҹаг, јахуд Јеһованын евиндән бир чешмә чыхаҹаг. Онлар Һизгијал пејғәмбәрин ҝөрдүјү ҝөрүнтүнүн дә һансыса һәгиги чај барәдә олдуғуну фикирләшмирдиләрa. Белә исә Јеһова онлара һансы хәбәри чатдырмаг истәјирди? Бу сәһнәнин бәзи һиссәләринин мәнасыны Мүгәддәс Јазыларын көмәји илә баша дүшмәк олур. Бу фәсилдә исә бу парчадакы үч мәгама нәзәр салаҹағыг. Бу үч мәгам бизә бирмәналы шәкилдә әминлик һисси ашылајаҹаг.

4. а) Ҝөрүнтүдәки чај барәдә ешидән јәһуди әсирләр һансы немәтләри алаҹагларына үмид едә биләрдиләр? б) Мүгәддәс Китабда чај вә су сөзләринин дашыдығы мәна бизи Јеһованын Өз халгына немәтләр верәҹәјинә неҹә әмин едир? («Немәтләр ҝәтирән чајлар» адлы чәрчивәјә бахын.)

⁴ Немәтләр ҝәтирән чај. Мүгәддәс Китабда чај вә су, адәтән, Јеһованын һәјат верән немәтләрини тәмсил едир. Һизгијал чајын мәбәддән ахдығыны ҝөрмүшдү. Демәли, Аллаһын халгы бу ҝөрүнтүдән ваҹиб бир һәгигәти баша дүшмәли иди: нә гәдәр ки, онлар пак шәкилдә ибадәт едирләр Јеһова һәјат верән руһани немәтләри онларын башындан төкәҹәк. Бәс сөһбәт һансы немәтләрдән ҝедир? Онлар јенә дә каһинләрдән руһани нәсиһәтләр алаҹагдылар. Мәбәддә гурбанлар ҝәтириләҹәкди вә беләҹә, архајын олаҹагдылар ки, ҝүнаһлары үчүн кәффарә верилиб (Һизг. 44:15, 23; 45:17). Беләликлә, онлар јенидән тәмиз олаҹагдылар, санки, мәбәддән ахан пак суда јујунуб тәмизләнәҹәкдиләр.

5. Ҝөрүнтүдәки чај немәтләр һагда нә дејир?

⁵ Бәс Јеһованын немәтләри һамыја чатаҹаг? Әҝәр кимдәсә бунунла бағлы шүбһәләр олмушдурса, ҝөрүнтү бу шүбһәләри арадан галдырмышды. Белә ки, ҝөрүнтүдә чај мөҹүзәви сурәтдә ҝет-ҝедә енләнир вә һарадаса бир километр јарымдан сонра ҝур чаја чеврилир (Һизг. 47:3—5). Вәтәнә дөнән јәһудиләрин сајы артдыгҹа Јеһова онларын тәләбатыны өдәмәк үчүн немәтләрини дә артыраҹагды. Беләликлә, чај боллуг рәмзи иди.

6. а) Бу пејғәмбәрлик сәһнәсиндә нә вәд едилир? б) Ҝөрүнтүдә һәмчинин һансы хәбәрдарлыг јер алыр? (Һашијәјә бахын.)

⁶ Һәјат верән сулар. Һизгијалын ҝөрдүјү ҝөрүнтүдә чај Өлү дәнизә ахыб онун бөјүк һиссәсини ҹанландырырды. Бу суларын төкүлдүјү јердә о гәдәр зәнҝин балыг нөвү вар иди ки, онлар Бөјүк дәниздә, јәни Аралыг дәнизиндә олан балыгларла мүгајисә едилирди. Өлү дәниз саһилиндә, бир-бириндән хејли аралы јерләшән ики шәһәр арасында һәтта балыгчылыг сәнајеси дә фәалијјәт ҝөстәрирди. Мәләк деди: «Чај ахдығы һәр јерә һәјат ҝәтирәҹәк». Анҹаг Јеһованын евиндән ахан су Өлү дәнизин һәр тәрәфинә ҝедиб чатмырды. Мәләк деди ки, бәзи батаглыг саһәләр шәфа тапмајаҹаг, су ора ҝедиб чыхмајаҹаг. Һәмин јерләр шоранлыг олаҹагb (Һизг. 47:8—11). Бу пејғәмбәрлик сәһнәси вәд верир ки, пак ибадәт инсанлары ҹанландыраҹаг, дирчәлдәҹәк. Лакин бурада бир хәбәрдарлыг да вар: һеч дә һамы Јеһованын немәтләрини гәбул етмәјәҹәк, һамы шәфа тапмајаҹаг.

7. Чајын саһилиндәки ағаҹлар јәһудиләри нәјә әмин едирди?

⁷ Бар ҝәтирән шәфалы ағаҹлар. Бәс чај кәнарындакы ағаҹлар барәдә нә демәк олар? Онлар бу ҝөзәл сәһнәни һәм зәнҝинләшдирир, һәм дә она мәна гатыр. Һизгијал вә онун сојдашлары бу ағаҹларын һәр ај бар ҝәтирдијини, онларын дадлы мејвәләрини дүшүнәндә, сөзсүз ки, ләззәт дујурдулар. Бу сәһнә онлары бир даһа әмин едирди ки, Јеһова онлары руһани ҹәһәтдән гидаландыраҹаг. Үстәлик, ағаҹларын јарпаглары шәфалы иди (Һизг. 47:12). Јеһова билирди ки, әсирликдән гајыдан јәһудиләрә руһани ҹәһәтдән шәфа вермәк лазым ҝәләҹәк. О, мәһз буну онлара вәд едирди. Јеһованын онлара неҹә шәфа вердији дирчәлишлә бағлы диҝәр пејғәмбәрликләрдә ҝөстәрилир. Бу барәдә бу нәшрин 9-ҹу фәслиндә данышылыб.

8. Нәдән ҝөрүнүр ки, Һизгијалын ҝөрдүјү ҝөрүнтү ҝәләҹәкдә там мәнада јеринә јетәҹәкди?

⁸ Доггузунҹу фәсилдә һәм дә арашдырылмышды ки, сүрҝүндән ҝәлән јәһудиләрин дөврүндә бу пејғәмбәрликләр гисмән јеринә јетди. Буна сәбәбкар халгын өзү олду. Онлар тез-тез әјри јола дүшүр, Аллаһа аси чыхыр вә пак ибадәтә биҝанә јанашырдылар. Белә олан һалда Јеһова неҹә онлара немәтләр верә биләрди?! Мөмин инсанлар бу ҹүр сојдашларынын һәрәкәтләриндән әзаб чәкир, мәјус олурдулар. Лакин онлар билирдиләр ки, Јеһованын вәдләри һеч вахт боша чыхмыр. Онлар һәмишә јеринә јетир. (Јушә 23:14 ајәсини охујун.) Беләликлә, Һизгијалын ҝөрдүјү ҝөрүнтү ҝениш мәнада јеринә јетмәли иди. Бәс бу нә вахт олаҹагды?

Чајын индики дөврдә мәнасы

9. Һизгијалын мәбәдлә бағлы ҝөрдүјү ҝөрүнтү нә вахт ҝениш мигјасда јеринә јетмәли иди?

⁹ Бу нәшрин 14-ҹү фәслиндә дејилдији кими, Һизгијалын мәбәдлә бағлы ҝөрдүјү ҝөрүнтү «заманын сонунда», пак ибадәтин мисли ҝөрүнмәмиш шәкилдә уҹалдығы бир вахтда даһа ҝениш мигјасда јеринә јетир (Әшј. 2:2). Һизгијалын ҝөрдүјү ҝөрүнтүнүн бу һиссәси һазырда һансы мәнада јеринә јетир?

10, 11. а) Бу ҝүн һансы немәтләри алырыг? б) Ахырзаманда Јеһова һәгигәтин пак суларыны неҹә артырыб?

¹⁰ Немәтләр ҝәтирән чај. Јеһованын евиндән ахан су бу ҝүн алдығымыз һансы немәтләри бизә хатырладыр? Бизи руһани ҹәһәтдән сағлам едән вә гидаландыран бүтүн немәтләри. Бу немәтләрдән ән өнәмлиси инсаны тәмизләмәк гүввәсинә малик олан фидјә гурбанлығыдыр. Бу гурбанлығын сајәсиндә ҝүнаһларымыз бағышланыр. Аллаһын Кәламындакы пак һәгигәтләр дә һәјат верән, тәмизләјән суја бәнзәјир (Ефес. 5:25—27). Бәс бу немәтләри неҹә алырыг?

¹¹ 1919-ҹу илдә ҹәми бир нечә мин адам Јеһоваја ибадәт едирди. Онлар лазыми руһани гиданы вахтлы-вахтында алырдылар. Сонракы онилликләр әрзиндә онларын сајы артды. Бу ҝүн Аллаһын халгынын үзвләринин сајы сәккиз милјону кечиб. Бәс һәгигәтин пак сулары бу гәдәр инсана бәс едир? Бәли! Онлара Мүгәддәс Китабдакы чохлу сајда һәгигәтин мәнасы изаһ олунуб. Аллаһын халгы өтән әсрдә милјардларла Мүгәддәс Китаб, журнал, брошүр, китаб вә буклет алыб. Һизгијалын ҝөрүнтүдә ҝөрдүјү чајын сују кими, пак һәгигәт сулары да бүтүн дүнјада Аллаһы ахтаран инсанларын тәләбатыны өдәмәк үчүн сүрәтлә артыб. Узун мүддәтдир ки, Мүгәддәс Китаба әсасланан нәшрләрин чап версијасы чыхыр. Инди исә jw.org сајтында бу нәшрләрин 900-дән чох дилдә електрон версијасы вар. Бу һәгигәт сулары сәмими инсанлара неҹә тәсир едир?

12. а) Һәгигәт хәбәри инсанлара неҹә фајда ҝәтирир? б) Ҝөрүнтүдә бизим үчүн һансы хәбәрдарлыг вар? (Һәмчинин һашијәјә бахын.)

¹² Һәјат верән сулар. Мәләк Һизгијала деди: «Чај ахдығы һәр јерә һәјат ҝәтирәҹәк». Һәгигәт хәбәринин бәрпа едилмиш руһани өлкәјә ҝәлән һәр кәсә неҹә чатдығы барәдә бир дүшүнүн. Мүгәддәс Китабдакы һәгигәтләр милјонларла инсана һәјат вә руһани шәфа верир. Лакин ҝөрүнтүдә бир хәбәрдарлыг вар. Һәр кәс бу һәгигәти горујуб сахламајаҹаг. Ҝөрүнтүдә Өлү дәнизин бәзи јерләри батаглыг олдуғу кими, бәзиләринин дә үрәји мүәјјән бир мәгамда күтләшир вә онлар һәгигәтә ујғун јашамагдан имтина едирләрc. Гој бу бәла биздән ираг олсун. (Ганунун тәкрары 10:16—18 ајәләрини охујун.)

13. Ҝөрүнтүдәки ағаҹлар бизә һансы руһландырыҹы фикри чатдырыр?

¹³ Бар ҝәтирән шәфалы ағаҹлар. Чајын кәнарындакы ағаҹлар бизә дә руһландырыҹы хәбәр чатдырыр. Јадыныздадырса, һәмин ағаҹлар һәр ај дадлы мејвә ҝәтирирди, јарпаглары исә шәфалы иди (Һизг. 47:12). Беләликлә, онлар бизә хатырладыр ки, ибадәт етдијимиз Јеһова Аллаһ сәхавәтлә бизи руһани ҹәһәтдән једиздирир вә шәфа верир. Руһани ҹәһәтдән шәфа тапмаг исә һазырда ән ваҹиб мәсәләдир. Бу ҝүн дүнја руһани мәнада хәстә вә аҹ-јалаваҹдыр. Амма Јеһова бизә бол-бол немәтләр бәхш едир. Һеч елә олмајыбмы ки, журналларымызын бириндә һансыса мәгаләни охујуб гуртаранда, топлантыда сонунҹу нәғмәни охујанда, һансыса видеоја вә ја ајлыг програма бахыб гуртаранда бу руһани гидаја ҝөрә үрәјиниз миннәтдарлыгла долуб-дашсын? Бәли, Јеһова бизи јахшы бәсләјир (Әшј. 65:13, 14). Бәс алдығымыз руһани гида руһани сағламлығымыза неҹә фајда ҝәтирир? Мүгәддәс Китаб әсасында алдығымыз мәсләһәтләр бизә әхлагсызлыг, тамаһкарлыг, имансызлыг кими дүшмәнләри мәғлуб етмәјә көмәк едир. Јеһова мәсиһиләрин ҹидди ҝүнаһын төрәтдији руһани хәстәликдән шәфа тапмасы үчүн бир гурулуш да тәшкил едиб. (Јагуб 5:14 ајәсини охујун.) Доғрудан да, Јеһова ҝөрүнтүдәки ағаҹларын тәмсил етдији немәтләри башымыздан төкүр.

14, 15. а) Ҝөрүнтүдәки шәфа тапмамыш батаглыг јерләрдән һансы ибрәт дәрсини ҝөтүрүрүк? б) Ҝөрүнтүдәки чај бизә һансы фајданы ҝәтирир?

¹⁴ Бу ҝөрүнтүдән, даһа конкрет десәк, шәфа тапмајан батаглыг јерләрдән өзүмүзә ибрәт дәрси дә ҝөтүрмәлијик. Биз һеч вахт истәмәрик ки, һәјатымыза ахан немәтләрин гаршысыны кәсәк. Руһани хәстәлијә тутулмуш бу дүнјадакы инсанлар кими олмаг, шәфа тапмагдан имтина етмәк әсл фаҹиә оларды (Мәт. 13:15). Бунун әксинә олараг, биз чајын немәтләриндән севә-севә фајдаланмалыјыг. Биз Аллаһын Кәламындакы пак һәгигәт суларыны ләззәтлә ичәндә, тәблиғ едиб бу һәгигәти инсанлара чатдыранда, садиг нөкәрин тәлим вердији ағсаггаллардан ҝөстәриш, тәсәлли вә көмәк аланда Һизгијалын ҝөрүнтүдә ҝөрдүјү чајы јадымыза сала биләрик. Бу чај ахдығы һәр јерә һәјат вә шәфа ҝәтирир!

¹⁵ Бәс ҝөрүнтүнүн чајла бағлы һиссәси ҝәләҹәкдә неҹә јеринә јетәҹәк? Немәтләр ҝәтирән бу чај ән енли вә ән дәрин сәвијјәјә Ҹәннәтдә чатаҹаг.

Ҝөрүнтүнүн Ҹәннәтдә јеринә јетмәси

16, 17. а) Ҹәннәтдә чај һансы мәнада бөјүк олаҹаг? б) Ҝөрүнтүдәки чај Ҹәннәтдә бизә һансы немәтләри бәхш едәҹәк?

¹⁶ Тәсәввүр един, Ҹәннәтдәсиниз. Достларынызын, аиләнизин әһатәсиндә һәјаты долу-долу јашајырсыныз. Ҝөрүнтүдәки чајын мәнасыны арашдырдыгҹа һәмин һәјаты тәсәввүрүнүздә даһа ајдын ҹанландыра биләҹәксиниз. Ҝәлин бир даһа бу ҝөрүнтүдәки үч мәгамы нәзәрдән кечирәк.

¹⁷ Немәтләр ҝәтирән чај. Ҝөрүнтүдәки чај Ҹәннәтдә гат-гат бөјүк олаҹаг, чүнки о, тәкҹә руһани јох, һәм дә физики фајда ҝәтирәҹәк. Исанын миниллик һакимијјәти дөврүндә Аллаһын Падшаһлығы садиг инсанлара фидјәдән даһа чох фајдаланмаға көмәк едәҹәк. Онлар тәдриҹән камиллијә јетишәҹәкләр. Артыг хәстәлик олмајаҹаг, һәкимләрә, үмумијјәтлә тибб ишчиләринә, хәстәханалара еһтијаҹ галмајаҹаг. Һәјат сују Армаҝеддонда сағ галан, бөјүк мүсибәтдән чыхан бөјүк издиһам үчүн ахаҹаг (Вәһј 7:9, 14). Бу су чох мөһтәшәм олаҹаг, анҹаг сонра о гәдәр әзәмәтли олаҹаг ки, илкин һалы бунун јанында кичик бир чешмәјә бәнзәјәҹәк. Һизгијалын ҝөрдүјү ҝөрүнтүдәки кими, чај артан тәләбаты өдәмәк үчүн ҝенишләнәҹәк.

18. Мәсиһин миниллик һакимијјәти дөврүндә «һәјат сују» ахан чај һансы мәнада селә чевриләҹәк?

¹⁸ Һәјат верән сулар. Мәсиһин миниллик һакимијјәти дөврүндә «һәјат сују» ахан чај селә чевриләҹәк (Вәһј 22:1). Милјонларла, һәтта милјардларла инсан дириләҹәк. Онлара Ҹәннәтдә әбәди јашамаг имканы вериләҹәк. Јеһованын Падшаһлыг васитәсилә вердији немәтләрдән бири дә өлүмүн дустағы олан сонсуз сајда инсанын һәјата гајытмасы олаҹаг (Әшј. 26:19). Бәс дириләнләрин һамысы әбәди јашајаҹаг?

19. а) Ҹәннәтдә јени һәгигәт суларынын олаҹағыны нә ҝөстәрир? б) Бәзи инсанлар һансы мәнада шоран саһәјә бәнзәјәҹәк?

¹⁹ Һәр кәс өзү сечим етмәли олаҹаг. Һәмин вахт јени тумарлар ачылаҹаг. Демәли, Јеһованын вердији тәравәтләндириҹи сулара јени һәгигәтләр, јени руһани ҝөстәришләр дахил олаҹаг. Бу барәдә дүшүнәндә адамын үрәји вәҹдә ҝәлир. Бунунла белә, һәмин немәтләри рәдд едән, Јеһованын итаәтиндән чыхан инсанлар да олаҹаг. Ола билсин, бәзи адамлар бу мин ил әрзиндә үсјан едәҹәк, амма онлара Ҹәннәтдәки асајиши позмаға изин верилмәјәҹәк (Әшј. 65:20). Јәгин һәмин вахт јадымыза Һизгијалын ҝөрдүјү ҝөрүнтү, батаглыг, шоран саһәләр дүшәҹәк. Инад едиб һәјат сујундан ичмәмәк чох бөјүк ахмаглыгдыр. Миниллик һакимијјәтдән сонра исә үсјанкар инсанлар Шејтанын тәрәфини тутаҹаг. Јеһованын адил һакимијјәтини рәдд едәнләрин һамысыны ејни агибәт ҝөзләјир. Онлар әбәдилик мәһв едиләҹәк (Вәһј 20:7—12).

20. Мин ил әрзиндә фәалијјәт ҝөстәрәҹәк һансы гурулуш бизә Һизгијалын ҝөрдүјү ағаҹлары хатырладыр?

²⁰ Бар ҝәтирән шәфалы ағаҹлар. Јеһова истәмир ки, бизләрдән кимсә әбәди һәјат әнамыны итирсин. Бу ҝөзәл имканы әлдән вермәјәк дејә, О, јенә дә Һизгијалын ҝөрдүјү ағаҹлара бәнзәр бир тәдбир тәшкил едәҹәк. Ҹәннәтдә Јеһова бизә һәм физики, һәм дә руһани немәтләр бәхш едәҹәк. Иса Мәсиһ вә онун 144 000 һәмвариси мин ил әрзиндә ҝөјдә падшаһлыг едәҹәк. 144 000 нәфәр һәмчинин каһин хидмәтини иҹра едәҹәк вә Мәсиһин вердији фидјәни тәтбиг едәрәк садиг инсанлары камиллијә чатдыраҹаг (Вәһј 20:6). Һәм физики, һәм дә руһани шәфа верән бу гурулуш бизә Һизгијалын чај кәнарында ҝөрдүјү, фајдалы мејвәләри вә шәфалы јарпаглары олан ағаҹлары хатырладыр. Һизгијалын ҝөрдүјү ҝөрүнтү һәвари Јәһјанын јаздығы пејғәмбәрликлә һәмаһәнҝдир. (Вәһј 22:1, 2 ајәләрини охујун.) Јәһјанын ҝөрдүјү ағаҹларын јарпаглары «халгларын шәфа тапмасы үчүндүр». 144 000 нәфәрин каһин кими иҹра етдији хидмәтдән милјонларла садиг инсан јарарланаҹаг.

21. Ҝөрүнтүдәки чај барәдә дүшүнәндә сиздә һансы һиссләр јараныр вә нөвбәти фәсилдә һансы мөвзу арашдырылыр? («Булаг чаја чеврилир» адлы чәрчивәјә бахын.)

²¹ Һизгијалын ҝөрүнтүдә ҝөрдүјү чај барәдә дүшүнәндә, јәгин гәлбиниз раһатлашыр, үрәјиниз үмидлә долур. Бизи гаршыда мөһтәшәм ҝәләҹәк ҝөзләјир. Бир дүшүнүн, Ҹәннәти тәсәввүр едә биләк дејә Јеһова мин илләр бундан әввәл пејғәмбәрликләр јаздырыб. О, вәдләринин ҝерчәкләшәҹәји дөвраны ҝөрмәјимиз үчүн сәбирлә бизи орада олмаға сәсләјир. Бәс сиз орада олаҹагсыныз? Бәлкә, сиздә суал јараныр ки, ҝөрәсән, Ҹәннәтдә сизин үчүн јер олаҹаг. Ҝәлин ҝөрәк Һизгијалын пејғәмбәрлијинин сон һиссәси бизи буна неҹә әмин едир.

1, 2. а) Јеһова Һизгијала нә бујурду? б) Бу фәсилдә һансы суаллар арашдырылыр?

ҺИЗГИЈАЛЫН индиҹә ҝөрдүјү ҝөрүнтү ону хәјалән һарадаса 900 ил әввәлә, Муса пејғәмбәрлә Јушәнин дөврүнә апарды. О вахт Јеһова Мусаја Вәд едилмиш дијарын сәрһәдләрини тәсвир етмишди, Јушәјә исә өлкәнин Исраил гәбиләләри арасында неҹә бөлүшдүрмәли олдуғуну баша салмышды (Сај. 34:1—15; Јуш. 13:7; 22:4, 9). Инди исә, е. ә. 593-ҹү илдә, Јеһова Һизгијала вә әсирликдә оланлара Вәд едилмиш дијары Исраил гәбиләләри арасында бир дә бөлүшдүрмәји бујурур (Һизг. 45:1; 47:14; 48:29).

² Бу ҝөрүнтү Һизгијала вә әсирликдә олан јәһудиләрә һансы хәбәри чатдырырды? Нәјә ҝөрә бу ҝөрүнтү бу ҝүн Аллаһын халгыны руһландырыр? Ҝөрүнтү ҝәләҹәкдә даһа бөјүк мигјасда јеринә јетәҹәкми?

Халга әминлик верән дөрд вәд

3, 4. а) Һизгијалын ҝөрдүјү сонунҹу ҝөрүнтү халга һансы дөрд вәди верирди? б) Бу фәсилдә һансы вәддән данышылыр?

³ Һизгијалын ҝөрдүјү сон ҝөрүнтү онун адыны дашыјан китабын доггуз фәслини әһатә едир (Һизг. 40:1—48:35). Бу ҝөрүнтү әсирликдә оланлара ҝәләҹәкдә бәрпа олунаҹаг Исраил халгы илә бағлы дөрд вәд верирди. Биринҹиси, Аллаһын мәбәдиндә пак ибадәт бәрпа олаҹагды. Икинҹиси, дирчәлмиш халга мөмин каһинләр вә чобанлар башчылыг едәҹәкди. Үчүнҹүсү, Исраилә гајыдан һәр кәс ирс олараг торпаг пајы алаҹагды. Дөрдүнҹүсү, Јеһова онларла олаҹаг, јенә онларын арасында јашајаҹагды.

⁴ Бу нәшрин 13 вә 14-ҹү фәсилләриндә илк ики вәдин неҹә ҝерчәкләшдији һаггында данышылыб. Бу фәсилдә исә үчүнҹү вәддән, ирс олараг торпаг пајы алмагдан данышылыр. Нөвбәти фәсилдә Јеһованын халгла олаҹағы вәдиндән сөһбәт ачылыр (Һизг. 47:13—21; 48:1—7, 23—29).

«Торпаг... ирс олараг сизә верилир»

5, 6. а) Һизгијалын ҝөрдүјү ҝөрүнтүдә һансы торпаг бөлүнмәли иди? (Фәслин әввәлиндәки шәклә бахын.) б) Торпаг бөлҝүсү илә бағлы ҝөрүнтүнүн мәнасы нә иди?

⁵ Һизгијал 47:14 ајәсини охујун. Јеһова Һизгијалын диггәтини тезликлә Әдән бағына чевриләҹәк бир дијара јөнәлтди (Һизг. 36:35). Сонра деди: «Исраилин он ики гәбиләси арасында ирс олараг бу торпағы бөлүшдүрәҹәксиниз» (Һизг. 47:13). Бөлүшдүрүлмәли олан торпаг Исраил дијары иди. Исраиллиләр әсирликдән чыхыб бу дијара гајыдаҹагды. Сонра Јеһова өлкәнин сәрһәдләрини дәгиг вә әтрафлы тәсвир етди (Һизг. 47:15—21).

⁶ Бәс бу ҝөрүнтүнүн мәнасы нәдир? Сәрһәдләрин дәгиг тәсвир олунмасы Һизгијалы вә онун сојдашларыны әмин едирди ки, онларын вәтәни мүтләг бәрпа олаҹаг. Сөзсүз ки, Јеһованын бу ҹүр әтрафлы данышмасы әсирликдә олан јәһудиләри бу вәдин ҝерчәкләшәҹәјинә әмин етмиш, онлара гол-ганад вермишди. Неҹә ки вәд олунмушду, Аллаһын гәдимдә јашајан халгына өлкәдә ирс олараг торпаг пајы верилди.

7. а) Ерамыздан әввәл 537-ҹи илдән башлајараг һансы һадисәләр баш верди вә бу бизә нәји хатырладыр? б) Әввәлҹә һансы суалы нәзәрдән кечирмәк лазымдыр?

⁷ Һизгијалын бу ҝөрүнтүнү алмасындан тәхминән 56 ил сонра, е. ә. 537-ҹи илдән башлајараг минләрлә јәһуди Исраил торпағына гајыдыб ораја саһиб олду. Гәдимдә баш вермиш бу әламәтдар һадисәләр бизә мүасир дөврдә Аллаһын халгы арасында баш верәнләри хатырладыр. Бу халг да мүәјјән мәнада торпаг пајы алыб. Јеһова хидмәтчиләринә руһани өлкәјә дахил олараг ораја саһиб олмаға изин вериб. Беләликлә, гәдимдә Вәд едилмиш дијарын бәрпа олмасы мүасир дөврдә руһани өлкәнин бәрпа олмасы барәдә бизә чох шеј өјрәдә биләр. Лакин бу мөвзуја кечмәздән әввәл ҝәлин бир суала ҹаваб тапаг. Нәјә ҝөрә бу ҝүн руһани өлкәнин мөвҹуд олдуғуну дүшүнүрүк?

8. а) Јеһова Исраил халгыны һансы халгла әвәз етди? б) Руһани өлкә, јахуд ҹәннәт нәдир? ҹ) Руһани өлкә нә вахт мејдана чыхды вә орада кимләр мәскән салыр?

⁸ Һизгијала вердији әввәлки ҝөрүнтүдә Јеһова билдирмишди ки, Исраилин бәрпасы илә бағлы пејғәмбәрликләр «гулум Давуд» адландырдығы Иса Мәсиһ падшаһ тахтына чыхандан сонра даһа ҝениш мигјасда јеринә јетәҹәк (Һизг. 37:24). Иса Мәсиһ ерамызын 1914-ҹү илиндә Падшаһ олду. Һәмин вахт Исраил артыг узун илләр иди ки, Аллаһын халгы дејилди. Онларын јерини руһани исраиллиләрдән, јәни руһла мәсһ олунмуш мәсиһиләрдән ибарәт халг тутмушду. (Мәтта 21:43; 1 Бутрус 2:9 ајәләрини охујун.) Бундан башга, Јеһова Исраил өлкәсини дә руһани өлкә илә, јәни руһани ҹәннәтлә әвәз етди (Әшј. 66:8). Бу нәшрин 17-ҹи фәслиндән ҝөрүндүјү кими, руһани өлкә тәһлүкәсизлијин һөкм сүрдүјү, мәсһ олунмуш мәсиһиләрин 1919-ҹу илдән бәри Јеһоваја ибадәт етдији руһани мүһитдир. («Нәјә ҝөрә мәһз 1919-ҹу ил?» адлы 9Б чәрчивәсинә бахын.) Вахт кечдикҹә јер үзүндә јашамаға үмид едән «башга гојунлар» да бу руһани өлкәдә мәскән салмаға башлады (Јәһ. 10:16). Руһани ҹәннәт бу ҝүн инкишаф етмәјә вә ҝенишләнмәјә давам етсә дә, онун немәтләрини там шәкилдә Армаҝеддондан сонра дадаҹағыг.

Торпағын бәрабәр вә дәгиг бөлҝүсү

9. Јеһова өлкәнин бөлүнмәси илә бағлы һансы ҝөстәриши верди?

⁹ Һизгијал 48:1, 28 ајәләрини охујун. Өлкәнин сәрһәдләрини тәјин едәндән сонра Јеһова өлкәни неҹә бөлүшдүрмәји тәфәррүаты илә изаһ етди. Бујурду ки, өлкә шималдан ҹәнуба 12 бәрабәр һиссәјә бөлүнүб гәбиләләрин һәр биринә ирс верилсин. Өлкәнин шимал сәрһәдиндә Дан гәбиләсинин ирси, ҹәнуб сәрһәдиндә исә Ҹад гәбиләсинин ирси јерләшмәли иди. 12 ирсин һәр бири шәргдән гәрбә, Бөјүк дәнизә (Аралыг дәнизи) доғру узанан үфүги золагдан ибарәт иди (Һизг. 47:20).

10. Ҝөрүнтүнүн бу һиссәси әсирликдә олан јәһудиләри нәјә әмин едирди?

¹⁰ Ҝөрүнтүнүн бу һиссәси әсирликдә олан јәһудиләри нәјә әмин едирди? Торпаг бөлҝүсүнү әтрафлы тәсвир едән мәлуматы ешидәндә, јәгин јәһудиләр бөлҝүнүн гајда-ганунла иҹра олунаҹағына әмин олмушдулар. Үстәлик, өлкәнин 12 гәбилә арасында бәрабәр һиссәләрә бөлүнмәси вурғулајырды ки, сүрҝүндән гајыдан әсирләрин һәр бири бәрпа олунмуш дијарда мүтләг ирс алаҹаг. Гајыданлардан һеч бири торпагсыз, јахуд евсиз-ешиксиз галмајаҹагды.

11. Ҝөрүнтүдә өлкәнин бөлүнмәсиндән нә өјрәнирик? («Өлкәнин бөлүнмәси» адлы чәрчивәјә бахын.)

¹¹ Бәс бу ҝөрүнтү бизи неҹә руһландырыр? Вәд едилмиш дијарда тәкҹә каһинләр, лавилиләр, башчылар үчүн јох, 12 гәбиләнин јердә галан үзвләри үчүн дә јер вар иди (Һизг. 45:4, 5, 7, 8). Бу ҝүн дә руһани ҹәннәтдә тәкҹә мәсһ олунмушлар үчүн вә бөјүк издиһамын арасындан сечилиб халга рәһбәрлик едән мәсиһиләр үчүн јох, бөјүк издиһамын галан үзвләри үчүн дә јер варa (Вәһј 7:9). Тәшкилатда ҝөрдүјүмүз иш нә гәдәр кичик олур-олсун, руһани өлкәдә сабит јеримиз вә дәјәрли тәјинатымыз вар. Бу, бизи чох руһландырыр.

Ики бөјүк фәрг

12, 13. Јеһова гәбиләләрә верилән пајла бағлы һансы ҝөстәриши верди?

¹² Јеһованын торпаг бөлҝүсү илә бағлы бәзи ҝөстәришләри јәгин Һизгијалы чашбаш гојмушду, чүнки онлар Мусаја верилән ҝөстәришләрдән фәргләнирди. Ҝәлин ики фәргә нәзәр салаг. Онлардан бири торпагла, о бириси сакинләрлә бағлыдыр.

¹³ Биринҹи фәрг — торпаг. Мусаја бујурулмушду ки, бөјүк гәбиләләрә кичик гәбиләләрә нисбәтән бөјүк торпаг пајы верилсин (Сај. 26:52—54). Һизгијалын ҝөрдүјү ҝөрүнтүдә исә Јеһова бујурмушду ки, бүтүн гәбиләләрә «ејни пај» верилсин (Һизг. 47:14). Беләликлә, 12 пајын һәр бириндә шимал сәрһәди илә ҹәнуб сәрһәди арасындакы мәсафә ејни иди. Һансы гәбиләјә аид олмасындан асылы олмајараг, бүтүн исраиллиләрин бол суварылан Вәд едилмиш дијарын тәбии сәрвәтләриндән ејни дәрәҹәдә јарарланмаг имканы олаҹагды.

14. Јеһованын јаделлиләрлә бағлы вердији ҝөстәриш Мусанын Ганунундакы ҝөстәришдән нәдә фәргләнирди?

¹⁴ Икинҹи фәрг — сакинләр. Мусанын Гануну јаделлиләри мүдафиә едирди вә онлара исраиллиләрлә бирҝә Јеһоваја ибадәт етмәјә изин верирди. Амма онларын өлкәдә торпаг пајы јох иди (Лав. 19:33, 34). Јеһованын Һизгијала вердији ҝөстәриш исә вахтилә Ганунда вердији бу ҝөстәришдән тамамилә фәргләнирди. Јеһова она деди: «Јаделлијә јашадығы гәбиләнин әразисиндә ирс вермәлисиниз». Бу әмрлә Јеһова јерли исраиллиләрлә өлкәдәки јаделлиләр арасындакы ән бөјүк фәрги арадан ҝөтүрдү (Һизг. 47:22, 23). Һизгијалын ҝөрүнтүдә ҝөрдүјү бәрпа олунмуш өлкәдә сакинләр арасында бәрабәрлик вә ибадәтдә бирлик һөкм сүрүрдү (Лав. 25:23).

15. Јеһованын торпаг вә әһали барәдә вердији ҝөстәришләр һансы дәјишмәз һәгигәти тәсдиг едир?

¹⁵ Һизгијалын торпагла вә онун әһалиси илә бағлы алдығы бу ики ҝөстәриш, јәгин ки, әсирликдә оланларын үрәјиндә әминлик јаратды. Онлар өјрәнди ки, истәр исраилли олсун, истәрсә дә Јеһоваја ибадәт едән јаделли, Јеһова онларын һамысына бәрабәр пај верәҹәк (Үзр. 8:20; Нәһ. 3:26; 7:6, 25; Әшј. 56:3, 8). Бу ҝөстәришләр һәмчинин дәјишмәз бир һәгигәти тәсдиг едир: Јеһова үчүн бүтүн хидмәтчиләри ејни дәрәҹәдә дәјәрлидир. (Һәггај 2:7 ајәсини охујун.) Бу ҝүн истәр ҝөјдә јашамаға үмид едәк, истәрсә дә јердә, бу һәгигәт һәр биримизә шамил олунур. Сөзсүз ки, бу, бизи чох руһландырыр.

16, 17. а) Өлкә вә әһали илә бағлы мәгамлары арашдырмағын бизә һансы фајдасы вар? б) Нөвбәти фәсилдә һансы суал арашдырылыр?

¹⁶ Өлкә вә әһали илә бағлы бу мәгамлары арашдырмағын бизә һансы фајдасы вар? Бу, бизә хатырладыр ки, бәрабәрлик вә бирлик үмумдүнја гардашлығымызын сәҹијјәви хүсусијјәти олмалыдыр. Јеһова ајры-сечкилик етмир. Биз дә өзүмүзә суал вермәлијик: Бәс мән ајры-сечкилик етмәмәкдә Јеһовадан нүмунә ҝөтүрүрәм? Миллијјәтиндән вә вәзијјәтиндән асылы олмајараг, диндашларымын һәр биринә сәмими-гәлбдән һөрмәт едирәм? (Ром. 12:10). Биз чох хошбәхтик ки, руһани ҹәннәтдә олмаға һамымызын ејни дәрәҹәдә һүгугу чатыр. Бу ҹәннәтдә биз сәмави Атамыза ҹан-дилдән хидмәт едир вә Онун вердији немәтләри севә-севә дадырыг (Гал. 3:26—29; Вәһј 7:9).

¹⁷ Нөвбә чатды Һизгијалын алдығы ахырынҹы ҝөрүнтүдә верилән дөрдүнҹү вәдә — Јеһованын әсир јәһудиләрлә олаҹағы вәдинә. Бәс бу вәд бизә нә өјрәдир? Бу суала нөвбәти фәсилдә ҹаваб верилир.

1, 2. а) Һансы хүсуси мәгсәд үчүн торпаг ајрылмалы иди? (Китабын үз габығындакы шәклә бахын.) б) Ҝөрүнтү әсирликдәки исраиллиләри нәјә әмин едир?

ҺИЗГИЈАЛ ҝөрүнтүнүн сонунда хүсуси мәгсәд үчүн ајрылмалы олан торпаг һаггында өјрәнир. Бу торпаг Исраилин һансыса гәбиләсинә ирс вермәк үчүн ајрылмајыб, Јеһова үчүн пај олараг ајрылыб. Һизгијал һәмчинин ҝөрүнтүдә мараглы ады олан әзәмәтли бир шәһәр һаггында да өјрәнир. Ҝөрүнтүнүн бу һиссәси исраиллиләрә әминлик верир: онлар доғма вәтәнә гајыданда Јеһова онларла олаҹаг.

² Һизгијал һәмин пај торпағы тәфәррүаты илә тәсвир етмишди. Ҝәлин онун јаздыгларыны әтрафлы тәһлил едәк, чүнки бунлар Јеһоваја пак шәкилдә ибадәт едән бизләр үчүн дәрин мәна кәсб едир.

«Шәһәрин торпағы илә бәрабәр мүгәддәс пај»

3. Јеһованын ајырдығы торпаг һансы беш саһәјә бөлүнмүшдү вә бу саһәләр һансы мәгсәд үчүн ајрылмышды? («Пај ајырын» адлы чәрчивәјә бахын.)

³ Бу хүсуси торпаг парчасы һәм шималдан ҹәнуба 25 000 гулаҹ (13 км.), һәм дә шәргдән гәрбә 25 000 гулаҹ өлчүсүндә иди. «Пајын үмуми саһәси» һаггында данышылан ајәдә мәһз бу торпаг парчасы нәзәрдә тутулур. Бу саһә үфүги хәтт үзрә үч һиссәјә бөлүнмүшдү. Јухарыдакы һиссә лавилиләр үчүн, ортадакы һиссә исә мәбәд вә каһинләр үчүн ајрылмышды. Бу ики һиссә «мүгәддәс пајы» тәшкил едирди. «Галан әрази», јәни ашағыдакы кичик һиссә мүгәддәс дејилди. Бу һиссә шәһәр үчүн нәзәрдә тутулмушду (Һизг. 48:15, 20).

4. Јеһова үчүн ајрылмыш пајдан нә өјрәнирик?

⁴ Торпагдан Јеһова үчүн пајын ајрылмасындан нә өјрәнирик? Әввәлҹә бу хүсуси пај үчүн, сонра исә гәбиләләр үчүн торпаг ајырмагла Јеһова ҝөстәрди ки, әсас диггәт өлкәнин руһани мәркәзи олан бу торпаг парчасына верилмәлидир (Һизг. 45:1). Шүбһәсиз сүрҝүндә оланлар торпаг бөлҝүсүндә ваҹиблијинә ҝөрә ардыҹыллығын бу ҹүр гурулмасындан чох шеј өјрәнирдиләр. Онларын һәјатында Јеһоваја ибадәт һәр шејдән үстүн олмалы иди. Бу ҝүн биз дә руһани ишләрә, мәсәлән, Аллаһын Кәламынын мүталиәсинә, јығынҹаг ҝөрүшләринә вә тәблиғә ән ваҹиб иш кими бахырыг. Әҝәр Јеһовадан нүмунә ҝөтүрүб һәјатда доғру шејләрә өнәм веририксә, һәјатымыз ибадәтин әтрафында дөвр едәҹәк.

«Шәһәр ортада јерләшәҹәк»

5, 6. а) Ҝөрүнтүдәки шәһәр кимә мәхсус иди? б) Шәһәр нәјин тимсалы ола билмәз вә нә үчүн?

⁵ Һизгијал 48:15 ајәсини охујун. Ҝөрүнтүдәки шәһәр вә ону әһатә едән әрази һансы мәнаны дашыјырды? (Һизг. 48:16—18). Ҝөрүнтүдә Јеһова Һизгијала дејир ки, шәһәр үчүн ајрылмыш саһә «бүтүн Исраил евинә мәхсус олаҹаг» (Һизг. 45:6, 7). Демәли, шәһәр вә әтрафындакы саһә Јеһова үчүн ајрылмыш мүгәддәс паја дахил дејилди (Һизг. 48:9). Бу фәрги јадда сахлајараг ҝәлин ҝөрәк ҝөрүнтүдәки шәһәрдән нә өјрәнә биләрик.

⁶ Бунун үчүн әввәлҹә мүәјјән етмәлијик ки, шәһәр нәји тәмсил етмир. О, ичиндә мәбәдин јерләшдији бәрпа олунмуш Јерусәлим шәһәрини тәмсил едә билмәз. Чүнки Һизгијалын ҝөрүнтүдә ҝөрдүјү шәһәрин ичиндә мәбәд јох иди. Һәмчинин шәһәр бәрпа олунмуш Исраил өлкәсиндәки диҝәр шәһәрләри дә тәмсил едә билмәз. Чүнки нә әсирликдән дөнән исраиллиләр, нә дә онларын өвладлары ҝөрүнтүдәкинә бәнзәр шәһәр тикмәмишдиләр. Һәмчинин Һизгијалын ҝөрдүјү шәһәр сәмави шәһәри дә тәмсил едә билмәз. Чүнки о, мүгәддәс ибадәт үчүн ајрылмыш әразидәки тикилиләрдән фәргли олараг, «ади [мүгәддәс олмајан] јердә» тикилмишди (Һизг. 42:20).

7. Һизгијалын ҝөрдүјү шәһәр һансы мәнаны дашыјыр вә нәји тәмсил едир? (Фәслин әввәлиндәки шәклә бахын.)

⁷ Белә исә Һизгијалын ҝөрдүјү шәһәр нәји тәмсил едирди? Јадыныздадырса, Һизгијал бу шәһәри өлкә илә бағлы алдығы ҝөрүнтүдә ҝөрмүшдү (Һизг. 40:2; 45:1, 6). Мүгәддәс Китаба әсасән, ҝөрүнтүдәки өлкә мәҹази мәна дашыјыр. Одур ки, шәһәр дә мәҹази мәна дашымалыдыр. Үмумијјәтлә, «шәһәр» дедикдә ҹамаатын топлу һалында јашадығы, мүтәшәккил вә низамлы јашајыш мәнтәгәси нәзәрдә тутулур. Белә чыхыр ки, низам-интизамла гурулмуш, дөрдбуҹаглы шәклиндә олан шәһәр јахшы тәшкил олунмуш инзибати системи тәмсил едир.

8. Бу идарәчилик системи һараны идарә едир вә нә үчүн белә гәнаәтә ҝәлирик?

⁸ Бәс бу идарәчилик системинин нүфуз даирәси һараны әһатә едир? Һизгијалын алдығы ҝөрүнтүдән мәлум олур ки, бу шәһәр руһани өлкәнин дахилиндә фәалијјәт ҝөстәрир. Беләликлә, бу ҝүн бу идарәчилик системи Аллаһын халгынын фәалијјәтини идарә едир. Шәһәрин ади, јахуд мүгәддәс олмајан јердә јерләшмәси нәји билдирир? Бу бизә хатырладыр ки, шәһәр сәмави јох, јердәки идарәчилијә аиддир. Бу идарәчилик руһани ҹәннәтдә мәскунлашан һәр кәсә фајда ҝәтирир.

9. а) Бу ҝүн јер үзүндәки идарәчилик системи кимләрдән тәшкил олунуб? б) Иса Мәсиһ миниллик һакимијјәти заманы нә едәҹәк?

⁹ Бәс јер үзүндәки бу идарәчилик системи кимләрдән тәшкил олунуб? Һизгијалын ҝөрдүјү ҝөрүнтүдә шәһәр һөкумәтинә сәрдар башчылыг едирди (Һизг. 45:7). О, Аллаһын халгына нәзарәт едирди, амма нә каһин, нә дә лавили дејилди. Бу бизә руһла мәсһ олунмамыш ағсаггаллары хатырладыр. «Башга гојунлар»ын арасындан сечилән бу руһани чобанлар Мәсиһин сәмави һөкумәтинин јер үзүндәки хидмәтчиләридир (Јәһ. 10:16). Иса Мәсиһ миниллик һакимијјәти дөврүндә онлардан бәзиләрини «бүтүн јер үзүндә» ағсаггал, јахуд «әмир» гојаҹаг (Зәб. 45:16). Сәмави Падшаһлығын рәһбәрлији алтында онлар мин ил әрзиндә Аллаһын халгынын рифаһы үчүн чалышаҹаглар.

«Јеһова орададыр»

10. Шәһәрин ады нәдир вә бу ад һансы әминлији верир?

¹⁰ Һизгијал 48:35 ајәсини охујун. Шәһәр белә адланыр: «Јеһова орададыр». Бу ад инсаны әмин едир ки, бу шәһәрдә Јеһованын һүзуру дујулур. Һизгијала мәркәздә јерләшән бу шәһәри ҝөстәрмәклә Јеһова әсирликдә оланлара, санки дејирди: «Мән јенә сизинлә олаҹағам!» Сөзсүз ки, бу фикир әсирликдә олан јәһудиләрә әминлик вермишди.

11. Һизгијалын ҝөрүнтүдә ҝөрдүјү шәһәрдән вә онун адындан нә өјрәнирик?

¹¹ Һизгијалын пејғәмбәрлијинин бу һиссәсиндән нә өјрәнирик? Бу шәһәрин ады бизи әмин едир ки, Јеһова Аллаһ һазырда јер үзүндәки хидмәтчиләри иләдир вә бу һәмишә белә олаҹаг. Мәна долу бу ад ваҹиб бир һәгигәти вурғулајыр: шәһәр кимләрәсә сәлаһијјәт вермәк үчүн јох, Јеһованын мәһәббәт долу вә адил һөкмләрини һәјата кечирмәк үчүн мөвҹуддур. Мәсәлән, Јеһова бу идарәчилик системини тәшкил едәнләрә, мәҹази мәнада десәк, өлкәни өз билдикләри кими бөлмәјә иҹазә вермәјиб. Әксинә, онлардан тәләб едир ки, Өзүнүн бүтүн хидмәтчиләринә, о ҹүмләдән «фағырлара» вердији паја, јәни мәсулијјәтә һөрмәтлә јанашсынлар (Мәс. 19:17; Һизг. 46:18; 48:29).

12. а) Шәһәрин ҝөзәл ҹәһәтләриндән бири һансыдыр вә бу нәји ҝөстәрир? б) Ҝөрүнтүнүн бу һиссәси ағсаггаллара һансы ваҹиб фикри хатырладыр?

¹² «Јеһова орададыр» шәһәринин башга һансы сәҹијјәви ҹәһәти вар? Гәдимдә шәһәри горујан гала диварында мүмкүн гәдәр аз дарваза гојулурду, бу шәһәрин исә 12 дарвазасы вар иди (Һизг. 48:30—34). Бу гәдәр дарваза (дөрдбуҹаг шәклиндә олан шәһәрин һәр тәрәфиндә 3 дарваза) ҝөстәрир ки, Аллаһын бүтүн хидмәтчиләри шәһәри идарә едән адамлара сәрбәст јахынлашыб дәрдләрини дејә биләрләр. Шәһәрин 12 дарвазасынын олмасы, һәмчинин вурғулајыр ки, шәһәр «бүтүн Исраил евинә», јәни һәр кәсин үзүнә ачыгдыр (Һизг. 45:6). Шәһәрә ҝиришин белә асан олмасы мәсиһи ағсаггаллара ваҹиб бир фикри хатырладыр: Јеһова истәјир ки, онлар меһрибан олсунлар, руһани ҹәннәтдә јашајан һәр кәс онлара асанлыгла јахынлаша билсин.

Аллаһын халгы «ибадәт етмәјә» ҝәлир вә «шәһәрә гуллуг» едир

13. Јеһова ҹамаатын һансы ишләри иҹра едәҹәјини дејир?

¹³ Ҝәлин хәјалән Һизгијал пејғәмбәрин дөврүнә гајыдаг вә ҝөрәк пејғәмбәр өлкәнин бөлүнмәси илә бағлы алдығы бу бөјүк ҝөрүнтүдә даһа нә ҝөрүр. Ҝөрүнтүдә Јеһова ҹамаатын мүхтәлиф хидмәтләри иҹра едәҹәјини дејир. Каһинләр, јәни мүгәддәс мәкан хидмәтчиләри Јеһоваја хидмәт етмәк үчүн гурбанлар ҝәтирәҹәкдиләр вә хидмәт етмәк үчүн Она јахынлашаҹагдылар. Мәбәд хидмәтчиләри олан лавилиләр «орада иҹра олунан хидмәти вә бүтүн ҝөрүлмәли ишләри» иҹра едәҹәкдиләр (Һизг. 44:14—16; 45:4, 5). Бундан башга, шәһәрин јахынлығында да ишчиләр чалышаҹагды. Бу ишчиләр кимләрдир?

14. Шәһәрин јахынлығындакы ишчиләр бизә нәји хатырладыр?

¹⁴ Шәһәрин јахынлығындакы ишчиләр Исраилин бүтүн гәбиләләриндәндирләр. Онлар көмәкчи ролуну ојнајырлар. Онларын иши шәһәрә гуллуг едән адамлар үчүн мәһсул јетишдирмәкдир (Һизг. 48:18, 19). Бу бизә бу ҝүн гаршымызда ачылан имканы хатырладыр. Бу ҝүн руһани ҹәннәтин бүтүн сакинләринин гаршысында белә бир ҝөзәл имкан ачылыб: һәр кәс Мәсиһин мәсһ олунмуш гардашларына, о ҹүмләдән Јеһованын бөјүк издиһамын арасындан халгына рәһбәрлик етмәк үчүн тәјин етдији гардашлара ҝөрдүкләри ишдә дәстәк ола биләр (Вәһј 7:9, 10). Бу гардашлары дәстәкләмәјин ән әсас јолу садиг нөкәрин рәһбәрлијинә ҹан-дилдән табе олмагдыр.

15, 16. а) Һизгијалын ҝөрүнтүсүндән даһа һансы мараглы фикирләр тапырыг? б) Бу ҝүн бизим һансы ишләри ҝөрмәк имканымыз вар?

¹⁵ Һизгијалын алдығы ҝөрүнтүдәки башга бир мәгамдан да хидмәтимизлә бағлы өзүмүзә дәрс ҝөтүрә биләрик. Јеһова дејир ки, Лави гәбиләси истисна олмагла галан 12 гәбиләнин үзвләри ики јердә фәалијјәт ҝөстәрәҹәкләр: мәбәдин һәјәтиндә вә шәһәрин өрүшләриндә. Бәс бу јерләрдә онлар һансы ишлә мәшғул олурлар? Мәбәдин һәјәтиндә бүтүн гәбиләләр Јеһоваја гурбан ҝәтирәрәк ибадәт едир (Һизг. 46:9, 24). Шәһәрин торпағында исә бүтүн гәбиләләрин үзвләри торпағы әкиб-беҹәрәрәк шәһәрә көмәк едирләр. Бу ишчиләрдән нә өјрәнирик?

¹⁶ Бу ҝүн бөјүк издиһамын үзвләринин бу ҝөрүнтүдәкинә бәнзәр ишләри иҹра етмәк имканы вар. Онлар Јеһоваја мәдһ гурбанлары ҝәтирәрәк Онун мәбәдиндә ибадәт едирләр (Вәһј 7:9—15). Онлар тәблиғ етмәклә вә мәсиһи јығынҹағында иманларыны ифадә етмәклә мәдһ гурбанлары тәгдим едирләр. Јеһоваја бу ҹүр ибадәт етмәк онларын һәјатда ән үмдә амалыдыр (1 Салн. 16:29). Бундан башга, Аллаһын халгы арасында бир чохлары Онун тәшкилатыны мүхтәлиф үсулларла дәстәкләјир. Мәсәлән, онлар ибадәт евләринин вә филиал биналарынын тикинтисиндә вә тәмириндә иштирак едир, Јеһованын тәшкилатынын башладығы диҝәр лајиһәләрдә көмәклик ҝөстәрирләр. Диҝәрләри исә бу лајиһәләри ианәләрлә дәстәкләјир. Онлар Аллаһын шәрәфләнмәси үчүн мәҹази мәнада торпағы әкиб-беҹәрирләр (1 Кор. 10:31). Онлар бүтүн ишләри ҹан-дилдән, севә-севә едирләр, чүнки билирләр ки, бу ҹүр гурбанлар Јеһоваја хошдур (Ибр. 13:16). Бәс сиз бу имканлардан там истифадә едирсиниз?

«Јени бир ҝөј вә јени јер ҝөзләјирик»

17. а) Һизгијалын ҝөрдүјү ҝөрүнтү ҝәләҹәкдә даһа ҝениш мигјасда неҹә јеринә јетәҹәк? б) Мәсиһин миниллик һакимијјәти заманы шәһәрә бәнзәјән идарәчилик системи кимләрә фајда ҝәтирәҹәк?

¹⁷ Бәс ҝөрәсән, Һизгијалын пај торпагла бағлы ҝөрдүјү ҝөрүнтү ҝәләҹәкдә даһа ҝениш мигјасда јеринә јетәҹәк? Бәли! Һизгијал «мүгәддәс пај» адланан торпағын өлкәнин ортасында олдуғуну ҝөрмүшдү (Һизг. 48:10). Буна бәнзәр тәрздә Армаҝеддондан сонра һарада јашамағымыздан асылы олмајараг, Јеһова бизимлә мәскән салаҹаг (Вәһј 21:3). Мәсиһин миниллик һакимијјәти заманы шәһәрлә тәмсил олунан идарәчилик системинин, јәни јер үзүндә Аллаһын халгынын гејдинә галмаг үчүн тәјин олунан инсанларын фәалијјәти бүтүн јер күрәсини әһатә едәҹәк. Онлар «јени јер»и, јәни јени ҹәмијјәти тәшкил едән бүтүн инсанлара мәһәббәтлә рәһбәрлик едиб јол ҝөстәрәҹәк (2 Бут. 3:13).

18. а) Нәјә ҝөрә әмин ола биләрик ки, шәһәрлә тәмсил олунан идарәчилик системи һәмишә Аллаһын һакимијјәти илә там аһәнҝдарлыг тәшкил едәҹәк? б) Шәһәрин ады бизи нәјә әмин едир?

¹⁸ Нәјә ҝөрә әмин ола биләрик ки, шәһәрлә тәмсил олунан идарәчилик системи һәмишә Аллаһын һакимијјәти илә там аһәнҝдарлыг тәшкил едәҹәк? Аллаһын Кәламындан ајдын олур ки, јер үзүндәки 12 дарвазалы шәһәр 12 дарвазалы сәмави шәһәри, јәни Мәсиһин 144 000 һәмварисиндән тәшкил олунмуш јени Јерусәлими әкс етдирир (Вәһј 21:2, 12, 21—27). Бу ҝөстәрир ки, јер үзүндәки идарәчилик системи Аллаһын Падшаһлығынын ҝөјдә вердији бүтүн гәрарлары дәгигликлә әкс етдирәҹәк вә бу гәрарлары мүкәммәл шәкилдә јеринә јетирәҹәк. Бәли, шәһәрин адынын «Јеһова орададыр» олмасы бизи әмин едир ки, пак ибадәт ҹәннәтдә һәмишә мөвҹуд олаҹаг вә әбәдијјән чичәкләнәҹәк. Бизи неҹә дә ҝөзәл ҝәләҹәк ҝөзләјир!