Охуҹуларын суаллары

Һәвари Павел ‘бүтүн Исраилин хилас олаҹағыны’ демишди (Ром. 11:26). О, бир заманлар бүтүн јәһудиләрин мәсиһчилији гәбул едәҹәјиними нәзәрдә тутурду?

Хејр, Павел буну нәзәрдә тутмурду. Ибраһимин нәсли, бир халг кими, Исанын Мәсиһ олдуғуну инкар етди. Исанын өлүмүндән сонракы илләрдә ајдын олду ки, јәһудиләр күтләви шәкилдә мәсиһчилији гәбул етмәјәҹәкләр. Бунунла белә, Павелин «бүтүн Исраил хилас олаҹагдыр» сөзләри һәгигәт иди. Һансы мәнада?

Иса өз ҝүнләриндә јашајан јәһуди дин рәһбәрләринә демишди: «Аллаһын Сәлтәнәти сиздән алыныб, онун мејвәләрини јетишдирәҹәк бир халга вериләҹәкдир» (Мат. 21:43). Исраил халгы үмумиликдә Исаны рәдд етдији үчүн, Јеһова диггәтини јени, руһани халга јөнәлдәҹәкди. Павел һәмин халгы «Аллаһын Исраили» адландырды (Галат. 6:16).

Јунанҹа Мүгәддәс Јазыларын диҝәр јерләриндә сүбут едилир ки, «Аллаһын Исраили» руһла мәсһ едилмиш 144 000 мәсиһчидән ибарәтдир (Ром. 8:15-17; Вәһј 7:4). Бу група гејри-јәһудиләрдән олан инсанларын да дахил олдуғуну Вәһј 5:9, 10 ајәләри тәсдиг едир. Орада мәсһ олунмуш мәсиһчиләрин «һәр гәбиләдән, дилдән, халгдан вә милләтдән» олдуғу ҝөстәрилир. Руһани Исраилин үзвләри хүсусилә дә «падшаһ вә каһин» олмаг үчүн сечилмишләр вә онлар ‘дүнја үзәриндә сәлтәнәт сүрәҹәкләр’. Јеһова Исраили сечилмиш бир халг кими рәдд етсә дә, онун ајры-ајры үзвләринин Аллаһла барышмаг имканы вар иди. Һәвариләр вә бир чох еркән мәсиһчиләр дә онларын сырасында иди. Анҹаг сөзсүз ки, бүтүн башга адамлар кими, бу јәһудиләр дә Иса Мәсиһин ганы илә сатын алынмалы идиләр (1 Тим. 2:5, 6; Ибр. 2:9; 1 Пет. 1:17-19).

Биринҹи әсрдә јәһудиләрин әксәријјәтинин Исанын һакимијјәт шәрикләри олмаг имканыны әлдән вермәси Аллаһын нијјәтинин гаршысына сәдд чәкмәди. Бу гејри-мүмкүндүр, чүнки Јеһова пејғәмбәри васитәсилә демишди: «Ағзымдан чыхан кәлмә дә беләдир: Бош јерә јаныма гајытмаз, анҹаг истәдијими јеринә јетирәр, ону ҝөндәрдијим иш иҹра олунсун дејә һәјата кечирәр» (Јешаја 55:11).

Бу, Аллаһын сәмада Оғлу илә бирликдә 144 000 нәфәрин сәлтәнәт сүрмәсинә даир мәгсәдинә ҝәлдикдә дә беләдир. Мүгәддәс Китаб ачыглајыр ки, Аллаһ 144 000 нәфәрин һамысыны мәсһ едәҹәк. Бир нәфәр дә олсун, әскик олмајаҹаг! (Вәһј 14:1-5).

Беләликлә, һәвари Павел «бүтүн Исраил хилас олаҹагдыр» дејәндә, јәһудиләрин күтләви шәкилдә мәсиһчилији гәбул едәҹәјини пејғәмбәрлик етмирди. Әксинә, о, Аллаһын сәмада Оғлу Иса Мәсиһлә бирликдә 144 000 нәфәр руһани исраиллинин һакимијјәт сүрмәсинә даир нијјәтинин јеринә јетәҹәјини нәзәрдә тутурду. Аллаһын тәјин етдији вахтда онларын һамысы, «бүтүн Исраил» хилас олараг, нәһајәт ки, Аллаһын Падшаһлығында падшаһ вә каһин кими сәлтәнәт сүрәҹәк (Ефес. 2:8).

[28-ҹи сәһифәдәки шәкилләр]

Мәсһ олунмушлар ‘һәр милләтдән, һәр гәбиләдән, һәр дилдән вә һәр халгдандырлар’