Јеһова Өз садиг бәндәләрини тәрк етмәјәҹәк

«Рәбб әдаләти севир, һеч заман мөминләри [«садиг бәндәләрини», ЈД] тәрк етмир. Салеһләр даим мүдафиә олунаҹаг» (МӘЗ. 37:28).

1, 2. а) Ерамыздан әввәл онунҹу әсрдә јаранан һансы вәзијјәт Аллаһын хидмәтчиләринин садиглијини сынаға чәкди? б) Јеһова Өз садиг бәндәләрини һансы үч вәзијјәтдә горуду?

ЕРАМЫЗДАН әввәл онунҹу әср. Һәлледиҹи ан ҝәлиб чатыб. Исраилин баш галдыран шимал гәбиләләринә мүстәгиллик верилмәси сајәсиндә вәтәндаш мүһарибәси тәһлүкәси ҝүҹ-бәла илә совушуб. Үзәрләринә тәзә тәјин едилмиш падшаһ Јаровам јени дөвләт дини јарадараг вахт итирмәдән өз һакимијјәтини мөһкәмләндирмәјә башлајыр. О өз тәбәәләриндән там сәдагәт тәләб едир. Бәс Јеһованын садиг хидмәтчиләри нә едәҹәкләр? Ибадәт етдикләри Аллаһа садиг галаҹаглармы? Минләрлә инсан белә дә давраныр вә нөгсансызлыгларыны горудуглары мүддәтдә Јеһованын ҝөзү онларын үстүндә олур (1 Пад. 12:1-33; 2 Салн. 11:13, 14).

² Аллаһын хидмәтчиләринин садиглији бизим ҝүнләрдә дә сынаныр. Мүгәддәс Китаб хәбәрдарлыг едир: «Ајыг дурун, сајыг олун. Чүнки дүшмәниниз олан шејтан, нәрә чәкән вә ашырмаг үчүн кимисә ахтаран аслан кими ҝәзир». Бәс биз ‘мөһкәм иманла она гаршы дурмаға’ мүвәффәг ола биләрикми? (1 Пет. 5:8, 9). Ҝәлин Јаровам падшаһын б. е. ә. 997-ҹи илдә тахта чыхдығы дөврдә ҹәрәјан едән бәзи һадисәләри вә онлардан һансы ибрәт дәрсләрини ҝөтүрә биләҹәјимизи нәзәрдән кечирәк. Һәмин ҝәрҝин дөврдә Јеһованын садиг хидмәтчиләри сыхышдырылырдылар. Онлар чәтин тапшырыгларыны јеринә јетирдикләри мүддәтдә дөнүкләрин тәсиринә дә мәруз галырдылар. Бу вәзијјәтләрин һеч бириндә Јеһова Өз садиг бәндәләрини тәрк етмәди, индики дөврдә дә етмәјәҹәк (Мәз. 37:28).

Сыхышдырыланда

3. Нә үчүн Давудун һөкмранлығы алтында халг налә чәкмирди?

³ Ҝәлин әввәлҹә Јаровамын һансы шәраитдә падшаһ олдуғуну нәзәрдән кечирәк. Сүлејманын мәсәлләри 29:2 ајәсиндә дејилир: «Пис һөкмдар оланда халг налә чәкәр». Гәдим Исраилин падшаһы Давудун һакимијјәти дөврүндә халг налә чәкмирди. Давуд камил дејилди, амма Аллаһа садиг иди вә Она ҝүвәнирди. О, әзазил һөкмдар да дејилди. Јеһова Давуда: «Сәнин нәслин вә падшаһлығын Мәним гаршымда әбәди әмин-аманлыгда олаҹаг, тахтын исә әбәди мөһкәм галаҹаг» дејәрәк, онунла әһд бағлады (2 Шам. 7:16).

4. Сүлејманын һакимијјәти дөврүндә верилән хејир-дуалар нәдән асылы иди?

⁴ Давудун оғлу Сүлејманын һакимијјәти алтында әввәлҹә елә фираванлыг вә әмин-аманлыг һөкм сүрүрдү ки, Мәсиһ Исанын ҝәләҹәк Миниллик Һөкмранлығынын нүмунәси олмушду (Мәз. 72:1, 17). О заман Исраилин 12 гәбиләсиндән һеч биринин үсјан галдырмаға сәбәби јох иди. Анҹаг Сүлејмана вә онун тәбәәләринә верилән хејир-дуалар шәрти иди. Јеһова Сүлејмана демишди: «Әҝәр сән Мәним гајдаларымла ҝетсән, һөкмләримә вә әмрләримә ујғун һәрәкәт етсән, онда Мән атан Давуда вердијим сөзү сәнин васитәнлә јеринә јетирәҹәјәм: Исраил өвладларынын арасында јашајаҹағам вә халгым Исраили тәрк етмәјәҹәјәм» (1 Пад. 6:11-13).

5, 6. Сүлејманын Јеһоваја сәдагәтсизлији нәјә ҝәтириб чыхарды?

⁵ Гоҹалыг чағында Сүлејман Јеһоваја сәдагәтиндән дөндү вә јалан ибадәтә гошулду (1 Пад. 11:4-6). О, тәдриҹән Јеһованын ганунларындан чыхыр вә ҝет-ҝедә залымлашырды. Ахырда о һәддә ҝәлиб чатды ки, өлүмүндән сонра халг онун оғлу вә хәләфи Рехавамын јанына шикајәтә ҝәлиб, вәзијјәти јүнҝүлләшдирмәји хаһиш етди (1 Пад. 12:4). Јеһова Сүлејманын сәдагәтсизлијинә неҹә мүнасибәт ҝөстәрди?

⁶ Мүгәддәс Китабда дејилир: «Рәбб Сүлејмана гәзәбләнди, чүнки онун үрәји Исраилин Аллаһы Рәбдән дөнмүшдү. Рәбб она ики дәфә ҝөрүнәрәк “башга аллаһлара хидмәт етмә” дејә бу барәдә әмр етди, о исә Рәббин әмринә әмәл етмәди». Јеһова Сүлејмана деди: «Сәнә әмр етдијим әһдимә вә гајдаларыма әмәл етмәдијин үчүн Мән һөкмән падшаһлығыны әлиндән чәкиб алаҹағам вә ону сәнин гулуна верәҹәјәм» (1 Пад. 11:9-11).

7. Јеһова Сүлејманы рәдд етсә дә, Өз садиг бәндәләринин гајғысына неҹә галды?

⁷ Јеһова сонра Ахија пејғәмбәри ҝөндәрди ки, халгы Сүлејманын зүлмүндән гуртараҹаг адамы мәсһ етсин. Һәмин адам Сүлејманын падшаһлығында чалышан баҹарыглы Јаровам иди. Јеһова Давудла бағладығы Падшаһлыг әһдинә садиг галса да, 12 гәбиләнин бөлүнмәсинә разылыг верди. Он гәбилә Јаровама вериләҹәкди, икиси исә һәмин вахт Рехавам падшаһын тәмсил етдији Давудун сүлаләсиндә галаҹагды (1 Пад. 11:29-37; 12:16, 17, 21). Јеһова Јаровама деди: «Әҝәр гулум Давуд кими Мәним ганунларыма вә әмрләримә әмәл едәрәк сәнә бујурдуғум һәр шејә гулаг ассан, Мәним јолумла ҝетсән вә Мәним ҝөзүмдә доғру олан ишләр ҝөрсән, онда Мән сәнинлә олаҹағам. Давуд үчүн гурдуғум кими сәнин үчүн дә мөһкәм бир сүлалә гураҹағам вә Исраили сәнә верәҹәјәм» (1 Пад. 11:38). Јеһова Өз халгы наминә һәрәкәт етди вә онлар үчүн зүлмдән гуртулуша јол ачды.

8. Аллаһын халгы мүасир дөврдә неҹә сыхышдырылыр?

⁸ Бу ҝүн зүлм вә һагсызлыг һәр јаны бүрүјүб. Ваиз 8:9 ајәсиндә дејилир: «Бир нәфәрин башга адама ағалыг етмәси башына бәла олур». Тиҹарәтдәки аҹҝөзлүк вә идарәчиликдәки рүшвәтхорлуг чәтин игтисади вәзијјәтин јаранмасына ҝәтириб чыхара биләр. Һөкумәтә, игтисадијјата вә динә рәһбәрлик едәнләр чох вахт әхлаги ҹәһәтдән пис нүмунә гојурлар. Буна ҝөрә дә, салеһ Лут кими, Аллаһын садиг бәндәләри бу ҝүн ‘позғун адамларын сәфаһәтә дүшкүн һәјат тәрзиндән әзијјәт чәкирләр’ (2 Пет. 2:7). Бундан әлавә, һеч кимә дәјиб-долашмадан Аллаһын нормалары илә јашамаға чалышмағымыза бахмајараг, чох вахт тәкәббүрлү рәһбәрләрин тәгиб һәдәфинә чеврилирик (2 Тим. 3:1-5, 12).

9. а) Јеһова халгыны хилас етмәк үчүн нә етмишдир? б) Исанын Аллаһа һәмишә садиг галаҹағына нәјә ҝөрә әмин ола биләрик?

⁹ Анҹаг бир дәјишмәз һәгигәтә әмин ола биләрик: Јеһова Өз садиг бәндәләрини тәрк етмәјәҹәк! Дүнјанын мәнәвијјатыны итирмиш рәһбәрләрини әвәз етмәк үчүн Јеһованын артыг атдығы аддымлар үзәриндә бир дүшүнүн. Мәсиһин идарә етдији Аллаһын Падшаһлығы артыг тәсис олунмушдур. Иса Мәсиһ јүз илә јахындыр ки, ҝөјдә идарә едир. Тезликлә о, Аллаһын адындан горхан инсанлара әсл гуртулуш ҝәтирәҹәк. (Вәһј 11:15-18 ајәләрини оху.) Иса, һәтта өлүм гаршысында да Аллаһа садиг олдуғуну артыг сүбут етмишдир. Сүлејмандан фәргли олараг, о өз тәбәәләринин үмидини һеч вахт боша чыхармајаҹаг (Ибр. 7:26; 1 Пет. 2:6).

10. а) Аллаһын Падшаһлығыны гијмәтләндирдијимизи неҹә ҝөстәрә биләрик? б) Сынаглара мәруз галаркән нәјә әмин ола биләрик?

¹⁰ Аллаһын Падшаһлығы бүтүн сыхынтылара сон гојаҹаг реал һөкумәтдир. Биз јалныз Јеһова Аллаһа вә Онун гурулушуна садигик. Падшаһлыға там архајын олараг, биз дүнјадакы аллаһсыз әмәлләри рәдд едир вә сәјлә јахшы ишләрә ҹан атырыг (Тит. 2:12-14). Биз бу дүнјадан ләкәсиз галмаға чалышырыг (2 Пет. 3:14). Инди һансы сынагла үзләшириксә үзләшәк әмин ола биләрик ки, Јеһова бизи руһани зәрәрдән горујаҹаг. (Мәзмур 97:10 ајәсини охуa.) Бундан савајы, Мәзмур 116:15 ајәси бизи әмин едир ки, «Рәббин ҝөзүндә һәр бир мөминин [«садиг бәндәләринин», ЈД] өлүмү чох баһадыр». Јеһованын хидмәтчиләри Она о гәдәр әзиздирләр ки, онларын бир груп шәклиндә мәһв олмаларына һеч вахт јол вермәјәҹәк.

Дөнүкләрин тәсиринә мәруз галанда

11. Неҹә олду ки, Јаровам сәдагәтсиз олду?

¹¹ Јаровам падшаһын һакимијјәти Аллаһын халгынын вәзијјәтини бир аз јүнҝүлләшдирә биләрди. Анҹаг онун һәрәкәтләри халгын Аллаһа садиглијини даһа да сынаға чәкди. Јаровам она верилән шәрәф вә имтијазлара гане олмајыб өз мөвгејини мөһкәмләндирмәк үчүн јоллар ахтармаға башлады. О, үрәјиндә фикирләширди: «Әҝәр бу халг Јерусәлимә, Рәббин мәбәдинә гурбан ҝәтирмәк үчүн ҝедәрсә, бу халгын үрәји ағаларына — Јәһуда падшаһы Рехавама тәрәф дөнәҹәк. Онлар мәни өлдүрүб Јәһуда падшаһы Рехавамын тәрәфинә кечәҹәкләр». Буна ҝөрә дә Јаровам ики гызыл данаја ибадәтдә мәркәзләшән јени дин тәсис етди. «О, даналардан бирини Бет-Елдә, о бирини исә Данда гојду. Бу иш ҝүнаһ олду. Халг онлардан биринә сәҹдә етмәк үчүн Дана гәдәр ҝедирди. Јаровам сәҹдәҝаһларда ибадәт евләри тикди вә халгын арасындан Левилиләрдән олмајан каһинләр тәјин етди». Јаровам һәтта өзүндән ‘Исраил өвладлары үчүн бајрам’ ҝүнү дә ујдурду вә «бухур јандырмаг үчүн... дүзәлтдији гурбанҝаһа галхды» (1 Пад. 12:26-33).

12. Јаровам Исраилдә данаја ибадәти тәсис едән заман Аллаһын шимал падшаһлығындакы садиг бәндәләри нә етдиләр?

¹² Бәс инди Аллаһын шимал падшаһлығындакы садиг бәндәләри нә едәҹәкдиләр? Шимал падшаһлығында онлара верилән шәһәрләрдә јашајан левилиләр, садиг әҹдадлары кими, вахт итирмәдән һәрәкәтә кечдиләр (Чых. 32:26-28; Сај. 35:6-8; Ганун. т. 33:8, 9). Онлар мирасларыны бурахыб, аиләләри илә бирликдә ҹәнуба, Јеһоваја манеәсиз ибадәт едә биләҹәкләри Јәһудаја көчдүләр (2 Салн. 11:13, 14). Јәһудада мүвәггәти јашајан диҝәр исраиллиләр евләринә дөнмәји јох, һәмишәлик орада галмағы сечдиләр (2 Салн. 10:17). Јеһова гајғы ҝөстәрди ки, һәгиги ибадәтә јол ачыг олсун вә сонракы нәсилләр дә шимал падшаһлығында данаја ибадәти тәрк едиб Јәһудаја гајыда билсинләр (2 Салн. 15:9-15).

13. Дөнүкләрин тәсири мүасир дөврдә Аллаһын халгыны неҹә сынаға чәкир?

¹³ Дөнүкләр вә онларын ҝөстәрдији тәсир бу ҝүн дә Аллаһын халгы үчүн тәһлүкә доғурур. Бәзи рәһбәрләр өзләринин дөвләт динини јаратмаға чалышыр вә тәбәәләрини ону гәбул етмәјә мәҹбур едирләр. Христиан дүнјасынын руһаниләри вә башга тәкәббүрлү шәхсләр руһани каһин тајфасы олдугларыны иддиа етмәјә чалышырлар. Анҹаг падшаһлыг едән ‘каһин тајфасыны’ тәшкил едән әсл мәсһ едилмишләр јалныз һәгиги мәсиһчиләрдән сечилир (1 Пет. 2:9; Вәһј 14:1-5).

14. Дөнүк фикирләрә мүнасибәтимиз неҹә олмалыдыр?

¹⁴ Ерамыздан әввәл онунҹу әсрдәки садиг левилиләр кими, бу ҝүн дә Аллаһа садиг инсанлар дөнүк фикирләрә алданмырлар. Мәсһ едилмишләр вә онларын мәсиһчи јолдашлары дәрһал дөнүк фикирләрдән гачыр вә онлары рәдд едирләр. (Ромалылара 16:17 ајәсини оху.) Дүнјәви мәсәләләрдә биз һаким даирәләрә һәвәслә табе олсаг да, дүнјадакы чәкишмәләрдә битәрәфлији горујур вә јалныз Аллаһын Падшаһлығына садиг галырыг (Јәһ. 18:36; Ром. 13:1-8). Биз Аллаһа хидмәт етдијини сөјләјән, ејни заманда давранышы илә Она ләкә ҝәтирәнләрин јалан иддиаларыны рәдд едирик (Тит. 1:16).

15. Нә үчүн «садиг вә ағыллы гул» она садиг галмағымыза лајигдир?

¹⁵ Һәмчинин Јеһованын сәмими гәлбли инсанларын пис дүнјадан чыхыб, мәҹази дилдә десәк, руһани ҹәннәтә кечмәсинә имкан јаратмасы үзәриндә дүшүнүн (2 Кор. 12:1-4). Миннәтдарлыгла долу үрәјимиз бизи ‘вахтлы-вахтында онлара јемәк вермәк үчүн, ағасынын өз нөкәрләры үзәринә гојдуғу садиг вә ағыллы гулла’ сых әмәкдашлыг етмәјә тәшвиг едир. Мәсиһ «бүтүн маликанәсинин идарәсини» бу гула тапшырыб (Мат. 24:45-47). Буна ҝөрә дә, биз шәхсән садиг гулун тутдуғу һансыса мөвгеји ахырадәк баша дүшмәјәндә, ону рәдд етмәјә вә ја Шејтанын дүнјасына гајытмаға һеч бир әсасымыз јохдур. Әксинә, сәдагәт бизи тәвазөкарлыгла давранмаға вә Јеһованын мәсәләләрә ајдынлыг ҝәтирәҹәјини ҝөзләмәјә тәшвиг едәҹәк.

Аллаһын тапшырыгларыны јеринә јетирәркән

16. Јәһудадан олан пејғәмбәрә һансы тапшырыг верилмишди?

¹⁶ Јеһова Јаровамы дөнүклүјүнә ҝөрә мүһакимә етди. О, Јәһудадан олан пејғәмбәрә шимала, Бет-Елә ҝедиб, гурбанҝаһда дини ајини иҹра едәркән Јаровама ҝөрүнмәји тапшырды. Пејғәмбәр Јаровама дәһшәтли һөкм хәбәрини чатдырмалы иди. Сөзсүз ки, бу, чәтин тапшырыг иди (1 Пад. 13:1-3).

17. Јеһова Өз елчисини неҹә горуду?

¹⁷ Јаровам Јеһованын һөкмүнү ешидәндә бәрк гәзәбләнди. О, әлини Аллаһын елчисинә узадыб, јанындакы адамлара «ону тутун», дејә гышгырды. Анҹаг о андаҹа, һәлә һеч ким аддым атмаға маҹал тапмамыш, «Аллаһ адамына гаршы узатдығы әли гуруду вә әлини өзүнә тәрәф дөндәрә билмәди... гурбанҝаһ бөлүндү вә күл гурбанҝаһдан төкүлдү». Јаровам мәҹбур олуб пејғәмбәрдән хаһиш етди ки, Јеһованы рәһмә ҝәтирсин вә гурумуш әлини өзүнә тәрәф дөндәрә билмәси үчүн Она дуа етсин. Пејғәмбәр Јеһоваја дуа етди вә онун әли сағалды. Бунунла да Јеһова Өз елчисини бәладан горуду (1 Пад. 13:4-6).

18. Мүгәддәс хидмәти горхмадан иҹра едәндә Јеһова бизи неҹә горујур?

¹⁸ Падшаһлығын тәблиғи вә шаҝирд һазырламаг ишиндә сәдагәтлә иштирак едәркән һәрдән сојуг вә һәтта гәрәзли мүнасибәтлә гаршылаша биләрик (Мат. 24:14; 28:19, 20). Анҹаг рәдд едилмәк горхусунун хидмәтдәки сәјимизи зәифләтмәсинә һеч вахт јол вермәмәлијик. Јаровамын ҝүнләриндәки ады чәкилмәјән пејғәмбәр кими, биз дә горхмадан сәдагәтлә Јеһованын һүзурунда ибадәт етмәк шәрәфинә лајиг ҝөрүлмүшүкb (Лука 1:74, 75). Дүздүр, биз бу ҝүн Јеһованын мөҹүзәли шәкилдә мүдахилә етмәсини ҝөзләмирик, анҹаг О, инди дә мүгәддәс руһу вә мәләкләри васитәсилә биз Шаһидләрини горујур вә мүдафиә едир. (Јәһја 14:15-17; Вәһј 14:6 ајәләрини оху.) Аллаһ Онун кәламыны горхмадан бәјан едәнләри һеч вахт тәрк етмәјәҹәк (Филип. 1:14, 28).

Јеһова Өз садиг бәндәләрини мүдафиә едәҹәк

19, 20. а) Јеһованын бизи һеч вахт тәрк етмәјәҹәјинә нә үчүн әмин ола биләрик? б) Нөвбәти мәгаләдә һансы суаллар мүзакирә едиләҹәк?

¹⁹ Јеһова бизим садиг Аллаһымыздыр (Мәз. 18:25). О, «һәр ишиндә садигдир» (Мәз. 145:17). Һәмчинин Мүгәддәс Китаб бизи әмин едир: «О... мөминләрин [«садиг бәндәләринин», ЈД] јолларыны һифз едир» (Сүл. мәс. 2:8). Сынагларла, дөнүк фикирләрлә үзләшәндә, јахуд чәтин тапшырыглары јеринә јетирәндә Аллаһын садиг бәндәләри Јеһованын рәһбәрлијинә вә көмәјинә архајын ола биләрләр.

²⁰ Инди һәр биримизин үзәриндә дүшүнмәли олдуғу бир шеј вар: гаршыма чыхан сынаглара вә ширникдириҹи тәсирләрә бахмајараг, Јеһоваја сәдагәтими горумаға мәнә нә көмәк едәр? Башга сөзлә, Аллаһа садиглијими неҹә мөһкәмләндирә биләрәм?

[Һашијәләр]

Неҹә ҹаваб верәрдиниз?

• Јеһова садиг бәндәләрини сыхынтылар заманы тәрк етмәдијини неҹә ҝөстәрмишдир?

• Дөнүкләрә вә онларын фикирләринә неҹә мүнасибәт ҝөстәрмәлијик?

• Јеһова мәсиһчи хидмәтини иҹра едән садиг бәндәләрини неҹә мүдафиә едир?

[5-ҹи сәһифәдәки хәритә/шәкил]

(Хәритәјә нәчрин өзүндә бахын)

ШИМАЛ ПАДШАҺЛЫҒЫ (Јаровам)

Дан

ШЕКЕМ

Бет-Ел

ҸӘНУБ ПАДШАҺЛЫҒЫ (Рехавам)

ЈЕРУСӘЛИМ

[Шәкил]

Јаровам данаја ибадәти тәсис едәндә Јеһова Өз садиг бәндәләрини тәрк етмәди

[3-ҹү сәһифәдәки шәкил]

Сүлејманын вә тәбәәләринин алдығы хејир-дуалар шәрти иди