Ушагларынызы өјрәдин

Јусифин гардашлары кими, сәндә дә һеч пахыллыг јараныбмы?

ҜӘЛ бир аз пахыллығын нә демәк олдуғу һаггында данышаг. Һеч елә олубму ки, башгаларынын киминсә һаггында јахшы, гәшәнҝ, јахуд ағыллы адам кими данышдығы үчүн ондан хошун ҝәлмәсин?a ~ Һә, бу, кимәсә пахыллыг етмәк демәкдир.

Валидејнләр ушағын бирини о бириндән үстүн тутанда аиләдә пахыллыг јарана биләр. Мүгәддәс Китабда пахыллығын бөјүк проблемә сәбәб олдуғу бир аилә һаггында данышылыр. Ҝәл бунун һансы фәлакәтә ҝәтириб чыхардығыны вә баш верәнләрдән нә өјрәнә биләҹәјимизи мүзакирә едәк.

Јусиф Јагубун 11-ҹи оғлу иди вә өҝеј гардашлары она пахыллыг едирдиләр. Билирсән нијә? ~ Чүнки аталары Јагуб Јусифи чох севирди. Мәсәлән, бир дәфә о, Јусифә ҝөзәл ала-бәзәк палтар тикдирмишди. Јусиф Јагубун «гоҹалыг чағынын оғлу» вә севимли арвады Рәһиләдән биринҹи ушағы олдуғундан, ону хүсусилә севирди.

Мүгәддәс Китабда дејилир: «Гардашлары ҝөрдүләр ки, аталары онлардан чох Јусифи севир. Буна ҝөрә дә она нифрәт етдиләр». Сонра бир дәфә Јусиф аиләсинә данышыр ки, јухуда һамынын, еләҹә дә атасынын она баш әјдијини ҝөрүб. Мүгәддәс Китабда дејилир ки, «гардашлары она пахыллыг етдиләр», һәтта атасы да данышдығы јухуја ҝөрә ону данлады (Јарадылыш 37:1-11).

Бир гәдәр сонра, Јусифин 17 јашы оланда гардашлары евдән чох километр узагда аталарынын гојун вә кечиләрини отарырдылар. Буна ҝөрә дә Јагуб Јусифи гардашларындан хәбәр билмәјә ҝөндәрир. Билирсән, гардашлары Јусифи ҝөрәндә нә етмәк истәдиләр? ~ Ону өлдүрмәк истәдиләр! Анҹаг икиси — Рувен вә Јәһуда онлара гошулмадылар.

Мисирә ҝедән таҹирләр орадан кечәндә Јәһуда деди: «Ҝәлин ону... сатаг». Онлар белә дә етдиләр. Бир кечи кәсиб Јусифин палтарыны онун ганына батырдылар. Һәмин палтары аталарына ҝөстәрәндә о фәрјад гопарды: «Јәгин ону вәһши бир һејван јејиб» (Јарадылыш 37:12-36).

Сонралар Јусиф Мисир падшаһы фиронун лүтфүнү газанды. Чүнки Јусиф Аллаһын көмәјилә фиронун ики јухусуну јозмушду. Биринҹи јуху једди көк инәк вә једди арыг инәк һаггында иди. Икинҹи јуху исә, једди долу сүнбүл вә једди солғун сүнбүл һагда иди. Јусиф изаһ етди ки, һәр ики јуху једди ил боллуг, ондан сонракы једди ил исә аҹлыг олаҹағыны билдирир. Фирон Јусифә једди боллуг или әрзиндә аҹлыг илләри үчүн азугә топламағы һәвалә етди.

Аҹлыг ҝәләндә Јусифин узагларда јашајан аиләсинин әрзаға еһтијаҹы олду. Јагуб Јусифин он бөјүк гардашыны Мисирә әрзаг далынҹа ҝөндәрди. Онлар Јусифин һүзуруна ҝәлдиләр, анҹаг ону танымадылар. Јусиф өзүнүн ким олдуғуну сөјләмәјиб, гардашларыны јохлады вә ҝөрдү ки, онлар онунла пис рәфтар етдикләринә ҝөрә чох пешман олублар. Сонра Јусиф ким олдуғуну онлара ачды. Гардашлар јенидән ҝөрүшдүкләринә ҝөрә неҹә дә хошбәхт идиләр! (Јарадылыш, 40-дан 45-ә кими фәсилләр).

Мүгәддәс Китабын бу һекајәсиндән пахыллыг һаггында нә өјрәндин? ~ Пахыллыг бөјүк фәлакәтә сәбәб ола биләр, һәтта адамда доғма гардашына белә, пислик етмәк истәји ојада биләр! Ҝәл Һәвариләрин ишләри 5:17, 18 вә 7:54-59 ајәләрини охујаг вә ҝөрәк пахыллыг уҹбатындан инсанлар Исаја вә шаҝирдләринә нә етмишдиләр. ~ Буну охујандан сонра баша дүшүрсән нәјә ҝөрә пахыллыгдан өзүмүзү горумалыјыг? ~

Јусиф 110 ил өмүр сүрдү. О, ушаглар бөјүтдү, нәвә-нәтиҹә саһиби олду. Әмин ола биләрик ки, Јусиф тез-тез онлара бир-бирини севмәји вә пахыллыг етмәмәји нәсиһәт едирди (Јарадылыш 50:22, 23, 26).

Суаллар:

○ Пахыллыг нә демәкдир?

○ Пахыллыг Јусифин гардашларыны нәјә тәһрик етди?

○ Јусиф гардашларыны нә үчүн бағышлады?

○ Бу һекајәдән нә өјрәнә биләрик?

[Һашијә]