Охуҹуларын суаллары
Иса Исраили долашыб тәблиғ етмишди. Бәс нәјә ҝөрә һәвари Петер јәһуди халгынын вә рәисләринин Исаны «билмәјәрәк» едам етдикләрини демишди? (Һәв. иш. 3:17).
Бир груп јәһудијә мүраҹиәт едәрәк һәвари Петер онларын Мәсиһин едам едилмәсиндә һансы ролу ојнадыглары барәдә демишди: «Билирәм ки, рәисләриниз кими сиз дә буну билмәјәрәк етдиниз» (Һәв. иш. 3:14-17). Ҝөрүнүр, бәзи јәһудиләр Исанын Мәсиһ олдуғуну вә онун тәлимләрини садәҹә анламырдылар. Диҝәрләринә ҝәлдикдә исә, онларын руһани наданлыгларынын сәбәби Аллаһы разы салмаг арзуларынын олмамасы, Иса һаггында габагҹадан јаранмыш мәнфи рәј, пахыллыг вә нифрәт иди.
Ҝәлин ҝөрәк, Јеһованы разы салмаг арзуларынын олмамасы чохларынын Исанын тәлимләринә олан мүнасибәтинә неҹә тәсир ҝөстәрмишди. Иса тәлим верәркән чох вахт мәсәлләрдән истифадә едир вә даһа чох билмәк истәјән һәр кәсә онлары изаһ едирди. Буна бахмајараг, онун динләјиҹиләриндән бәзиләри ону баша дүшмәк үчүн һеч бир сәј ҝөстәрмәдән садәҹә чыхыб ҝедирдиләр. Бир дәфә һәтта шаҝирдләрдән бәзиләри онун мәҹази сөзләриндән инҹидиләр (Јәһ. 6:52-66). Бу инсанлар нәзәрдән гачырырдылар ки, Исанын нүмунәләри онларын дүшүнҹә вә һәрәкәт тәрзләрини дәјишмәјә һазыр олуб-олмадыгларыны сынаға чәкир (Јешаја 6:9, 10; 44:18; Мат. 13:10-15). Онлар һәм дә Мәсиһин тәлим верәркән мәсәлләр сөјләјәҹәјинә даир пејғәмбәрлијә мәһәл гојмурдулар (Мәз. 78:2).
Башгаларынын Исанын тәлимләрини рәдд етмәләринин сәбәби онун һаггында габагҹадан јаранмыш мәнфи рәјдә олмалары иди. О, доғма шәһәри Назаретдәки синагогда өјрәдәркән ону ешидән инсанлар ‘һејрәтә ҝәлирдиләр’. Онларын: «Бу Адама бу шејләр һарадандыр? [...] Мәрјәмин оғлу, Јагуб, Јусиф, Јәһуда вә Шимонун гардашы дүлҝәр Бу дејилми? Баҹылары бурада арамызда дејилләрми?» кими суаллары һеч дә ону Мәсиһ кими гәбул етдикләрини ҝөстәрмирди (Марк 6:1-3). Иса хүсуси тәһсил алмадығы үчүн Назаретин сакинләри онун тәлимләринә гијмәт вермәдиләр.
Бәс дин рәһбәрләри һаггында нә демәк олар? Онларын әксәријјәти ејни сәбәбләрә ҝөрә Исаја әһәмијјәт вермирди (Јәһ. 7:47-52). Бундан әлавә, онлар инсанлардан даһа чох диггәт ҝөрән Исаја пахыллыг етдикләри үчүн онун тәлимләрини рәдд едирдиләр (Марк 15:10). Вә Иса икиүзлүлүкләрини вә јаланларыны үзә чыхаранда, шүбһәсиз, бир чох адлы-санлы адамлар буна пис реаксија ҝөстәрирдиләр (Мат. 23:13-36). Иса там һаглы олараг онларын биләрәкдән етинасызлыг ҝөстәрдикләрини ифша едирди: «Вај һалыныза, Ганун алимләри! Чүнки елм гапысынын ачарыны сиз ҝөтүрдүнүз; нә өзүнүз [Падшаһлыға] ҝирдиниз, нә дә ҝирмәк истәјәнләрә имкан вердиниз» (Лука 11:37-52).
Иса үч ил јарым әрзиндә хош хәбәри Исраилдә тәблиғ етмишди. О һәмчинин бу иши бир чохларына да өјрәтмишди (Лука 9:1, 2; 10:1, 16, 17). Исанын вә шаҝирдләринин уғур газандығыны ҝөрән фәрисејләр дејинирдиләр: «Дүнја Онун ардынҹа ҝетди» (Јәһ. 12:19). Әслиндә, демәк олмаз ки, јәһудиләрин әксәријјәтинин һеч нәдән хәбәри јох иди. Бунунла белә, онлар маһијјәт етибарилә Исанын Мәсиһ олдуғуну ‘билмирдиләр’. Онлар Мәсиһ һаггында даһа чох билик әлдә едә вә она гаршы мәһәббәтләрини мөһкәмләндирә биләрдиләр, анҹаг онлар буну етмәдиләр. Һәтта онлардан бәзиләри әлбир олуб ону өлдүрдүләр. Буна ҝөрә дә һәвари Петер онлардан чохуну тәшвиг едирди: «Беләликлә, ҝүнаһларынызын силинмәси үчүн төвбә един вә Аллаһа гајыдын ки, Рәббин һүзурундан динҹәлиш вахтлары ҝәлсин; вә сизин үчүн әввәлҹәдән тәјин олунан Иса Мәсиһи ҝөндәрсин» (Һәв. иш. 3:19, 20). Мараглыдыр ки, «каһинләрдән бир чоху» да дахил олмагла, минләрлә јәһудиләр Мәсиһ һаггында хош хәбәрә мараг ҝөстәрмәјә башладылар. Артыг онлар хәбәрсиз дејилдиләр. Әксинә, төвбә едиб Јеһованын лүтфүнү газандылар (Һәв. иш. 2:41; 4:4; 5:14; 6:7).