Јадыныздадырмы?
«Ҝөзәтчи Гүлләси»нин сон сајлары хошунуза ҝәлдими? Елә исә, ашағыдакы суаллара ҹаваб вермәјә чалышын:
• Һансы мәнада Аллаһ инсаны зәнҝин едә биләр?
Кечмишдә Јеһова бәзи хидмәтчиләринә, мәсәлән, Ибраһимә вә Сүлејмана вар-дөвләт вермишди. Амма мәсиһчинин ән чох еһтијаҹ дујдуғу вә Аллаһын она тапмаға көмәк едә биләҹәји ән әсас хәзинә иман, гәлб раһатлығы, мәмнунлуг вә хошбәхтликдир (окт.-дек., сәһифәләр 3-7).
• Петер дәниздә батаркән Исанын ону хилас етмәсиндән нә өјрәнә биләрик? (Мат. 14:28-31).
Гардашымызын иманынын чатышмадығыны ҝөрәндә јардым әлимизи узадыб иманыны мөһкәмләндирмәкдә она көмәк едә биләрик (15.9., сәһифә 8).
• Бизим гуртулушумуз Јеһоваја нәјин баһасына баша ҝәлиб?
Јеһова Оғлуна әзаб верилмәсинә вә ришхәнд едилмәсинә таб ҝәтирмәли олду. Ибраһим өз оғлуну гурбан ҝәтирмәјә һазыр иди, бу, Јеһованын Оғлунун бир ҹани кими едам едилмәсинә таб ҝәтирәҹәјини тәмсил едирди (15.9., сәһифәләр 28, 29).
• Сүлејманын мәсәлләри 24:27 ајәсиндә ‘ев тикмәјә’ даир һансы ибрәт дәрси вар?
Евләнмәк истәјән киши әввәлҹә һәмин мәсулијјәтләрә һазыр олмалыдыр. Бу о демәкдир ки, о, аиләнин мадди тәләбатларынын гајғысына галмаға вә руһани ишләрдә рәһбәрлији үзәринә ҝөтүрмәјә һазыр олмалыдыр (15.10., сәһифә 12).
• Мәсиһчи валидејнләр аиләви ибадәтләринин мүвәффәгијјәтли олмасы үчүн нә едә биләрләр?
Ушагларынызла бирликдә аиләви ибадәт кечирмәк үчүн дәгиг ҝүн вә вахт тәјин един вә она риајәт един. Бундан әлавә, һәр еһтимала гаршы аиләви ибадәт үчүн башга ҝүн дә сечин (15.10., сәһифә 29).
• Нәјә ҝөрә мәсиһчи ҝөрүшләриндә Мүгәддәс Китаба әсасланан чыхышлары жест дилинә тәрҹүмә едән баҹы башыны өртмәлидир?
Технолоҝијанын инкишафыны нәзәрә алсаг, нитг жест дилинә тәрҹүмә олунанда тәрҹүмәчинин ролу даһа габарыг олур. Чох вахт бөјүк екранда тәрҹүмәчи ҝөрүнүр, натиг исә аудиторијанын нәзәриндән кәнарда галыр. Бу амилләри нәзәрә аланда, баҹынын бир тәрҹүмәчи кими икинҹи рол ојнамасынын әламәти олараг башыны өртмәси мүнасибдир (15.11., сәһифә 12).
• Јеһова вә Иса әдәб-әрканлы олмагда неҹә нүмунә гојурлар?
Јүксәк мөвге тутмасына бахмајараг, Јеһова инсанларла нәзакәт вә һөрмәтлә давраныр. Орижинал мәтнә әсасән, Јеһова Ибраһимә вә Мусаја мүраҹиәт едәндә, адәтән, «зәһмәт олмаса» кими тәрҹүмә олунан ибрани сөзүндән истифадә едирди (Јар. 13:14; Чых. 4:6). Аллаһ һәм дә инсанлара гулаг асыр (Јар. 18:23-32). Иса да инсанлара көмәк етмәјә һазыр иди, һәтта онлара адлары илә мүраҹиәт едирди (15.11., сәһифә 25).