«Ушағын руһани ҹәһәтдән инкишаф етмәк һүгугу»
УШАГ Һүгуглары үзрә Исвечрә Академијасы 2008-ҹи ил декабрын 9-да «Ушағын руһани ҹәһәтдән инкишаф етмәк һүгугу» ады алтында гејри-ади семинар кечирди. Орада Исвеч килсәсинин, диҝәр Христиан динләринин, Ислам дининин, һуманизм һәрәкатынын, о ҹүмләдән башга мәзһәбләрин тәмсилчиләринин чыхышлары сәсләнди.
Натигләрин арасында бир кешиш дә варды. О, чыхышында белә деди: «Мүгәддәс Китаб һекајәләринин ушагларын руһанилијиндә ојнадығы ролун нә гәдәр мүһүм олдуғуну там тәсвир етмәк чәтиндир». Мүгәддәс Китабдакы һекајәләр ушагларын руһани тәләбатларыны неҹә өдәјир?
«Мүгәддәс Китаб ајәләри вә һекајәләри ушагларын үзәриндә дүшүнмәси үчүн чох ҝөзәл материалдыр»,— дејә кешиш гејд етди. О һәмчинин Мүгәддәс Китабын бир чох һекајәләрини — «Адәмлә Һәвва, Габиллә Һабил, Давудла Голјат, Исанын анадан олмасы, верҝијыған Закај һагда һекајәләри, гејб олмуш оғул вә хејирхаһ самаријалы кими мәсәлләри» садалады вә гејд етди ки, онлар «сатгынлыг, бағышламаг, кәффарә, нифрәт, мәнәви тәнәззүл, барышыг вә тәмәннасыз гардашлыг мәһәббәти кими саһәләрдә [ушағын] дүшүнҹә тәрзинин формалашмасында ҝөзәл рәһбәрликдир». О әлавә етди: «Нүмунә олан бу һекајәләр киминсә һәјатыны дәјишә, һәрәкәтә вә һәјат тәҹрүбәсинә чеврилә биләр».
Бәли, инсанлары Мүгәддәс Китабы охумаға тәшвиг етмәк тәгдирәлајигдир. Бәс, кешишин дедији кими, ушаглар Мүгәддәс Јазылардан охудуглары үзәриндә өзләри «дүшүнүб», дүзҝүн нәтиҹә чыхара биләрләрми?
Һәтта бөјүкләрә белә Мүгәддәс Китабда јазыланлары изаһ етмәк лазым ҝәлир. Мәсәлән, Мүгәддәс Китабда өзү «дүшүнәрәк» әсил руһанилијә јијәләнә билмәјән инсанын нүмунәси чәкилир. Бу, һәбәшистанлы мәмур олмушду. О, Јешајанын пејғәмбәрлијини охујур, амма мәғзини баша дүшә билмирди. Анҹаг о, пејғәмбәрин јаздыгларыны анламаг истәдији үчүн шаҝирд Филипин көмәјини мәмнунијјәтлә гәбул етди (Һәв. иш. 8:26—40). Мүгәддәс Јазыларын изаһ едилмәсинә еһтијаҹ дујан јалныз һәбәшистанлы мәмур дејилди. Һамымызын, хүсусилә дә ушагларын буна еһтијаҹы вар.
Мүгәддәс Китабда хәбәрдарлыг едилир: «Сәфеһлик ушағын гәлбиндән јапышар» (Сүл. мәс. 22:15). Ушаглар рәһбәрлијә вә нәсиһәтә еһтијаҹ дујурлар вә валидејнләр өвладларына Мүгәддәс Китаба вә мәсиһчи јығынҹағынын вердији тәлимләрә әсасланан мәнәви вә руһани өјүд-нәсиһәт вермәк мәсулијјәтини дашыјырлар. Ушаглар бу ҹүр тәлим-тәрбијә алмаг һүгугуна маликдирләр. ‘Һиссләри алышдырылараг, хејирлә шәри ајырд етмәләри’ үчүн, ‘камил’, јәни јеткин олмалары үчүн ушаглара лап көрпә јашларындан руһани инкишафларынын тәмәлини гојмаға көмәк етмәк лазымдыр (Ибр. 5:14).