Даим Падшаһлыг иши илә мәшғул олмушам

Нәгл етди Вернон Зубко

У ШАГЛЫҒЫМ Канаданын Саскачеван әјаләтинин Стенен кәндинин јахынлығында кечиб. Аиләдә беш ушаг идик: мән, бөјүк баҹым Ауреллија, Елвин, Аллегра вә Дарл. Валидејнләримиз Фред вә Аделла руһани вә мадди тәләбатларымызын гајғысына галмаг үчүн әлләриндән ҝәләни әсирҝәмирдиләр. Бизә һәгигәти ашыладыгларына ҝөрә бу ҝүнәдәк онлара үрәкдән миннәтдарыг!

Атамыз мәсһ олунмуш мәсиһчи иди вә хош хәбәри ҹәсарәтлә бәјан едирди. Еви доландырмаг үчүн о, чох ишләјирди. Буна бахмајараг, атам чалышырды ки, онун Јеһованын Шаһиди олдуғуну һамы билсин. О, һәмишә һәгигәт барәдә данышарды. Онун хидмәтдә ҝөстәрдији сәј вә ҹәсарәт һеч вахт јаддашымдан силинмәјәҹәк. Атам тез-тез мәнә дејәрди: «Даим Падшаһлыг иши илә мәшғул ол, онда бир чох проблемләрдән узаг олаҹагсан».

Биз тез-тез Стенен вә она јахын олан әразиләрдәки күчәләрдә тәблиғ едирдик. Мәним үчүн бу, һәмишә асан олмурду. Һәр шәһәрдә далашган ҝәнҹләрдән ибарәт дәстәләр олурду вә ушаглара јахынлашыб онлары әлә салырдылар. Бир дәфә, сәккиз јашым оланда әлимдә «Ҝөзәтчи Гүлләси» вә «Ојанын!» журналлары күчәнин тининдә дурмушдум вә бу заман бир груп ҝәнҹ мәни дөврәјә алды. Онлар тәзә папағымы башымдан ҝөтүрүб јанында дурдуғум шалбанын башына кечирдиләр. Хошбәхтликдән, бајагдан мәни мүшаһидә едән бир гардаш баш верәнләри ҝөрүрдү. Јашҹа мәндән бөјүк олан бу гардаш јахынлашыб сорушду: «Верн, һәр шеј гајдасындадыр?» Буну ешидән оғланлар бир ҝөз гырпымында јох олдулар. Баш верәнләрә ҝөрә бир аз мәјус олсам да, баша дүшдүм ки, күчәдә тәблиғ едәркән һејкәл кими бир јердә дурмаг лазым дејил. Ушаглыг илләриндә алдығым дәрсләр һәмчинин мәнә евдән-евә тәблиғ едәркән дә ҹәсарәт верди.

Елвинлә мән 1951-ҹи илин мајында вәфтиз олдуг. О вахт мәним 13 јашым вар иди. Ҹек Нејтан гардашын вәфтизлә бағлы сөјләдији нитг индијә кими јадымдадыр. О, бизи тәшвиг едирди ки, Јеһова барәдә данышмаға бир ај да олсун ара вермәјәкa. Аиләмиз һәмишә пионер хидмәтини ән јахшы һәјат јолу һесаб едирди. Елә буна ҝөрә дә 1958-ҹи илдә, мәктәби битирдикдән сонра пионер кими хидмәт етмәк үчүн Манитоба әјаләтинин Виннипег шәһәринә көчдүм. Атамла бирҝә харратлыгла мәшғул олдуғум үчүн о чох севинирди. Буна бахмајараг, о вә анам мәни ҹидд-ҹәһдлә таммүддәтли хидмәтә тәшвиг едирдиләр вә Виннипегә ҝетмәк гәрарымы дәстәкләдиләр.

Јени ев, јени әмәкдаш

1959-ҹу илдә филиал башга әразиләрә көчмәк имканы олан баҹы-гардашлары тәблиғчиләрә даһа чох еһтијаҹ олан Квебекә ҝетмәјә тәшвиг едирди. Мән пионер кими хидмәт етмәк үчүн Монреала јолландым. Һәјатым бир анда неҹә дә дәјишди! Франсыз дилини өјрәнмәјә вә башга мәдәнијјәтә ујғунлашмаға башлајанда һәјатымда јени сәһифә ачылды. Ҝүнләрин бир ҝүнү рајон нәзарәтчимиз мәнә деди: «Һеч вахт демә: “Биздә буну башга ҹүр едирләр”». Бу чох јахшы мәсләһәт олду (1 Кор. 9:22, 23).

Мән Квебекә көчәндә әмәкдашым јох иди. Лакин 1961-ҹи илин февралында Шерли Теркат адлы бир ҝәнҹ баҹы илә аилә гуран ҝүндән бәри о, мәним даими әмәкдашым олду. Биз онунла әввәлләр Виннипегдә таныш олмушдуг. О да Јеһованы севән бир аиләдә бөјүјүб. Шерлинин узун илләр әрзиндә мәним үчүн бөјүк тәсәлли вә ҝүҹ мәнбәји олаҹағыны о вахтлар мән һәлә там анламырдым.

Гаспејә тәблиғ сәјаһәти

Тојумуздан ики ил сонра бизи Квебек әјаләтинин Римуски шәһәринә хүсуси пионер тәјин етдиләр. Нөвбәти баһар филиал биздән Канаданын шәрг саһилиндә јерләшән Гаспе јарымадасына тәблиғ сәјаһәтинә чыхмағы хаһиш етди. Бизим ишимиз имкан дахилиндә даһа чох һәгигәт тохуму сәпмәк иди (Ваиз 11:6). Автомобилимизә 1 000-дән чох журнал вә 400-ә јахын китаб, еләҹә дә бир аз гида вә палтар јүкләјиб бирајлыг тәблиғ сәјаһәтинә јолландыг. Биз Гаспедәки балаҹа кәндләри бир-бир ҝәзәрәк һамысында тәблиғ етдик. Јерли радиостансија бизим ора ҝәләҹәјимизи елан етмишди вә әһалијә хәбәрдарлыг едилмишди ки, һеч кәс биздән әдәбијјат ҝөтүрмәсин. Лакин бир чох инсанлар еланы нәшрләримизин реклам едилмәси кими гәбул етдикләриндән ону јанлыш баша дүшдүләр вә биздән китаб-журнал ҝөтүрдүләр.

Һәмин илләрдә Квебекин бәзи јерләриндә ачыг-ашкар тәблиғ етмәк јени бир шеј олдуғундан бәзән баҹы-гардашларын полис тәрәфиндән сахланылмасы тәәҹҹүблү һал дејилди. Бир дәфә бизим дә башымыза белә һадисә ҝәлмишди. Бир шәһәрдә биз, демәк олар, бүтүн гапылары дөјәрәк әдәбијјат пајлајырдыг. Бу заман бир полис забити биздән онунла бөлмәјә ҝетмәји тәләб етди, биз дә ҝетдик. Сән демә, шәһәрин вәкили тәблиғ етмәјимизи гадаған едән бир гәрар чыхармышды. Полис рәиси јериндә олмадығы үчүн мән вәкилә Торонто филиалынын тәгдим етдији мәктубу узатдым. Сәнәдләрә әсасланан бу мәктубда тәблиғ етмәк һүгугумуз тәсдиг олунурду. Мәктубу охујар-охумаз о деди: «Бах а, мәнә проблем лазым дејил. Кешиш мәнә дејиб ки, сизә тәблиғ етмәји гадаған едим». Биз истәјирдик ки, јерли әһали фәалијјәтимизин гејри-гануни олмадығыны билсин. Буна ҝөрә дә полисин бизи сахладығы јерә гајыдыб тәблиғимизи давам етдирдик.

Сәһәриси ҝүн полис рәиси илә ҝөрүшмәјә ҝедәндә башымыза ҝәләнләри она данышдыг. О чох мәјус олду. Сиз онун телефонда вәкиллә неҹә данышдығыны бир ҝөрәјдиниз! Рәис деди ки, ишдир, бир проблем олса, она зәнҝ едә биләрик вә о, мәсәләни һәлл едәҹәк. Башга әјаләтдән ҝәлдијимизә вә франсыз дилини јахшы билмәдијимизә бахмајараг, јерли әһали хејирхаһ вә гонагпәрвәр иди. Анҹаг бизи бир суал марагландырырды: «Ҝөрәсән, онлар нә вахтса һәгигәти гәбул едәҹәкләр?» Бу суалымыза илләр сонра, Падшаһлыг Заллары тикмәк мәгсәдилә јенидән Гаспе јарымадасына ҝәләндә ҹаваб тапдыг. Әввәлләр тәблиғ етдијимиз инсанларын чоху инди бизим баҹы-гардашымыздыр. Доғрудан да, һәгигәт тохумларыны бөјүдән Јеһовадыр (1 Кор. 3:6, 7).

Јеһованын бизә вердији пај

1970-ҹи илдә гызымыз Лиза дүнјаја ҝәлди. Јеһованын вердији бу пај севинҹимизә севинҹ гатды. Јолдашым Шерли вә гызымыз мәнимлә бирҝә бир чох Падшаһлыг Залларынын тикинтисиндә иштирак етмишләр. Лиза мәктәби битирдикдән сонра бизә деди: «Һә, мәнә ҝөрә таммүддәтли хидмәти мүвәггәти олараг дајандырмалы олдуғунуз үчүн пионер олуб бунун әвәзини өдәјәҹәјәм». Артыг 20 илдән чохдур ки, о, пионер кими хидмәт едир. Лакин инди о, тәк јох, јолдашы Силванла хидмәт едир. Онлар бејнәлхалг тикинти лајиһәләриндә иштирак етмәк шәрәфинә лајиг ҝөрүлмүшләр. Бир аилә кими, мәгсәдимиз садә һәјат тәрзи сүрмәк вә Јеһоваја хидмәти һәјатымызда биринҹи јерә гојмагдыр. Лизанын пионер хидмәтинә башладығы вахт дедији сөзләр һәлә дә гулағымдан ҝетмир. Онун сөзләри мәни 2001-ҹи илдә јенидән пионер хидмәтинә башламаға тәшвиг етди вә мән индијә кими пионер кими хидмәт едирәм. Бу хидмәтин сајәсиндә һәр бир ишдә Јеһоваја ҝүвәнмәји өјрәнирәм вә садә, анҹаг хошбәхт вә мәналы һәјат сүрүрәм.

Тикинти лајиһәләри мәһәббәт вә сәдагәт тәләб едир

Јеһова мәнә өјрәтди ки, әҝәр хидмәти һәјатымда биринҹи јерә гојсам вә Онун һәр бир тапшырығыны ҹанла-башла јеринә јетирсәм, бол-бол хејир-дуалар бичәҹәјәм. Реҝионал тикинти комитәсиндә хидмәт етмәк вә Квебек әјаләтиндә, еләҹә дә диҝәр әразиләрдә тикинти ишләриндә баҹы-гардашларла бирҝә чијин-чијинә чалышмаг мәним үчүн бөјүк шәрәфдир.

Бәзи көнүллүләр бир о гәдәр дә баҹарыглы натиг олмасалар да, бурада, Падшаһлыг Залларынын тикинтисиндә улдузлар кими парлајырлар. Бизә әзиз олан бу гардашлар ишә үрәкләрини гојурлар вә бунун да сајәсиндә онларын баҹарыглары үзә чыхыр. Нәтиҹәдә, һәмишә Јеһоваја ибадәтдә истифадә олунан ҝөзәл бина әрсәјә ҝәлир.

Бәзән мәндән сорушурлар: «Падшаһлыг Залларынын тикинтисиндә көнүлләрә ән чох лазым олан хүсусијјәтләр һансылардыр?» Өз тәҹрүбәмдән дејә биләрәм ки, инсан, илк нөвбәдә, Јеһованы, Онун Оғлуну, еләҹә дә бүтүн гардашлығы севмәлидир (1 Кор. 16:14). Икинҹиси, бу ишдә сәдагәтли олмаг ҝәрәкдир. Ишләр бизим истәдијимиз мәҹрада ҝетмәјәндә белә (бу кими һаллар гачылмаздыр) садиг инсан теократијаја табе олмаға давам едәҹәк. Садиглик ону нөвбәти лајиһәләрдә иштирак етмәјә тәшвиг едәҹәк.

Јеһоваја миннәтдарам

Атам 1985-ҹи илдә вәфат етсә дә, онун даима Падшаһлыг иши илә мәшғул олмаг мәсләһәти зеһнимдә һәкк олунуб. Шүбһә јохдур ки, Јеһованын тәшкилатынын сәмави һиссәсиндә хидмәт едән башгалары кими, о да чох мәшғулдур (Вәһј 14:13). Анам исә сағдыр, онун 97 јашы вар. О, инсулт кечирдијиндән әввәлки кими јахшы даныша билмир. Бунунла белә, Мүгәддәс Китабы јахшы билир. Бизә јаздығы мәктубларда тез-тез Мүгәддәс Китабдан ситатлар ҝәтирәрәк бизи бундан сонра да Јеһоваја сәдагәтлә хидмәт етмәјә тәшвиг едир. Јеһоваја неҹә дә миннәтдарыг ки, бизи бу гәдәр севән валидејнләримиз вар!

Мәнә Шерли кими садиг дост вә һәјат јолдашы бәхш етдији үчүн дә Она миннәтдарам. О, бу ҝүн дә анасынын вердији мәсләһәтә риајәт едир: «Верн һәмишә Јеһованын иши илә мәшғул олаҹаг вә сән онун башгаларына вахт вә диггәт ајыраҹағына өјрәшмәли олаҹагсан». Биз 49 ил бундан әввәл аилә гуранда гәрара алдыг ки, та гоҹаланадәк Јеһоваја бирҝә хидмәт едәк. Һәмчинин сөз вердик ки, сағ галыб бу системин сонуну ҝөрсәк, ҝәнҹлик ҝүнләринә доғру бирҝә аддымлајаҹаг вә әбәдијјәт боју Јеһова Аллаһа хидмәт едәҹәјик. Бәли, биз «Рәббин ишиндә» чох чалышмышыг (1 Кор. 15:58). Јеһова исә, өз нөвбәсиндә, һәмишә бизим гајғымыза галыб вә биз һеч вахт һеч нәдән корлуг чәкмәмишик.

[Һашијә]

[31-ҹи сәһифәдәки шәкил]

«Бир аилә кими, мәгсәдимиз садә һәјат тәрзи сүрмәк вә Јеһоваја хидмәти һәјатымызда биринҹи јерә гојмагдыр»