Јеһованын сәнин үчүн етдикләри үзәриндә дүшүн
ИСАНЫН дирилмәсиндән бир нечә ҝүн кечмишди. Онун ики шаҝирди Јерусәлимдән Еммауса ҝедирди. «Луканын мүждәси»ндә јазылыб: «Шаҝирдләр араларында данышаркән Исанын өзү јахынлашыб онларла јанашы ҝетди. Амма онлар Исаны танымадылар». Иса онлардан сорушду: «“Нә барәдә данышырсыныз?” Шаҝирдләр дајандылар. Онлар чох гәмҝин идиләр». Бунун сәбәби нә иди? Шаҝирдләр үмид едирдиләр ки, Иса Исраил халгыны диҝәр милләтләрин әсарәтиндән азад едәҹәк, амма о едам едилди вә онларын бүтүн үмидләри пуча чыхды. Буна ҝөрә дә онлар гәмҝин идиләр (Лука 24:15—21; Һәв. иш. 1:6).
Иса шаҝирдләри илә мүлаһизә јүрүтмәјә башлады. О, «Мусадан вә бүтүн Пејғәмбәрләрдән башлајыб Мүгәддәс Јазыларда өзүнә аид олан шејләри бир-бир онлара изаһ етди». Һәгигәтән дә, Исанын јер үзүндә хидмәти заманы чохлу мүһүм вә һәр кәсин иманыны мөһкәмләндирә биләҹәк һадисәләр баш вермишди! Шаҝирдләр Исанын изаһатларына диггәтлә гулаг асырдылар вә онларын кәдәри севинҹлә әвәз олунду. Һәмин ахшам онлар дедиләр: «Мәҝәр о, јолда бизимлә данышанда, Мүгәддәс Јазылары бизә изаһ едәндә үрәјимиз алышыб јанмырды?» (Лука 24:27, 32). Биз Исанын шаҝирдләри илә баш верән бу дәјишикликдән нә өјрәнә биләрик?
Һәр шеј истәдијимиз кими олмајанда
Еммауса ҝедән ики шаҝирдин гәмҝин олмасына сәбәб арзуладыглары вә үмид етдикләри һадисәләрин баш вермәмәси иди. Онлар Сүлејманын мәсәлләри 13:12 ајәсиндә јазылан һиссләри кечирирдиләр: «Ҝеҹикән үмид үрәји хәстәләндирир». Јеһоваја узун илләр сәдагәтлә хидмәт едән бизләрдән бәзиләри дүшүнүрләр ки, ‘бөјүк мүсибәт’ артыг чохдан баш вермәли иди (Мат. 24:21; Вәһј 7:14). Ајдындыр ки, инсанын үмидләри пуча чыханда о мәјус ола биләр.
Иса бу ики шаҝирдин диггәтини артыг јеринә јетән пејғәмбәрликләрә јөнәлдәндә үрәкләри јенидән севинҹлә долду. Бу пејғәмбәрликләрин бәзиләри һәтта онларын јашадыглары дөвр әрзиндә јеринә јетмишди. Дахили севинҹимизи горумаг вә мәјуслуғун өһдәсиндән ҝәлмәк үчүн биз дә белә едә биләрик. Мајкл адында тәҹрүбәли ағсаггал дејир: «Фикринизи Јеһованын һәлә етмәдикләри ишләрә ҹәмләмәјин. Әксинә, Онун артыг етдији ишләр барәдә дүшүнүн». Јахшы мәсләһәтдир, елә дејилми?
Јеһова нәләр едиб?
Јеһованын һәјата кечирдији мөһтәшәм ишләриндән бәзиләринә нәзәр салаг. Иса демишди: «Мәнә иман едән адам мәним етдијим ишләри едәҹәк вә бунлардан да бөјүк ишләр едәҹәк» (Јәһ. 14:12). Аллаһын мүасир хидмәтчиләри бу вахтадәк ҝөрүлмәјән ишләри ҝөрүрләр. Једди милјондан чох адам бөјүк мүсибәтдән сағ чыхаҹағы вахты һәсрәтлә ҝөзләјир. Демәк олар ки, бәшәр тарихиндә дүнјанын бүтүн өлкә вә әразиләриндә мөһтәшәм ишләрини фәал шәкилдә бәјан едән Јеһованын бу гәдәр садиг хидмәтчиси һәлә олмајыб. Јеһованын Исанын давамчыларынын ондан да «бөјүк ишләр едәҹәк»ләри барәдә дедији пејғәмбәрлији ҝерчәклијә чевирмәси ҝөз габағындадыр.
Јеһова бизим үчүн даһа нәләр едиб? О, сәмими инсанларын пис вә гаранлыг дүнјадан чыхыб Өзүнүн әрсәјә ҝәтирдији руһани ҹәннәтә дахил ола билмәләри үчүн һәр ҹүр шәраит јарадыб (2 Кор. 12:1—4). Бизим јашадығымыз руһани ҹәннәт неҹә дә ҝөзәлдир! Шәхси вә ја Падшаһлыг Залындакы китабханаја бир нәзәр сал. «Ҝөзәтчи Гүлләси нәшрләринин индекси»ни вәрәглә. «Ҝөзәтчи Гүлләсинин китабханасы»на (CD) ҝөз ҝәздир. Мүгәддәс Китаб драмларынын јазысына гулаг ас. Сон конгресдә ешидиб ҝөрдүкләрини хәјалында ҹанландыр. Мәсиһчи баҹы-гардашларла олан сағлам үнсијјәт барәдә фикирләш. Бизи бол-бол руһани гида илә тәмин едән вә севән үмумдүнја гардашлығыны бәхш едән Јеһова Аллаһ неҹә дә сәхавәтлидир — бу, һәгигәтән дә, руһани ҹәннәтдир!
Мәзмурчу Давуд демишди: «Ја Рәбб Аллаһым, Сәнә бәнзәјән јохдур! Бизә аид харигәләрин, дүшүнҹәләрин чохдур» (Мәз. 40:5). Бәли, Јеһованын бизим үчүн етдији харигүладә ишләри вә бизә аид нијјәтләри барәдә дәриндән дүшүнсәк, сәмави Атамыз Јеһоваја сәдагәтлә вә сидги-үрәкдән хидмәт етмәк үчүн һәмишә ҝүҹ-гүввәтимиз олаҹагдыр (Мат. 24:13).
[31-ҹи сәһифәдәки шәкил]
Иса шаҝирдләринә өз дүшүнҹәләрини Јеһованын онлар үчүн етдији ишләрә јөнәлтмәјә көмәк етди
[32-ҹи сәһифәдәки шәкилләр]
Сон конгресдә ешитдикләрини вә ҝөрдүкләрини хәјалында ҹанландыр