«Мән һамынын диггәт мәркәзиндә идим»

Таммүддәтли тәблиғчи Шарлотта Уајтын әлиндә тәкәрли чамадан Кентукки штатынын (АБШ) Луисвилл шәһәринә ҝәлиши сакинләр арасында бөјүк әкс-сәда доғурмушду.

1908-ҸИ ИЛ ИДИ. Шәһәр сакинләринин диггәтини Шарлотта баҹыја ҹәлб едән, әлбәттә ки, «сәјјар шәфәг» адланан јени ихтира олмушду. Баҹы јазмышды: «Бүтүн шәһәр бу барәдә данышырды вә мән һамынын диггәт мәркәзиндә идим».

Әввәлләр Мүгәддәс Китаб Тәдгигатчылары ады илә танынан Јеһованын Шаһидләри дәрк етмишдиләр ки, Мүгәддәс Јазылары диггәтлә арашдырмалары сајәсиндә өјрәндикләри дәјәрли һәгигәтләри башгалары илә бөлүшмәк ваҹибдир. Чохлары бир нечә ҹилддә нәшр едилән, сонралар һәм дә «Мүгәддәс Јазыларын тәдгиги» адланан «Миниллијин шәфәги» китабы васитәсилә Мүгәддәс Китаб биликләринә јијәләнмишдиләр. Истәкләри илә имканлары үст-үстә дүшән о мәсиһчиләр шәһәрләри, кәндләри вә гәсәбәләри ҝәзиб-долашараг «Мүгәддәс Китаб Тәдгигатчыларынын көмәкчиләри» адланан бу китаблары һәгигәт үчүн сусајан охуҹулара тәклиф едирдиләр.

1908-ҹи илдә Шарлотта баҹы вә диҝәр фәал тәблиғчиләр үз габығы бүтөв парчадан дүзәлдилмиш 6 ҹилдли бу китабы 1,65 АБШ долларына тәклиф едирдиләр. Китаблары сакинләрә дәрһал вермәк әвәзинә, онлар сифариш јығыб, бир гәдәр сонра, адәтән, инсанларын мааш алдыглары ҝүндә гајыдырдылар вә бу китаблары јалныз онун чап хәрҹләрини өдәјән кичик бир мәбләғә тәклиф едирдиләр. Һәтта бир тәгибчи бу китаблара ҝөрә инсанларын аз пул ианә етмәли олдугларындан ҝилејләнирди!

Малинда Кифер адлы бир баҹы һәфтә әрзиндә 200-дән 300-дәк сифариш гәбул етдијини демишди. Лакин «Миниллијин шәфәги» китабына тәләбатын бөјүк олмасы бир чәтинлик јаратмышды. Алты ҹилддә олан бу китаб 740 сәһифәдән ибарәт иди! О вахтлар «Ҝөзәтчи гүлләси» журналында гејд едилирди ки, әлли китабын үмуми чәкиси 18 килограмдыр вә бу, онлары охуҹулара чатдырмаг мәсәләсини гәлизләшдирирди, хүсусилә дә баҹылар үчүн.

Бу мәсәләни һәлл етмәк үчүн гардашымыз Ҹејмс Коул шурупларын көмәји илә чамадана бәркидилән икитәкәрли гатланан ҝөвдә иҹад етмишди. Артыг китабларла долу ағыр чамаданлары дашымаға еһтијаҹ јох иди. Ихтирачы бу барәдә демишди: «Даһа голларым гырылмыр». О, бу јени аләти 1908-ҹи илдә Оһајо штатын Синсиннати шәһәриндә Мүгәддәс Китаб Тәдгигатчыларынын кечирдикләри конгресдә севинҹ ичиндә олан тамашачылара тәгдим етмишди. Дүјмәҹикләрдә «Сәјјар шәфәг» ифадәси һәкк олунмушду, чүнки бу чамаданларда, әсасән, «Миниллијин шәфәги» китаблары дашынылырды. Бир-ики дәфә истифадә етдикдән сонра тәблиғчи китабларла долу бу чамаданы бир әллә асанлыгла идарә етмәји өјрәнирди. Чамаданын һүндүрлүјү тәблиғчинин бојуна ҝөрә тәнзимләнирди вә ону кәлә-көтүрлү јолларда сүрмәк мүмкүн иди. Хидмәт ҝүнүнүн сонунда тәблиғчи пијада вә ја трамвајла евә ҝедәркән резин тәкәрләри чамаданын бөјрүнә гатлаја биләрди.

«Сәјјар шәфәг»ин гијмәти 2,50 АБШ доллары иди. Лакин таммүддәтли хидмәтдә олан баҹылар ону пулсуз әлдә едә биләрдиләр. Шәкилдә тәсвир олунан Малинда баҹы «сәјјар шәфәг»и о дәрәҹә мәһарәтлә идарә едирди ки, бир әли илә долу чамаданы сүрүрдү, диҝәр әлиндә исә чантада әлавә китаблар дашыјырды. Пенсилванија штатынын (АБШ) шахтачылар шәһәриндә хош хәбәрә һај верән инсанларын сајы чох олдуғундан о, чатдырылма ҝүнүндә, адәтән, үч-дөрд дәфә көрпүдән кечирди.

1980-ҹи илләрин сонларына јахын бир пилот бизим ҝүнләрдә һава лиманларында вә шәһәр күчәләриндә артыг ади һала чеврилмиш тәкәрли чамадан иҹад етмишди. Амма тәхминән јүз ил бундан әввәл Мүгәддәс Китаб Тәдгигатчылары «сәјјар шәфәг»ин көмәјилә дәјәрли һәгигәт тохумларыны сәпәндә һејран долу бахышлары илә онлара тамаша едән инсанларын диггәтини ҹәлб едирдиләр.

[32-ҹи сәһифәдәки јазы]

Малинда баҹы чатдырылма ҝүнүндә, адәтән, үч-дөрд дәфә көрпүдән кечирди

[32-ҹи сәһифәдәки јазы]

«Бу, “Шәфәг” китабынын чатдырылма проблемини һәлл етди»