Аһыл јашларында олан һикмәтли инсанлар мәни өзләринә ҹәлб едирди

Нәгл етди Елва Гжерди

Тәхминән 70 ил бундан әввәл аиләмизә баш чәкән бир нәфәрин атама етдији тәклиф һәјатымы тамамилә дәјишди. Һәјатымда дөнүш нөгтәси олан һәмин андан етибарән мәнә тәсир едән башга адамлар да олмушду. Бунун сајәсиндә инсан достларындан даһа ваҹиб олан бир Дост газандым. Сизә елә бу барәдә данышмаг истәјирәм.

МӘН 1932-ҹи ил Австралијанын Сиднеј шәһәриндә Аллаһа инанан, лакин килсәјә ҝетмәјән бир аиләдә дүнјаја ҝөз ачмышам. Анам мәни өјрәдирди ки, Аллаһ бизи даима мүшаһидә едир вә дәҹәллик етсәм, О, дәрһал мәни ҹәзаландыраҹаг. Буна ҝөрә дә Аллаһдан горхурдум. Бунунла белә, Мүгәддәс Китаб мәни һејрәтә ҝәтирирди. Халам һәфтәсонлары бизә баш чәкәндә мәнә чохлу мараглы Мүгәддәс Китаб һекајәләри данышырды. Онун ҝәлишини һәмишә сәбирсизликлә ҝөзләјирдим.

Мән јенијетмә оланда атам анамын Јеһованын Шаһиди олан бир јашлы гадындан әлдә етдији китаблары охујурду. Бу нәшрләрдән өјрәндији фикирләр она о дәрәҹәдә ҝүҹлү тәсир бағышламышды ки, Јеһованын Шаһидләринин онунла Мүгәддәс Китабы өјрәнмәләринә разылыг верди. Бир ахшам атамла Мүгәддәс Китаб өјрәнмәси кечириләндә мән хәлвәтҹә онлара гулаг асырдым. Буну ҝөрән атам мәни јатмаға ҝөндәрмәк истәјирди ки, она дәрс кечән гардаш деди: «Гој Елва да отуруб бизә гулаг ассын!» Бу тәклиф јени һәјатын вә һәгиги Аллаһ олан Јеһова илә достлуғумун башланғыҹы иди.

Бир мүддәтдән сонра атам вә мән јығынҹагларда иштирак етмәјә башладыг. Өјрәндикләри атамы һәјатында дәјишикликләр етмәјә тәшвиг етди. О һәтта әсәбләрини ҹиловламағы өјрәнди. Атамдакы дәјишикликләри ҝөрән анам вә бөјүк гардашым Френкa дә јығынҹаг ҝөрүшләринә ҝәлмәјә башладылар. Биз дөрдүмүз дә руһән инкишаф етдик вә тезликлә вәфтиз олундуг. О ҝүндән етибарән јашлы баҹы-гардашларла достлуг етмәјә башладым вә онлар һәјатымын мүхтәлиф мәрһәләләриндә мәнә көмәк едирдиләр.

СЕЧИМ ГАРШЫСЫНДА

Јенијетмә вахтларымда јығынҹағымыздакы јашлы баҹы-гардашларла сых үнсијјәт едирдим. Онлардан бири аиләмизә илк дәфә баш чәкән Алиса Плејс баҹы иди. О, мәнә нәнәм гәдәр әзиз иди. Алиса баҹы мәнә тәблиғ етмәји өјрәтмишди вә мәни вәфтиз олмаға тәшвиг етмишди. 15 јашым оланда мән вәфтиз олундум.

Мән һәмчинин јашлы ҹүтлүк олан Перси вә Маҹ [Маргарет] Дунһамла да јахын идим. Онларла үнсијјәт етмәк ҝәләҹәјимә бөјүк тәсир ҝөстәрди. Ријазијјаты чох севдијим үчүн ријазијјат мүәллими олмаг истәјирдим. Перси вә Маҹ 1930-ҹу илләрдә Латвијада миссионер кими хидмәт етмишдиләр. Авропада Икинҹи Дүнја мүһарибәси башлајанда онлар Австралијанын Сиднеј шәһәриндән кәнарда јерләшән Бет-Елдә хидмәт етмәјә дәвәт алдылар. Перси вә Маҹ мәнимлә марагланырдылар. Онлар миссионер хидмәтиндә башларына ҝәлән бир чох мараглы һадисәләри бөлүшүрдүләр. Артыг мәндә шүбһә галмады ки, инсанлара Мүгәддәс Китабы өјрәтмәк ријазијјаты тәдрис етмәкдән даһа мараглыдыр. Буна ҝөрә дә фикрими дәјишиб миссионер олмаг гәрарына ҝәлдим.

Перси вә Маҹ мәни тәшвиг етдиләр ки, миссионер хидмәтинә һазырлашмаг үчүн илк олараг пионер олум. Беләликлә, 1948-ҹи илдә 16 јашымда Һертсвиллдәки (Сиднеј) доғма јығынҹағымда пионер кими хидмәт едән он нәфәр ҝәнҹин сырасына гошулдум.

Нөвбәти дөрд ил әрзиндә мән Јени Ҹәнуби Уелс вә Квинсленд штатларында јерләшән дөрд шәһәрдә пионер кими хидмәт едирдим. Мүгәддәс Китабы өјрәтдијим илк инсанлардан бири ики јаш мәндән бөјүк олан Бетти Ло (һал-һазырда Ремнант) иди. Мән Сиднејдән 230 километр гәрбдә јерләшән Каура шәһәриндә хидмәт едәндә бу гајғыкеш баҹы пионер хидмәтиндә мәним әмәкдашым иди. Бирҝә хидмәтимиз чох чәкмәсә дә, индијәдәк биз достлуг едирик.

Хүсуси пионер тәјин олунанда Каурадан 220 километр ҹәнуб-гәрбдә јерләшән Наррандера шәһәринә көчдүм. Мәним јени әмәкдашым Ҹој Леннокс (һал-һазырда Һантер) олду. Пионер хидмәтинә ҹан јандыран бу баҹы да мәндән ики јаш бөјүк иди. Һәмин шәһәрдә биздән башга Јеһованын Шаһидләри јох иди. Ҹој вә мән гонагпәрвәр Реј вә Естер Ајренсләр аиләсиндә јашајырдыг. Бу әр-арвад, еләҹә дә онларын үч гызы вә бир оғлу һәгигәтә мараг ҝөстәрирдиләр. Һәфтәарасы ҝүнләрдә Реј оғлу илә бирҝә шәһәрдән кәнарда јерләшән гојун фермасында вә тахыл зәмисиндә ишләјирди. Естер вә гызлары исә кичик бир меһманхана ишләдирдиләр. Һәр базар ҝүнү Ҹој вә мән Ајренсләр аиләси, еләҹә дә онларын меһманханасында галан тәхминән он ики нәфәр аҹ дәмирјол ишчиләри үчүн чохлу јемәкләр биширирдик. Бунунла биз кирајә һаггымызын мүәјјән һиссәсини өдәјирдик. Масаны јығышдырандан сонра Ајренсләр аиләси үчүн ләззәтли руһани гидадан — «Ҝөзәтчи гүлләси»нин һәфтәлик арашдырылмасындан ибарәт «сүфрә ачырдыг». Реј, Естер вә онларын дөрд ушағы һәгигәти гәбул етдиләр вә Наррандера јығынҹағынын илк үзвләри олдулар.

1951-ҹи илдә Јеһованын Шаһидләринин Сиднејдә кечирдикләри конгресдә иштирак етдим. Конгрес заманы миссионер хидмәтинә мараг ҝөстәрән пионерләр үчүн тәшкил олунмуш хүсуси ҝөрүшә ҝетдим. Бөјүк бир чадырда кечирилән бу ҝөрүшә 300-дән чох адам ҝәлмишди. Бруклиндәки Бет-Елдән ҝәлән Нејтан Норр гардаш динләјиҹиләрә мүраҹиәт едәрәк хош хәбәри дүнјанын һәр бир ҝушәсинә чатдырмағын ваҹиблијини вурғулады. Онун ағзындан чыхан һәр бир кәлмәјә диггәтлә гулаг асырдыг. Һәмин ҝөрүшдә иштирак едән бир чох пионерләр сонрадан Сакит океанын ҹәнуб вә диҝәр бөлҝәләриндә Падшаһлыг ишинә тәкан вермишдиләр. Ҝилеад Мәктәбинин 1952-ҹи илдә кечирилән 19-ҹу синфинә дәвәт алан 17 австралијалы арасында олдуғум үчүн севинҹдән өзүмә јер тапа билмирдим. Миссионер олмаг арзум 20 јашымда һәјата кечди.

ДҮЗӘЛИШӘ ЕҺТИЈАҸЫМ ОЛАНДА

Ҝилеад Мәктәбиндә алдығым тәлим вә орадакы баҹы-гардашларла етдијим үнсијјәт нәинки Мүгәддәс Китаб биликләрими артырды вә иманымы мөһкәмләндирди, һәм дә бир шәхсијјәт кими формалашмағымда әвәзсиз рол ојнады. Ҝәнҹ вә максималист олдуғум үчүн өзүмдән, еләҹә дә башгаларындан камиллик ҝөзләмәјә мејилли идим. Бәзи саһәләрдә исә һәддән артыг тәләбкар идим. Мисал үчүн, Нејтан гардашын бир груп ҝәнҹ бет-елли илә бејсбол ојнадығыны ҝөрәндә шока дүшмүшдүм.

Дахилимдә ҝедән бу мүбаризә дәрракәли вә зәнҝин тәҹрүбәјә малик олан Ҝилеад Мәктәбинин тәлиматчыларынын нәзәриндән гачмады. Онлар мәнә мараг ҝөстәрдиләр вә дүшүнҹә тәрзими дәјишмәјә көмәк етдиләр. Тәдриҹән ҝөрдүм ки, Јеһова сәрт вә тәләбкар јох, мәһәббәтли вә баша дүшән Аллаһдыр. Синиф јолдашларымын бәзиләринин дә мәнә көмәји дәјди. Онлардан биринин сөзләри һәлә дә гулағымдадыр: «Елва, Јеһова гамчы илә башымызын үстүндә дурмур. Өзүнә гаршы бу дәрәҹәдә тәләбкар олма!» Бу баҹынын сәмими сөзләри гәлбимә јол тапды.

Ҝилеад Мәктәбини битирдикдән сонра мәни дөрд синиф јолдашымла бирҝә Намибијаја (Африка) тәјин етдиләр. Бир мүддәтдән сонра биз артыг 80 нәфәрлә Мүгәддәс Китаб өјрәнмәси кечирирдик. Намибија вә миссионер һәјаты мәним чох хошума ҝәлирди. Лакин Ҝилеад Мәктәбиндә охујаркән Исвечрәјә тәјинат алан синиф јолдашыма вурулмушдум. Намибијада бир ил хидмәт етдикдән сонра хидмәтими Исвечрәдә давам етдирдим. Биз онунла евләндик вә тојдан сонра әрими сәјјар хидмәтдә мүшаһидә етмәјә башладым.

ФӘЛАКӘТ

Сәјјар хидмәтдә беш севиндириҹи ил кечирдикдән сонра бизи Исвечрәдә јерләшән Бет-Елә дәвәт етдиләр. Бурадакы руһән јеткин јашлы баҹы-гардашларын әһатәсиндә олмаг мәнә зөвг верирди.

Бундан бир мүддәт сонра мән сарсыдыҹы хәбәр алдым, елә бил, башымдан гајнар су төкдүләр. Мәлум олду ки, әрим һәм мәнә, һәм дә Јеһоваја хәјанәт едиб. О, мәни атыб ҝетди. Гәм-кәдәрдән өзүмә јер тапа билмирдим. Бет-Елдәки јашлы достларымын дәстәји вә мәһәббәти олмасајды, билмирәм, нә едәрдим. Үрәјими бошалтмаг лазым ҝәләндә онлар мәни динләјирдиләр, тәк галмаг истәјәндә исә мәни баша дүшүрдүләр. Достларымын руһландырыҹы сөзләри вә хејирхаһ ишләри сөзлә ифадә едилә билмәјән о чәтин анларымда мәнә тәсәлли верди вә Јеһоваја даһа да јахынлашмаға көмәк етди.

Мән һәмчинин чәтинликләрлә гаршылашан мүдрик јашлы достларымын илләр өнҹә дедији сөзләри дә хатырлајырдым. Мәсәлән, Маҹ Дунһам бир дәфә мәнә демишди: «Елва, Јеһоваја хидмәт етдијин мүддәтдә һәјатында чохлу чәтинликләр олаҹаг, анҹаг ән чәтин сынаглар сәнә јахын олан инсанлардан ҝәлә биләр. Бу чәтинликләр заманы Јеһоваја сығын. Јадда сахла ки, сән гејри-камил инсанлара јох, Она хидмәт едирсән!» Маҹын мәсләһәти мәнә ән ағыр анларымда көмәк етди. Мән гәрара ҝәлдим ки, әримин сәһвинә ҝөрә Јеһовадан һеч вахт ајрылмајым.

Сонра мән аиләмә јахын бир јердә пионер кими хидмәт етмәк үчүн Австралијаја гајытмаг гәрарына ҝәлдим. Ҝәми илә евә ҝедәркән бир груп сәрнишинлә мүнтәзәм олараг Мүгәддәс Китаб барәдә мараглы сөһбәтләр едирдик. Онларын арасында Арне Гжерди адлы Норвечдән олан сакит тәбиәтли бир киши вар иди. Ешитдикләри онун хошуна ҝәлмишди. О, сонрадан мәнә вә аиләмә Сиднејдә баш чәкмишди. Арне тез бир заманда руһән инкишаф едиб вәфтиз олду. 1963-ҹү илдә Арне вә мән аилә гурдуг. Ики илдән сонра оғлумуз дүнјаја ҝәлди вә онун адыны Гери гојдуг.

НӨВБӘТИ СЫНАГ

Арне, Гери вә мән чох хошбәхт идик. Бир мүддәтдән сонра Арне евимизи ҝенишләндирди ки, јашлы валидејнләрим биздә јашасынлар. Лакин евлилијимизин алтынҹы илиндә биз бөјүк бир зәрбә алдыг: Арнејә бејин хәрчәнҝи диагнозу гојдулар. О, узун мүддәт әрзиндә шүа терапијасы алдығы заман мән һәр ҝүн хәстәханада она баш чәкирдим. Арне ҝет-ҝедә јахшылашырды, анҹаг сонра онун вәзијјәти писләшди вә о, инсулт кечиртди. Һәкимләр мәнә дедиләр ки, онун өмрүнүн сонуна бир һәфтә галыб. Лакин һәкимләрин дедикләри дүз чыхмады. Арне евә гајытды вә сағалана гәдәр мән онун гајғысына галдым. Бир мүддәтдән сонра о, јенидән јеримәјә башлады вә јығынҹагда ағсаггал кими хидмәтини бәрпа етди. Онун мүсбәт әһвал-руһијјәси вә јумор һисси сағалмасында бөјүк рол ојнады вә мәним онун гејдинә галмағымы асанлашдырды.

1986-ҹы илдә Арненин сәһһәти јенидән писләшди. Мәним валидејнләрим артыг вәфат етмишди вә биз достларымыза даһа јахын олмаг үчүн Сиднејдән кәнарда јерләшән Мави дағлар адланан мәнзәрәли әразијә көчдүк. Даһа сонра оғлумуз Гери Карен адында руһани ҹәһәтдән мөһкәм бир баҹы илә аилә һәјаты гурду вә онлар тәклиф етдиләр ки, бирликдә јашајаг. Бир нечә ај ичиндә һамымыз көһнә евимизин јахынлығында јерләшән евә көчдүк.

Өмрүнүн сон 18 ајы әрзиндә Арне јатаг хәстәси олду вә онун даими гуллуға еһтијаҹы варды. Демәк олар ки, евдән бајыра чыха билмирдим вә буна ҝөрә дә һәр ҝүн ики саат әрзиндә Мүгәддәс Китабы вә она әсасланан нәшрләри арашдырырдым. Арашдырмалар заманы мән өз вәзијјәтимә ујғун чохлу мүдрик мәсләһәтләр тапырдым. Һәмчинин буна бәнзәр сынаглара синә ҝәрән гајғыкеш јашлы баҹы-гардашлар бизә баш чәкирдиләр. Онларын башчәкмәләри мәни, һәгигәтән дә, руһландырырды! Арне 2003-ҹү илин апрел ајында вәфат етди вә о әмин иди ки, дириләҹәк.

МӘНИМ ӘН БӨЈҮК ДАЈАҒЫМ

Мән ҝәнҹ оланда максималист идим. Анҹаг баша дүшдүм ки, һәјат чох надир һалларда истәдијимиз кими олур. Мән чохлу хејир-дуалар алмышам. Лакин ејни заманда ики бөјүк фаҹиә илә дә үзләшмишәм: биринҹи һәјат јолдашым мәнә хәјанәт едиб, икинҹиси исә узун сүрән хәстәликдән сонра өлүб. Бу ҹүр ағыр анларымда мән мүхтәлиф јерләрдән рәһбәрлик вә тәсәлли алырдым. Индијәдәк мәним ән бөјүк дајағым «Әзәлдән Вар Олан» Јеһова Аллаһдыр (Дан. 7:9). Онун мәсләһәтләри мәни бир шәхсијјәт кими формалашдырды вә миссионер хидмәтимдә чохлу ҝөзәл анлар јашатды. Проблемләрлә үзләшәндә Јеһованын мәһәббәти мәнә дајаг олурду вә вердији тәсәлли мәни фәрәһләндирирди (Мәз. 94:18, 19). Аиләм вә әсил достларым дар ҝүнүмдә мәнә мәһәббәт ҝөстәрир вә дәстәк олурдулар (Сүл. мәс. 17:17). Онларын чоху мүдрик јашлы инсанлар иди.

Әјјуб демишди: «Ағсаггалларын һикмәти вар, узунөмүрлүләр дүнјаҝөрмүш олар» (Әјј. 12:12). Һәјатыма дөнүб баханда бу сөзләрдә бөјүк һәгигәт олдуғуну дејә биләрәм. Мүдрик јашлы баҹы-гардашларын мәсләһәтләринин мәнә чох көмәји дәјиб, онларын тәсәллиси мәнә дајаг олуб вә онларын достлуғу һәјатымы зәнҝинләшдириб. Достларыма үрәкдән миннәтдарам.

Инди мәним 80 јашым вар вә мән дә артыг гоҹалмышам. Газандығым һәјат тәҹрүбәси сајәсиндә јашлыларын тәләбатларына гаршы һәссас олмағы өјрәнмишәм. Мән һәлә дә онлара баш чәкмәкдән вә көмәк етмәкдән севинҹ дујурам. Анҹаг ҝәнҹләрин арасында олмаг да мәнә зөвг верир. Онларын енержиси вә руһ јүксәклији мәнә дә тәсир едир. Ҝәнҹләр мәндән мәсләһәт вә көмәк истәјәндә онлар үчүн әлимдән ҝәләни етмәјә һазырам.

[Һашијә]

[14–ҹү сәһифәдәки шәкил]

Ҹој Ленноксла бирҝә Наррандерада пионер кими хидмәт едәркән

[15–ҹи сәһифәдәки шәкил]

Исвечрәдәки Бет-Ел аиләсинин үзвләри илә, 1960-ҹы ил

[16–ҹы сәһифәдәки шәкил]

Арне хәстә оланда онун гајғысына галырдым